An Dios Nagmamakolog sa Saindo

SI Mary, sarong Kristiana na magsisingkuenta anyos na, nagtios nin grabe sa saiyang buhay. An pakikisambay kan saiyang agom na lalaki naggiya sa diborsio labi nang sarong dekada an nakaagi. Pakalihis kaiyan, si Mary naghingoa na otobon an saiyang papel bilang nagsosolong magurang sa saiyang apat na aki. Alagad sia nagsosolo pa man giraray, asin kun beses an kapungawan garo baga dai matagalan. Si Mary naghahapot, ‘Nangangahulogan daw ini na an Dios dai nagmamakolog sa sako o sa sakuyang mga aki na daing ama?’

Baga man naeksperyensiahan nindo an kaagid na kasakitan o dai, seguradong makasisimpatiya kamo sa mga namamatean ni Mary. Gabos kita nagtagal nin nakababalong mga kamugtakan, asin tibaad ikinahapot niato kun noarin asin paano mahiro si Jehova para sa sato. An nagkapira sa mga eksperyensiang ini direktang resulta kan satong pangangapot sa mga pagboot nin Dios. (Mateo 10:​16-18; Gibo 5:29) An iba bunga kan satong pagigin bakong sangkap na mga tawo na nabubuhay sa sarong kinaban na pinamamahalaan ni Satanas. (1 Juan 5:19) Si apostol Pablo nagsurat: “An gabos na linalang padagos na nag-aaragrangay asin nagtitios nin kolog sagkod ngonyan.”​—Roma 8:22.

Minsan siring, an bagay na kamo napaaatubang sa grabeng pagbalo dai nangangahulogan na si Jehova binayaan na kamo o bakong interesado sa saindong karahayan. Paano kamo makaseseguro kaini? Ano an nagpapaheling na an Dios nagmamakolog sa saindo?

Sarong Suanoy na Halimbawa

An Biblia nagtatao nin malinaw na ebidensia kan pagmakolog ni Jehova sa mga tawo bilang mga indibiduwal. Helinga si David. Si Jehova nagkaigwa nin personal na interes sa hoben na pastor na ini, na minamansay sia bilang “lalaki na nasusunoan kan saiyang puso.” (1 Samuel 13:14) Sa huri, kan si David mamahala bilang hade, si Jehova nanuga sa saiya: “Ako masasakaibahan mo saen ka man dumuman.”​—2 Samuel 7:9.

Nangangahulogan daw ini na si David nagkaigwa nin “protehidong” pamumuhay, na talingkas sa ano man na kasakitan? Dai, si David napaatubang sa grabeng mga pagbalo antes asin durante kan saiyang pamamahala. Sa laog nin nagkapirang taon antes na magin hade, sia daing ontok na linapag kan gustong mangadan na si Hadeng Saul. Durante kan peryodong ini sa saiyang buhay, si David nagsurat: “An sakong kalag nasa tahaw nin mga leon . . . mga aki nin tawo pa ngani, na an ngipon mga budyak asin bosog.”​—Salmo 57:4.

Pero, sa gabos na kasakitan na ini si David kombensido sa personal na pagmakolog ni Jehova. “An sakuyang pagigin dulag ika mismo an nagbareta,” an ipinahayag nia sa sarong pamibi ki Jehova. Iyo, para ki David garo baga irinekord ni Jehova an bilog na makatatakot na inagihan nia. Dangan idinugang ni David: “Bugtakan an sakuyang mga luha sa saimong supot na anit. Bako daw na iyan yaon sa saimong libro?”a (Salmo 56:8) Paagi sa ilustrasyon na ini, ipinahayag ni David an saiyang kompiansa na aram ni Jehova bako sana an situwasyon kundi pati an emosyonal na epekto kaiyan.

Sa paghinanapos kan saiyang buhay, si David nakasurat basado sa personal na eksperyensia: “Paagi ki Jehova an mismong mga lakad nin makosog na tawo inandam, asin sa saiyang dalan Sia nawiwili. Minsan pa sia matumba, dai sia ikaaapon, huli ta kinakabit ni Jehova an saiyang kamot.” (Salmo 37:​23, 24) Kamo puede man na magkaigwa nin kompiansa na minsan an saindong mga pagbalo dai nahahale asin nagpapadagos, naririparo asin pinahahalagahan ni Jehova an saindong pagtagal. Si Pablo nagsurat: “An Dios bakong biko na malingawan an saindong ginibo asin an pagkamoot na saindong ipinaheling para sa saiyang ngaran, na kamo naglingkod sa mga banal asin padagos pang naglilingkod.”​—Hebreo 6:10.

Dugang pa, si Jehova puedeng humiro para sa saindo paagi sa pagtao sa saindo kan kosog tanganing tagalan an ano man na olang na yaon sa saindong dalan. “Dakol nanggayod an kalamidad kan matanos,” an isinurat ni David, “alagad hale sa gabos na iyan iliniligtas sia ni Jehova.” (Salmo 34:19) Tunay nanggad, sinasabi sato kan Biblia na an mga mata ni Jehova “naglilibot sa bilog na daga tanganing ipaheling an saiyang kosog para duman sa mga an puso bilog para sa saiya.”​—2 Cronica 16:9.

Dinagka Kamo ni Jehova

An dugang pang ebidensia kan personal na pagmakolog ni Jehova makukua sa mga tataramon ni Jesus. “Dai nin nakadodolok sa sako,” an sabi nia, “kun dai sia dagkahon kan Ama na nagsugo sa sako.” (Juan 6:44) Iyo, tinatabangan ni Jehova an mga tawo indibiduwalmente na aprobetsaran an mga pakinabang sa atang ni Cristo. Paano? Sa dakulang kabtang, iyan paagi sa paghuhulit kan Kahadean. Totoo, an gibohon na ini nagseserbing “pagpatotoo sa gabos na nasyon,” pero iyan nakaaabot sa mga tawo indibiduwalmente. An bagay na kamo naghihinanyog asin naghihimate sa mensahe kan maogmang bareta ebidensia kan personal na pagmakolog ni Jehova sa saindo.​—Mateo 24:14.

Paagi sa banal na espiritu, dinadagka ni Jehova an mga indibiduwal pasiring sa saiyang Aki asin sa paglaom na buhay na daing sagkod. Pinapangyayari kaini na an lambang saro makasabot asin iaplikar an espirituwal na mga katotoohan sa ibong nin ano man na natural na mga limitasyon asin pagkabakong sangkap. Tunay nanggad, an saro dai makasasabot kan mga katuyohan nin Dios kun mayo an tabang kan espiritu nin Dios. (1 Corinto 2:​11, 12) Siring sa isinurat ni Pablo sa mga taga-Tesalonica, “an pagtubod bakong sadiri nin gabos na tawo.” (2 Tesalonica 3:2) Si Jehova nagtatao kan saiyang espiritu duman sana sa mga nagpapaheling nin pagigin andam na padagka sa saiya.

Dinadagka ni Jehova an mga tawo huli ta namomotan nia sinda bilang mga indibiduwal asin mawot nia na sinda magkamit nin kaligtasan. Kanigoan kasarig na ebidensia kan personal na pagmakolog ni Jehova! Si Jesus nagsabi: “Bakong kawiliwili para sa sakong Ama na nasa langit na an saro kaining saradit na ini mapahamak.” (Mateo 18:14) Iyo, sa mga mata nin Dios an lambang tawo mahalaga bilang sarong laen na indibiduwal. Iyan an dahelan na si Pablo nakasurat: “Sia mabayad sa lambang saro sono sa saiyang mga gibo.” (Roma 2:6) Asin si apostol Pedro nagsabi: “An Dios daing ipinaoorog, kundi sa lambang nasyon an tawo [an indibiduwal] na natatakot sa saiya asin naggigibo nin katanosan saiyang inaako.”​—Gibo 10:​34, 35.

An mga Milagro ni Jesus

An personal na interes nin Dios sa mga tawo nakapahihirong ipinaheling sa mga milagrong ginibo kan saiyang Aki, si Jesus. An mga pagpaomay na ini may kaibang hararom na pagmate. (Marcos 1:​40, 41) Mantang si Jesus “dai makagigibo nin ano man sa saiyang sadiring boot, kundi an saiya sanang naheheling na ginigibo kan Ama,” an saiyang pagkaherak nag-iilustrar kan mamomoton na pagmakolog ni Jehova sa lambang saro kan saiyang mga lingkod.​—Juan 5:19.

Horophoropa an tala nin sarong milagro na ginibo ni Jesus, na nakarekord sa Marcos 7:​31-37. Digdi pinaomayan ni Jesus an sarong lalaking bongog asin may diperensia sa pagtaram. “Isinuhay nia [an lalaki] sa kadaklan sa pribado,” an pagsaysay kan Biblia. Dangan, “pagtangad sa langit gumininhawa sia nin hararom asin nagsabi sa saiya: ‘Ephʹpha·tha,’ na an kahulogan, ‘Mabukas.’”

Taano an lalaking ini ta isinuhay ni Jesus sa kadaklan? Bueno, posible na an sarong tawo na haros dai makataram masosopog sa atubangan nin mga nagdadalan. Tibaad nariparo ni Jesus na bakong komportable an lalaking ini, asin iyan an dahelan kun taano ta sia nagdesisyon na paomayan sia sa pribado. “An bilog na estorya,” an komento nin sarong iskolar sa Biblia, “nagpapaheling sa sato sa pinakamalinaw na paagi na an lalaki dai sana minansay ni Jesus na sarong pasyente; minansay nia sia bilang sarong indibiduwal. An lalaki igwa nin espesyal na pangangaipo asin espesyal na problema, asin sa pinakamaboot na konsiderasyon trinatar sia ni Jesus sa sarong paagi na dai nakakolog sa saiyang pagmate asin sa paagi na masasabotan nia.”

An talang ini nagpapaheling na si Jesus igwa nin personal na pagmakolog sa mga tawo. Makaseseguro kamo na sia siring man kainteresado sa saindo. Totoo, an saiyang sakripisyal na kagadanan sarong kapahayagan nin pagkamoot para sa bilog na kinaban nin mababalukat na katawohan. Pero, puede nindong personalon an aktong iyan, arog ni Pablo, na nagsurat: ‘An Aki nin Dios namoot sa sako asin itinao an saiyang sadiri para sa sako.’ (Galacia 2:20) Asin mantang nagsabi si Jesus na ‘an nakaheling sa saiya nakaheling man sa Ama,’ makaseseguro kita na si Jehova may kaparehong interes sa lambang saro kan saiyang mga lingkod.​—Juan 14:9.

Si Jehova Nagin Parabalos

An pagkua nin kaaraman manongod sa Dios kalabot an pakanood kan lambang kabtang kan saiyang personalidad siring sa pakahayag kaiyan sa Biblia. An mismong ngaran na Jehova nangangahulogan “Saiyang Pinangyayari,” na ipinasasabot na si Jehova puedeng magin ano man na gustohon nia tanganing gibohon an saiyang kabotan. Sa bilog na kasaysayan, nagliwatliwat an saiyang papel, kabale na an pagigin Kaglalang, Ama, Soberanong Kagurangnan, Pastor, Jehova nin mga hukbo, Paradangog nin pamibi, Hokom, Kaharohalangkaweng Paratokdo, asin Paratubos.b

Tanganing maapresyar an bilog na kahulogan kan ngaran nin Dios, kaipuhan ta man na mamidbid si Jehova sa papel na Parabalos. Si Pablo nagsurat: “Kun dai nin pagtubod dai mahihimo na makapaoyon sa saiya, huli ta an minadolok sa Dios kaipuhan na magtubod na sia iyo nanggad asin na sia nagigin an parabalos sa mga maigot na naghahanap sa saiya.”​—Hebreo 11:6.

Si Jehova nanuga nin buhay na daing katapusan sa sarong paraisong daga sa mga pinili an maglingkod sa saiya nin bilog na puso ngonyan. Bakong kapasloan na magtanaw sa kaotoban kan dakulang panugang iyan, ni pagigin pangahas man an pag-imahinar nin saro na sia nabubuhay duman. Si Moises “nakatorohok na gayo sa pagtao kan balos.” (Hebreo 11:26) Si Pablo siring man maingat na nag-antisipar kan kaotoban kan panuga nin Dios sa fiel na linahidan na mga Kristiano. Sia nagsurat: “Pinupunta ko an pasohan para sa premyo na pag-apod sa itaas nin Dios paagi ki Cristo Jesus.”​—Filipos 3:14.

Kamo man puedeng magtanaw sa balos na ipinanuga ni Jehova sa mga nagtatagal. An pag-antisipar kan balos na iyan mahalagang kabtang kan saindong kaaraman manongod sa Dios asin kan saindong pakatagal sa paglilingkod saiya. Kaya maghorophorop aroaldaw sa mga bendisyon na itinagama ni Jehova para sa saindo. Si Mary, na nasambitan sa enotan, naggibo nin espesyal na paghihingoa na gibohon ini. “Sa kaenot-enote sa buhay ko,” an sabi nia, “inako ko dai pa sana nahahaloy na an pantubos na atang ni Jesus aplikado sa sako. Namamatean ko nang si Jehova nagmamakolog sako bilang sarong tawo. Ako sarong Kristiana sa labi nang 20 taon, alagad dai pa sana nahahaloy na ako talagang nagpoon na maniwala kaini.”

Paagi sa pag-adal asin odok sa pusong paghorophorop sa Biblia, si Mary, kaiba kan minilyon na iba pa, nakakanood na si Jehova nagmamakolog sa saiyang banwaan bako sanang bilang sarong grupo kundi siring man bilang mga indibiduwal. Si apostol Pedro kombensidong marhay kaini kaya sia nagsurat: ‘Ibugtak nindo an gabos nindong kahaditan sa Dios, huli ta sia may pagmakolog sa saindo.’ (1 Pedro 5:7) Iyo, an Dios nagmamakolog sa saindo!

[Mga nota sa ibaba]

[Kahon sa pahina 6]

An Pagkabuhay Liwat​—Prueba na an Dios Nagmamakolog

AN NAKAKOKOMBENSIR na prueba na an Dios interesado sa lambang indibiduwal makukua sa Biblia sa Juan 5:​28, 29: ‘An oras maabot na an gabos na nasa mga lolobngan nin girumdoman makadadangog kan tingog ni Jesus asin maruluwas.’

Interesante, an Griegong termino na mne·meiʹon (lolobngan nin girumdoman) ginamit digdi imbes na taʹphos (lolobngan). An terminong taʹphos nagtatao sana kan ideya nin paglobong. Alagad an mne·meiʹon nagsusuherir na an rekord kan tawong nagadan nagigirumdoman.

Sa bagay na ini, isipa na sana an hahagadon ki Jehova Dios kan pagkabuhay liwat. Tanganing ikabalik sa buhay an sarong tawo, kaipuhan na aram nia an gabos manongod sa sarong iyan​—pati na an saiyang minanang mga karakteristiko asin kompletong memorya. Saka sana ikababalik an indibiduwal na iyan na may iyo man sanang personalidad.

Siempre, ini imposible sa pagmansay nin tawo, alagad “an gabos na bagay posible sa Dios.” (Marcos 10:27) Puede nia nganing aramon kun ano an nasa puso nin sarong tawo. Dawa an sarong tawo gadan sa laog nin dakol nang siglo, an paggirumdom nin Dios sa saiya dai nagliliwat; iyan dai napapara. (Job 14:​13-15) Sa siring, kan sinasambit si Abraham, Isaac, asin si Jacob, si Jesus nakasabi minsan mga siglo na an nakaagi poon kan sinda magadan na si Jehova “Dios, bakong kan mga gadan, kundi kan mga buhay, huli ta sinda gabos buhay para sa saiya.”​—Lucas 20:38.

Sa siring, an binilyon na nagkagaradan yaon sa memorya ni Jehova Dios sa bilog na detalye. Kanigoan kamakangangalas na prueba na an Dios nagmamakolog sa mga tawo indibiduwalmente!

[Retrato sa pahina 7]

Si Jesus nagpaheling nin personal na interes sa mga pinaomayan nia