Ginibo Ninda an Kabotan ni Jehova

Binautismohan ni Felipe an Sarong Opisyal na Etiope

MANTANG lunad sa saiyang karuwahe, madonong na ginagamit nin sarong Etiope an saiyang panahon. Nagbabasa sia nin makosog​—sarong usong ugale nin mga nagbibiahe kan enot na siglo. An partikular na lalaking ini sarong opisyal na “nasa kapangyarihan na sakop ni Candace na reyna kan mga taga-Etiopia.”a Sia an “nagkakapot kan gabos niang kayamanan”​—na garo man sana sia an ministro kan kayamanan kan gobyerno. An opisyal na ini nagbabasa sa Tataramon nin Dios tanganing kumua nin kaaraman.​—Gibo 8:​27, 28.

Nasa harani an paraebanghelyong si Felipe. An sarong anghel giniyahan sia pasiring sa lugar na ini, asin ngonyan sinabihan sia: “Rumani ka asin umiba ka sa karuwaheng ini.” (Gibo 8:​26, 29) Maiimahinar niato si Felipe na hinahapot an sadiri, ‘Siisay an lalaking ini? Ano an binabasa nia? Taano ta giniyahan ako pasiring sa saiya?’

Mantang nagdadalagan si Felipe sa kataed kan karuwahe, nadangog nia an Etiope na binabasa an mga tataramon na ini: “Siring sa sarong karnero sia dinara pasiring sa bunoan, asin siring sa kordero na nagin pula sa atubangan kan saiyang paratusar, dai man nia binuka an saiyang ngoso. Sa panahon kan saiyang kasopganan an paghokom hinale sa saiya. Siisay an magsasaysay kan saiyang kapag-arakian? Huli ta an saiyang buhay hinale sa daga.”​—Gibo 8:​32, 33.

Tolos-tolos na namidbid ni Felipe an teksto. Hale idto sa surat ni Isaias. (Isaias 53:​7, 8) Nariribong an Etiope sa saiyang binabasa. Pinonan ni Felipe an pakipag-olay paagi sa paghapot: “Nakasasabot ka kan binabasa mo?” An Etiope nagsimbag: “An totoo, paano ko magigibo iyan, kun daing gumiya sa sako?” Dangan nakimaherak sia ki Felipe na umiba sa saiya sa saiyang karuwahe.​—Gibo 8:​30, 31.

“Ano an Nakaoolang sa Sako na Mabautismohan?”

“Ipinakikiolay ko saimo,” an sabi kan Etiope ki Felipe, “manongod kiisay sinasabi ini kan propeta? Manongod sa saiya man sana o manongod sa ibang tawo?” (Gibo 8:​34) Bakong makangangalas an pagkaribaraw kan Etiope, ta kaidto pa saro nang misteryo kun siisay an “karnero,” o “lingkod,” sa hula ni Isaias. (Isaias 53:11) Siertong nagin malinaw ini kan ipahayag ni Felipe sa Etiope “an maogmang bareta manongod ki Jesus”! Paghaloyhaloy an Etiope nagsabi: “Uya! May tubig; ano an nakaoolang sa sako na mabautismohan?” Kaya binautismohan tolos sia duman ni Felipe.​—Gibo 8:​35-38.

Marikas na akto daw ini? Bako man! An Etiope sarong Judiong proselito.b Kaya sia nagsasamba na ki Jehova na may kaaraman sa Kasuratan, kabale an mga hula dapit sa Mesiyas. Minsan siring, bakong kompleto an saiyang kaaraman. Ngonyan na inako na nia an mahalagang marhay na impormasyon na ini mapadapit sa katongdan ni Jesu-Cristo, nasabotan kan Etiope an kahagadan nin Dios sa saiya asin andam na kumuyog. Angay an bautismo.​—Mateo 28:​18-20; 1 Pedro 3:21.

Pagkatapos kaiyan, “irinayo tolos kan espiritu ni Jehova si Felipe.” Nagpasiring sia sa iba naman na destino. An Etiope “nagdagos na naggagayagaya.”​—Gibo 8:​39, 40.

Leksion Para sa Sato

Bilang mga lingkod ni Jehova sa presenteng aldaw, igwa kitang obligasyon na tabangan an sadiosan an pusong mga indibiduwal na manodan an katotoohan kan Tataramon nin Dios. Dakol an nagin mapanggana sa pag-atubang kan maogmang bareta sa iba mantang nagbibiahe o sa iba pang impormal na mga kamugtakan. Bilang resulta kan gibohon na paghuhulit kan Kahadean, kada taon ginatos na ribo an nagsisimbolisar kan saindang pagdusay ki Jehova Dios paagi sa pagpabautismo.

Siempre, an mga mas bagohan maninigong dai hidaleon na magpabautismo. Dapat nguna sindang magkaigwa nin tamang kaaraman manongod ki Jehova Dios asin sa saiyang Aki, si Jesu-Cristo. (Juan 17:3) Dangan dapat sindang magsolsol, na binabayaan an salang gawe asin nagbabakle tanganing makasunod sa mga pamantayan nin Dios. (Gibo 3:19) Nangangaipo ini nin panahon, orog na kun hararom an pagkatadom kan salang kaisipan asin gawe. Minsan ngani maninigo na seryosong horophoropon nin mga bagohan an kalabot sa Kristianong pagkadisipulo, dakulang mga bendisyon an ibinubunga nin paglaog sa dusay na relasyon ki Jehova Dios. (Ikomparar an Lucas 9:23; 14:​25-33.) An mga Saksi ni Jehova entusiastikong ginigiyahan an siring na mga bagohan pasiring sa organisasyon na ginagamit nin Dios sa pag-otob sa saiyang kabotan. (Mateo 24:​45-47) Arog kan Etiope, an mga ini maggagayagaya sa pakanood manongod sa asin pagsunod sa kahagadan sa sainda nin Dios.

[Mga Nota sa Ibaba]

[Kahon sa pahina 8]

Taano ta Inapod na Kapon?

Sa bilog na tala kan Gibo kapitulo 8, an Etiope inaapod na “kapon.” Minsan siring, huling dai inako kan Ley Mosaiko an kapon na lalaki sa laog kan kongregasyon, an lalaking ini malinaw na bakong kapon sa literal na sentido. (Deuteronomio 23:1) An termino sa Griego para sa “kapon” puedeng manongod sa saro na may halangkaw na katongdan. Sa siring, an Etiope sarong opisyal na sakop kan reyna nin Etiopia.