Kaipuhan Niato an Tunay na mga Katood
SI Jenny asin si Sue igwa nin buhay na orolay. An mga huyom lataw, an mga mata maliwanag—an gabos nindang mga hiro naghahayag nin makosog na interes sa sasabihon kan saro. Dawa magkalaen an mga pinaghalean, malinaw na sa dakol na bagay sinda magkapareho asin igwa nin dakulang paggalang sa lambang saro.
Sa iba man na lugar, si Eric asin si Dennis magkaibang nagtatrabaho sa sarong proyekto, na saro sa dakol na proyekto sa nakaaging dakol na taon. Sinda pamugtak, asin madaling ngumisi. Mantang an pag-orolay minabalyo sa seryosong mga tema, sinda prangkang nagriribayan nin mga opinyon. Iginagalang ninda an lambang saro. Kapareho ni Jenny asin ni Sue, si Eric asin si Dennis tunay na magkatood.
An mga paglaladawan na ini tibaad makapaogma sa saindong puso, na pinagigirumdom kamo manongod sa saindong sadiring mga katood. Sa ibong na kampi, puede kamong pukawon kaiyan na magmawot nin siring na mga pakikikatood. Kamo puede man na magkaigwa kaiyan!
Kun Taano ta Kaipuhan Niato an Tunay na mga Katood
An marahay na mga pakikikatood kaipuhan sa satong mental asin pisikal na ikararahay. Minsan siring, kun kita napupungaw, dai man ini nangangahulogan na kita may diperensia. An nagkapirang parasiyasat nagsasabi na an kapungawan sarong pagkagutom, sarong natural na senyal na kita nangangaipo nin kaibahan. Minsan paano, kun paanong an kakanon minaina o minahale kan gutom, an tamang klase nin mga pakikikatood puedeng makaina sa kapungawan o haleon pa ngani iyan. Dugang pa, an pagkaigwa nin marahay na mga katood na nagpapahalaga sa sato bako man na imposible.
An mga tawo linalang na nangangaipo nin makakaibaiba. (Genesis 2:18) Sinasabi kan Biblia na an sarong tunay na katood, o kaiba, “namundag para sa panahon nin kasakitan.” (Talinhaga 17:17) Huli kaini, an tunay na magkatood maninigong nakahahagad nin tabang sa lambang saro kun iyan kaipuhan. Alagad an pakikikatood nangangahulogan nin labi pa kisa sa pagkaigwa sana nin saro na mahahagadan nin tabang o pagigin sarong kaiba sa trabaho o kawat. An marahay na magkatood nakapaluluwas kan pinakamarahay sa lambang saro. An Talinhaga 27:17 nagsasabi: “Sa batbat, an batbat mismo minatarom. Kaya an tawo minapatarom sa lalauogon nin ibang tawo.” Kun paanong an kapidasong batbat puedeng gamiton tanganing pataromon an sarong tarom na gibo sa kaparehong metal, an sarong katood puedeng pataromon an intelektuwal asin espirituwal na kamugtakan kan iba. Kun an mga pagkasudya nakapamomondo sa sato, an may simpatiyang heling asin Makakasuratan na pamparigon sa boot nin sarong katood puedeng magin nakapagiginhawang marhay.
Sa Biblia, an pakikikatood konektado sa pagkamoot, pagigin pamilyar, pagtago nin hilom, asin pag-ibaiba. An mga pakikikatood puedeng kalabot an mga kataed, katrabaho, asin iba pa. An nagkapira minimirar man an pirang paryente na kaiba sa pinakadayupot nindang mga katood. Minsan siring, para sa dakol ngonyan, an tunay na mga katood masakit na hanapon asin padanayon. Taano ta siring? Puede daw nindong kamtan an tunay asin nagdadanay na mga pakikikatood?