Pakapanggana sa Angat nin Kaimbodan

“Magsolog kan bagong pagkatawo na linalang oyon sa kabotan nin Dios sa tunay na katanosan asin kaimbodan.”​—EFESO 4:24.

1. Taano ta utang niato ki Jehova Dios an kaimbodan?

AN PAKAPANGGANA sa angat nin kaimbodan dakol an kabtang. An pinakamahalaga iyo an pakapanggana sa angat nin kaimbodan ki Jehova Dios. Tunay nanggad, sa pagkonsiderar sa kun siisay si Jehova asin sa mga ginibo nia para sa sato, patin huli sa satong pagdusay sa saiya, utang niato sa saiya an kaimbodan. Paano niato ipinaheheling an kaimbodan ki Jehova Dios? An sarong pangenot na paagi iyo an pagigin maimbod sa matanos na mga prinsipyo ni Jehova.

2, 3. Ano an relasyon nin kaimbodan asin katanosan?

² Tanganing mapangganahan an angat na iyan, kaipuhan niatong himateon an mga tataramon na yaon sa 1 Pedro 1:​15, 16: “Kaoyon sa Banal na Saro na nag-apod sa saindo, magin man kamong mga banal sa gabos nindong gawe, huli ta nasusurat: ‘Kaipuhan kamong magin banal, huli ta ako banal.’” An kaimbodan ki Jehova Dios mapangyari sa sato na kumuyog sa saiya sa gabos na panahon, na iinooyon an satong isip, mga tataramon, asin hiro sa saiyang banal na kabotan. Iyan nangangahulogan nin pagpapadanay nin marahay na konsensia, siring sa pagboot sa sato sa 1 Timoteo 1:​3-5: “An katuyohan kan pagboot na ini [bakong pagtokdo nin manlaenlaen na doktrina o paghinanyog sa falsong mga estorya] iyo an pagkamoot na gikan sa malinig na puso asin gikan sa marahay na konsensia patin gikan sa pagtubod na mayo nin pagsaginsagin.” Totoo, mayo sa sato na sangkap, alagad kita maninigong maghingoa na gibohon an bilog niatong makakaya, bako daw?

³ An kaimbodan ki Jehova ililikay kita na paslong ikompromiso an matanos na mga prinsipyo. Tunay nanggad, an kaimbodan ililikay kita sa pagsaginsagin. Kaimbodan an yaon sa isip ni David kan sia umawit: “Tokdoi ako, O Jehova, dapit sa saimong dalan. Ako maglalakaw sa saimong katotoohan. Gibohang saro an sakong puso na matakot sa saimong ngaran.” (Salmo 86:11) An kaimbodan naghahagad kan tama an pagkaladawan na “pagkuyog sa mga dai kayang ipaotob nin mga tawo.”

4, 5. An kaimbodan papagmamaanon kita, ta tibaad magibo niato an ano?

⁴ An kaimbodan ki Jehova Dios ililikay man kita sa paggibo nin ano man na bagay na magdadara nin katuyawan sa saiyang ngaran asin Kahadean. Halimbawa, may duwang Kristiano na nagkaproblema sa kada saro sagkod na sinda salang duminolok sa sarong kinabanon na husgado. An huwes naghapot, ‘Pareho kamo Saksi ni Jehova?’ Malinaw na dai nia masabotan kun taano sinda ta nasa husgado. Kanigoan na katuyawan iyan! An kaimbodan ki Jehova Dios nakadagka kutana sa mga tugang na idto na himateon an hatol ni apostol Pablo: “Kaya ngani iyan nangangahulogan nin biyong kadaogan nindo na kamo nag-aarasuntohan. Taano ta dai na sana nindo pabayaan na kamo pagkasalaan? Taano ta dai na sana nindo pabayaan na kamo madaya?” (1 Corinto 6:7) Tunay nanggad, an kaimbodan ki Jehova Dios nangangahulogan na pagtios nin personal na kawaran kisa sa magcausa nin katuyawan ki Jehova asin sa saiyang organisasyon.

⁵ An kaimbodan ki Jehova Dios kalabot man an dai pagpadaog sa takot sa tawo. “An pagtakig sa tawo sarong siod, alagad an nagtitiwala ki Jehova iingatan.” (Talinhaga 29:25) Sa siring, dai kita nakikokompromiso kun napaaatubang sa paglamag, kundi sinusunod niato an halimbawa na itinao kan Mga Saksi ni Jehova sa dating Unyon Sobyet, sa Malawi, sa Etiopia, asin sa dakol na iba pang kadagaan.

6. An kaimbodan ililikay kita sa pakikiiba kiisay?

⁶ Kun kita maimbod ki Jehova Dios, lilikayan niatong makikatood sa gabos niang kaiwal. Iyan an dahelan kun taano si Santiago ta nagsurat: “Mga parapakisambay, dai nindo naaaraman na an pakikikatood sa kinaban pakikiiwal sa Dios? An siisay man, kun siring, na boot na magin katood kan kinaban ginigibo an saiyang sadiri na kaiwal nin Dios.” (Santiago 4:4) Mawot niatong magkaigwa kan kaimbodan na ipinaheling ni Hadeng David kan sia magsabi: “Bakong naoongis ako sa mga naoongis nin labi-labi sa saimo, O Jehova, asin bakong nababalde ako sa mga nagrerebelde tumang sa saimo? Ikinaoongis ko sinda na may lubos na pagkaongis. Sinda nagin tunay na mga kaiwal para sa sako.” (Salmo 139:​21, 22) Habo niatong makiamistad sa siisay man na tuyong mga parakasala, huli ta mayo kita nin ano man na pakisumaro sa sainda. Bako daw na an kaimbodan sa Dios ililikay kita na makiibaiba sa siisay man na mga kaiwal ni Jehova, baga man personal o paagi sa telebisyon?

Idinedepensa si Jehova

7. An kaimbodan matabang sa sato na gibohon an ano manongod ki Jehova, asin paano ini ginibo ni Eliu?

⁷ An kaimbodan pahihiroon kita na idepensa si Jehova Dios. Marahay nanggad na halimbawa sa bagay na iyan si Eliu! An Job 32:​2, 3 nagsasabi sato: “An kaanggotan ni Eliu . . . luminaad. Tumang ki Job luminaad an saiyang kaanggotan huli sa pagpahayag nia sa saiyang sadiring kalag na matanos imbes na an Dios. Siring man, tumang sa saiyang tolong kairiba luminaad an saiyang kaanggotan huli sa bagay na sinda dai nakakua nin ikasisimbag alagad pinaluwas nindang maraot an Dios.” Sa Job kapitulo 32 sagkod 37, idinepensa ni Eliu si Jehova. Halimbawa, sinabi nia: “Pagpasensiahan pa nindo ako nin kadikit na panahon, asin ipahahayag ko sa saindo na igwa pa nin mga tataramon na sasabihon para sa Dios. . . . Sa sakuyang Kaggibo iaatribwir ko an katanosan. . . . Dai nia hahaleon an saiyang mga mata sa siisay man na matanos.”​—Job 36:​2-7.

8. Taano ta kaipuhan niatong idepensa si Jehova?

⁸ Taano ta igwang pangangaipo na idepensa si Jehova? Ngonyan, an satong Dios na si Jehova linalanghadan sa kadakol na paagi. Hinihingako na sia dai nag-eeksister, na sia kabtang nin sarong Trinidad, na pinasasakitan nia an mga tawo sagkod lamang sa sarong naglalaad na impierno, na sia daing kosog sa pagprobar na kombertiron an kinaban, na sia dai nagmamakolog sa katawohan, asin iba pa. Ikinakapaheling niato an satuyang kaimbodan sa saiya paagi sa pagdepensa sa saiya asin pagpatotoo na si Jehova nag-eeksister; na sia sarong madonong, makatanosan, makakamhan sa gabos, asin mamomoton na Dios; na sia igwang panahon para sa gabos na bagay; asin na kun dumatong na an itinalaan niang panahon, tataposon nia an gabos na karatan asin gigibohon niang paraiso an bilog na daga. (Eclesiastes 3:1) Hinahagad kaini na gamiton niato an lambang oportunidad na magpatotoo sa ngaran asin Kahadean ni Jehova.

Kaimbodan sa Organisasyon ni Jehova

9. Sa anong mga bagay na an nagkapira ipinaheling an saindang kadaihan nin kaimbodan?

⁹ Pag-oolayan ta ngonyan an dapit sa pagigin maimbod sa naheheling na organisasyon ni Jehova. Tunay nanggad, utang niato an kaimbodan dian, pati sa “fiel asin madonong na oripon,” na paagi kaiyan an Kristianong kongregasyon pinakakakan sa espirituwal. (Mateo 24:​45-47) Ipamugtak na igwang lumuwas sa mga publikasyon kan Watch Tower na dai niato nasasabotan o inooyonan sa presenteng panahon. Ano an satong gigibohon? Maanggot asin bayaan an organisasyon? Iyan an ginibo nin nagkapira kan An Torrengbantayan, dakol nang taon an nakaagi, iaplikar an bagong tipan sa Milenyo. An iba naanggot sa sinabi sarong beses kan An Torrengbantayan manongod sa isyu nin neutralidad. Kun idtong mga nagkasiringkog sa mga bagay na ini nagin maimbod sana sa organisasyon asin sa saindang mga tugang, naghalat kutana sinda ki Jehova na linawon an mga bagay na ini, na ginibo nia sa itinalaan niang panahon. Sa siring, an kaimbodan kaiba an mapasensiang paghalat sagkod na an dugang pang pakasabot ipublikar kan fiel asin maimbod na oripon.

10. An kaimbodan ililikay kita na mag-usyoso manongod sa ano?

¹⁰ An kaimbodan sa naheheling na organisasyon ni Jehova nangangahulogan man nin pagsikwal sa mga apostata. An maimbod na mga Kristiano dai mausyoso manongod sa sasabihon kan siring na mga tawo. Totoo, an mga ginagamit ni Jehova Dios sa pagdirehir kan saiyang gibohon sa daga mga bakong sangkap. Alagad ano an sinasabi kan Tataramon nin Dios na gibohon niato? Bayaan an organisasyon nin Dios? Dai. An kapadangatan sa tugang maninigong padanayon kitang maimbod dian, asin maninigo kitang padagos na “magkaminorootmootan . . . nin makosog gikan sa puso.”​—1 Pedro 1:22.

Kaimbodan sa Maimbod na Kamagurangan

11. An kaimbodan matabang sa sato na mag-ingat tumang sa anong negatibong kaisipan?

¹¹ Kun igwang sinabi o ginibo sa kongregasyon na depisil niatong masabotan, an kaimbodan ililikay kita sa paghusgar sa mga motibo asin tatabangan kitang isipon na tibaad iyan depende sa pagmansay. Bako daw na mas marahay nanggad na magkonsentrar sa marahay na mga kualidad kan nombradong kamagurangan asin ibang kapagtubod imbes na sa saindang mga pagkukulang? Iyo, mawot niatong mag-ingat tumang sa gabos na siring na negatibong kaisipan, huli ta iyan konektado sa pagigin bakong maimbod! An kaimbodan matabang man sa sato na kuyogon an giyang itinao ni Pablo “na dai magtaram nin maraot tumang sa kiisay man.”​—Tito 3:1, 2.

12, 13. Anong partikular na mga angat an kaipuhan na atubangon nin kamagurangan?

¹² An kaimbodan nagtatao nin partikular na mga angat sa kamagurangan. An saro sa mga angat na ini manongod sa pagtago nin hilom. An sarong miembro nin kongregasyon tibaad magtuga nin hilom sa sarong magurang sa kongregasyon. An kaimbodan sa sarong iyan ililikay an magurang sa kongregasyon na balgahon an prinsipyo nin pagtago nin hilom. Sia mahimate kan hatol sa Talinhaga 25:9: “Dai mo ihayag an hilom nin iba.” Iyan nangangahulogan nin dai paghayag dawa pa sa saiyang agom na babae!

¹³ An kamagurangan igwa pa nin ibang pagbalo sa kaimbodan na kaipuhan na atubangon. Magigin daw sindang mga parapaoyon sa mga tawo, o mapuso asin maboot daw nindang tatabangan idtong mga nangangaipo nin pagtanos, minsan pa kun sinda mga paryente o dayupot na mga katood? An kaimbodan sa organisasyon ni Jehova mapangyari duman sa kamagurangan sa sato na pagmaigotan na tabangan an siisay man na nangangaipo nin espirituwal na tabang. (Galacia 6:​1, 2) Dawa kita magigin maboot, an kaimbodan gigibohon kitang prangka sa satong kapwa magurang sa kongregasyon, kun paanong si Pablo nagtaram ki apostol Pedro sa prangkang paagi. (Galacia 2:​11-14) Sa ibong na kampi, mawot kan mga nangengenot na magin maingat, ta tibaad huli sa bakong madonong na aksion o pagpaheling nin pagpalaenlaen o pag-abuso sa saindang autoridad sa ibang paagi, gibohon nindang depisil para sa mga pinangangatamanan ninda na magin maimbod sa organisasyon nin Dios.​—Filipos 4:5.

14, 15. Anong mga bagay an tibaad bumalo sa kaimbodan kan mga miembro kan kongregasyon?

¹⁴ Igwa pa nin ibang aspekto an pakapanggana sa angat nin kaimbodan sa kongregasyon asin sa kamagurangan kaiyan. Kun igwa nin masakit na mga kamugtakan sa kongregasyon, tinatawan kita kaini nin oportunidad na ipaheling an kaimbodan ki Jehova asin sa mga nagrerepresentar sa saiya. (Helingon an The Watchtower, Hunyo 15, 1987, pahina 15-17.) Kun nagkaigwa nin pagtitiwalag, an kaimbodan naghahagad na suportaran niato an kamagurangan, na dai naghihingoang humanap pa nin ibang paliwanag kun baga supisyente an mga dahelan sa ginibong aksion.

¹⁵ An kaimbodan sa kongregasyon naghahagad man sa sato na suportaran an gabos na limang pagtiripon kada semana sa abot kan satong mga sirkumstansia asin kakayahan. An kaimbodan naghahagad na kita bako sanang atenderan iyan nin regular kundi pag-andaman man iyan asin magtao nin nakaparirigon na mga komento sagkod sa mapupuede.​—Hebreo 10:​24, 25.

Kaimbodan sa Agom

16, 17. Anong mga angat sa kaimbodan an kaipuhan na atubangon nin may agom na mga Kristiano?

¹⁶ Kiisay pa niato utang an kaimbodan? Kun kita may agom, huli sa satong sumpa sa pag-agom, kaipuhan niatong pangganahan an angat nin pagigin maimbod sa satuyang agom. An kaimbodan sa satong agom ililikay kita na mapasalang magin mas maboot sa ibang babae o lalaki kisa sa satong agom na babae o agom na lalaki. An kaimbodan sa satong agom naghahagad man na dai niato ihayag sa iba an mga kaluyahan asin pagkukulang kan satong agom. Mas pasil na magreklamo sa iba kisa sa paghingoang papagdanayon na bukas an linya nin pakikikomunikar sa satong agom, na kaipuhan niatong gibohon kaoyon sa Bulawan na Reglamento sa Paggawe. (Mateo 7:12) Sa katunayan, an pagkaigwa nin agom angat nanggad sa satong Kristianong kaimbodan.

¹⁷ Tanganing mapangganahan an angat na ini nin kaimbodan, bako sanang kaipuhan niatong likayan an pagkakulpable sa salang marhay na paggawe kundi kaipuhan man niatong ingatan an sato mismong mga iniisip asin saboot. (Salmo 19:14) Halimbawa, kun an satong madayang puso paslo sa kasingawan asin kaogmahan, pasil na may kapasloan na maholog sa pagmawot an satong paghanga. Nagsasadol nin kaimbodan sa agom, si Hadeng Salomon hinahatolan an mga agom na lalaki sa piguratibong paagi na ‘uminom nin tubig hale sa saindang sadiring lalagan.’ (Talinhaga 5:15) Asin si Jesus nagsabi: “An siisay man na magparaheling sa sarong babae tanganing magkaigwa nin horot sa saiya nagsasambay na sa saiya sa saiyang puso.” (Mateo 5:28) An mga agom na lalaki na nagpaparaheling nin pornograpikong mga materyal namemeligrong maagyat na makakomitir nin pagsambay, sa siring dinadaya an saindang agom na babae asin nagigin bakong maimbod sa sainda. Sa parehong dahelan, an agom na babae na bangkag sa pagdalan nin mga drama na manongod sa mga estorya nin sarambayan puedeng masugotan na magin bakong maimbod sa saiyang agom na lalaki. Minsan siring, paagi sa pagigin maimbod nanggad sa satong agom, pinaririgon niato an bogkos nin pag-agoman, asin kita nagtitinabangan sa paghihingoa niatong paogmahon si Jehova Dios.

Mga Pantabang Tanganing Magdanay na Maimbod

18. An pagsabot sa ano matabang sa sato na magin maimbod?

¹⁸ Ano an matabang sa sato tanganing mapangganahan an angat nin kaimbodan sa apat na bagay na ini: kaimbodan ki Jehova, sa saiyang organisasyon, sa kongregasyon, asin sa satong agom? An sarong pantabang iyo an pagsabot na an pakapanggana sa angat nin kaimbodan konektadong marhay sa pagbindikar kan soberaniya ni Jehova. Iyo, paagi sa pagdanay na maimbod ipinaheheling niato na minimidbid niato si Jehova bilang Unibersal na Soberano. Sa siring kita magkakaigwa man nin paggalang sa sadiri asin kan paglaom na buhay na daing katapusan sa bagong kinaban ni Jehova. Matatabangan niato an satong sadiri na magdanay na maimbod paagi sa paghorophorop kan marahay na mga halimbawa nin kaimbodan, poon ki Jehova sagkod duman sa mga nasambitan sa Biblia asin sa mga publikasyon kan Watch Tower, kabale na an mga tala sa Yearbook.

19. Ano an papel nin pagtubod sa satong pagigin maimbod?

¹⁹ An makosog na pagtubod ki Jehova Dios asin takot na mapamondo sia matabang sa sato na mapangganahan an angat nin kaimbodan. Pinaririgon niato an satong pagtubod asin takot ki Jehova paagi sa maigot na pag-adal sa Tataramon nin Dios asin paagi sa pakikakabtang sa Kristianong ministeryo. Ini matabang sa sato na humiro kaoyon sa hatol ni Pablo na nakarekord sa Efeso 4:​23, 24: “Maninigo kamong magin bago sa puersa na nagpapahiro sa saindong isip, asin magsolog kan bagong pagkatawo na linalang oyon sa kabotan nin Dios sa tunay na katanosan asin kaimbodan.”

20. Orog sa gabos, anong kualidad an matabang sa sato na magin maimbod ki Jehova asin sa gabos na iba pa na pinagkakautangan niato nin kaimbodan?

²⁰ An pag-apresyar sa mga kualidad ni Jehova matabang sa sato na magin maimbod. Orog sa gabos, an daing kapasloan na pagkamoot sa satong langitnon na Ama asin pagtanaw nin utang na boot sa gabos na ginibo nia para sa sato, an pagkamoot sa saiya sa bilog niatong puso asin kalag asin isip patin kosog matabang sa sato na magin maimbod sa saiya. Dugang pa, an pagkaigwa kan pagkamoot na sinabi ni Jesus na magpapamidbid sa saiyang mga parasunod matabang sa sato na magin maimbod sa gabos na Kristiano sa kongregasyon asin sa satong pamilya. Sa ibang pagtaram, iyan sa katunayan pagigin paslo o bakong paslo. An kadaihan nin kaimbodan nangangahulogan nin pagigin paslo. An kaimbodan nangangahulogan nin pagigin bakong paslo.​—Marcos 12:​30, 31; Juan 13:​34, 35.

21. Paano susumaryohon an manongod sa pakapanggana sa angat nin kaimbodan?

²¹ Sa pagsumaryo: An kaimbodan iyo an ekselenteng kualidad na ipinaheheling ni Jehova Dios, ni Jesu-Cristo, asin nin gabos na tunay na lingkod ni Jehova. Tanganing magkaigwa nin marahay na relasyon ki Jehova Dios, kaipuhan niatong pangganahan an angat nin kaimbodan sa saiya paagi sa pag-otob kan saiyang matanos na mga kahagadan, paagi sa pagsikwal sa saiyang mga kaiwal, asin paagi sa pagdepensa ki Jehova sa pagpatotoo sa pormal asin impormal na paagi. Kaipuhan man niatong mapangganahan an angat nin pagigin maimbod sa naheheling na organisasyon ni Jehova. Kaipuhan na kita magin maimbod sa satong kongregasyon asin maimbod sa satong agom. Paagi sa mapangganang pag-atubang sa angat nin kaimbodan, kita nakikakabtang sa pagbindikar kan soberaniya ni Jehova, asin nagsusuportar sa saiyang kampi sa isyu. Paagi kaiyan makakamtan niato an saiyang pabor asin aakoon an premyo na buhay na daing katapusan. An sinabi ni apostol Pablo manongod sa diosnon na debosyon puede man na ikaaplikar sa satong pakapanggana sa angat nin kaimbodan. Iyan kapakipakinabang kapwa sa buhay ngonyan asin sa madatong.​—Salmo 18:25; 1 Timoteo 4:8.

Ano an Saindong Simbag?

◻ Sa anong mga paagi na puede niatong pangganahan an angat nin kaimbodan sa Dios?

◻ Ano an hinahagad sa sato kan kaimbodan sa organisasyon ni Jehova?

◻ Paano mapanggaganahan kan kamagurangan an angat nin kaimbodan?

◻ Anong angat na may labot sa kaimbodan an kaipuhan na mapangganahan kan mga Kristianong may agom?

◻ Anong mga kualidad an matabang sa sato na mapangganahan an angat nin kaimbodan?

[Retrato sa pahina 17]

An kaimbodan sa mga miembro kan kongregasyon ililikay an kamagurangan na ihayag an hilom na mga bagay

[Mga retrato sa pahina 18]

An kaimbodan sa agom nagpaparigon sa bogkos nin pag-agoman