PAGPUON NIN PAKIKIPAG-ULAY
LEKSIYON 2
Pagigin Natural
Prinsipyo: “An tataramon na sinabi sa tamang panahon—abaang rahay nanggad!”—Tal. 15:23.
Kun Ano an Ginibo ni Felipe
1. Hilingon an VIDEO, o basahon an Gibo 8:30, 31. Dangan pag-isipan an minasunod na mga hapot:
Paano pinunan ni Felipe an pakikipag-ulay sa lalaki?
Taano ta natural na paagi ini nin pagpuon nin pakikipag-ulay asin paghiras nin bagong katotoohan?
Ano an Manunudan Ta ki Felipe?
2. Kun papabayaan tang magin natural an dalagan kan pag-uulay, mas posibleng magin pamugtak an buot kan kaulay ta asin magin andam na magdangog sa satong mensahe.
Arugon si Felipe
3. Magin mapagmasid. Dakula an ipinaparisa kan ekspresyon nin lalawgon asin hiro-hiro nin sarong tawo. Nahihiling mo daw na gusto niyang makipag-ulay saimo? Puwede mong iintrodusir an sarong katotoohan sa Bibliya paagi sa simpleng paghapot, “Aram mo daw na . . . ?” Dai magpirit na makipag-ulay sa saro na habong makipag-ulay.
4. Magin mapasensiya. Dai pag-isipon na kaipuhan mong iintrodusir tulos an sarong katotoohan sa Bibliya. Maghalat nin tamang tiyempo tanganing magin natural sana an dalagan kan saindong pag-uulay. Kun minsan, tibaad kaipuhan mong maghalat sagkod na makaulay mo siya giraray.
5. Magin handang ibagay an pakikipag-ulay. Puwedeng ibang tema an ibangon kan kaulay ta. Kaya magin andam na maghiras nin sarong katotoohan hali sa Bibliya na magigin kapaki-pakinabang sa kaulay mo, dawa pa iba iyan sa nasa isip mong ipakipag-ulay sa saiya.