Bareta kan mga Parabalangibog kan Kahadean

“An Gabos Mong Togon Katotoohan”

DAI nahaloy bago sia magadan, sinadol ni Moises an banwaan nin Israel na kuyogon an gabos na togon ni Jehova. Sia nagsabi: “Idusay nindo an saindong puso sa gabos na tataramon na itinataram ko sa pagpatanid sa saindo ngonyan, tanganing mapagbotan nindo an saindong mga aki na mag-ingat na otobon an gabos na tataramon kan ley na ini. Huli ta iyan bakong tataramon na daing halaga sa saindo, kundi iyan nangangahulogan kan saindong buhay.”​—Deuteronomio 32:46, 47.

Pakalihis nin ginatos na taon, itinampok kan salmista an halaga kan gabos na katokdoan nin Dios kan sabihon nia: “Harani ka, O Jehova, asin an gabos mong togon katotoohan.” (Salmo 119:151) Kan enot na siglo, nasambitam mismo ni Jesus an halaga kan “lambang tataramon na minaluwas sa ngoso ni Jehova.” (Mateo 4:4) Asin sa paggiya nin Dios si apostol Pablo nagsurat na “an gabos na Kasuratan ipinasabong nin Dios asin kapakipakinabang.”​—2 Timoteo 3:16.

Malinaw nanggad, linalaoman ni Jehova Dios an saiyang mga parasamba na odok sa boot na horophoropon an bilog na mensahe na itinao sa sato sa mga pahina kan saiyang Tataramon. Mayo ni sarong teksto sa Biblia na dai nin halaga. Iyan an saboot kan Mga Saksi ni Jehova manongod sa Tataramon nin Dios, siring sa iiniilustrar kan minasunod na eksperyensia hale sa Mauritius.

Si Mr. D—— nag-iistar sa sarong puerang baryo, kun saen saro siang bantay kun banggi. Sa haloy na panahon, sinsero niang hinanap an tamang paagi nin pagsamba sa Dios. Kan banggi na sia nagbabantay, pinonan niang basahon an Biblia. Pag-abot nin panahon nabasa nia iyan intero. Nanodan nia na an ngaran nin Dios Jehova​—ngaran na minalataw nin dakol na beses sa saiyang Biblia na Hindi. Nanompongan nia na an librong Kapahayagan espesyalmenteng kawiliwili.

Dangan ihinapot nia sa saiyang sadiri kun baga igwa nin relihion na sinusunod an bilog na Biblia. Narisa nia na an mga relihion na midbid nia, sa irarom nin pinakamarahay na mga kamugtakan, mga kabtang sana kan Biblia an sinusunod. An nagkapirang relihion inaako an Hebreong Kasuratan asin sinasayumahan an Kristianong Griegong Kasuratan. An ibang relihion iniignoro an Hebreong Kasuratan, na nag-aatribwir nin praktikal na halaga sa Kristianong Griegong Kasuratan sana.

Sarong aldaw naheling ni Mr. D—— an sarong mag-agom na naooranan asin pinasirong sinda sa saiyang harong. Mga Saksi ni Jehova sinda. Kapot kan agom na babae an librong Revelation​—Its Grand Climax At Hand!a Tolos-tolos na hinagad sa sainda ni Mr. D—— an libro. An mga Saksi naghona na an materyal dapit sa hula sa Kapahayagan hararom na marhay para sa saiya, kaya inalokan na sana sia ninda nin ibang publikasyon. Alagad nag-insister si Mr. D—— na magkaigwa kan librong Revelation.

Kan magkaigwa na sia nin kopya, tolos-tolos niang binasa an libro. Dangan nag-ako sia nin pag-adal sa Biblia kaiba kan Mga Saksi ni Jehova. Dai nahaloy naghanga sia sa bagay na iginagalang na marhay kan mga Saksi an bilog na Biblia. Nagpoon siang umatender nin regular sa mga pagtiripon sa Kingdom Hall kan Mga Saksi ni Jehova, kun saen kapwa an Hebreong Kasuratan asin an Kristianong Griegong Kasuratan maingat na pinag-aadalan. Sia ngonyan saro nang parabalangibog kan Kahadean asin bautisadong miembro kan Kristianong kongregasyon.

[Nota sa ibaba]