‘Igwa daw Ako nin Halaga sa Dios?’
“IGWA daw Ako nin Halaga? An Dios daw Nagmamakolog?” Siring an mababasang titulo nin sarong artikulo na nagluwas sa Christianity Today. “Kadaklan kan sakuyang panahon sa propesyon bilang parasurat nakasentro sa problema nin kolog,” an pahayag ni Philip Yancey, an autor kan artikulo. “Paorootro kong binabalikan an iyo man sanang mga hapot, na garo paghapiyap kan moro sa haloy nang lugad na nungkang naoomayan nin biyo. Sinusuratan ako kan mga parabasa sa sakuyang mga libro, asin an saindang mga estorya nin grabeng kakologan nagkokompirmar kan sakuyang mga pagduwaduwa.”
Tibaad napag-isip-isip na man nindo kun baga interesado an Dios sa saindong buhay. Iyo, tibaad pamilyar kamo sa Juan 3:16, na nagsasabi na “An Dios namoot na gayo sa kinaban na itinao nia an saiyang Aking bugtong.” O tibaad nabasa nindo an Mateo 20:28, na nagsasabi na si Jesus nagdigdi “tanganing . . . magtao kan saiyang kalag bilang pantubos na karibay nin dakol.” Pero tibaad maghapot kamo, ‘Ako daw naririparo nin Dios? Sia daw nagmamakolog sa sako bilang indibiduwal?’ Igwa nin marahay na rason na maniwala na sia nagmamakolog sa saindo, siring sa maheheling niato.