Si Jehova—Mamomoton sa Katanosan Asin Hustisya
AN SARONG aking babae sa Sarajevo naghahapot sa sadiri kun taano an mga aki sa saiyang siudad ta kaipuhan na magtios nin grabeng kasakitan. “Mayo man kaming ginibo tanganing magsakit. Mayo kaming sala,” an sabi nia. An nariribok an boot na mga ina sa Argentina nagdedemonstrar sa sarong pampublikong plasa sa Buenos Aires sa laog na nin mga 15 taon, bilang pagprotesta sa pagkawara kan saindang mga aking lalaki. An sarong taga-Aprika na an ngaran Emmanuel, na an ina asin tolong tugang na babae maringis na ginadan durante nin sarong pagputok nin etnikong kadahasan, nag-insistir: “An gabos dapat na mag-ako kan saiyang angay na kabayadan . . . Gusto mi nin hustisya.”
An hustisya saro sa pangenot na mga atributo ni Jehova Dios. “An gabos niang dalan hustisya,” an sabi kan Biblia. Iyo nanggad, si Jehova “mamomoton sa katanosan asin hustisya.” (Deuteronomio 32:4; Salmo 33:5) Tangani na mamidbid nin marhay an Dios, kaipuhan niatong masabotan an saiyang pagkaigwa nin hustisya asin manodan na arogon iyan.—Oseas 2:19, 20; Efeso 5:1.
An satong kaisipan manongod sa hustisya tibaad naimpluwensiahan kan paniniwala nin mga tawo kun ano an kualidad na ini. Sa nagkapirang parte kan kinaban, an hustisya parateng ilinaladawan na sarong natatahoban an matang babae na may kapot na minasbad asin timbangan. Dapat daa na an hustisya nin tawo mayong ipinaoorog, an boot sabihon, buta sa kayamanan o kapangyarihan. Maninigo na maingat na turotimbangon kaiyan an pagkakasala o pagkadaing sala kan akusado. Paagi sa minasbad kaiyan, maninigong protehiran kan hustisya an mayong sala asin padusahan an mga nagkasala.
An librong Right and Reason—Ethics in Theory and Practice nagsasabi na “an hustisya konektado sa ley, obligasyon, mga diretso, asin paninimbagan, patin itinatao an mga sentensia kaiyan sono sa pagkadaing ipinaoorog o sa merito.” Alagad an hustisya ni Jehova labi pang marhay an kahulogan dian. Maheheling niato ini paagi sa paghorophorop sa mga ginibo asin kualidad ni Jesu-Cristo, na arog na gayo sa saiyang langitnon na Ama.—Hebreo 1:3.
An mga tataramon sa Isaias 42:3 iinaplikar ki Jesus kan kagsurat kan Ebanghelyo na si Mateo, na nagsabi: “Mayong nalanog na gaho na saiyang roronoton, asin mayong nagbabagang linong mitsa na saiyang paparongon, sagkod na sia magpaluwas nin hustisya na may kapangganahan.” Ipinahayag ni Jesus an nakararangang mensahe sa mga tawo na arog sa nalanog na gaho na ruyong na asin tinimaktimakan pa. Arog sinda sa nagbabagang mitsa nin lampara, na garo baga an saindang ultimong kilyab nin buhay haros naparong na. Imbes na sa piguratibong pagtaram ronoton an nalanog na mga gaho asin parongon an nagbabagang mga mitsa, naherak si Jesus sa mga nasasakitan, tinokdoan asin pinarahay sinda, asin liniwanag sainda an hustisya ni Jehova Dios. (Mateo 12:10-21) Siring sa pagkahula ni Isaias, an siring na klase nin hustisya nakadadagka nin paglaom.
Pagkaherak Asin Hustisya ni Jehova
An pagkaherak mahalagang kabtang kan hustisya nin Dios. Ini napabantog kan si Jesus uya digdi sa daga. Sangkap niang irinepresentar an mga pamantayan nin Dios sa hustisya asin katanosan. Minsan siring, an Judiong mga eskriba asin Fariseo naghingoang magin matanos paagi sa pagsunod sa sarong estriktong kodigo nin mga ley—na kadaklan sadiri nindang mukna. An saindang legalistikong hustisya parateng hinahale an pagkaherak. An dakol na diskusyon sa pag-oltanan ni Jesus asin kan mga Fariseo nakasentro sa isyung ini: Ano an tunay na hustisya asin katanosan?—Mateo 9:10-13; Marcos 3:1-5; Lucas 7:36-47.
Iinilustrar ni Jesus kun paano tatrataron an iba sa paaging basado sa hustisya asin katanosan. Sarong beses an sarong lalaki na tataong marhay sa Pagboot naghapot ki Jesus kun ano an kaipuhan tanganing magmana nin buhay na daing katapusan. Bilang simbag hinapot sia ni Jesus asin kinomendaran sia kan sia magsimbag na an duwang pinakaimportanteng pagboot iyo na kamotan an Dios sa bilog na puso, kalag, isip, asin kosog nin saro patin kamotan an kataed nin siring sa sadiri. Dangan naghapot an lalaki: “Siisay man nanggad an sakuyang kataed?” Nagsimbag si Jesus paagi sa pagsaysay kan ilustrasyon manongod sa makikatood na Samaritano.—Lucas 10:25-37.
An katanosan asin maheherakon na hustisya ni Jehova ipinaghalimbawa sa ilustrasyon ni Jesus manongod sa Samaritano. Paagi sa mayong kapasloan na pagtabang sa nalugadan na tawo na dai nia midbid, nakagibo an Samaritano nin bagay na matanos, makatanosan, asin maheherakon. Si Jesus mismo nagpaheling nin kaparehong espiritu kan yaon digdi sa daga. Sia matanos asin makatanosan. Dugang pa, itinao nia an saiyang buhay para sa tikapong mga tawo, para sa makasalan asin bakong sangkap na katawohan na may kasakitan, helang, asin kagadanan. Ikinonektar ni apostol Pablo an katanosan sa probisyon na pantubos. Sia nagsurat: “Kun paanong paagi sa sarong paglapas an bunga sa gabos na tawo iyo an silot, siring man paagi sa sarong gibo nin pagpapakangmatanos [o, “sarong matanos na gibo,” nota sa ibaba] an bunga sa gabos na tawo iyo an pagpapahayag sa sainda na matanos para sa buhay.” (Roma 5:18) An “sarong matanos na gibong” ini iyo an paagi nin Dios sa pagligtas sa makinuyog na katawohan gikan sa kapahapahamak na mga resulta kan kasalan ni Adan, na bako sinda an direktang may paninimbagan.
An hustisya nin Dios naghingoa na balukaton an makasalan na mga tawo asin kadungan kaiyan suportaran an matanos na mga prinsipyo. An pag-ignoro sa kasalan nagin kutana kapwa bakong makatanosan asin bakong mamomoton, huli ta inenganyar kutana kaiyan an karatan. Sa ibong na kampi, kun an hustisya nin Dios limitado sana sa pagtao magsalang nin balos o padusa, an situwasyon kan katawohan nagin kutana mayong kaparapaglaom. Sono sa Biblia, “an ibinabayad nin kasalan kagadanan,” asin “mayo nin matanos na tawo, mayo minsan saro.” (Roma 3:10; 6:23) Sa dakulang personal na pagsasakripisyo nia mismo asin kan saiyang namomotan na Aki, itinao ni Jehova an pantubos na atang para sa mga kasalan.—1 Juan 2:1, 2.
Ipinaheheling kan pantubos na an hustisya nin Dios konektadong marhay sa may prinsipyong pagkamoot (sa Griego, a·gaʹpe). Iyo nanggad, an hustisya nin Dios iyo an paggibo kan saiyang matanos na mga prinsipyo—an pagpaheling kan saiyang pamantayan sa moral. Kun siring, kun ginigibo nin Dios, an a·gaʹpe pagkamoot na dian basado an hustisya nin Dios. (Mateo 5:43-48) Kaya kun talagang nasasabotan niato an hustisya ni Jehova, magkakaigwa kita nin lubos na tiwala sa saiyang hudisyal na mga desisyon. Bilang “an Hokom sa bilog na daga,” permi niang ginigibo an tama.—Genesis 18:25; Salmo 119:75.
Arogon an Hustisya ni Jehova
Sinasadol kita kan Biblia na ‘magin mga paraarog sa Dios.’ (Efeso 5:1) Ini nangangahulogan nin pag-arog sa saiyang hustisya saka sa saiyang pagkamoot. Minsan siring, mantang bako kitang sangkap, an satong mga dana bakong siring kalangkaw kan ki Jehova Dios. (Isaias 55:8, 9; Ezequiel 18:25) Kun siring paano kita magigin mamomoton sa katanosan asin hustisya? Paagi sa ‘pagsolog kan bagong pagkatawo, na linalang oyon sa kabotan nin Dios sa tunay na katanosan asin kaimbodan.’ (Efeso 4:24) Sa siring mamomotan niato an namomotan nin Dios asin ikaoongis an ikinaoongis nia. Isinisikwal nin “tunay na katanosan” an kadahasan, inmoralidad, kaatian, asin apostasiya, huli ta binabalga kaini an banal. (Salmo 11:5; Efeso 5:3-5; 2 Timoteo 2:16, 17) Pinahihiro man kita kan diosnon na hustisya na magpaheling nin odok na interes sa iba.—Salmo 37:21; Roma 15:1-3.
Dugang pa, kun pinahahalagahan niato an pagigin maheherakon kan hustisya nin Dios, dai kita magkakaigwa nin tendensia na hokoman an espirituwal na mga tugang na lalaki asin babae. Paano niato mahihimo na masabotan sinda nin siring karahay kan pakasabot ni Jehova? Bako daw na sinda hohokoman niato sono sa sato mismong may kinakampihan na punto-de-vista? Sa siring, nagpatanid si Jesus: “Dai kamo maghokom tanganing dai man kamo hokoman; huli ta an paghokom na ihinohokom nindo, iyo man an ihohokom sa saindo; asin an sokol na isinosokol nindo, iyo man an isosokol ninda sa saindo. Kaya, taano ta naheheling mo an dagami sa mata kan saimong tugang, alagad dai mo hinohorophorop an pasagi na nasa sadiri mong mata? O paano mo masasabi sa saimong tugang, ‘Togoti akong haleon an dagami sa saimong mata’; mantang, uya! may pasagi sa saimo mismong mata? Parasaginsagin! Haleon mo nguna an pasagi sa saimong sadiring mata, dangan malinaw mong maheheling kun paano hahaleon an dagami sa mata kan saimong tugang.” (Mateo 7:1-5) An sadiosan na pagsiyasat sa sato mismong mga pagkabakong sangkap maolang sa sato sa mga paghokom na ibibilang ni Jehova na bakong matanos.
Obligado an nombradong kamagurangan sa kongregasyon na maghokom sa mga kaso nin magabat na pagkakasala. (1 Corinto 5:12, 13) Kun naggigibo kaiyan, ginigirumdom ninda na an hustisya nin Dios naghihingoang magpaheling nin pagkaherak kun posible. Kun mayong basihan para kaiyan—siring sa kaso nin daing pagsolsol na mga nagkasala—dai ikapaheheling an pagkaherak. Alagad dai itinitiwalag kan kamagurangan an nagkasalang iyan sa kongregasyon huli sa pagkabenggatibo. Naglalaom sinda na an mismong pagtiwalag ibabalik sia sa saiyang toltol na pag-isip. (Ikomparar an Ezequiel 18:23.) Sakop kan pagkapayo ni Cristo, an kamagurangan naglilingkod para sa hustisya, asin kabale digdi an pagigin siring sa “pailihan sa doros.” (Isaias 32:1, 2) Kaya kaipuhan sindang magpaheling nin pagkadaing ipinaoorog asin pagkamakatanosan.—Deuteronomio 1:16, 17.
Magtanom nin mga Banhi sa Katanosan
Mantang hinahalat niato an matanos na bagong kinaban nin Dios, kaipuhan na ‘hanapon niato an katanosan’ tanganing magkamit kan pag-oyon nin Dios. (Sofonias 2:3; 2 Pedro 3:13) Magayonon an pagkapahayag kan ideyang ini sa mga tataramon na ini, na yaon sa Oseas 10:12: “Magtanom para sa saindo nin banhi sa katanosan; mag-ani sono sa mamomoton na kabootan. Magkultibar para sa saindo nin matatanoman na daga, mantang igwa pang panahon na hanapon si Jehova sagkod na sia dumatong asin magtokdo sa saindo sa katanosan.”
Sa satong aroaldaw na pamumuhay, igwa kita nin dakol na oportunidad na ‘magtanom nin mga banhi sa katanosan,’ siring sa pagkailustrar ni Jesus sa saiyang parabola manongod sa makikatood na Samaritano. Seseguradohon ni Jehova na kita “mag-ani sono sa mamomoton na kabootan.” Kun danay kitang naglalakaw sa “dalan nin hustisya,” padagos kitang mag-aako nin pagtotokdo sa katanosan sakop kan pamamahala kan Kahadean. (Isaias 40:14) Mantang minaagi an panahon, mayong duwa-duwa na masasabotan niato nin lubos pa na si Jehova mamomoton sa katanosan asin hustisya.—Salmo 33:4, 5.
[Retrato sa pahina 23]
Ipinaghalimbawa kan makikatood na Samaritano an hustisya ni Jehova
[Retrato sa pahina 23]
Naherak si Jesus sa nasasakitan na mga tawo, na arog sa nalanog na mga gaho