Harani Na an Kapangganahan kan Tunay na Pagsamba
“Si Jehova kaipuhan na magin hade sa bilog na daga.”—ZACARIAS 14:9.
1. Ano an naeksperyensiahan kan linahidan na mga Kristiano kaidtong Guerra Mundial I, asin paano ini ihinula?
KAIDTONG enot na guerra mundial, an linahidan na mga Kristiano nagtios nin dakol na kasakitan asin pagkabilanggo sa kamot kan naggeguerrang mga nasyon. Nalimitaran na marhay an saindang mga atang nin pag-omaw ki Jehova, asin namugtak sinda sa espirituwal na pagkabihag. Ini gabos ihinula sa Zacarias 14:2, na naglaladawan nin internasyonal na pagsalakay sa Jerusalem. An siudad sa hulang ini iyo an “langitnon na Jerusalem,” an langitnon na Kahadean nin Dios asin an namumugtakan kan “trono nin Dios asin kan Kordero.” (Hebreo 12:22, 28; 13:14; Kapahayagan 22:3) An mga linahidan nin Dios digdi sa daga nagrepresentar sa siudad na iyan. An mga fiel sa sainda nakaligtas sa pagsalakay, na nagsayumang madistiero hale “sa siudad.”a
2, 3. (a) Paano nanggana an pagsamba ki Jehova poon kan 1919? (b) Poon kan 1935, ano an nangyari?
2 Kan 1919 an fiel na mga linahidan nakatalingkas sa saindang bihag na kamugtakan, asin inaprobetsaran tolos ninda an panahon nin katoninongan na kasunod kan guerra. Bilang mga embahador kan langitnon na Jerusalem, inaprobetsaran ninda an dakulang oportunidad na ihulit an maogmang bareta kan Kahadean nin Dios asin tumabang sa pagtipon sa ultimong mga miembro kan 144,000. (Mateo 24:14; 2 Corinto 5:20) Kan 1931 inako ninda an angay na Makakasuratan na ngaran na Mga Saksi ni Jehova.—Isaias 43:10, 12.
3 Poon kaidto, an linahidan na mga Saksi nin Dios nungka na nagsalingoy. Minsan si Hitler kaiba an saiyang Nazistang politikal asin militar na organisasyon dai sinda kayang pasilensiohon. Sa ibong nin paglamag na lakop sa kinaban, an saindang gibohon nagbunga sa bilog na daga. Partikularmente poon kan taon 1935, inibanan sinda kan internasyonal na “dakulang kadaklan,” na ihinula sa librong Kapahayagan. An mga ini dusay man, bautisadong mga Kristiano asin “hinugasan ninda an saindang mga gubing asin pinaputi iyan sa dugo kan Kordero,” si Jesu-Cristo. (Kapahayagan 7:9, 14) Minsan siring, sinda mga bakong linahidan, na may paglaom sa langitnon na buhay. An paglaom ninda manahon an nawara ki Adan asin Eva, arin na baga, an sangkap na buhay na tawo sa sarong paraisong daga. (Salmo 37:29; Mateo 25:34) Ngonyan, an dakulang kadaklan may kabilangan na labing limang milyon na kalag. An tunay na pagsamba ki Jehova nanggagana, pero sa ngapit pa an ultimong kapangganahan kaiyan.
Mga Tagaibang Daga sa Espirituwal na Templo nin Dios
4, 5. (a) Saen si Jehova sinasamba kan dakulang kadaklan? (b) Anong mga pribilehio an nakakamtan ninda, asin bilang kaotoban kan anong hula?
4 Arog kan ihinula, an dakulang kadaklan “nagsasamba [sa Dios] aldaw asin banggi sa saiyang templo.” (Kapahayagan 7:15, nota sa ibaba) Mantang sinda bakong espirituwal, makasaserdoteng mga Israelita, posibleng naheling sinda ni Juan na nagtitindog sa templo sa mas nasa luwas na patyo kan mga Hentil. (1 Pedro 2:5) Nagin nanggad mamurawayon an espirituwal na templo ni Jehova, na an mga palibot kaiyan pano kaining dakulang kaburunyogan na, kaiba kan natatada sa espirituwal na Israel, nag-oomaw sa saiya!
5 An dakulang kadaklan dai naglilingkod sa Dios sa kamugtakan na ilinadawan kan mas nasa laog na patyo kan mga saserdote. Sinda dai ipinahahayag na matanos sa katuyohan na magin inampon, espirituwal na mga aki nin Dios. (Roma 8:1, 15) Minsan siring, paagi sa paggibo nin pagtubod sa pantubos ni Jesus, sinda may malinig na kamugtakan sa atubangan ni Jehova. Sinda ipinahahayag na matanos sa katuyohan na magin saiyang mga katood. (Ikomparar an Santiago 2:21, 23.) Sinda may pribilehio man na magdolot nin inaakong mga atang sa espirituwal na altar nin Dios. Sa siring, sa dakulang kadaklan na ini, an hula kan Isaias 56:6, 7 nagkakaigwa nin mamuraway na kaotoban: “An mga tagaibang daga na nagdorolok ki Jehova tanganing maglingkod sa saiya asin kamotan an ngaran ni Jehova, . . . dadarahon ko man sinda sa sakong banal na bukid asin pagagayagayahon ko sinda sa laog kan sakong harong nin pamibi. An saindang bilog na mga dolot na tinotong asin an saindang mga atang aakoon sa sakong altar. Huli ta an sadiri kong harong aapodon na harong nin pamibi para sa gabos na banwaan.”
6. (a) Anong klaseng mga atang an idinodolot kan mga tagaibang daga? (b) Ano an ipinagigirumdom sa sainda kan lalagan nin tubig sa patyo kan mga saserdote?
6 Kabilang sa mga atang na idinodolot kan mga tagaibang dagang ini “an bunga nin mga ngabil [na siring sa pino an pagkagibong mga dolot na tipasi] na nagpapahayag sa publiko kan . . . ngaran” nin Dios asin “an paggibo nin marahay asin an paghiras nin mga bagay sa iba.” (Hebreo 13:15, 16) An dakulang lalagan nin tubig na kaipuhan na gamiton kan mga saserdote sa paghanaw mahalaga man na pagirumdom sa mga tagaibang dagang ini. Sinda man dapat na umagi sa espirituwal asin moral na paglinig mantang progresibong orog na linilinaw sa sainda an Tataramon nin Dios.
An Banal Asin an mga Kasangkapan Dian
7. (a) Paano minamansay kan dakulang kadaklan an mga pribilehio kan banal na pagkasaserdote? (b) Anong dugang na mga pribilehio an inako kan ibang tagaibang daga?
7 Igwa daw nin kahulogan an Banal asin an mga kasangkapan dian para sa dakulang kadaklan na ini nin mga tagaibang daga? Bueno, nungka na sinda mapapasa kamugtakan na ilinaladawan kan Banal. Sinda dai namumundag giraray bilang espirituwal na mga aki nin Dios na may langitnon na pagkasiudadano. Sinda daw nakamamate nin pagkauri o pagkaara huli kaini? Dai. Imbes, sinda naggagayagaya sa saindang pribilehio na suportaran an natatada kan 144,000, asin nagpapaheling sinda nin hararom na pag-apresyar sa katuyohan nin Dios sa pag-ampon sa espirituwal na mga aking ini, na makikiiba ki Cristo sa pagdara kan katawohan sa pagkasangkap. Saro pa, an dakulang kadaklan nin mga tagaibang daga minamahal an dakulang dai na kutana maninigong kabootan nin Dios sa pagtao sa sainda nin daganon na paglaom na buhay na daing katapusan sa Paraiso. An iba sa mga tagaibang dagang ini, kapareho kan mga Netineo kan suanoy, tinawan nin mga pribilehio sa pangangataman sa pagtabang sa banal na pagkasaserdote.b (Isaias 61:5) Hale sa tahaw kan mga ini si Jesus nagnonombra nin “mga prinsipe sa bilog na daga.”—Salmo 45:16.
8, 9. Ano an pakinabang na nakukua kan dakulang kadaklan sa paghorophorop sa mga kasangkapan sa Banal?
8 Minsan ngani nungka sindang malaog sa antitipikong Banal, an dakulang kadaklan nin mga tagaibang daga nakanonood nin mahahalagang leksion sa mga kasangkapan dian. Kun paanong an kandelero nagkaipo nin daing ontok na suplay nin lana, an mga tagaibang daga nagkakaipo man nin banal na espiritu na matabang sa sainda na masabotan an progresibong mga katotoohan gikan sa Tataramon nin Dios, na pinaaagi sa “fiel asin madonong na oripon.” (Mateo 24:45-47) Dugang pa, an espiritu nin Dios nagtatabang sa sainda na kumuyog sa pangagdang ini: “An espiritu asin an nobya [an linahidan na natatada] padagos na nagsasabi: ‘Madia!’ Asin an siisay man na makadangog magsabi: ‘Madia!’ Asin an siisay man na napapaha dumolok; an siisay man na boot kumua kan tubig nin buhay na daing bayad.” (Kapahayagan 22:17) Sa siring, an kandelero nagpapagirumdom sa dakulang kadaklan kan saindang obligasyon na sumirang bilang mga Kristiano asin likayan an ano man sa gawe, kaisipan, tataramon, o gibo na makapamomondo sa banal na espiritu nin Dios.—Efeso 4:30.
9 An lamesa kan dolot na tinapay nagpapagirumdom sa dakulang kadaklan na tanganing magdanay na mabagsik an salud sa espirituwal, sinda dapat na dayaday na kumakan nin espirituwal na kakanon hale sa Biblia asin hale sa mga publikasyon kan “fiel asin madonong na oripon.” (Mateo 4:4) An altar nin insenso nagpapagirumdom sa sainda kan halaga nin odok na pamimibi ki Jehova para sa tabang tangani na mapagdanay an saindang integridad. (Lucas 21:36) Maninigong kaiba sa saindang mga pamibi an odok sa pusong mga kapahayagan nin pag-omaw asin pagpasalamat. (Salmo 106:1) An altar nin insenso nagpapagirumdom man sa sainda kan pangangaipo na omawon an Dios sa ibang mga paagi, arog baga kan saindang bilog na pusong pagkanta kan mga awit na pan-Kahadean sa Kristianong mga pagtiripon asin kan saindang pag-andam na marhay na makatao nin epektibong ‘pagpahayag sa publiko para sa kaligtasan.’—Roma 10:10.
An Lubos na Kapangganahan nin Tunay na Pagsamba
10. (a) Anong marahayon na ngapit an malalaoman niato? (b) Ano an dapat ngunang mangyari?
10 Ngonyan “dakol na banwaan” hale sa gabos na nasyon an nagduduruman sa harong nin pagsamba ki Jehova. (Isaias 2:2, 3) Pinatutunayan ini, an Kapahayagan 15:4 nagsasabi: “Siisay nanggad an dai matatakot sa saimo, Jehova, asin magpapamuraway kan saimong ngaran, huli ta ika sana an maimbod? Huli ta an gabos na nasyon madolok asin masamba sa atubangan mo, huli ta an saimong matanos na mga pagboot nahayag na.” Ilinaladawan kan Zacarias kapitulo 14 an kasunod. Sa harani nang ngapit, an maraot na kaisipan kan mayoriya sa mga tawo digdi sa daga makaaabot sa kulminasyon mantang sinda nagtitiripon sa kahurihurihi tanganing makilaban tumang sa Jerusalem—an mga representante sa daga kan langitnon na Jerusalem. Dangan mahiro si Jehova. Bilang Guerrerong Dios, sia “maluwas nanggad asin makikilaban tumang sa mga nasyon na idto” na nangahas na gumibo kan pagsalakay na ini.—Zacarias 14:2, 3.
11, 12. (a) Ano an magigin reaksion ni Jehova sa nagdadangadang na panglobong pagsalakay sa mga parasamba sa saiyang templo? (b) Ano an magigin resulta kan pakikilaban nin Dios?
11 “Iyo ini an magigin damat na ipandadamat ni Jehova sa gabos na banwaan na makikilaban tumang sa Jerusalem: Malalapa an laman nin saro, mantang an saro nagtitindog sa saiyang mga bitis; asin an mismong mga mata nin saro malalapa sa namumugtakan kaiyan, asin an mismong dila nin saro malalapa sa saiyang ngoso. Asin mangyayari sa aldaw na iyan na an karibarawan gikan ki Jehova magigin lakop sa tahaw ninda; asin totoo nanggad na kakapotan ninda, kan lambang saro an kamot kan saiyang kaiba, asin an saiyang kamot totoong ibibingat tumang sa kamot kan saiyang kaiba.”—Zacarias 14:12, 13.
12 Kaipuhan na halaton niatong maheling kun baga literal o piguratibo an damat na ini. Minsan siring, sarong bagay an segurado. Mantang an mga kaiwal nin Dios naghihiro tanganing gibohon an saindang panglobong pagsalakay sa mga lingkod ni Jehova, oolangon sinda nin kahangahangang mga pagpapaheling kan makakamhan sa gabos na kapangyarihan nin Dios. Pasisilensiohon an saindang mga ngoso. An mangyayari garo nalapa an saindang mga dila na pantumang. An sararo nindang pasohan magigin malibog sa saindang pagheling, na garo baga nalapa an saindang mga mata. An pisikal nindang mga puersa, na nagpakosog kan saindang boot na sumalakay, mawawara. Sa karibarawan, bibirikan ninda an lambang saro na may grabeng garadanan. Sa siring mapapara an gabos na daganon na kaiwal kan pagsamba sa Dios. Sa katapustapusi, an gabos na nasyon napiritan nang midbidon an unibersal na soberaniya ni Jehova. Maootob an hula: “Si Jehova kaipuhan na magin hade sa bilog na daga.” (Zacarias 14:9) Pakalihis kaiyan, si Satanas asin an saiyang mga demonyo gagaposon sa pagpoon kan Sangribong Taon na Paghade ni Cristo na may tagamang darakulang bendisyon sa katawohan.—Kapahayagan 20:1, 2; 21:3, 4.
An Daganon na Pagkabuhay Liwat
13. Sairisay an mga “natatada sa gabos na nasyon”?
13 An hula ni Zacarias nagpapadagos sa kapitulo 14, bersikulo 16: “Mangyayari na, kun dapit sa gabos na natatada sa gabos na nasyon na minaabot tumang sa Jerusalem, sinda kaipuhan man na magturukad taon-taon tanganing maghorohod sa Hade, si Jehova kan mga hukbo, asin magselebrar kan kapiestahan nin mga payag-payag.” Sono sa Biblia, an gabos na tawong buhay ngonyan na padagos na nabubuhay sagkod sa katapusan kan maraot na palakaw na ini asin hinokoman na mga kaiwal nin tunay na pagsamba magtitios kan “hudisyal na padusa na daing katapusan na pagkalaglag.” (2 Tesalonica 1:7-9; helingon man an Mateo 25:31-33, 46.) Dai sinda bubuhayon liwat. Kun siring, posible na kaiba sa mga ‘natatada’ an mga miembro kan mga nasyon na nagadan bago an pangultimong pakikilaban nin Dios asin may basado sa Bibliang paglaom sa pagkabuhay liwat. “An oras maabot,” an panuga ni Jesus, “na an gabos na nasa mga lolobngan nin girumdoman makadadangog kan saiyang tingog asin maruluwas, idtong naggiribo nin marahay sa pagkabuhay liwat sa buhay, idtong naggiribo nin maraot sa pagkabuhay liwat sa paghokom.”—Juan 5:28, 29.
14. (a) Ano an dapat na gibohon nin mga binuhay liwat tanganing magkamit nin buhay na daing katapusan? (b) Ano an mangyayari sa siisay man na habong idusay an sadiri ki Jehova asin gumibo nin tunay na pagsamba?
14 An gabos na binuhay liwat na ini dapat na may gibohon tangani na an saindang pagkabuhay liwat magin sa buhay asin bakong sa paghokom na bakong paborable. Sinda dapat na magduman sa daganon na mga patyo kan templo ni Jehova asin maghorohod sa pagdusay sa Dios paagi ki Jesu-Cristo. An siisay man na binuhay liwat na habong gumibo kaini magtitios kan damat na uminabot sa mga nasyon sa presenteng aldaw. (Zacarias 14:18) Siisay baga an nakaaaram kun pirang binuhay liwat an maogmang maiba sa dakulang kadaklan sa pagselebrar kan antitipikong Kapiestahan nin mga Payag-Payag? Daing duwa-duwa, magkakaigwa nin dakol, asin an dakulang espirituwal na templo ni Jehova magigin orog pang mamuraway bilang resulta!
An Antitipikong Kapiestahan nin mga Payag-Payag
15. (a) Ano an pambihirang mga aspekto kan suanoy na Kapiestahan nin mga Payag-Payag sa Israel? (b) Taano ta idinodolot an 70 toro sa panahon kan kapiestahan?
15 Kada taon, an suanoy na Israel obligadong magselebrar kan Kapiestahan nin mga Payag-Payag. Iyan naglalawig nin sarong semana asin minaabot sa pagtatapos kan pagsaray kan saindang inani. Idto magayagayang panahon nin pagpasalamat. Sa laog kan semana, sinda kaipuhan na mag-istar sa temporaryong mga payag-payag na nalilipodan nin mga dahon nin kahoy, nangorogna an mga sanga nin palma. An kapiestahan na ini nagpagirumdom sa Israel kun paano ilinigtas nin Dios an saindang mga apoon sa Egipto asin kun paano nia sinda inataman kan sinda nag-iistar sa mga payag-payag mantang nagbabaklay sa kaawagan sa laog nin 40 taon sagkod na sinda nakaabot sa Dagang Panuga. (Levitico 23:39-43) Sa panahon kan kapiestahan, 70 toro an iinaatang sa altar sa templo. Minalataw na an aspektong ini kan kapiestahan naghuhula kan sangkap asin kompletong pagliligtas nin buhay na ginibo ni Jesu-Cristo. An mga pakinabang sa saiyang pantubos na atang sa kahurihurihi maabot sa dai mabilang na mga gikan kan 70 pamilya nin katawohan na hale ki Noe.—Genesis 10:1-29; Bilang 29:12-34; Mateo 20:28.
16, 17. (a) Kasuarin nagpoon an antitipikong Kapiestahan nin mga Payag-Payag, asin paano iyan ginibo? (b) Paano nakikakabtang sa selebrasyon an dakulang kadaklan?
16 Sa siring an suanoy na Kapiestahan nin mga Payag-Payag nagtokdo sa magayagayang pagtipon sa binalukat na mga parakasala pasiring sa dakulang espirituwal na templo ni Jehova. An antitipo kan kapiestahan na ini nagpoon kan Pentecostes kan 33 C.E. paagi sa pagpopoon kan magayagayang pagtipon sa espirituwal na mga Israelita pasiring sa Kristianong kongregasyon. (Gibo 2:41, 46, 47) Nasasabotan kan mga linahidan na ini na sinda “nakiiistar nin temporaryo” sa kinaban ni Satanas huli ta an saindang tunay na “pagkasiudadano nasa kalangitan.” (1 Pedro 2:11; Filipos 3:20) An magayagayang kapiestahan sa halipot na panahon natahoban kan apostasiya na nagbunga kan pagkatindog kan Kakristianohan. (2 Tesalonica 2:1-3) Minsan siring, ibinalik an kapiestahan kan 1919 paagi sa magayagayang pagtipon sa huring mga miembro kan 144,000 na espirituwal na mga Israelita, na sinundan kan pagtipon sa internasyonal na dakulang kadaklan kan Kapahayagan 7:9.
17 An dakulang kadaklan ilinaladawan na igwa nin kapot na mga sanga nin palma, na nagpapaheling na sinda man magayagayang mga paraselebrar kan antitipikong Kapiestahan nin mga Payag-Payag. Bilang nagdusay na mga Kristiano, sinda magayagayang nakikakabtang sa gibong pagtipon sa mas dakol pang parasamba sa templo ni Jehova. Dugang pa, bilang mga parakasala, nasasabotan ninda na mayo sinda nin permanenteng diretso na mag-istar sa daga. Sinda, kaiba an mga bubuhayon liwat sa ngapit, dapat na padagos na gumibo nin pagtubod sa pantubos na atang ni Cristo sagkod na sinda makaabot sa pagkasangkap nin tawo sa katapusan kan Sangribong Taon na Paghade ni Cristo.—Kapahayagan 20:5.
18. (a) Ano an mangyayari sa katapusan kan Sangribong Taon na Paghade ni Jesu-Cristo? (b) Paano manggagana sa katapustapusi an tunay na pagsamba ki Jehova?
18 Dangan, an mga nagsasamba sa Dios digdi sa daga matindog sa atubangan nia na sangkap na bilang tawo na dai nangangaipo nin langitnon na pagkasaserdote. Nag-abot na an panahon na si Jesu-Cristo ‘itatao na an kahadean sa saiyang Dios asin Ama.’ (1 Corinto 15:24) Si Satanas bubutasan “sa halipot na panahon” tanganing baloon an sangkap nang katawohan. An siisay man na bakong fiel lalaglagon sagkod lamang, kaiba ni Satanas asin kan saiyang mga demonyo. An mga magdadanay na fiel tatawan nin buhay na daing katapusan. Sinda magigin permanenteng mga nag-iistar sa daganon na Paraiso. Sa siring nakaabot na sa mamuraway, mapangganang katapusan an antitipikong Kapiestahan nin mga Payag-Payag. An tunay na pagsamba nanggana na para sa daing katapusan na kamurawayan ni Jehova asin daing sagkod na kaogmahan nin katawohan.—Kapahayagan 20:3, 7-10, 14, 15.
[Mga nota sa ibaba]
a Para sa bersikulo-por-bersikulong komentaryo sa Zacarias kapitulo 14, helingon an librong Paradise Restored to Mankind—By Theocracy!, na ipinublikar kan 1972 kan Watchtower Bible and Tract Society of New York, Inc., kapitulo 21 asin 22.
b Para sa dugang na impormasyon manongod sa mga Netineo sa modernong aldaw, helingon an The Watchtower, Abril 15, 1992, pahina 16.
Mga Hapot sa Repaso
◻ Paano sinalakay an “Jerusalem” kaidtong enot na guerra mundial?—Zacarias 14:2.
◻ Ano an nangyari sa banwaan nin Dios poon kan 1919?
◻ Siisay ngonyan an nakikakabtang sa pagselebrar kan antitipikong Kapiestahan nin mga Payag-Payag?
◻ Paano biyong manggagana an tunay na pagsamba?
[Retrato sa pahina 23]
An mga sanga nin palma ginamit sa pagselebrar kan Kapiestahan nin mga Payag-Payag