Helinga an Maimbod!

“Siisay nanggad an dai matatakot saimo, Jehova, asin magpapamuraway kan saimong ngaran, huli ta ika sana an maimbod?”​—KAPAHAYAGAN 15:4.

1. Anong patotoo an itinao ni J. F. Rutherford manongod sa kaimbodan kan saiyang sinundan, si C. T. Russell?

SI Joseph F. Rutherford, na suminalida ki C. T. Russell bilang presidente kan Watch Tower Society kan 1917, pinonan an saiyang mga tataramon sa pahayag sa lobong ni Russell paagi sa pagsabi: “Si Charles Taze Russell maimbod sa Dios, maimbod ki Cristo Jesus, maimbod sa katuyohan kan kahadean kan Mesiyas. Sia maimbod nin biyo​—iyo, maimbod sagkod sa kagadanan.” Tunay nanggad, iyan sarong marahay na pag-omaw sa sarong fiel na lingkod ni Jehova Dios. Mayo na nin malabi pang pag-omaw na ikatatao niato sa siisay man na indibiduwal kisa sa pagsabi na napangganahan nia an angat nin kaimbodan, na sia maimbod​—maimbod nin biyo.

2, 3. (a) Taano an kaimbodan ta sarong angat? (b) Sairisay an nakaposisyon man tumang sa tunay na mga Kristiano sa saindang mga paghihingoa na magin maimbod?

² An kaimbodan sarong angat. Taano? Huli ta an kaimbodan katumang nin sadiring interes. An klero kan Kakristianohan pangenot sa mga bakong maimbod sa Dios. Siring man, dai pa nin kaagid an siring kalakop na kadaihan nin kaimbodan sa relasyon nin mag-agom ngonyan. An pagsambay normal na sana. An kadaihan nin kaimbodan lakop man sa kinaban nin negosyo. Manongod digdi, kita sinasabihan: “An dakol na manedyer asin propesyonal . . . naniniwala na mga mangmang na madaling lokohon asin mga madaling dayaon sana an maimbod sa saindang kompaniya ngonyan.” An mga tawong “sobra kaimbod” minemenus. “An pangenot asin unikong kaimbodan nindo maninigo na sa saindong sadiri” an pagkasabi dian nin sarong presidente nin kompaniya na kinokonsulta nin ibang kompaniya manongod sa administrasyon asin personahe. Minsan siring, an pagtaram manongod sa kaimbodan sa sadiri pagraot sa kahulogan kan termino. Nagpapagirumdom iyan sa sato kan sinabi sa Miqueas 7:2: “An maimbod nawawara na sa daga.”

³ Sa mas makahulogan nanggad na sokol, si Satanas asin an saiyang mga demonyo nakaposisyon tumang sa sato, na determinadong gibohon kitang bakong maimbod sa Dios. Iyan an dahelan kun taano an mga Kristiano ta sinabihan sa Efeso 6:12: “Kita nakikipaglaban, bakong tumang sa dugo asin laman, kundi tumang sa mga gobyerno, tumang sa mga autoridad, tumang sa mga namamahala sa kinaban sa kadikloman na ini, tumang sa maraot na mga puersang espiritu sa langitnon na mga lugar.” Iyo, kaipuhan niatong himateon an patanid: “Magmata kamo, magpuka kamo. An saindong kaiwal, an Diablo, naglalakaw na siring sa nagngangarob na leon, na naghahanap nin masisiba.”​—1 Pedro 5:8.

4. Ano an mga tendensia na nagpapadepisil na marhay sa pagigin maimbod?

⁴ An saro pang nagpapadepisil sa kaimbodan iyo an paslong mga tendensia na minana niato hale sa satong mga magurang, siring sa pakasambit sa Genesis 8:21: “An tendensia kan puso nin tawo maraot”​—asin paslo—​“poon sa saiyang pagkaniaki.” Kita gabos igwa kan problema na itinuga ni apostol Pablo na nagin problema nia: “An marahay na minamawot ko dai ko ginigibo, kundi an maraot na hinahaboan ko iyo an ginigibo ko.”​—Roma 7:19.

An Kaimbodan Sarong Espesyal na Bagay

5, 6. Ano an masasabi manongod sa kun ano an kaimbodan, asin ano an itinaong kahulogan kaiyan?

⁵ An “kaimbodan” sarong espesyal na marhay na termino. Sa siring an Insight on the Scriptures nagsasabi: “Mayo nin Ingles na mga termino na eksaktong nagpapahayag kan bilog na kahulogan kan Hebreo asin Griegong mga termino, alagad an ‘loyalty’ (sa Bicol, ‘kaimbodan’) kaiba an ideya nin debosyon asin pagigin fiel, kun ginagamit dapit sa Dios asin sa paglilingkod sa saiya, puede na.”a Manongod sa “kaimbodan” An Torrengbantayan nagsabi kaidto: “Pagigin fiel, katongdan, pagkamoot, paninimbagan, pagsuportar. Saen nagkakaparareho an mga terminong ini? Mga laen-laen na aspekto iyan nin kaimbodan.” Iyo, kadakol kan marahay na kualidad na sa katunayan manlaenlaen na mga aspekto nin kaimbodan. Maririsa nanggad na dakol na beses na an kaimbodan asin katanosan pinagkokonektar sa Kasuratan.

⁶ Makatatabang man an minasunod na mga pakahulogan: ‘An kaimbodan puedeng magsuherir nin nagpapadagos, masasarigan na pagigin fiel asin pagsuportar, na seguradong dai manluluya o masusugotan.’ ‘An kaimbodan nagpaparisa nin pagigin fiel sa panuga nin saro o nagpapadagos na pagsuportar sa institusyon o mga prinsipyo na dian an saro naniniwalang sia igwang moral na paninimbagan; an termino nagsusuherir bako sana nin pangangapot kundi pagsayumang maakit asin maagda parayo sa pangangapot na iyan.’ Sa siring, an mga tawong nagpapadagos na fiel sa ibong nin mga pagbalo, pagtumang, asin paglamag angay na apodon na “maimbod.”

7. Ano an puedeng sabihon na pagkakalaen nin kaimbodan asin pagigin fiel?

⁷ Minsan siring, sa bagay na ini, tibaad marahay na iilustrar an puedeng sabihon na kalaenan nin kaimbodan asin pagigin fiel. Sa solnopan na Estados Unidos, igwa nin sarong geyser na nagtutuga sa kada mga sarong oras. Iyan regular nanggad kaya inapod iyan na Old Faithful (sa Bicol, Fiel Kaidto Pa). An Biblia nagsasambit kan daing buhay na mga bagay siring kan bulan bilang fiel, huli ta iyan masasarigan. An Salmo 89:37 sinasambit an bulan bilang “fiel na saksi sa kalangitan.” An mga tataramon nin Dios sinasabing fiel. An Kapahayagan 21:5 nagsasabi: “An Saro na nagtutukaw sa trono nagsabi: ‘Uya! ginigibo kong bago an gabos na bagay.’ Siring man, sia nagsabi: ‘Isurat mo, huli ta an mga tataramon na ini fiel asin totoo.’” An gabos na ini fiel, masasarigan, alagad sinda dai puedeng magkaigwa nin pakamate nin kadayupotan o moral na mga kualidad, siring sa kaimbodan.

Si Jehova, an Pinakamaimbod

8. Anong Makakasuratan na patotoo an nagpapamidbid sa pinakanangongorog na halimbawa nin kaimbodan?

⁸ Mayong duwa-duwa, si Jehova Dios an pinakanangongorog na halimbawa nin kaimbodan. Si Jehova maimbod sa rasa nin tawo poon pa kaidto, na itinao pa ngani an saiyang Aki tanganing an mga tawo mag-ako nin buhay na daing katapusan. (Juan 3:16) Sa Jeremias 3:​12, mababasa niato: “‘Magbalik ka, O mapasaloib na Israel,’ an sabi ni Jehova. ‘Dai ko papahologon an sakong lalauogon na may kaanggotan sa saindo, huli ta ako maimbod.’” An mga tataramon sa Kapahayagan 16:5 dugang pang patotoo sa kaimbodan ni Jehova: “Ika, an Saro na iyo ngonyan asin iyo kaidto, an Maimbod, matanos.” Dangan saro pa, sa Salmo 145:​17, kita sinabihan: “Si Jehova matanos sa gabos niang dalan asin maimbod sa gabos niang gibo.” Sa katunayan, si Jehova ekselenteng marhay sa saiyang kaimbodan kaya an Kapahayagan 15:4 nagsasabi: “Siisay nanggad an dai matatakot saimo, Jehova, asin magpapamuraway kan saimong ngaran, huli ta ika sana an maimbod?” Si Jehova maimbod sa pinakahalangkaw na sokol.

9, 10. Anong rekord nin kaimbodan an ginibo ni Jehova sa saiyang relasyon sa nasyon na Israel?

⁹ An kasaysayan kan nasyon na Israel sa partikular igwa nin dakol na patotoo sa kaimbodan ni Jehova sa saiyang banwaan. Sa mga aldaw kan Mga Hokom, an Israel nagbaya nin paorootro sa tunay na pagsamba, alagad si Jehova paorootrong namondo asin nagligtas sa sainda. (Hokom 2:​15-22) Sa bilog na limang siglo na igwang mga hade sa Israel, si Jehova nagpaheling nin kaimbodan sa nasyon na iyan.

¹⁰ An kaimbodan ni Jehova nagpangyari sa saiya na magin mapasensia sa saiyang banwaan, siring sa sinabi sa 2 Cronica 36:​15, 16: “Si Jehova na Dios kan saindang mga apoon daing ontok na nagsugo tumang sa sainda paagi sa saiyang mga sugo, nin paorootro, huli ta sia nakamate nin pagdamay sa saiyang banwaan asin sa saiyang erokan. Alagad ta padagos na pinag-oolog-olog ninda an mga sugo kan tunay na Dios asin dinuduhagi an saiyang mga tataramon patin tinutuya an saiyang mga propeta, sagkod na an kabangisan ni Jehova luminuwas tumang sa saiyang banwaan, sagkod na mayo na nin kaomayan.”

11. Anong pag-asegurar o karangahan an itinatao sa sato kan kaimbodan ni Jehova?

¹¹ Huli ta si Jehova maimbod na gayo, si apostol Pablo nakasurat, siring sa nakarekord sa Roma 8:​38, 39: “Ako naniniwala na ni an kagadanan ni an buhay ni an mga anghel ni an mga gobyerno ni an mga bagay na yaon na digdi ngonyan ni an mga bagay na madatong pa ni an mga kapangyarihan ni an kalangkawan ni an kararoman ni an arin man na ibang linalang makapasusuhay sa sato hale sa pagkamoot nin Dios na yaon dian ki Cristo Jesus na satong Kagurangnan.” Iyo, inaasegurar kita ni Jehova: “Sa ano man na paagi dai taka babayaan ni sa ano man na paagi pababayaan taka.” (Hebreo 13:5) Tunay nanggad, nakararangang maaraman na si Jehova Dios perming maimbod!

Si Jesu-Cristo, an Maimbod na Aki

12, 13. Anong patotoo an yaon sa sato manongod sa kaimbodan kan Aki nin Dios?

¹² Sangkap na inaarog ni Jesu-Cristo si Jehova sa pakapanggana sa angat nin kaimbodan kaidto asin ngonyan. Angay sanang kinokotar ni apostol Pedro an Salmo 16:10 asin iinaaplikar iyan ki Jesu-Cristo sa Gibo 2:27: “Dai mo pababayaan an sakong kalag sa Hades, ni na totogotan mo man an saimong maimbod na saro na makaheling nin kalapaan.” Si Jesu-Cristo angay sanang apodon na “maimbod na saro.” Sa gabos na bagay, sia maimbod sa saiyang Ama asin sa ipinanuga nin Dios na Kahadean. Enot na prinobaran ni Satanas na raoton an integridad ni Jesus paagi sa mga sugot, mga pagpukaw sa sadiring interes. Sa pagkasudya nia dian, an Diablo guminamit nin paglamag, na katapustapusi pinapangyari an kagadanan ni Jesus sa hariging pangadan. Nungkang nagsukisuki si Jesus kun dapit sa saiyang kaimbodan sa saiyang langitnon na Ama, si Jehova Dios.​—Mateo 4:​1-11.

¹³ Si Jesus maimbod sa saiyang mga parasunod sa pag-otob kan panuga na nakarekord sa Mateo 28:20: “Uya! ako danay na nasa saindo sagkod sa pagtatapos kan palakaw nin mga bagay.” Bilang kaotoban kan panugang iyan, sia maimbod na nangengenot sa saiyang kongregasyon poon kan Pentecostes nin 33 C.E. sagkod sa presenteng panahon.

Bakong Sangkap na mga Tawo na Nagin Maimbod

14. Anong halimbawa nin kaimbodan an itinao ni Job?

¹⁴ Ngonyan, kumusta man an bakong sangkap na mga tawo? Puede daw sindang magin maimbod sa Dios? Igwa kita kan ekselenteng kaso ni Job. Lininaw ni Satanas an isyu sa kaso nia. Maimbod daw si Job ki Jehova Dios, o sia daw naglilingkod sana sa saiya huli sa sadiring interes? Si Satanas naghambog na kaya niang patalikodon si Job ki Jehova paagi sa pagtao nin mga problema ki Job. Kan mawara ki Job an gabos niang rogaring, gabos niang aki, asin pati ngani an saiyang marahay na salud, sia dinagka kan saiyang agom: “Sumpaa an Dios asin magadan ka!” Alagad si Job maimbod, huli ta si Job nagsabi sa saiya: “‘Ika nagtataram man siring sa pagtaram nin saro sa mga babaeng lolong. Aakoon sana daw niato an marahay hale sa tunay na Dios asin dai man aakoon an maraot?’ Sa gabos na ini si Job dai nagkasala sa saiyang mga ngabil.” (Job 2:​9, 10) Sa katunayan, sa saiyang naghihingakong mga pararanga, si Job nagsabi: “Dawa kun ako gadanon nia [nin Dios], ako maglalaom pa man giraray sa saiya.” (Job 13:​15, New International Version) Bakong makangangalas na si Job nag-ako kan pag-oyon ni Jehova! Huli kaini, si Jehova nagsabi ki Elifas na Temanita: “An sakuyang kaanggotan naglaad tumang sa saimo asin sa duwa mong kairiba, huli ta kamo dai nagtaram kan katotoohan manonongod sa sako arog kan sakuyang lingkod na si Job.”​—Job 42:7, 10-16; Santiago 5:11.

15. Anong Makakasuratan na patotoo an yaon sa sato manongod sa kaimbodan kan dakol na lingkod ni Jehova Dios?

¹⁵ An gabos na lalaki asin babae na may pagtubod na ilinadawan sa Hebreo kapitulo 11 puedeng apodon na mga maimbod. Sinda bako sanang fiel kundi maimbod man sa atubangan nin mga pangigipit. Sa siring, mababasa niato idtong mga “huli sa pagtubod . . . nagpinto sa mga ngoso nin mga leon, nakasigbo kan kapangyarihan nin kalayo, nakalikay sa tarom nin minasbad . . . Iyo, an iba nabalo paagi sa pag-olog-olog asin paglatigo, sa katotoohan, labi pa kaiyan, paagi sa mga pagkagapos asin pagkabilanggo. Sinda ginapo, pinagbista, pinaglagadi, ginaradan sa minasbad, naggurubing nin anit nin karnero, nin kanding, mantang sinda nagtitios, nasasakitan, inaapi.”​—Hebreo 11:​33-37.

16. Anong halimbawa nin kaimbodan an itinao ni apostol Pablo?

¹⁶ An Kristianong Griegong Kasuratan nagtatao man kan ekselenteng halimbawa ni apostol Pablo. Angay siang makasabi sa mga Kristianong taga-Tesalonica manongod sa saiyang ministeryo: “Kamo an mga saksi, pati an Dios, kun gurano kami kanagin maimbod asin matanos patin daing kasagwean sa saindo na nagturubod.” (1 Tesalonica 2:10) Kita igwa pang dugang na prueba sa kaimbodan ni Pablo sa saiyang mga tataramon na nakarekord sa 2 Corinto 6:​4, 5, kun saen mababasa niato: “Sa gabos na paagi pinatutunayan niamo an samong sadiri na mga ministro nin Dios, paagi sa pagtagal nin dakol, paagi sa mga kahorasaan, paagi sa mga pangangaipo, paagi sa mga kasakitan, paagi sa mga paghampak, paagi sa mga bilanggoan, paagi sa mga karibokan, paagi sa mga pagpagal, paagi sa mga bangging daing torog, paagi sa mga panahon na mayong pagkakan.” An gabos na ini nagpatotoo na si apostol Pablo igwa nin paggalang sa sadiri huli ta sia maimbod.

Mga Maimbod sa Modernong Panahon

17. Anong mga tataramon ni J. F. Rutherford an nagpaheling kan saiyang determinasyon na magin maimbod?

¹⁷ Sa modernong mga panahon, kita igwa kan marahay na halimbawa na kinonsiderar sa pagpopoon. Mangnoha an sabi sa librong Worldwide Security Under the “Prince of Peace,” sa pahina 146 sa irarom kan subtemang “Loyalty During Time of Imprisonment.” Dian sinasabi: “Ipinaheheling an kaimbodan sa organisasyon ni Jehova sa panahon kan saiyang pagkabilanggo, an presidente kan Watch Tower Society, si Joseph F. Rutherford, kan Disyembre 25, 1918, nagsurat kan minasunod: ‘Huli ta ako nagsayumang makikompromiso sa Babilonya, kundi fiel na naghingoang maglingkod sa sakong Kagurangnan, ako yaon sa bilanggoan, na huli kaiyan ako nagpapasalamat. . . . Mas gugustohon ko pa nanggad na kamtan an Saiyang huyom nin pag-oyon asin mabilanggo, kisa sa makikompromiso o sumuko sa Hayop asin magin talingkas patin makua an pag-oyon kan bilog na kinaban.’”b

18, 19. Anong ekselenteng mga halimbawa nin kaimbodan sa modernong mga panahon an yaon sa sato?

¹⁸ Kita igwa nin ekselenteng mga halimbawa nin kaimbodan sa dakol na iba pang Kristiano na nagtagal nin paglamag. Kaiba sa maimbod na mga indibiduwal na iyan an Aleman na mga Saksi ni Jehova durante kan pamamahala kan Nazi, siring sa pagkaladawan sa video na Purple Triangles, na mahiwas na idinistribwir sa tataramon na Ingles. Angay man na konsideraron an dakol na maimbod na Aprikanong Saksi ni Jehova, siring kaidtong mga nasa Malawi. Duman, sarong guardia sa bilanggoan an nagpatotoo sa kaimbodan kan mga Saksi, na nagsasabi: “Nungka sindang makikikompromiso. Sinda nagdadakol sana.”

¹⁹ Seguradong kun mabasa nin saro an dai pa sana nahaloy na mga Yearbook of Jehovah’s Witnesses sia mahanga sa kaimbodan na ipinaheling kan tunay na mga Kristiano, siring kaidtong mga nasa Grecia, Mozambique, asin Polandia. Dakol sa sainda an nagtios nin makolog na marhay na pasakit; an iba ginadan. An pahina 177 kan 1992 Yearbook nagpapaheling nin mga retrato kan siyam na Kristiano sa Etiopia na napangganahan an angat nin kaimbodan sagkod sa kagadanan. Bilang Mga Saksi ni Jehova, bako daw na kita naoogma na magkaigwa nin kadakol na halimbawa na madagka sa sato na pangganahan an angat nin kaimbodan?

20. Ano an resulta kun kita magdadanay na maimbod?

²⁰ Paagi sa maimbod na pagtumang sa mga sugot asin pangigipit, pinaooswag niato an satong paggalang sa sadiri. Kaya, kun siring, kiisay na kampi sa isyu nin kaimbodan an mawot niatong mamugtakan? Paagi sa pakapanggana sa angat nin kaimbodan, kita minasuportar sa kampi ni Jehova Dios sa isyu asin nagpapatotoo na si Satanas na Diablo labi-labi karaot, lataw na gayong putikon! Sa siring kakamtan niato an pag-oyon kan satong Kaggibo, si Jehova Dios, asin an balos na buhay na daing katapusan sa kaogmahan. (Salmo 37:29; 144:15b) Kokonsideraron sa masunod kun ano an kaipuhan tanganing mapangganahan an angat nin kaimbodan.

[Mga Nota sa Ibaba]

Ano an Saindong Simbag?

◻ Taano ta sarong angat an pagigin maimbod?

◻ Taano ta masasabing espesyal na marhay na termino an “kaimbodan”?

◻ Anong Makakasuratan na mga halimbawa nin bakong sangkap na mga tawo na nagin maimbod an yaon sa sato?

◻ Anong marahay na modernong aldaw na mga halimbawa nin kaimbodan an yaon sa sato?

[Retrato sa pahina 11]

Si Charles Taze Russell

[Retrato sa pahina 12]

Si Jesus an tunay nanggad na “maimbod na saro” ni Jehova

[Retrato sa pahina 13]

Si Job, dawa bakong sangkap, nagin maimbod sa Dios

[Retrato sa pahina14]

Si Pablo nagtao nin marahay na halimbawa nin kaimbodan ki Jehova