Si Felipe—Sarong Maigot na Ebanghelisador

SA Kasuratan dakol an pagkasaysay dapit sa mga lalaki asin babae na an pagtubod maninigo na arogon. Horophoropa si Felipe, sarong Kristianong misyonero kaidtong enot na siglo. Bako siang apostol, pero sia ginamit sa mapangyaring paagi sa pagpalakop kan mensahe kan Kahadean. Sa katunayan, si Felipe inapod na “ebanghelisador.” (Gibo 21:8) Taano ta iyan an apod ki Felipe? Asin ano an manonodan ta sa saiya?

Si Felipe maheheling sa rekord kan Biblia pakalihis tolos kan Pentecostes 33 C.E. Kan panahon na idto an mga Judiong Griego an tataramon nagpoon na maggurumodgumod tumang sa mga Judiong Hebreo an tataramon, na sinasabi na an saindang mga balo napapabayaan sa aroaldaw na pagwaras nin kakanon. Tanganing asikasohon an problema, an mga apostol nagnombrar nin “pitong lalaki na marahay an dangog.” Kabilang si Felipe sa mga pinili.—Gibo 6:1-6.

An pitong lalaki na ini “marahay an dangog.” An traduksion ni James Moffatt nagsasabi na sinda “may marahay na reputasyon.” Iyo, kan panahon na sinda nombrahan, sinda dati nang midbid bilang espirituwal na mga lalaki na may kakayahan na mag-isip sa praktikal na paagi. Kapareho iyan kan mga naglilingkod bilang Kristianong mga paraataman ngonyan. An siring na mga lalaki dai dali-daling ninonombrahan. (1 Timoteo 5:22) Sinda dapat na igwa nin “marahay na patotoo hale sa mga tawo sa luwas,” asin maninigong maaraman kan mga kapwa Kristiano na sinda rasonable asin marahay an kaisipan.—1 Timoteo 3:2, 3, 7; Filipos 4:5.

Minalataw na marahay an pag-asikaso ni Felipe sa saiyang asignasyon sa Jerusalem. Minsan siring, dai nahaloy biglang nagpoon an makuring paglamag asin an mga parasunod ni Cristo nagkawararak. Arog kan iba, si Felipe naghale sa siudad, alagad dai pa tapos an saiyang ministeryo. Dai nahaloy, sibot na sia sa paghuhulit sa sarong bagong teritoryo—an Samaria.—Gibo 8:1-5.

Pagbukas nin Bagong mga Teritoryo

Ihinula ni Jesus na an saiyang mga disipulo maghuhulit “kapwa sa Jerusalem asin sa bilog na Judea asin Samaria patin sagkod sa kaporoporohi kan daga.” (Gibo 1:8) Paagi sa paghuhulit sa Samaria, si Felipe nakikabtang sa pagkaotob kan mga tataramon na iyan. Sa pankagabsan an mga Judio mayo nin paggalang sa mga Samaritano. Alagad dai patienot na hinusgaran ni Felipe an mga tawong ini, asin binendisyonan an saiyang dai pagpaorog. Tunay nanggad, dakol na Samaritano an nagpabautismo, kabale an sarong dating madyikero na an ngaran Simon.—Gibo 8:6-13.

Pag-abot nin panahon, si Felipe pinagbotan kan anghel ni Jehova na magduman sa tinampo sa desierto na hale sa Jerusalem pa-Gaza. Duman natanaw ni Felipe an sarong karuwahe na may lunad na sarong opisyal na Etiope na nagbabasa nin makosog kan hula ni Isaias. Si Felipe nagdalagan na kaabay kan karuwahe asin pinonan an pakipag-olay. Minsan ngani an Etiope sarong proselito na may aram man manongod sa Dios asin sa Kasuratan, mapakumbaba niang inadmitir na kaipuhan nia an tabang tanganing masabotan an saiyang binabasa. Huli kaini, inagda nia si Felipe na sumakay sa karuwahe asin tumukaw kataed nia. Pakatapos na makapagpatotoo, sinda nakaabot sa sarong lugar na may tubig. “Ano an nakaoolang sako na mabautismohan?” an hapot kan Etiope. Tolos-tolos na binautismohan sia ni Felipe, asin an Etiope nagdagos na naggagayagaya. Posible na pinalakop kan bagong disipulo na ini an maogmang bareta duman sa saiyang sadiring lugar.—Gibo 8:26-39.

Ano an manonodan ta sa ministeryo ni Felipe may labot sa mga Samaritano asin opisyal na Etiope? Dai niato noarin man maninigong ipamugtak na an mga tawong iba an nasyonalidad, rasa, o kamugtakan sa sosyedad dai magigin interesado sa maogmang bareta. Imbes, maninigo na ipahayag niato an mensahe kan Kahadean sa “gabos na klase nin tawo.” (1 Corinto 9:19-23) Kun ipepresentar ta an satong sadiri paagi sa paghuhulit sa gabos, puede kitang gamiton ni Jehova sa ‘paggibo nin mga disipulo sa mga tawo kan gabos na nasyon’ bago dumatong an katapusan kan maraot na palakaw na ini.—Mateo 28:19, 20.

Dugang Pang mga Pribilehio ni Felipe

Pakapaghulit sa opisyal na Etiope, si Felipe nagpatotoo sa Asdod, “asin linibot nia an teritoryo asin padagos na nagpahayag kan maogmang bareta sa gabos na siudad sagkod na makaabot sia sa Cesarea.” (Gibo 8:40) Kan enot na siglo, dakol-dakol an Hentil na populasyon sa duwang siudad na ini. Kan sia pasiring sa amihanan pa-Cesarea, si Felipe posibleng naghulit sa prominenteng mga sentro kan mga Judio, arog kan Lida asin Jope. Tibaad iyan an dahelan na kan huri may manonompongan na mga disipulo sa mga lugar na ini.—Gibo 9:32-43.

An ultimong pagkasambit ki Felipe maheheling pakalihis nin mga 20 taon. Sa katapusan kan saiyang ikatolong biahe sa pagmimisyonero, si Pablo nagduong sa Ptolemais. “Kan sumunod na aldaw,” sabi kan kaibaiba ni Pablo sa pagbiahe na si Lucas, “kami naghale asin nag-abot sa Cesarea, asin duminagos kami sa harong ni Felipe na ebanghelisador.” Kan panahon na ini, si Felipe igwa na nin “apat na aking babae, mga daraga, na naghuhurula.”—Gibo 21:8, 9.

Minalataw na si Felipe nag-erok na sa Cesarea. Alagad dai nawara sa saiya an saiyang espiritu nin pagmimisyonero, huli ta inapod sia ni Lucas na “ebanghelisador.” An pananaram na ini parateng nangangahulogan nin saro na minahale sa saiyang harong tanganing ihulit an maogmang bareta sa mga rehion na dai pa nahuhulitan. An bagay na si Felipe may apat na aking babae na naghuhurula nagsusuherir na sinundan ninda an mga gira kan saindang maigot na ama.

Maninigong girumdomon nin Kristianong mga magurang sa presenteng aldaw na an saindang mga aki iyo an saindang pinakamahalagang mga disipulo. Dawa kun kinaipuhan kan siring na mga magurang na butasan an nagkapirang teokratikong mga pribilehio huli sa pampamilyang mga paninimbagan, arog ki Felipe puede sindang magdanay na bilog na pusong mga lingkod nin Dios asin arogan na mga magurang.—Efeso 6:4.

An pagsongko ni Pablo asin kan saiyang kairiba nagtao sa pamilya ni Felipe nin marahay na oportunidad na ipaheling an pagkamapag-istimar. Imahinara an pagrinibayan nin pagparigon sa boot! Tibaad sa okasyon na ini kinua ni Lucas an mga detalye manongod sa mga aktibidad ni Felipe, na kan huri iiniba sa Gibo kapitulo 6 asin 8.

Ginamit ni Jehova Dios si Felipe sa mahiwas na paagi sa pagpaoswag kan intereses pan-Kahadean. An kaigotan ni Felipe nagpangyari sa saiya na ikapalakop an maogmang bareta sa bagong mga teritoryo asin mapaoswag an marahay na espirituwal na kamugtakan sa saiyang harong. Gusto daw nindong kamtan an kaparehong mga pribilehio asin bendisyon? Kun siring marahay na arogon nindo an mga kualidad na ipinaheling ni Felipe na ebanghelisador.