Igwa Kitang Dahelan na Magkurahaw sa Kagayagayahan
“Maaabot ninda an kaogmahan asin paggayagaya, asin madulag an kamondoan asin pagtangis.”—ISAIAS 35:10.
1. Sairisay ngonyan an igwang partikular na dahelan na maggayagaya?
POSIBLENG narisa nindo na kakadikit kan tawong igwa nin tunay na kagayagayahan ngonyan. Pero, bilang tunay na mga Kristiano, an Mga Saksi ni Jehova igwang kagayagayahan. Asin an paglaom na magkamit kan kaparehong kagayagayahan na iyan nasa atubangan mismo kan dagdag pang minilyon na dai pa bautisado, hoben asin gurang, na nakiaasosyar sa mga Saksi. An bagay na binabasa nindo ngonyan an mga tataramon na ini sa magasin na ini nagpaparisa na an kagayagayahan na ini yaon na sa saindo o madali na nindong kamtan.
2. Paano an kagayagayahan nin sarong Kristiano napapalaen sa pankagabsan na kamugtakan nin kadaklan na tawo?
2 Namamatean kan kadaklan na tawo na may kulang sa saindang buhay. Kumusta man kamo? Totoo, tibaad mayo kamo kan gabos na kasangkapan na magagamit nindo, siertong bakong gabos na yaon sa mayayaman asin makapangyarihan ngonyan. Asin tibaad gusto nindong madugangan pa an marahay na salud asin kabagsikan. Pero, puedeng sabihon na pag-abot sa kagayagayahan, kamo mas mayaman asin mas marahay an salud kisa sa kadaklan kan binilyon digdi sa daga. Taano man?
3. Anong makahulogan na mga tataramon an angay na tawan niato nin atension, asin taano?
3 Girumdoma an mga tataramon ni Jesus: “An mga bagay na ini itinaram ko sa saindo, tanganing an sakong kagayagayahan mapasaindo asin an saindong kagayagayahan malubos.” (Juan 15:11) “An saindong kagayagayahan malubos.” Pambihirang paglaladawan! An hararom na pagsiyasat sa Kristianong paagi nin pamumuhay magpapaheling nin dakol na dahelan kun taano ta lubos an satong kagayagayahan. Alagad ngonyan mismo, mangnoha an makahulogan na mga tataramon sa Isaias 35:10. Makahulogan ini huli ta may koneksion na gayo ini sa sato ngonyan. Satong mababasa: “An mismong mga binalukat ni Jehova mabalik asin sierto nanggad na maduman sa Sion na may magayagayang kurahaw; asin an paggayagaya sagkod sa panahon na daing katapusan mamumugtak sa saindang payo. Maaabot ninda an kaogmahan asin paggayagaya, asin madulag an kamondoan asin pagtangis.”
4. Anong klaseng kagayagayahan an nasasambitan sa Isaias 35:10, asin taano ta maninigo niato ining tawan nin atension?
4 “Paggayagaya sagkod sa panahon na daing katapusan.” An fraseng “sagkod sa panahon na daing katapusan” eksaktong traduksion kan isinurat ni Isaias sa Hebreo. Alagad, siring sa pinatutunayan kan iba pang teksto, an kahulogan kan bersikulong ini “sagkod lamang.” (Salmo 45:6; 90:2; Isaias 40:28) Kaya an paggayagaya magigin daing sagkod, sa mga kamugtakan na matogot nin—iyo, magtataong katanosan sa—daing katapusan na paggayagaya. Bako daw na makawiwiling madangog iyan? Minsan siring, tibaad an pagdangog nindo sa bersikulong iyan garo komento sa sarong situwasyon na teoretiko, na pinapag-iisip kamo: ‘Dai man ako aktuwal na apektado kaiyan na arog kan sakong pan-aroaldaw na mga problema asin kahaditan.’ Alagad an kabaliktaran an pinatototoohan kan mga katunayan. An makahulang panuga sa Isaias 35:10 igwang kahulogan para sa saindo ngonyan. Tanganing maaraman kun paano, siyasaton niato an magayon na kapitulong ini, Isaias 35, na rinirisa an kada kabtang sono sa konteksto. Laoman nindo na maoogma kamo sa satong maaaraman.
Banwaan na Nangaipong Maggayagaya
5. Sa anong makahulang kamugtakan manonompongan an hula sa Isaias kapitulo 35?
5 Bilang pantabang, helingon niato an kamugtakan sa likod kan pangyayari, an kasaysayan, kan interesanteng gayong hula na ini. Isinurat iyan kan Hebreong propeta na si Isaias kan mga 732 B.C.E. Idto mga dekada pa bago laglagon kan mga hukbo nin Babilonya an Jerusalem. Siring sa ipinaririsa kan Isaias 34:1, 2, ihinula nin Dios na babaloson nia an mga nasyon, arog baga kan Edom, na nasambitan sa Isaias 34:6. Malinaw na ginamit nia an suanoy na mga Babilonyo na iyo an gumibo kaiyan. Sa kaagid na paagi, an Juda ipinalaglag nin Dios sa mga Babilonyo huli ta bakong maimbod an mga Judio. An resulta? An banwaan nin Dios binihag, asin an saindang sadiring daga nagin gaba sa laog nin 70 taon.—2 Cronica 36:15-21.
6. Ano an kalaenan sa pag-oltanan kan mangyayari sa mga Edomita asin kan mangyayari sa mga Judio?
6 Minsan siring, may makahulogan na pagkakalaen an mga Edomita asin an mga Judio. An pagbalos nin Dios sa mga Edomita nungkang natapos; pag-abot nin panahon sinda nawara bilang banwaan. Iyo, puede pa nindong pasyaran an daing laog na mga kagabaan sa lugar na dating inistaran kan mga Edomita, arog baga kan bantog sa kinaban na mga kagabaan nin Petra. Alagad ngonyan, mayo nin nasyon o banwaan na puedeng apodon na ‘mga Edomita.’ Sa ibong na kampi, magigin daw sagkod lamang an paglaglag kan Babilonya sa Juda, na babayaan an daga na mayong kagayagayahan sa panahon na daing sagkod?
7. Ano an tibaad nagin reaksion sa Isaias kapitulo 35 kan mga Judiong bihag sa Babilonya?
7 Digdi an makangangalas na hula sa Isaias kapitulo 35 igwang nakaoogmang kahulogan. Iyan maaapod na hula sa pagbabalik, ta an enot na kaotoban kaiyan kaidtong bumalik an mga Judio sa saindang sadiring daga kan 537 B.C.E. An mga Israelita na bihag sa Babilonya tinawan nin katalingkasan na makabalik sa saindang sadiring daga. (Esdras 1:1-11) Pero, sagkod na nangyari idto an mga Judiong bihag sa Babilonya na naghorophorop sa hulang ini nin Dios tibaad nag-isip-isip kun anong klaseng mga kamugtakan an aabotan ninda pagpuli ninda sa sadiring daga kan saindang nasyon, an Juda. Asin ano daw an magigin kamugtakan ninda mismo? An simbag direktang may koneksion sa kun taano ta talagang igwa kita nin dahelan na magkurahaw sa kagayagayahan. Helingon niato.
8. Anong mga kamugtakan an aabotan kan mga Judio pagbalik hale sa Babilonya? (Ikomparar an Ezequiel 19:3-6; Oseas 13:8.)
8 An situwasyon garo nanggad daing malalaoman na marahay para sa mga Judio dawa kan madangog ninda na puede na sindang bumalik sa saindang sadiring daga. An saindang daga nagin gaba sa laog nin pitong dekada, sarong bilog na lawig nin buhay. Ano daw an nangyari sa daga? An ano man na kinultibar na mga oma, ubasan, o tanoman puedeng nagin nang kaawagan. An may patubig na mga tatamnan o sinokol nang daga puedeng nagin nang alang na daga o disyerto. (Isaias 24:1, 4; 33:9; Ezequiel 6:14) Isip-isipa man an layas na mga hayop na duminakolon na. Kabale digdi an mga nagkakakan nin karne, arog baga nin mga leon asin leopardo. (1 Hade 13:24-28; 2 Hade 17:25, 26; Awit ni Salomon 4:8) Dai man ninda puedeng lingawan an mga oso, na kayang gumadan nin lalaki, babae, o aki. (1 Samuel 17:34-37; 2 Hade 2:24; Talinhaga 17:12) Asin dai na niato kaipuhan na sambiton pa an mga rimoranon asin iba pang mararang halas, o an mga amamatak. (Genesis 49:17; Deuteronomio 32:33; Job 20:16; Salmo 58:4; 140:3; Lucas 10:19) Kun kaiba kamo kan mga Judio na pabalik hale sa Babilonya kan 537 B.C.E., posibleng mag-aalangan kamong maglakawlakaw sa siring na lugar. Idto bakong paraiso pag-abot ninda.
9. Huli sa anong dahelan na may basihan para sa paglaom asin kompiansa an nagbaralik?
9 Pero, si Jehova mismo an naggiya sa saiyang mga parasamba papuli, asin may kakayahan sia na baliktadon an sarong gabang kamugtakan. Dai daw nindo iyan tinutubod manongod sa Kaglalang? (Job 42:2; Jeremias 32:17, 21, 27, 37, 41) Kaya ano an gigibohon nia—ano an ginibo nia—para sa nagbaralik na Judio asin sa saindang daga? Paano ini nakaaapektar sa banwaan nin Dios sa modernong mga panahon asin sa saindong situwasyon—sa presente asin sa ngapit? Helingon nguna niato kun ano an nangyari kaidto.
Magayagaya sa Naliwat na Situwasyon
10. Anong pagkaliwat an ihinula kan Isaias 35:1, 2?
10 Ano an mangyayari kun togotan na ni Ciro an mga Judio na bumalik sa dagang idto na masakit an kamugtakan? Basaha nindo an nakaoogmang hula sa Isaias 35:1, 2: “An kaawagan asin an alang na lugar mag-oogma, asin an disyerto maggagayagaya patin mamumurak arog kan azafran. Daing duwa-duwa na iyan mamumurak, asin iyan nanggad magigin magayagaya na may kagayagayahan asin may maogmang kurahaw. An kamurawayan nin Libano mismo itatao dian, an kagayonan nin Carmelo asin nin Saron. Igwa nin mga makaheheling kan kamurawayan ni Jehova, kan kagayonan kan satong Dios.”
11. Anong kaaraman dapit sa daga an ginamit ni Isaias?
11 Kaidtong mga panahon kan Biblia, an Libano, Carmelo, asin Saron midbid na marhay sa berdeng kagayonan kaiyan. (1 Cronica 5:16; 27:29; 2 Cronica 26:10; Awit ni Salomon 2:1; 4:15; Oseas 14:5-7) Ginamit ni Isaias an mga halimbawang iyan tanganing iladawan kun ano an magigin kamugtakan kan nabagong daga, sa tabang nin Dios. Alagad ini daw magigin sanang epekto sa daga? Bako nanggad!
12. Taano ta masasabi niato na an hula sa Isaias kapitulo 35 nasesentro sa mga tawo?
12 An Isaias 35:2 nagtataram dapit sa daga na “magayagaya na may kagayagayahan asin may maogmang kurahaw.” Aram ta na an daga asin mga tinanom bako man na literal na “magayagaya na may kagayagayahan.” Pero, an pagbabago kaiyan na magin mataba asin mabunga puedeng magpangyari sa mga tawo na makamate nin siring. (Levitico 23:37-40; Deuteronomio 16:15; Salmo 126:5, 6; Isaias 16:10; Jeremias 25:30; 48:33) An literal na mga pagkaliwat sa daga mismo magigin katimbang kan mga pagkaliwat sa mga tawo, huli ta sa mga tawo nakasentro an hulang ini. Huli kaini, igwa kitang dahelan na saboton an mga tataramon ni Isaias bilang pangenot na nakasentro sa mga pagkaliwat sa nagbaralik na Judio, nangorogna sa saindang kagayagayahan.
13, 14. Anong pagkaliwat sa mga tawo an ihinula kan Isaias 35:3, 4?
13 Kaoyon kaiyan, siyasaton ta pa nin orog an nakapahihiro sa boot na hulang ini tanganing maheling kun paano iyan naotob pakatapos na an mga Judio makatalingkas asin makabalik hale sa Babilonya. Sa bersikulo 3 asin 4, si Isaias nagtataram manongod sa iba pang pagkaliwat sa nagbaralik na idto: “Pakosoga nindo an maluyang mga kamot, kamo banwaan, asin paposoga nindo an nagkokobogkobog na mga tuhod. Sabihi nindo an may naghahadit na puso: ‘Magpakakosog kamo. Dai kamo matakot. Uya! An saindong Dios maabot na may pamalos, an Dios na may bayad. Sia mismo maabot asin ililigtas kamo.’”
14 Bako daw na nakapakokosog na isipon na an satong Dios, na kayang baliktadon an gabang kamugtakan kan daga, interesadong gayo sa saiyang mga parasamba? Habo nia na an bihag na mga Judio manluya, madisganar, o maghadit dapit sa ngapit. (Hebreo 12:12) Isip-isipa an kamugtakan kan Judiong mga bihag na idto. Apuera kan paglaom na makukua ninda sa mga hula nin Dios manongod sa saindang ngapit, depisil para sa sainda na maglaom sa pinakamarahay. Garo sinda nasa madiklom na bilanggoan sa irarom nin daga, na dai makahiro asin dai puedeng magin aktibo sa paglilingkod ki Jehova. Tibaad para sa sainda garo nanggad mayo nang liwanag na maabot.—Ikomparar an Deuteronomio 28:29; Isaias 59:10.
15, 16. (a) Ano an ikakokonklusyon niato na ginibo ni Jehova para sa nagbaralik? (b) Taano an nagbaralik ta dai naglaom nin milagrosong mga pagpaomay sa pisikal, alagad ano an ginibo nin Dios kaoyon sa Isaias 35:5, 6?
15 Minsan siring, kanigoan an pagkaliwat kaiyan kan pabutasan sinda ni Jehova ki Ciro tanganing makapuruli na! Mayong ebidensia sa Biblia na duman milagrosong pinamuklat nin Dios an arin man na butang mata kan nagbaralik na Judio, binuksan an mga talinga nin siisay man na bongog, o pinaomayan an siisay man na kimay o putol. Minsan siring, talagang may ginibo siang orog pa kadakula. Ibinalik nia sinda sa liwanag asin katalingkasan kan saindang namomotan na daga.
16 Daing nagpaparisa na linaoman kan nagbaralik na gumibo si Jehova nin siring na milagrosong mga pagpaomay sa pisikal. Siertong naaraman ninda na dai iyan ginibo nin Dios ki Isaac, Samson, o Eli. (Genesis 27:1; Hokom 16:21, 26-30; 1 Samuel 3:2-8; 4:15) Alagad kun naglaom sinda na babaliktadon nin Dios an saindang kamugtakan sa piguratibong paagi, dai sinda nasudya. Totoo nanggad na sa piguratibong sentido, an bersikulo 5 asin 6 tunay na naotob. Si Isaias eksaktong naghula: “Sa panahon na iyan an mga mata kan mga buta magkakaburuklat, asin an mismong mga talinga kan mga bongog magkakaburukasan. Sa panahon na iyan an pilay matukad na garo lalaking usa, asin an dila kan pula makurahaw sa kaogmahan.”
Paggibo sa Daga na Siring sa Paraiso
17. Anong pisikal na mga pagkaliwat an malinaw na pinangyari ni Jehova?
17 An nagbaralik na idto tunay nanggad na may dahelan na magkurahaw sa kaogmahan huli sa mga kamugtakan na siring kan ilinadawan ni Isaias: “Huli ta an katubigan maburakbusak sa kaawagan, asin an kasalogan sa disyerto. Asin an alang na daga magigin siring sa danaw na may mga gaho, asin an pahang daga siring sa mga burabod nin tubig. Sa erokan nin mga layas na ayam, na pahingaloan ninda, magkakaigwa nin berdeng doot na may mga gaho asin papiro.” (Isaias 35:6b, 7) Minsan ngani tibaad dai na niato iyan maheling sa bilog na lugar na iyan ngonyan, an ebidensia nagpaparisa na an lugar na dating Juda “sarong paraisong probinsia.”a
18. Ano an posibleng nagin reaksion kan nagbaralik na Judio sa mga bendisyon nin Dios?
18 Kun dapit sa mga dahelan nin kagayagayahan, isip-isipa an siertong namatean kan natadang mga Judio kan sinda ikabalik sa Dagang Panuga! Yaon sainda an oportunidad na sadirihon an alang na daga, na iniistaran nin layas na mga ayam asin iba pang siring na mga hayop, asin bagohon iyan. Dai daw kamo makanonompong nin kagayagayahan sa paggibo nin siring na pagbabago, orog na kun aram nindo na binebendisyonan nin Dios an saindong mga paghihingoa?
19. Sa anong sentido na may kondisyon an pagbalik hale sa pagkabihag sa Babilonya?
19 Minsan siring, bakong gabos na bihag na Judio sa Babilonya puedeng bumalik o talagang nagbalik tanganing makikabtang sa magayagayang pagbabago na iyan. An Dios nagtao nin mga kondisyon. Mayong naolakitan nin Babiloniko, paganong relihiosong mga kaugalean an may diretsong bumalik. (Daniel 5:1, 4, 22, 23; Isaias 52:11) Dai man makababalik an siisay man na may kamangmangan na ilinabot an sadiri sa bakong madonong na dalan. Diskualipikado an gabos na siring na tawo. Sa ibong na kampi, idtong mga nakaabot sa mga pamantayan nin Dios, na saiyang minansay na banal sa relatibong sentido, puedeng bumalik sa Juda. Puede sindang magbaklay na garo nasa Dalan nin Kabanalan. Lininaw iyan ni Isaias sa bersikulo 8: “Magkakaigwa dian nin lansangan, nin sarong dalan; asin aapodon iyan na Dalan nin Kabanalan. Dai maagi dian an marigsok. Asin iyan magigin para sa naglalakaw sa dalan, asin mayo nin mga mangmang na maglalakawlakaw dian.”
20. Sa ano dai na kaipuhan na matakot an mga Judio sa saindang pagbalik, na nagbunga nin ano?
20 An nagbaralik na Judio dai kaipuhan na matakot sa ano man na pagsalakay nin mga tawong siring sa hayop o nin mga grupo nin tulisan. Taano? Huli ta an mga siring dai totogotan ni Jehova na makalaog sa Dalan kaiba kan saiyang tinubos na banwaan. Kaya puede sindang magbaklay na may magayagayang pagkapositibo, may maogmang mga paglaom. Mangnoha kun paano iyan ilinadawan ni Isaias sa pagtapos sa hulang ini: “Dai dian magkakaigwa nin leon, asin an naninibang mabangis na mga hayop dai matukad dian. Mayo nin manonompongan dian; asin an mga tinubos maglalakaw dian. Asin an mismong mga binalukat ni Jehova mabalik asin sierto nanggad na maduman sa Sion na may magayagayang kurahaw; asin an paggayagaya sagkod sa panahon na daing katapusan mamumugtak sa saindang payo. Maaabot ninda an kaogmahan asin paggayagaya, asin madulag an kamondoan asin pagtangis.”—Isaias 35:9, 10.
21. Paano niato maninigong mansayon ngonyan an nangyari nang kaotoban kan Isaias kapitulo 35?
21 Kanigoan karahay na makahulang paglaladawan an yaon sa sato digdi! Minsan siring, dai niato ini maninigong mansayon na may koneksion sa nakaagi sanang kasaysayan, na garo baga iyan sarong magayon na estorya na dai man nin koneksion sa satong situwasyon o sa satong ngapit. An katunayan iyo na an hulang ini makangangalas na naootob ngonyan sa tahaw kan banwaan nin Dios, kaya iyan tunay na may labot sa lambang saro sa sato. Nagtatao iyan sa sato nin tamang dahelan na magkurahaw sa kagayagayahan. An mga aspektong ini na kalabot an saindong buhay ngonyan asin sa ngapit ipinaliliwanag sa minasunod na artikulo.
[Nota sa Ibaba]
a Sa saiyang pagsiyasat sa lugar, an agronomong si Walter C. Lowdermilk (na nagrerepresentar sa Food and Agriculture Organization kan N.U.) nagkonklusyon: “An dagang ini dating sarong paraisong probinsia.” Sinabi man nia na an klima duman daing gayo nagliwat “poon kaidtong mga panahon kan mga Romano,” asin “an ‘disyerto’ na suminalida sa dati tubang na daga gibo nin tawo, bakong nin naturalesa.”
Nagigirumdoman daw Nindo?
◻ Kasuarin enot na naotob an Isaias kapitulo 35?
◻ Anong epekto an ibubunga kan enot na kaotoban kan hula?
◻ Paano inotob ni Jehova an Isaias 35:5, 6?
◻ Anong mga pagkaliwat sa daga asin sa saindang situwasyon an naeksperyensiahan kan nagbaralik na Judio?
[Retrato sa pahina 9]
Mga kagabaan nin Petra, sa lugar na dating erokan kan mga Edomita
[Pasasalamat para sa pinagkuanan]
Garo Nalbandian
[Mga retrato sa pahina 10]
Mantang nadidistiero an mga Judio, an kadaklan na parte kan Juda nagin siring sa kaawagan, na inerokan na nin mabangis na mga hayop arog nin mga oso asin leon
[Pasasalamat para sa pinagkuanan]
Garo Nalbandian
Oso Asin Leon: Safari-Zoo sa Ramat-Gan, Tel Aviv