Ano an Boot Sabihon kan Pagkamoot sa Dios?

KAIDTONG mga anom na ribong taon na an nakaagi, namundag an enot na omboy na tawo. Pagkamundag nia, an saiyang ina, si Eva, nagsabi: “Nangaki ako nin sarong lalaki sa tabang ni Jehova.” (Genesis 4:1) Ihinahayag kan saiyang sinabi na, minsan ngani kondenado nang magadan huli sa saindang pagrebelde, si Eva asin an agom nia, si Adan, nakaaaram pa man giraray sa pagka-Dios ni Jehova. Paghaloyhaloy nagkaigwa sinda nin ikaduwang aki. An mga aking lalaki nginaranan na Cain asin Abel.

Mantang nagdadakula an mga aking lalaki, sierto na dakol an nanodan ninda manongod sa pagkamoot ni Jehova paagi sana sa pagsiyasat sa saiyang mga linalang. Naggayagaya sinda sa magagayon na kolor sa naturalesa asin sa laen-laen na hayop asin tinanom. Bako sana na sinda tinawan nin Dios nin buhay kundi tinawan man nia sinda kan kakayahan na maogma sa buhay.

Naaraman ninda na an saindang mga magurang linalang na sangkap asin na an orihinal na katuyohan ni Jehova para sa mga tawo mabuhay sagkod lamang. Posible na ilinadawan sa sainda ni Adan asin Eva an magayon na tatamnan nin Eden, asin minsan paano kaipuhan na ipaliwanag ninda kun taano sinda ta pinalayas sa siring na paraisong erokan. Tibaad aram man ni Cain asin Abel an hula nin Dios na nasusurat sa Genesis 3:15. Paagi sa hulang iyan ipinahayag ni Jehova an saiyang katuyohan na itanos an mga bagay sa igong panahon para sa kapakinabangan kan mga namomoot sa saiya asin maimbod sa saiya.

An pakanood manongod ki Jehova asin sa saiyang mga kualidad seguradong nakapukaw kan pagmawot ni Cain asin Abel kan pag-oyon nin Dios. Kaya nagdolok sinda ki Jehova paagi sa pagtao nin mga dolot sa saiya. An tala kan Biblia nagsasabi: “Nangyari na pakalihis nin kadikit na panahon si Cain nagdara nin mga bunga kan daga bilang dolot ki Jehova. Alagad kun dapit ki Abel, sia man nagdara kan mga matuang ogbon kan saiyang kahayopan, pati an matatabang pidaso kaiyan.”​—Genesis 4:​3, 4.

An pagmawot ninda kan pag-oyon nin Dios nag-establisar nin pasisikadan para sa relasyon sa saiya. An naabtan ni Cain pagrebelde tumang sa Dios, mantang si Abel nagpadagos na motibaron nin tunay na pagkamoot sa Dios. Nungka na makapatatalubo si Abel nin siring na relasyon sa Dios kun dai nguna sia nagkaigwa nin kaaraman manongod sa personalidad ni Jehova asin sa saiyang mga katuyohan.

Puede man nindong mamidbid si Jehova. Halimbawa, sa Biblia puede nindong manodan na an Dios sarong tunay na persona, bako sanang daing buhay na puersa na naglalalang nin mga bagay paagi sa aksidente sana. (Ikomparar an Juan 7:​28; Hebreo 9:​24; Kapahayagan 4:11.) Itinotokdo man kan Biblia na si Jehova “Dios na maheherakon asin maugayon, maluway sa pagkaanggot asin mayaman sa mamomoton na kabootan asin katotoohan.”​—Exodo 34:6.

“An Pagkuyog Orog na Marahay Kisa sa Pag-atang”

Siring sa iiniilustrar kan tala manongod ki Cain asin Abel, bakong igo an pagkaigwa nin kaaraman manongod sa Dios asin pagmawot nin dayupot na relasyon sa saiya. Totoo, an duwang magtugang duminolok sa Dios dara an mga dolot. Pero, “mantang pinagheheling ni Jehova na may pag-oyon si Abel asin an saiyang dolot, dai nia hineling na may ano man na pag-oyon si Cain asin an saiyang dolot. Asin si Cain naanggot na marhay, asin an saiyang lalauogon nagpoon na magmurusdot.”​—Genesis 4:​3-5.

Taano ta hinaboan ni Jehova an atang ni Cain? May diperensia daw an kualidad kan saiyang dolot? Naanggot daw si Jehova ta an idinolot ni Cain “mga bunga kan daga” imbes na atang na hayop? Dai man. Kan huri, maogmang inako nin Dios an mga dolot na tipasi asin iba pang bunga kan daga gikan sa dakol na nagsasamba sa saiya. (Levitico 2:​1-16) Malinaw kun siring na may diperensia an puso ni Cain. Nababasa ni Jehova an puso ni Cain asin ini pinatanidan nia: “Taano ta naaanggot kang marhay asin taano ta murusdot an saimong lalauogon? Kun ika magibo nin marahay, dai daw magkakaigwa nin pag-omaw? Alagad kun dai ka magibo nin marahay, igwa nin kasalan na naglulukob sa tata, asin ika an minamawot kaiyan.”​—Genesis 4:​6, 7.

An kahulogan nin tunay na pagkamoot sa Dios labi pa sa pagdolot sana nin mga atang. Iyan an dahelan na pinarigon ni Jehova an boot ni Cain na ‘gumibo nin marahay.’ An boot nin Dios pagkuyog. An siring na pagkuyog sa Dios nakatabang kutana ki Cain na magkaigwa nin marahay na pundasyon para sa mamomoton na relasyon sa Kaglalang. Idinodoon kan Biblia an halaga nin pagkuyog paagi sa mga tataramon na ini: “Igwa daw nin pagkaogma si Jehova sa tinutong na mga dolot asin atang na arog kan sa pagkuyog sa tingog ni Jehova? Uya! An pagkuyog orog na marahay kisa sa pag-atang, an pagtao nin atension kisa sa taba nin mga karnero.”​—1 Samuel 15:22.

An ideyang ini kan huri naparigon na marhay paagi sa mga tataramon kan 1 Juan 5:​3: “Ini iyo an boot sabihon kan pagkamoot sa Dios, na kuyogon niato an saiyang mga togon; pero an saiyang mga togon bakong magabat.” Mayo na nin mas marahay na paagi na ikapaheling an satong pagkamoot ki Jehova kisa sa pagpasakop sa saiyang autoridad. Ini nangangahulogan nin pagkuyog sa moral na mga ley sa Biblia. (1 Corinto 6:​9, 10) Iyan nangangahulogan nin pagkamoot sa marahay asin pagkaongis sa maraot.​—Salmo 97:​10; 101:​3; Talinhaga 8:13.

An sarong mahalagang kapahayagan kan satong pagkamoot sa Dios iyo an satong pagkamoot sa kataed. Sinasabi sa sato kan Biblia: “Kun an siisay man nagsasabi: ‘Namomoot ako sa Dios,’ pero naoongis sia sa saiyang tugang, sia putikon. Huli ta an dai namomoot sa saiyang tugang, na saiyang naheheling, dai makakahimong mamoot sa Dios, na dai nia naheheling.”​—1 Juan 4:20.

Posible an Pagigin Dayupot sa Dios

An iba tibaad magsabi, ‘Sinasamba ko si Jehova. Kinukuyog ko an saiyang mga ley. Tinatrato kong may katanosan an sakong kapwa. Ginigibo ko gabos iyan. Pero, an pagmate ko bako pa talaga akong harani sa Dios. Dai ako nakamamate nin makosog na pagkamoot sa saiya, asin huli kaiyan nakamamate ako nin sala.’ An iba tibaad isipon na dai sinda angay na magkaigwa nin siring na dayupot na relasyon ki Jehova.

Pakalihis nin haros 37 taon nin dusay na paglilingkod ki Jehova, an sarong Kristiano nagsurat: “Dakol na beses sa sakong buhay na an pagmate ko garo mekanikal an sakong paglilingkod ki Jehova, na seguro mayo ngani dian an sakong puso. Alagad aram ko na an paglilingkod ki Jehova iyo an tamang gibohon, asin dai ko itotogot na ako pumondo. Minsan siring, kada makabasa ako manongod sa saro na nagsasabi na an saiyang ‘puso pano nin pagkamoot ki Jehova,’ iniisip-isip ko, ‘Ano an diperensia ko, ta nungka kong namatean an arog kaiyan?’” Paano daw kita magigin dayupot sa Dios?

Kun an saro talagang namomotan nindo, parate nindong iniisip an sarong iyan. Makosog an kamawotan nindo na magin harani sa saiya huli ta kamo may pagmakolog sa saiya. Mientras na sia orog nindong naheheling, nakakaolay, asin iniisip-isip, orog man na nagtatalubo an saindong pagkamoot sa saiya. An prinsipyong ini aplikado man sa pagpatalubo nindo nin pagkamoot sa Dios.

Sa Salmo 77:​12, an pinasabngan na parasurat nagsabi: “Hohorophoropon ko an gabos mong gibo, asin tatawan ko nin atension an saimong mga ginibo.” An paghorophorop mahalagang marhay sa pagpatalubo nin pagkamoot para sa Dios. Ini nangorognang totoo huli sa bagay na sia dai naheheling. Alagad mientras na sia orog nindong iniisip-isip, sia orog man na magigin tunay para sa saindo. Saka sana kamo makapatatalubo nin odok sa puso asin mapagpadangat na relasyon sa saiya​—huli ta sia tunay para sa saindo.

An tendensia nindo na parateng horophoropon an mga dalan asin ginibo ni Jehova madepende sa kun gurano kamo kaparateng naghihinanyog sa saiya. Kamo naghihinanyog paagi sa regular na pagbasa asin pag-adal kan saiyang Tataramon, an Biblia. An salmista nagtataram manongod sa tawong maogma bilang saro na an “kaogmahan yaon sa ley ni Jehova, asin sa saiyang ley sia nagbabasa sa maluya sanang tingog aldaw asin banggi.”​—Salmo 1:​1, 2.

An saro pang mahalagang elemento iyo an pamibi. Iyan an dahelan na paorootro kitang sinasadol kan Biblia na mamibi​—“sa gabos na panahon,” na ‘nagdudusay nin panahon sa pamibi,’ ‘nagmamaigot sa pamibi,’ asin ‘namimibi nin daing ontok.’ (Efeso 6:​18; 1 Corinto 7:​5; Roma 12:​12; 1 Tesalonica 5:17) An satong daing ontok na mga pamibi ki Jehova magpapangyari na kita kamotan nia, asin an kasiertohan na sia naghihinanyog irarani kita sa saiya. Ini pinatunayan kan salmista, kan sia magsabi: “Namomoot ako, huli ta dinadangog ni Jehova an sakong tingog, an sakong mga pagngayongayo. Huli ta ikiniling nia sa sako an saiyang talinga, asin sa gabos kong aldaw mag-aarang ako.”​—Salmo 116:​1, 2.

Pag-arog sa Dios nin Pagkamoot

Si Jehova maboot sa sato. Bilang Kaglalang kan uniberso, tunay na kadakol kan dapat niang isaisip asin asikasohon. Pero, sinasabi sato kan Biblia na minsan ngani sia dakulaon, pinagmamakolgan pa man giraray nia an saiyang linalang na mga tawo. Namomotan nia kita. (1 Pedro 5:​6, 7) Pinatutunayan ini kan salmista paagi sa saiyang mga tataramon: “O Jehova na samong Kagurangnan, kanigoan kadakula kan saimong ngaran sa bilog na daga, ika na an dignidad ipinahahayag sa itaas nin kalangitan! Kun naheheling ko an saimong kalangitan, an mga gibo kan saimong mga moro, an bulan asin mga bitoon na saimong hinaman, ano an magagadanon na tawo ta sia ginigirumdom mo, asin an aki nin daganon na tawo ta sia inaataman mo?”​—Salmo 8:​1, 3, 4.

Paano ginigirumdom ni Jehova an magagadanon na tawo? An Biblia minasimbag: “Huli kaini nahayag sa sato an pagkamoot nin Dios, huli ta sinugo nin Dios an saiyang Aking bugtong sa kinaban tanganing kita magkamit nin buhay paagi sa saiya. An pagkamoot sa bagay na ini, bakong huli ta kita namoot sa Dios, kundi na sia namoot sa sato asin isinugo an saiyang Aki bilang pampagian nin boot na atang para sa satong mga kasalan.”​—1 Juan 4:​9, 10.

Paano na an pampagian nin boot na atang na ini pinakadakulang ebidensia kan pagkamoot nin Dios? Horophoropon niato an nangyari sa tatamnan nin Eden. Si Adan asin Eva napaatubang sa desisyon kun baga mapasakop sa ley ni Jehova na may paglaom sa sangkap na buhay sagkod lamang o marebelde tumang ki Jehova na kagadanan an bunga. Pinili nindang magrebelde. (Genesis 3:​1-6) Sa paggibo kaiyan kinondenar man ninda sa kagadanan an bilog na katawohan. (Roma 5:12) May kapangahasan na hinale ninda sa sato an oportunidad na kita mismo an magdesisyon. Mayo sa sato na may nasabi sa bagay.

Minsan siring, mamomoton na ginirumdom ni Jehova an magagadanon na tawo, na minimidbid an saiyang masakit na kamugtakan. Paagi sa kagadanan bilang atang kan Saiyang Aki, si Jesu-Cristo, itinao ni Jehova an legal na basihan na an kada saro sa sato magsadiring pumili nin buhay o kagadanan, pagkuyog o pagrebelde. (Juan 3:16) Garo baga itinao sa sato ni Jehova an sadiri niatong aldaw na umatubang sa husgado​—an oportunidad na bumuelta sa Eden, sabi ngani, asin magdesisyon nin sadiri. Ini an kadarudakulaing kapahayagan nin pagkamoot kasuarin pa man.

Isip-isipa an kolog na tinagalan ni Jehova mantang pinagheheling nia an saiyang panganay na iniinsulto, pinasasakitan, asin ipinapako na garo kriminal. Asin tinagalan iyan nin Dios para sa sato. An pakaaram niato kan inisyatiba ni Jehova na iyo an umenot na kamotan kita maninigo man na magmotibar sa sato na kamotan sia asin dumagka sa sato na hanapon sia. (Santiago 1:​17; 1 Juan 4:19) Inaagda kita kan Biblia na “hanapa nindo si Jehova asin an saiyang kosog. Danay na hanapon an saiyang lalauogon. Girumdoma nindo an makangangalas na mga gibo na saiyang ginibo, an saiyang mga milagro asin an hudisyal na mga desisyon kan saiyang ngoso.”​—Salmo 105:​4, 5.

An pagkaigwa nin personal na kadayupotan asin mamomoton na relasyon sa Dios, an pagigin katood nia, bakong harayo sa katunayan. Iyan puedeng kamtan. Totoo, dai niato estriktong ikababaing an pagkamoot niato sa Dios sa mga relasyon sa tawo. An pagkamoot na namamatean niato para sa satong agom, mga magurang, tugang, aki, o katood laen man sa pagkamoot niato sa Dios. (Mateo 10:​37; 19:29) An pagkamoot ki Jehova kalabot an satong debosyon, pagsamba, asin daing kondisyon na pagdusay sa saiya. (Deuteronomio 4:24) Mayo nin ibang relasyon na igwa nin siring na mga implikasyon. Pero, puede kitang magpatalubo nin makosog asin hararom na mga emosyon para sa Dios sa may pagsambang paagi, may paghanga saka takot.​—Salmo 89:7.

Minsan ngani bakong sangkap, arog ni Cain asin Abel yaon sa saindo an potensial na kamotan an saindong Kaglalang. Si Cain puminili, uminiba ki Satanas, asin nagin an enot na tawong paragadan. (1 Juan 3:12) Kabaliktaran, si Abel gigirumdomon ni Jehova bilang tawong may pagtubod asin katanosan patin babalosan nin buhay sa nagdadangadang na Paraiso.​—Hebreo 11:4.

Makapipili man kamo. Sa tabang kan espiritu nin Dios asin kan saiyang Tataramon, puede nindong talagang kamotan an Dios ‘sa bilog nindong puso asin sa bilog nindong kalag patin sa bilog nindong kosog.’ (Deuteronomio 6:5) Si Jehova man padagos na mamomoot sa saindo, huli ta sia “an parabalos sa mga maigot na naghahanap sa saiya.”​—Hebreo 11:6.

[Retrato sa pahina 7]

Inako nin Dios an atang ni Abel