Magtanaw nin Lihis sa mga Bagay na Saindong Naheheling!
AN MARAHAY na pagheling sa pisikal sarong bendisyon. Sa katunayan, an kadaklan na tawo masabi na dikit sana sa mga pagsasadiri ninda an mas mahalaga. Minsan siring, para sa mga Kristiano igwa nin sarong klase nin pagheling na nasambitan ni apostol Pablo na mas mahalaga kisa sa minsan marahay na pisikal na pagheling. “Kami nakatorohok, bakong sa mga bagay na naheheling, kundi sa mga bagay na dai naheheling,” an isinurat ni Pablo. (2 Corinto 4:18) Sierto na sarong espesyal na gayong pagheling an nagpapangyari sa saro na maheling an mga bagay na dai naheheling! Puede niato iyan na apodon na ekselenteng espirituwal na pagheling.
Taano ta Kaipuhan?
An mga Kristiano kan enot na siglo nangangaipo nanggad kan klaseng ini nin espirituwal na pagheling. Inootob ninda an saindang Kristianong ministeryo sa irarom nin grabeng kasakitan. Iyan ipinahayag ni Pablo sa paaging ini: “Kami nagigipit sa palibot, alagad dai man naiipit na dai na makahiro; kami nahahandal, alagad dai nahahalean nin paglaom; kami pinaglalamag, alagad dai pinababayaan; kami ilinalampog, alagad dai nalalaglag.”—2 Corinto 4:8, 9.
Sa ibong kan siring na mga sirkumstansia, an maimbod na mga disipulo marigon na nanindogan. Huli sa makosog na pagtubod sa Dios, sinda nakasabi na arog ni Pablo: “Dai kami minasuko, kundi minsan ngani an samong pagkatawo sa luwas nalalapa, an samong pagkatawo sa laog nababago aroaldaw.” Pero, ano an nagpangyari sa pagbagong ini sa aroaldaw? Si Pablo nagpadagos na magsabi: “Huli ta minsan ngani an kasakitan naagi sana asin magian, iyan nagbubunga para sa samo nin kamurawayan na paorog nang paorog an gabat asin daing katapusan; mantang kami nakatorohok, bakong sa mga bagay na naheheling, kundi sa mga bagay na dai naheheling. Huli ta an mga bagay na naheheling naagi sana, alagad an mga bagay na dai naheheling daing katapusan.”—2 Corinto 4:16-18.
Pinaririgon ni Pablo an boot kan saiyang espirituwal na mga tugang na dai togotan an mga problema, kasakitan, paglamag—ano man na klase nin kahorasaan—na palibogon an saindang pananaw sa mamuraway na balos na ibinugtak sa saindang atubangan. Maninigo sindang magtanaw nin lihis sa presente nindang mga kamugtakan, na itinotorohok an saindang mga mata sa maogmang resulta kan saindang pagigin Kristiano. Iyan an nakatabang sa sainda sa pagbago sa aroaldaw kan saindang pagkadesidido na magpadagos sa pakipaglaban. An mga Kristiano ngonyan nangangaipo man kan siring na marahay na espirituwal na pagheling.
Mansayon an Presenteng Kahorasaan na Naagi Sana!
Sa gusto niato o dai, aroaldaw niatong naheheling an mga bagay na dai niato gugustohon na maheling. Sarong salimbad sa salming asin maririparo tolos niato an depekto asin kanawayan kan pisikal na hawak, na nagpapaheling kan pisikal na pagkabakong sangkap. Kun kita minatorohok sa salming kan Tataramon nin Dios, naheheling niato an espirituwal na mga depekto asin kanawayan, kapwa sa satong sadiri asin sa iba. (Santiago 1:22-25) Asin kun hehelingon ta an pan-aroaldaw na peryodiko o an telebisyon, an mga bareta nin inhustisya, karingisan, asin trahedya tolos na dinadara sa satong atension asin nagpapamondo sa sato.
Si Satanas mawot na kita madisganar huli sa mga bagay na naheheling ta o malingling asin pumoon na magduwaduwa sa pagtubod. Paano ta ini malilikayan na mangyari? Kaipuhan niatong sunodon an itinaong halimbawa ni Jesu-Cristo, siring sa irinekomendar ni apostol Pedro kan sia magsabi: “Sa katotoohan, huli kaini kamo inapod, huli ta minsan si Cristo nagtios para sa saindo, na winalatan kamo nin padara tanganing sunodon nindo nin estrikto an saiyang mga lakad.” (1 Pedro 2:21) Sa lambang aspekto nin Kristianong pamumuhay, si Jesus an sangkap na halimbawa.
Sa pagtokdo ki Jesus bilang satong arogan, si Pedro partikularmenteng nagsambit na si Jesus nagtios. Tunay nanggad, si Jesus nagsakit na gayo kan nasa daga. Bilang “pangenot na trabahador” ni Jehova na presente kan lalangon an katawohan, aram niang marhay an katuyohan nin Dios na magin kamugtakan nin mga tawo. (Talinhaga 8:30, 31) Alagad ngonyan naheling nia mismo an ibinunga sa sainda nin kasalan asin pagkabakong sangkap. Aroaldaw niang naheling asin kaipuhan na atubangon an mga pagkabakong sangkap asin kaluyahan nin mga tawo. Iyan siertong nakabalo kan saiyang pasensia.—Mateo 9:36; Marcos 6:34.
Apuera sa mga kahorasaan nin iba, naeksperyensiahan man ni Jesus an sadiri niang mga kahorasaan. (Hebreo 5:7, 8) Alagad huli sa sangkap na espirituwal na pagheling, sia nagtanaw nin lihis dian tanganing maheling an balos na pagigin ilinangkaw sa inmortal na buhay huli sa saiyang integridad. Dangan bilang an Mesiyanikong Hade, sia magkakaigwa kan pribilehio na kaldahon an nasasakitan na katawohan hale sa hababang kamugtakan kaiyan pabalik sa pagkasangkap na orihinal na katuyohan ni Jehova. An pagtorohok nia sa dai naheheling na mga mangyayaring ini sa ngapit tuminabang sa saiya na mapagdanay an kagayagayahan sa diosnon na paglilingkod sa ibong kan mga kahorasaan na naheling nia sa aroaldaw. Isinurat ni Pablo kan huri: “Huli kan kagayagayahan na ibinugtak sa atubangan nia tinios nia an pasakitan na kahoy, hinamak an kasopganan, asin nagtukaw sa too kan trono nin Dios.”—Hebreo 12:2.
Nungkang tinogotan ni Jesus an mga kasakitan asin nakababalo sa pasensiang mga kamugtakan na magpangyari sa saiya na madisganar, malingling, o magduwaduwa sa saiyang pagtubod. Bilang mga disipulo nia, kaipuhan tang sunodon nin estrikto an saiyang ekselenteng padara.—Mateo 16:24.
Magkonsentrar sa Dai Naheheling na mga Bagay na Daing Katapusan!
Sa pagtaram manongod sa nagpangyari ki Jesus na makatagal, itinokdo man ni Pablo an dalan para sa sato kan sia sumurat: “Dumalagan kita na may pakatagal sa paorumbasan na nasa atubangan ta, mantang kita nagheheling nin maingat sa Pangenot na Ahente asin Parasangkap kan satong pagtubod, si Jesus.” (Hebreo 12:1, 2) Iyo, tanganing makadalagan sa Kristianong dalan na mapanggana asin magayagaya, kaipuhan ta na magtanaw nin lihis sa mga bagay na yaon mismo sa atubangan ta. Alagad paano daw kita “nagheheling nin maingat” ki Jesus, asin ano an gigibohon kaiyan para sa sato?
Bilang sarong halimbawa, kan 1914, si Jesus pinatukaw bilang Hade kan Kahadean nin Dios, asin sia namamahala hale sa langit. Siempre, ini gabos dai naheheling kan satong pisikal na mga mata. Pero, kun kita ‘maheling nin maingat’ ki Jesus, an satong espirituwal na pagheling tatabangan kita na maheling na sia andam nang humiro tanganing taposon an presenteng maraot na palakaw nin mga bagay asin ibilanggo si Satanas asin an saiyang mga demonyo sa mga gapos nin inaktibidad. Nagtatanaw nin mas harayo pa, an satong espirituwal na pagheling makamamansay sa makangangalas na bagong kinaban kun saen “an kagadanan mawawara na, dai na sagkod magkakaigwa nin pagmondo ni pagtangis ni kolog. An enot na mga bagay nakalihis na.”—Kapahayagan 19:11-16; 20:1-3; 21:4.
Kaya, kun siring, imbes na magabatan kan naagi sanang mga kahorasaan na tibaad inaatubang niato aroaldaw, taano ta dai ikonsentrar an satong pagtorohok sa mga bagay na daing sagkod? Paagi sa mga mata nin pagtubod, taano ta dai magtanaw nin lihis sa helang asin kapasloan sa maating dagang ini tanganing maheling an sarong paraiso na pano nin marahay an salud, maogma, asin mapagmakolog na mga tawo? Taano ta dai magtanaw nin lihis sa satong mga kanawayan, kapwa sa pisikal asin espirituwal, asin helingon an satong sadiri na nakatalingkas na sa mga iyan sagkod lamang paagi sa merito kan pantubos na atang ni Cristo? Taano ta dai magtanaw nin lihis sa mga ginaradan nin guerra, krimen, asin kadahasan asin helingon an mga bago pa sanang buhayon liwat na tinotokdoan kan katoninongan asin katanosan ni Jehova?
Dugang pa, kabale man sa ‘pagheling nin maingat’ ki Jesus an pagkonsentrar kan satong espirituwal na pagheling sa nagibo na kan Kahadean, dawa dai naheheling, sa tahaw kan banwaan nin Dios sa daga: pagkasararo, katoninongan, pagkamoot, kapadangatan sa tugang, asin espirituwal na prosperidad. An sarong Kristiana sa Alemania, pakatapos na madalan an United by Divine Teaching na video, nagsurat: “An video makatatabang sakuya na sa nag-oorog na paagi padanayon sa sakong isip na kadakol na Kristianong tugang na lalaki asin babae sa bilog na kinaban an sa mismong oras na ini maimbod na naglilingkod ki Jehova—asin ini sa ibong nin pagtumang kan publiko. Kanigoan kahalaga kan satong pagkasararo bilang magturugang sa kinaban nin kadahasan asin pagkaongis!”
“Naheheling” man daw nindo si Jehova, si Jesus, an maimbod na mga anghel, asin an minilyon na kapwa Kristiano na nagtitindog sa saindong kampi? Kun iyo, kamo dai mahahadit nin labi-labi sa “kahaditan kan palakaw na ini nin mga bagay” na puedeng makapapondo sa saindo huli sa pagkadisganar asin magresulta na kamo ‘dai magbunga’ sa Kristianong paglilingkod. (Mateo 13:22) Kaya ‘magheling nin maingat’ ki Jesus paagi sa pagkonsentrar kan saindong espirituwal na mga mata sa pinatindog nang Kahadean nin Dios asin sa mga bendisyon kaiyan, kapwa sa presente asin sa ngapit.
Magmaigot na Mabuhay Tanganing Maheling an Dai Naheheling!
Mantang naheheling an malinaw na kalaenan kan daing sagkod na bagong kinaban nin Dios asin kan nagagaba nang daan na kinaban ngonyan, kita maninigong mapahiro na gumawe sa paagi na kita ibibilang na angay na mabuhay tanganing literal na maheling an mga bagay na puede sana niatong maheling paagi sa mga mata nin pagtubod ngonyan. An kadakol na bubuhayon liwat masasakitan na maniwala sa saindang naheheling kun sinda bumangon na tanganing maheling an sarong matanos na paraisong daga na laen na gayo sa kinaban na naheling ninda bago sinda nagadan. Imahinara an satong kagayagayahan na kita buhay tanganing taratarahon sinda asin ipaliwanag sa sainda an ginibo nin Dios!—Ikomparar an Joel 2:21-27.
Iyo, kanigoan kahalaga nin marahay na espirituwal na pagheling, asin kanigoan kaimportante na papagdanayon iyan na matarom an pagmansay! Magigibo ta ini paagi sa regular na personal na pag-adal sa Biblia, pag-atender nin Kristianong mga pagtiripon, pagtaram sa iba manongod sa satong paglaom na basado sa Biblia, asin orog sa gabos, pamimibi para sa paggiya nin Dios. Papagdadanayon kaini na matarom an pagmansay asin malinaw an satong espirituwal na pagheling, na mapangyari sa sato na magtanaw nin lihis sa mga bagay na satong naheheling!