Ginibo Ninda an Kabotan ni Jehova
Paghinanyog sa Pamamaaram ni Jesus
KAN banggi nin Nisan 14, 33 C.E., si Jesu-Cristo asin an saiyang 11 fiel na apostol nakahilay sa lamesa sa sarong kuarto sa itaas sa Jerusalem. Nakaaaram na nagdadangadang na an saiyang kagadanan, sinabihan nia sinda: “Ako nasa kaibahan nindo sa kadikit na sanang panahon.” (Juan 13:33) An totoo, paduman na si Judas Iscariote tangani na makipagkasapakat sa maraot na mga tawo na boot na ipagadan si Jesus.
Mayo ni saro sa kuartong idto sa itaas na nakamate nin orog pa kisa ki Jesus kan pagkaapretado kan situwasyon. Aram niang gayo na magsasakit na sia. Aram man ni Jesus na babayaan sia kan saiyang mga apostol sa mismong bangging idto. (Mateo 26:31; Zacarias 13:7) Huling ini na an ultimong oportunidad ni Jesus na makaolay an saiyang mga apostol bago sia magadan, makasisierto kita na an saiyang pamamaaram nakasentro sa mga bagay na mahalagang marhay.
“Padagos na Gibohon Nindo Ini sa Paggirumdom sa Sako”
Kaiba kan saiyang fiel na mga apostol, iinintrodusir ni Jesus an sarong bagong selebrasyon na masalida sa Judiong Paskua. Inapod idto ni apostol Pablo na “pamanggihan kan Kagurangnan.” (1 Corinto 11:20) Pakakua nin sarong tinapay na daing lebadura, namibi si Jesus. Dangan binaraak nia an tinapay asin itinao iyan sa saiyang mga apostol. “Kua, kakan kamo. Ini nangangahulogan kan sakong hawak,” nagsabi sia. Dangan nagkua sia nin sarong kopa nin arak, namibi sa pagpasalamat asin itinao iyan sa mga apostol, na nagsasabi: “Inom kamo kaiyan, kamo gabos; huli ta ini nangangahulogan kan sakong ‘dugo kan tipan,’ na paboboloson manongod sa dakol para sa kapatawadan nin mga kasalan.”—Mateo 26:26-28.
Ano an kahulogan kan okasyon na ini? Siring sa ipinarisa ni Jesus, an tinapay nagrepresentar sa saiyang hawak na mayong kasalan. (Hebreo 7:26; 1 Pedro 2:22, 24) An arak nagsimbolisar sa pinabolos na dugo ni Jesus, na magpapangyari sa kapatawadan nin mga kasalan. An saiyang sakripisyal na dugo gigibohon man na balido an bagong tipan sa pag-oltanan ni Jehova Dios asin kan 144,000 katawo, na pag-abot nin panahon mamamahala kaiba ni Jesus sa langit. (Hebreo 9:14; 12:22-24; Kapahayagan 14:1) Paagi sa pag-agda sa saiyang mga apostol na kumakan kan pamanggihan na ini, ipinarisa ni Jesus na makakaibanan nia sinda sa langitnon na Kahadean.
Mapadapit sa nagpapagirumdom na pamanggihan na ini, nagboot si Jesus: “Padagos na gibohon nindo ini sa paggirumdom sa sako.” (Lucas 22:19) Iyo, an Pamanggihan kan Kagurangnan magigin taonan na okasyon, kun paanong an Paskua kaidto iyo man. Mantang ipinagigirumdom kan Paskua an pakatalingkas kan mga Israelita sa pagkaoripon sa Egipto, an Pamanggihan kan Kagurangnan mataong atension sa sarong orog kadakulang pakatalingkas—kan mababalukat na katawohan sa pagkaoripon sa kasalan asin kagadanan. (1 Corinto 5:7; Efeso 1:7) Dugang pa, an mga nagkakakan kan emblemang tinapay asin arak mapagigirumdom kan saindang mga pribilehio sa ngapit bilang mga hade asin saserdote sa langitnon na Kahadean nin Dios.—Kapahayagan 20:6.
An kagadanan ni Jesu-Cristo tunay na iyo an pinakaimportanteng okasyon sa kasaysayan nin tawo. An mga nagpapahalaga sa ginibo ni Jesus nagkukuyog sa saiyang pagboot mapadapit sa Pamanggihan kan Kagurangnan: “Padagos na gibohon nindo ini sa paggirumdom sa sako.” Ginigirumdom kan Mga Saksi ni Jehova kada taon an kagadanan ni Jesus sa petsa na katimbang kan Nisan 14. Ngonyan na 1996 an petsang ini katangod kan Abril 2, pagkasolnop kan aldaw. Mainit kamong iniimbitaran na umatender sa Kingdom Hall sa saindong lugar.
“Tinatawan Ko Kamo nin Bagong Togon”
Apuera sa pag-introdusir kan Pamanggihan kan Kagurangnan, nagtao si Jesus nin nagkapirang pamamaaram na sadol sa saiyang mga apostol. Sa ibong kan marahay na pagpatood sa sainda, dakol pa an dapat na manodan kan mga lalaking ini. Dai ninda lubos na namansayan an katuyohan nin Dios para ki Jesus, para sa sainda, o para sa ngapit. Alagad dai ni Jesus prinobaran na liwanagon an gabos na bagay na ini kan panahon na idto. (Juan 14:26; 16:12, 13) Imbes, nagtaram sia manongod sa sarong bagay na may dakulang halaga. “Tinatawan ko kamo nin bagong togon,” nagsabi sia, “na kamo magkaminorootmootan; siring sa pagkamoot ko sa saindo, na kamo man magkaminorootmootan.” Dangan idinugang ni Jesus: “Paagi kaini an gabos makaaaram na kamo an sakong mga disipulo, kun kamo nagkakaminorootmootan.”—Juan 13:34, 35.
Sa anong paagi na ini “bagong togon”? Bueno, nagmanda an Mosaikong Pagboot: “Kamotan mo an saimong kapwa nin siring sa saimo man sana.” (Levitico 19:18) Minsan siring, hinagad ni Jesus sa saiyang mga parasunod na magpaheling nin mapagsakripisyo sa sadiring pagkamoot na masagkod sa pagtao nin saro kan saiyang buhay para sa mga kapwa Kristiano. Siempre, an ‘pagboot sa pagkamoot’ aplikado man sa bako man na gayong delikadong mga kamugtakan. Sa gabos na situwasyon an parasunod ni Jesu-Cristo boluntad na mapaheling nin pagkamoot paagi sa pagtabang sa iba sa espirituwal asin sa iba pang paagi.—Galacia 6:10.
Kan ultimong bangging ini kan buhay ni Jesus digdi sa daga, pinahiro si Jesus nin pagkamoot na mamibi ki Jehova Dios para sa saiyang mga disipulo. Sa sarong kabtang, sia namibi: “Sinda nasa kinaban asin ako madian saimo. Amang Banal, ingate sinda huli kan saimong ngaran na itinao mo sa sako, tangani na sinda magin saro siring sa sato.” (Juan 17:11) Mahalagang mangnohon na sa pakimaherak na ini sa saiyang Ama, namibi si Jesus para sa mamomoton na pagkasararo kan saiyang mga parasunod. (Juan 17:20-23) Kinaipuhan sindang ‘magkaminorootmootan siring kan pagkamoot ni Jesus sa sainda.’—Juan 15:12.
An fiel na mga apostol naghinanyog sa pamamaaram ni Jesus. Kita man maninigong mag-otob kan saiyang mga pagboot. Sa delikadong “huring mga aldaw” na ini, an pagkamoot asin pagkasararo sa tahaw kan tunay na mga parasamba orog na mahalaga kisa kasuarin pa man. (2 Timoteo 3:1) Iyo nanggad, an tunay na mga Kristiano nagkukuyog sa mga togon ni Jesus asin nagpapaheling nin sa magturugang na pagkamoot. Kabale digdi an pagkuyog sa saiyang pagboot na selebraron an Pamanggihan kan Kagurangnan.