Paglilingkod nin Maimbod Kaiba kan Organisasyon ni Jehova

“Sa sarong maimbod ika mahiro sa kaimbodan.”​—2 SAMUEL 22:26.

1, 2 . Ano an nagkapirang halimbawa nin kaimbodan na puedeng naheheling ta gabos sa kongregasyon?

MATANGA na sarong banggi an sarong magurang sa kongregasyon nag-aandam nin pahayag para sa Kristianong pagtiripon. Gusto niang pumondo asin magpahingalo; imbes, nagpadagos sia, na naghahanap nin mga halimbawa asin ilustrasyon sa Kasuratan na makatataros sa puso asin makaparirigon sa boot kan aripompon. Kan banggi kan pagtiripon, an pagal-pagal nang mga magurang na nakaasosyar sa kongregasyon man sanang iyan masosonoan kutana an magkaigwa nin sarong banggi sa harong; imbes, mapasensia nindang inandam an saindang mga aki asin nagduman sa pagtiripon. Pakatapos kan pagtiripon, an sarong grupo nin mga Kristiano pinag-oolayan an pahayag kan magurang sa kongregasyon. An sarong tugang na babae natetentaran na sambiton na sarong beses nakolgan kan tugang man sanang iyan an saiyang boot; imbes, sia entusiastikong nagtaram manongod sa saro sa mga puntong pinalataw nia. Naheheling daw nindo an sarong bagay na yaon sa gabos na senaryong ini?

² An bagay na iyan kaimbodan. An magurang sa kongregasyon maimbod na naghihingoang paglingkodan an aripompon nin Dios; an mga magurang maimbod na nag-aatender sa mga pagtiripon kan kongregasyon; an tugang na babae maimbod na sinusuportaran an kamagurangan. (Hebreo 10:​24, 25; 13:17; 1 Pedro 5:2) Iyo, sa gabos na aspekto nin buhay, naheheling ta an banwaan nin Dios na desididong maglingkod nin maimbod kaiba kan organisasyon ni Jehova.

3. Taano ta mahalagang marhay na kita magdanay na maimbod sa daganon na organisasyon ni Jehova?

³ Kun dinudungaw ni Jehova an marigsok na kinaban na ini, kakadikit na kaimbodan an naheheling nia. (Miqueas 7:2) Sierto nanggad na naggagayagaya an saiyang puso kun namamasdan nia an kaimbodan kan saiyang banwaan! Iyo, an saindo mismong kaimbodan ikinaoogma nia. Minsan siring, iyan ikinaaanggot ni Satanas, an enot na rebelde, asin nagpapatunay na sia putikon. (Talinhaga 27:11; Juan 8:​44) Laoman nindo na hihingoahon ni Satanas na paluyahon an saindong kaimbodan ki Jehova asin sa Saiyang daganon na organisasyon. Pag-olayan niato an nagkapirang paagi na ginigibo ini ni Satanas. Sa siring mas masasabotan ta kun paano kita makapagdadanay na maimbod sagkod sa katapusan.​—2 Corinto 2:​11.

An Pagtorohok sa mga Pagkabakong Sangkap Puedeng Luway-Luway na Raoton an Kaimbodan

4. (a) Taano ta pasil na magin negatibo an pagheling sa mga may autoridad? (b) Paano si Core nagin bakong maimbod sa organisasyon ni Jehova?

⁴ Kun an sarong tugang nasa katongdan na may paninimbagan, an saiyang mga sala tibaad mas naririsa. Kanigoan kapasil na tatsaran ‘an dagami sa mata kan satong tugang mantang dai iniintindi an pasagi sa satong mata’! (Mateo 7:​1-5) Pero, an pagparaisip kan mga sala magpapatubo nin kadaihan nin kaimbodan. Bilang ilustrasyon, horophoropa an pagkakalaen ni Core asin David. Dakula an paninimbagan ni Core, asin posible na sia dakol na taon nang maimbod, alagad sia nagin ambisyoso. Ikinaanggot nia an autoridad ni Moises asin Aaron, na mga primerong pinsan nia. Minsan ngani si Moises an pinakamahoyo sa mga tawo, malinaw na si Core nagpoon na pagparahanapan sia nin sala. Posibleng nahelingan nia nin mga sala si Moises. Minsan siring, an mga sala na idto dai nagtaong katanosan sa kadaihan nin kaimbodan ni Core sa organisasyon ni Jehova. Ginadan sia sa tahaw kan kongregasyon.​—Bilang 12:3; 16:​11, 31-​33.

5. Taano ta tibaad nasugotan si David na magrebelde tumang ki Saul?

⁵ Si David, sa ibong na kampi, naglingkod sakop ni Hadeng Saul. Sarong dating marahay na hade, si Saul sa katunayan nagin maraot. Kaipuhan ni David an pagtubod, pakatagal, asin pagkamapag-imbento pa ngani tanganing makaligtas sa mga pagsalakay kan nag-iimon na si Saul. Pero, kan si David magkaoportunidad na bumalos, sia nagsabi na ‘dai lamang pepensaron, sa punto de vista ni Jehova,’ na gibohon nia an bakong maimbod na akto tumang sa saro na linahidan ni Jehova.​—1 Samuel 26:11.

6. Dawa kun kita may naririsang mga kaluyahan asin sala sa kamagurangan, ano an maninigo na nungka niatong paggibohon?

⁶ Kun an nagkapira na nangengenot sa sato garo baga nasasala sa paghusgar, makolog kun magtaram, o garo baga may paboritismo, magrereklamo daw kita manongod sa sainda, na tibaad nagkokontribwir sa tatsador na espiritu sa kongregasyon? Dai na daw kita maatender sa Kristianong mga pagtiripon bilang pagprotesta? Sierto na dai! Arog ni David, nungkang totogotan ta an mga sala nin iba na pahiroon kitang magin bakong maimbod ki Jehova asin sa saiyang organisasyon!​—Salmo 119:165.

7. Ano an nagkapirang marigsok na gibo na nangyari may koneksion sa templo sa Jerusalem, asin ano an nagin saboot ni Jesus manongod digdi?

⁷ An pinakadakulang tawong halimbawa nin kaimbodan iyo si Jesu-Cristo, na makahulang ilinadawan bilang ‘an maimbod’ ni Jehova. (Salmo 16:10) An marigsok na salang paggamit kan templo sa Jerusalem sierto na ginibong angat an kaimbodan. Aram ni Jesus na an trabaho kan halangkaw na saserdote asin an mga atang ipinanganino an saiya mismong ministeryo asin kagadanan bilang atang, asin aram nia kun gurano kahalaga na makanood digdi an mga tawo. Kaya napano sia nin matanos na kaanggotan kan maheling nia na an templo nagin “lungib nin mga parahabon.” May autoridad na tao nin Dios, duwang beses siang naggibo nin mga paagi na linigon iyan.a​—Mateo 21:​12, 13; Juan 2:​15-​17.

8. (a) Paano si Jesus nagpaheling nin kaimbodan sa areglo sa templo? (b) Paano ta ikapaheheling na inaapresyar ta an pagsamba ki Jehova kaiba kan saiyang malinig na organisasyon?

⁸ Pero, maimbod na sinuportaran ni Jesus an areglo sa templo. Poon kan aki pa, nag-aatender sia sa mga kapiestahan sa templo asin parateng nagtokdo duman. Nagbayad pa ngani sia kan buhis sa templo​—minsan ngani an totoo bako siang obligadong gibohon iyan. (Mateo 17:​24-27) Tinawan ni Jesus nin komendasyon an dukhang balo huli sa pagbugtak kan “saiyang bilog na pagbuhay” sa kaha kan templo. Dai nahaloy, isinikwal nin permanente ni Jehova an templong iyan. Alagad sagkod kaidto, si Jesus maimbod dian. (Marcos 12:​41-44; Mateo 23:38) An daganon na organisasyon nin Dios ngonyan nakalalabi nanggad sa Judiong palakaw kaiba an templo kaiyan. Totoo, iyan bakong sangkap; kaya ngani may mga pagliliwat na ginigibo kun beses. Alagad iyan bako man na tadtad nin karatan, ni sasalidahan iyan ni Jehova Dios. Nungka niatong togotan an ano man na mga pagkabakong sangkap na naririsa niato sa laog kaiyan na ipagraot kan satong boot o magpahiro sa sato na magkaigwa nin tatsador, negatibong espiritu. Imbes, arogon ta an kaimbodan ni Jesu-Cristo.​—1 Pedro 2:21.

An Sato Mismong mga Pagkabakong Sangkap

9, 10. (a) Paano inaaprobetsaran kan palakaw nin mga bagay ni Satanas an satong mga pagkabakong sangkap tanganing pasagadon kitang gumawe na bakong maimbod? (b) Ano an maninigong gibohon nin saro na nakakomitir nin magabat na kasalan?

⁹ Si Satanas naghihingoa man na palakopon an kadaihan nin kaimbodan paagi sa pag-aprobetsar sa satong mga pagkabakong sangkap. An saiyang palakaw nin mga bagay inaaprobetsaran an satong mga kaluyahan, na tinetentaran kitang gibohon an sala sa pagheling ni Jehova. Makamomondo, taon-taon rinibo an napadadara sa inmoralidad. An nagkapira dinudugangan pa an kadaihan nin kaimbodan na ini paagi sa pagkaigwa nin duwang klaseng buhay, na nagpapadagos sa salang gibo mantang nagsasagin na fiel na mga Kristiano. Bilang reaksion sa mga artikulo manongod sa temang ini sa seryeng “Young People Ask . . . ” sa magasin na Awake!, an sarong hoben na babae nagsurat: “An mga artikulo nagsasaysay kan estorya kan sakong buhay.” Sa hilom, nagpatalubo sia nin mga pakikikatood sa mga hoben na mayo nin pagkamoot ki Jehova. An resulta? Sia nagsurat: “Nalaglag an sakong buhay, asin napalabot ako sa inmoralidad asin kinaipuhan na sagweon. Raot na an sakong relasyon ki Jehova, asin nawara na an pagtitiwala kan sakong mga magurang asin kan kamagurangan.”b

¹⁰ An hoben na babaeng ini tinabangan kan kamagurangan asin nagbalik sa maimbod na paglilingkod ki Jehova. Pero, makamomondo, an dakol nagdudusa nin mas maraot na mga resulta, asin an nagkapira nungka nang minabalik sa kongregasyon. Orog karahay nanggad na magin maimbod asin labanan an sugot sa maraot na kinaban na ini! Kuyogon an mga patanid sa mga magasin na An Torrengbantayan asin Awake! dapit sa mga bagay na arog baga kan kinabanon na pag-iriba asin nakararaot na pag-aling-aling. Nungka logod kamong maholog sa bakong maimbod na gawe-gawe. Alagad kun mangyari iyan, nungkang itago an saindong tunay na pagkatawo. (Salmo 26:4) Imbes, patabang kamo. Iyan an dahelan na yaon an Kristianong mga magurang asin kamagurangan.​—Santiago 5:14.

11. Taano ta sala na mansayon an satong sadiri bilang maraot na dai nang paglaom na magbago, asin anong ehemplo sa Biblia an makatatabang sa sato na itanos an satong pagmansay?

¹¹ An mga pagkabakong sangkap niato puedeng isapeligro kita sa saro pang paagi. An nagkapira na nakakokomitir nin akto nin kadaihan nin kaimbodan minaontok na sa paghihingoang paoyonan si Jehova. Girumdomon, si David nakakomitir nin magabat na gayong mga kasalan. Pero, haloy nang panahon pagkagadan ni David, ginirumdom sia ni Jehova bilang fiel na lingkod. (Hebreo 11:32; 12:1) Taano? Huli ta sia nungkang uminontok sa paghihingoang paoyonan si Jehova. An Talinhaga 24:16 nagsasabi: “An matanos puedeng mapukan sagkod sa makapito, asin sia siertong matindog.” Sierto nanggad, kun kita maholog sa saradit na kasalan​—iyo paorootro—​huli sa sarong kaluyahan na linalabanan ta, puede pa kitang magin matanos sa pagheling ni Jehova kun kita padagos na “matindog”​—an boot sabihon, odok sa boot na magsolsol asin ipadagos an dalan nin maimbod na paglilingkod.​—Ikomparar an 2 Corinto 2:7.

Magmaan sa Natatagong mga Porma nin Kadaihan nin Kaimbodan!

12. Sa kaso kan mga Fariseo, paano an matagas, legalistikong punto de vista nagbunga nin kadaihan nin kaimbodan?

¹² An kadaihan nin kaimbodan igwa man nin mas natatagong mga porma. Iyan tibaad magsagin pa nganing kaimbodan! Halimbawa, an mga Fariseo kan kaaldawan ni Jesus posibleng naghona na sinda risang marhay na maimbod.c Alagad dai ninda naheling an kalaenan kan pagigin maimbod asin pagigin dai nagpapahunod na parasusog sa mga reglamentong gibo nin tawo, huli ta sinda matagas asin daing herak na mapaghusgar. (Ikomparar an Eclesiastes 7:16.) Digdi sinda sa totoo bakong maimbod​—sa mga tawo na kutana pinaglilingkodan ninda, sa tunay na kahulogan kan Ley na itinotokdo daa ninda, asin ki Jehova mismo. Al kontraryo, si Jesus maimbod sa tunay na kahulogan kan Ley, na basado sa pagkamoot. Sa siring pinarigon asin inenkaminar nia an mga tawo, siring sa patienot na sinabi kan mga hula manongod sa Mesiyas.​—Isaias 42:3; 50:4; 61:​1, 2.

13. (a) Paano puedeng magin bakong maimbod an Kristianong mga magurang? (b) Taano ta maninigong likayan nin mga magurang an pagigin labi-labi kadaing herak, tatsador, o negatibo sa pagdisiplina sa saindang mga aki?

¹³ An mga Kristiano na may autoridad nakikinabang nin dakula sa arogan na itinao ni Jesus sa bagay na ini. Halimbawa, aram nin maimbod na mga magurang na dapat nindang disiplinahon an saindang mga aki. (Talinhaga 13:24) Pero sineseguro ninda na dai ninda pinaaanggot an saindang mga aki paagi sa daing herak na pagdisiplina na ginigibo sa kaanggotan o paagi sa daing ontok na pagtatsar. An mga aki na nakamamateng dai ninda noarin man mapaooyonan an saindang mga magurang o nakamamate na an pagsamba kan saindang mga magurang garo baga ginigibo sana sindang negatibo asin tatsador puede nanggad na panluyahan nin boot asin, bilang resulta, mapasuhay sa tunay na pagtubod.​—Colosas 3:21.

14. Paano an Kristianong mga pastor mapatutunayan na maimbod sa aripompon na saindang pinaglilingkodan?

¹⁴ Kaagid kaiyan, an Kristianong kamagurangan asin nagbibiaheng mga paraataman tinatawan nin atension an mga problema asin peligro na inaatubang kan aripompon. Bilang maimbod na mga pastor, nagtatao sinda nin hatol kun kaipuhan, na sineseguro na aram nguna ninda an gabos na impormasyon asin maingat na ibinabasar sa Biblia asin sa mga publikasyon kan Sosyedad an saindang sinasabi. (Salmo 119:105; Talinhaga 18:13) Aram man ninda na an mga karnero nagsasarig sa sainda para sa espirituwal na pagparigon asin pagpakakan. Kaya hinihingoa nindang arogon si Jesu-Cristo, an Marahay na Pastor. Sinda maimbod na naglilingkod sa mga karnero serosemana sa Kristianong mga pagtiripon​—bakong pinapaluya sinda kundi, imbes, pinaririgon sinda asin pinakokosog an saindang pagtubod.​—Mateo 20:28; Efeso 4:​11, 12; Hebreo 13:​20, 21.

15. Paano ipinaheling kan nagkapira kaidtong enot na siglo na napasala an saindang kaimbodan?

¹⁵ An saro pang natatagong porma nin kadaihan nin kaimbodan iyo an napapasalang kaimbodan. An tunay na kaimbodan sa pangahulogan kan Biblia dai nagtotogot na ipaorog niato an ano man na debosyon sa satong kaimbodan ki Jehova Dios. An dakol na Judio kan enot na siglo may katagasan na nagdanay sa Ley ni Moises asin sa Judiong palakaw nin mga bagay. Pero nagdatong na an panahon ni Jehova na ibalyo an saiyang bendisyon hale sa rebeldeng nasyon na iyan pasiring sa nasyon nin espirituwal na Israel. Nagkapipira sana an maimbod ki Jehova asin nakibagay sa importanteng pagliliwat na ini. Maski sa tahaw nin tunay na mga Kristiano, an nagkapirang Judaisador nag-insister na bumalik sa “maluya asin dukhang panhababang gradong mga bagay” kan Ley ni Moises, na naotob na ki Cristo.​—Galacia 4:9; 5:​6-12; Filipos 3:​2, 3.

16. Ano an reaksion kan maimbod na mga lingkod ni Jehova sa mga pagliliwat?

¹⁶ Sa kabaliktaran, pinatunayan kan banwaan ni Jehova sa modernong mga panahon na sinda maimbod dawa sa mga panahon nin pagliliwat. Mantang padagos na nagliliwanag an liwanag kan ihinayag na katotoohan, may mga pagliliwat. (Talinhaga 4:18) Dai pa sana nahahaloy, “an fiel asin madonong na oripon” tinabangan kitang pakarhayon an satong pakasabot dapit sa terminong “kapag-arakian” na ginamit sa Mateo 24:34 asin dapit sa panahon kan paghokom sa “mga karnero” asin “mga kanding” na nasambitan sa Mateo 25:​31-46, siring man an satong pagmansay sa nagkapirang klase nin serbisyong sibilyan. (Mateo 24:45) Daing duwa-duwa na naogma kutana an mga apostata kun an dakol sa Mga Saksi ni Jehova matagas na nagdanay sa dating pakasabot sa siring na mga tema asin nagsayumang umoswag. Dai nagkaigwa nin siring kaiyan na reaksion. Taano? An banwaan ni Jehova maimbod.

17. Paano kun beses puedeng baloon nin mga namomotan an satong kaimbodan?

¹⁷ Pero, an bagay dapit sa napasalang kaimbodan tibaad mas personal na makaapektar sa sato. Kun an sarong namomotan na katood o miembro pa ngani kan pamilya pilion an sarong dalan na minalapas sa mga prinsipyo kan Biblia, tibaad an pagmate ta nababanga an satong kaimbodan. Natural sana na kita magmaimbod sa mga miembro kan pamilya. Alagad nungka niatong ipaorog an satong debosyon sa sainda kisa sa satong kaimbodan ki Jehova! (Ikomparar an 1 Samuel 23:​16-​18.) Dai niato tatabangan an mga parakasala na itago an sarong magabat na kasalan ni kakampihan sinda tumang sa kamagurangan na naghihingoang ‘pakarhayon giraray sinda sa espiritu nin kahoyoan.’ (Galacia 6:1) An paggibo kaiyan magigin kadaihan nin kaimbodan ki Jehova, sa saiyang organisasyon, asin sa sarong namomotan. Total, an pag-olang sa nagkasala na mag-ako kan disiplinang kaipuhan nia garo man sana pag-olang na makaabot sa saiya an kapahayagan kan pagkamoot ni Jehova. (Hebreo 12:​5-7) Girumdomon man na “an mga lugad na itinatao nin sarong namomoot fiel.” (Talinhaga 27:6) An prangka, mamomoton na hatol na basado sa Tataramon nin Dios tibaad makalugad sa amor propio kan nagkasalang namomotan, alagad iyan tibaad magligtas nin buhay sa katapustapusi!

An Kaimbodan Nagpapadagos sa Ibong nin Paglamag

18, 19. (a) Ano an gusto ni Acab na gibohon ni Nabot, asin taano ta nagsayuma si Nabot? (b) Bawi daw an kaimbodan ni Nabot? Ipaliwanag.

¹⁸ Kun beses direkta an mga pagsalakay ni Satanas sa satong kaimbodan. Horophoropa an kaso ni Nabot. Kan piriton sia ni Hadeng Acab na ipabakal an saiyang ubasan, sia nagsimbag: “Dai ko man lamang pepensaron, sa punto de vista ni Jehova, na itao ko sa saimo an minanang rogaring kan sakong mga apoon.” (1 Hade 21:3) Bakong matagas an payo ni Nabot; sia maimbod. An Ley ni Moises nagboot na daing Israelita na mapabakal nin minanang rogaring na daga sagkod lamang. (Levitico 25:​23-28) Siertong aram ni Nabot na puede siang ipagadan kan madahas na hadeng ini, huli ta tinogotan na ni Acab an saiyang agom, si Jezabel, na ipagadan an dakol sa mga propeta ni Jehova! Pero marigon na nanindogan si Nabot.​—1 Hade 18:4.

¹⁹ An kaimbodan kun beses may karibay. Si Jezabel, sa tabang nin nagkapirang “lalaking daing data,” putik na pinaluwas na si Nabot may sala sa sarong krimen na dai nia ginibo. Bilang resulta, sia asin an saiyang mga aking lalaki ginaradan. (1 Hade 21:​7-​16; 2 Hade 9:​26) Boot daw sabihon kaiyan na napasala an kaimbodan ni Nabot? Dai! Si Nabot kabilang sa dakol na maimbod na lalaki asin babae na “buhay” sa memorya ni Jehova ngonyan mismo, na ligtas na natotorog sa lolobngan sagkod sa panahon kan pagbuhay liwat.​—Lucas 20:38; Gibo 24:15.

20. Paano kita matatabangan kan paglaom na mapagdanay an satong kaimbodan?

²⁰ An iyo man sanang panuga nagtatao nin garantiya sa mga maimbod ni Jehova ngonyan. Aram ta na an satong kaimbodan tibaad mahal na marhay an karibay sa kinaban na ini. An saiyang buhay an ibinayad ni Jesu-Cristo para sa saiyang kaimbodan, asin sinabihan nia an saiyang mga parasunod na magigin pareho an pagtrato sa sainda. (Juan 15:20) Kun paanong sinusteniran sia kan saiyang paglaom para sa ngapit, kita man sinususteniran kan satong paglaom. (Hebreo 12:2) Sa siring makapagdadanay kitang maimbod sa atubangan nin gabos na klase nin paglamag.

21. Anong mga garantiya an itinatao ni Jehova sa saiyang mga maimbod?

²¹ Totoo, kakadikit sa sato ngonyan an nagdudusa nin siring na direktang mga pagsalakay sa satong kaimbodan. Alagad an banwaan nin Dios tibaad mapaatubang nanggad sa dakol pang paglamag bago dumatong an katapusan. Paano ta masesegurong mapagdanay an satong kaimbodan? Paagi sa pagpapadanay kan satong kaimbodan ngonyan. Tinawan kita ni Jehova nin dakulang sugo​—an paghuhulit asin pagtotokdo manongod sa saiyang Kahadean. Kita maimbod na magdanay sa mahalagang marhay na gibohon na ini. (1 Corinto 15:58) Kun dai niato itotogot na an mga pagkabakong sangkap nin tawo luway-luway na raoton an satong kaimbodan sa organisasyon ni Jehova asin kun magmamaan kita tumang sa natatagong mga porma nin kadaihan nin kaimbodan na arog baga nin napapasalang kaimbodan, kita kun siring magigin mas andam kun baloon nin mas makuri an satong kaimbodan. Sa paano man, permi kitang makaseseguro na si Jehova dai nasusudya an kaimbodan sa saiyang maimbod na mga lingkod. (2 Samuel 22:26) Iyo, iingatan nia an saiyang mga maimbod!​—Salmo 97:10.

[Mga Nota sa Ibaba]

Ano an Isisimbag Nindo?

◻ Paano ta malilikayan na an mga pagkabakong sangkap nin iba darahon kita sa kadaihan nin kaimbodan?

◻ Sa anong mga paagi na kita tibaad darahon sa bakong maimbod na gawe-gawe kan sato mismong mga pagkabakong sangkap?

◻ Paano niato malalabanan an tendensia na mapasala an satong kaimbodan?

◻ Ano an matabang sa sato na mapagdanay an satong kaimbodan dawa sa mga panahon nin paglamag?

[Kahon sa pahina 9]

Paglilingkod nin Maimbod sa Bethel

“Gibohon an gabos na bagay sa disente asin aregladong paagi.” Iyan an isinurat ni apostol Pablo. (1 Corinto 14:40) Aram kaidto ni Pablo na tanganing magpunsionar an sarong kongregasyon, kaipuhan an ‘areglo,’ an pag-organisar. Siring man ngonyan, an kamagurangan kaipuhan na gumibo nin mga desisyon dapit sa praktikal na mga bagay, arog baga kan pag-asignar kan mga miembro kan kongregasyon sa laen-laen na lugar nin pag-adal sa libro, pag-areglo nin mga pagtiripon bago maglingkod sa langtad, asin pagsiyasat sa nakokobrehan na teritoryo. An siring na mga areglo kun beses tibaad mag-atubang nin mga pagbalo sa kaimbodan. An mga iyan bakong pagboot na ipinasabong nin Dios, asin an mga iyan dai makasosono sa mga gusto nin gabos na indibiduwal.

Nagigin angat daw para sa saindo, kun beses, na magin maimbod sa nagkapira sa praktikal na mga areglo sa Kristianong kongregasyon? Kun iyo, tibaad makatabang sa saindo an halimbawa kan Bethel. An ngaran na Bethel, sarong termino sa Hebreo na nangangahulogan “Harong nin Dios,” itinao sa gabos na 104 sangang opisina kan Watch Tower Society, kaiba an opisina prinsipal sa E.U.* An mga boluntaryo na nag-iistar asin nagtatrabaho sa Bethel boot na an mga lugar na ini magpabanaag nin pagtaong onra asin hararom na paggalang ki Jehova. Ini naghahagad nin kaimbodan kan lambang saro.

An mga bisita sa Bethel parateng nagkokomento manongod sa pagkaareglado asin kalinigan na naheheling ninda dian. An mga trabahador organisado asin maogma; an saindang pananaram asin ugale asin pati an saindang itsura nagpapabanaag nin Kristianong konsensia na maygurang asin sinanay sa Biblia. An gabos na miembro nin sarong pamilyang Bethel maimbod na nagsususog sa mga pamantayan kan Tataramon nin Dios.

Dugang pa, an Namamahalang Grupo nagtatao sa sainda nin sarong manwal na may titulong Dwelling Together in Unity, na maboot na nagtatao nin nagkapirang praktikal na areglo na kaipuhan tanganing an siring kadakulang pamilya aregladong makatrabaho nin iriba. (Salmo 133:1) Halimbawa, ipinaliliwanag kaiyan an dapit sa kuarto, pagkakan, kalinigan, gubing asin pag-alinyar, asin kaagid na mga bagay. An mga miembro kan pamilyang Bethel maimbod na nagsusuportar asin nagsususog sa siring na mga areglo, dawa kun tibaad iba man an saindang personal na mga gusto. An pagheling ninda sa manwal na ini, bakong indiperenteng mga susundon asin reglamento, kundi nakatatabang na mga giya na sinadya tanganing paoswagon an pagkasararo asin pagkaoroyon. An mga paraataman maimbod sa pagsuportar sa mga prosedimientong ini na basado sa Biblia, asin ginagamit ninda iyan sa positibong paagi tanganing parigonon asin enkaminaron an pamilyang Bethel na ipadagos an saindang sagradong paglilingkod sa Bethel.

* An imprentahan, opisina, asin mga erokan na ini bakong an dakulang espirituwal na templo, o harong, nin Dios. An espirituwal na templo nin Dios iyo an saiyang areglo para sa dalisay na pagsamba. (Miqueas 4:1) Bilang siring, bako iyan na limitado sa ano man na pisikal na estruktura digdi sa daga.

[Kahon sa pahina 10]

An Loyalista Asin an Legalista

Kaidtong 1916 an Encyclopædia of Religion and Ethics nagsabi na “an kalaenan na ini kan loyalista asin kan legalista puedeng manompongan sa gabos na panahon asin sa gabos na lugar.” Iyan nagpaliwanag: “Yaon an legalista na ginigibo an isinabi sa saiya, daing binabalgang mga reglamento; sia fiel na nagsususog sa tataramon na nasusurat asin mababasa. Yaon an loyalista na ginigibo ini alagad . . . masasarigan sa orog pa, na ibinubugtak an saiyang bilog na isip sa saiyang obligasyon, na pinoporma an saiyang aktitud sono sa intension kan katuyohan na ootobon.” Kan huri, an reperensia man sanang ini nagkomento: “An pagigin maimbod pagigin labi pa sa pagkamakinuyog sa ley. . . . An maimbod na tawo ilinalaen sa tawong makinuyog sa ley bilang saro na naglilingkod sa bilog na puso asin isip . . . Dai nia itinotogot na sia makaginibo nin tuyong mga kasalan nin pakakomitir, kapabayaan, o pagkaignorante.”