Makahulogan na mga Kapiestahan sa Kasaysayan kan Israel
“Makatolo sa balang taon an gabos na lalaki mo maninigong dumolok sa atubangan ni Jehova na saimong Dios sa lugar na saiyang pipilion . . . , asin mayo nin maninigong dumolok sa atubangan ni Jehova na mayo nin dara.”—DEUTERONOMIO 16:16.
1. Ano an masasabi manongod sa mga okasyon nin kapiestahan kan mga panahon kan Biblia?
ANO an minasabong sa isip kun iniisip nindo an sarong kapiestahan? May mga kapiestahan kan suanoy na mga panahon na risang marhay an pagpalabilabi asin inmoralidad. Totoo man iyan sa nagkapirang kapiestahan sa presenteng panahon. Alagad napapalaen an mga kapiestahan na sinabi sa Ley nin Dios sa Israel. Mantang iyan magayagayang mga okasyon, iyan puede man na iladawan bilang “banal na mga kombension.”—Levitico 23:2.
2. (a) Ano an kahagadan na gibohon kan Israelitang mga lalaki tolong beses kada taon? (b) Siring sa paggamit kan termino sa Deuteronomio 16:16, ano an “kapiestahan”?
2 An fiel na Israelitang mga lalaki—na sa parate kaiba kan saindang pamilya—nakanompong nin nakarerepreskong kaogmahan sa pagbiahe pasiring sa Jerusalem, ‘an lugar na pinili ni Jehova,’ asin sinda buka an palad na nagkontribwir sa tolong dakulang kapiestahan. (Deuteronomio 16:16) An librong Old Testament Word Studies tinatawan nin kahulogan an termino sa Hebreo na trinadusir na “kapiestahan” sa Deuteronomio 16:16 bilang “okasyon nin dakulang kagayagayahan . . . na dian an nagkapirang lataw na pagpaheling nin pabor nin Dios sineselebrar na may kaibang pag-atang asin bangkete.”a
An Kahalagahan kan Dakulang mga Kapiestahan
3. Anong mga bendisyon an ipinagirumdom kan tolong taonan na kapiestahan?
3 Mantang an saindang sosyedad agrikultural, an mga Israelita nakadepende sa bendisyon nin Dios sa porma nin oran. An tolong dakulang kapiestahan sa Ley ni Moises kadungan kan pagtipon kan inaning sebada sa amay na tigsoli, kan pag-ani nin trigo sa huring kabtang nin tigsoli, asin kan iba pang pag-ani sa huring kabtang nin tig-init. An mga ini okasyon para sa dakulang paggayagaya asin pagpasalamat sa Parasuportar sa siklo nin oran asin sa Kaggibo kan matabang daga. Alagad orog pa an kalabot sa mga kapiestahan.—Deuteronomio 11:11-14.
4. Anong makasaysayan na pangyayari an sinelebrar kan enot na kapiestahan?
4 An enot na kapiestahan ginibo kaidtong primerong bulan kan suanoy na kalendaryo sa Biblia, poon Nisan 15 sagkod 21, na katimbang sa ngonyan kan huring kabtang nin Marso o kapinonan nin Abril. Inapod iyan na Kapiestahan kan Tinapay na Mayo nin Lebadura, asin huling sinusundan tolos kaiyan an Paskua nin Nisan 14, iyan inapod man na “kapiestahan kan paskua.” (Lucas 2:41; Levitico 23:5, 6) An kapiestahan na ini nagpagirumdom sa Israel kan saindang pagkaligtas sa makuring sakit sa Egipto, kaya an tinapay na mayo nin lebadura inaapod na “an tinapay nin pagsakit.” (Deuteronomio 16:3) Ipinagirumdom kaiyan sa sainda na an saindang pagdulag sa Egipto hiridalian na gayo kaya mayo na nin panahon na lagan nin lebadura an saindang masa asin halaton iyan na mag-alsa. (Exodo 12:34) Durante kan kapiestahan na ini dapat na mayong manompongan na tinapay na may lebadura sa harong nin Israelita. An siisay man na nagseselebrar, kabale an nakikihimanwa, na kumakan nin tinapay na may lebadura padudusahan nin kagadanan.—Exodo 12:19.
5. Anong pribilehio an tibaad ipinagirumdom kan ikaduwang kapiestahan, asin sairisay an iiiba sa paggayagaya?
5 An ikaduwang kapiestahan ginibo pitong semana (49 aldaw) pakatapos nin Nisan 16 asin natagbo sa ikaanom na aldaw kan ikatolong bulan, Sivan, na katimbang sa ngonyan kan huring kabtang kan Mayo. (Levitico 23:15, 16) Iyan inapod na Kapiestahan nin mga Semana (kan kaaldawan ni Jesus, inapod man iyan na Pentecostes, na an boot sabihon “Ikasingkuenta” sa Griego), asin iyan ginibo na haros kadungan kan panahon na an Israel naglaog sa tipan nin Ley sa Bukid nin Sinai. (Exodo 19:1, 2) Durante kan kapiestahan na ini an fiel na mga Israelita tibaad naghorophorop kan saindang pribilehio na pagigin isiniblag bilang banal na nasyon nin Dios. An saindang pagigin espesyal na banwaan nin Dios naghahagad nin pagkuyog sa Ley nin Dios, siring kan pagboot na magpaheling nin pagmalasakit sa mga daing sukat tanganing an mga ini mag-ogma man sa kapiestahan.—Levitico 23:22; Deuteronomio 16:10-12.
6. Anong eksperyensia an ipinagirumdom sa banwaan nin Dios kan ikatolong kapiestahan?
6 An pinakahuri sa tolong dakulang taonan na kapiestahan inapod na Kapiestahan nin Pagsaray, o Kapiestahan nin mga Payag-Payag. Iyan ginibo kan ikapitong bulan, Tisri, o Etanim, poon sa ika-15 sagkod sa ika-21 aldaw, na katimbang sa ngonyan kan enot na kabtang kan Oktubre. (Levitico 23:34) Durante kan panahon na ini, an banwaan nin Dios nag-istar sa luwas kan saindang harong o sa saindang atop sa temporaryong sirongan (payag-payag) na gibo sa mga sanga asin dahon nin mga kahoy. Ipinagirumdom kaini sa sainda an 40 taon na pagbaklay ninda hale sa Egipto pasiring sa Dagang Panuga, kan an nasyon kinaipuhan na makanood na manarig sa Dios para sa saindang pan-aroaldaw na mga pangangaipo.—Levitico 23:42, 43; Deuteronomio 8:15, 16.
7. Paano kita makikinabang sa pagrepaso kan mga selebrasyon nin kapiestahan sa suanoy na Israel?
7 Repasohon niato an nagkapirang kapiestahan na nagin makahulogan sa kasaysayan kan suanoy na banwaan nin Dios. Ini maninigong magin nakaparirigon sa satong boot ngonyan, mantang kita inaagda man na magtiripon nin regular kada semana asin tolong beses kada taon sa darakulang asamblea asin kombension.—Hebreo 10:24, 25.
Sa Panahon kan Davidikong mga Hade
8. (a) Anong makasaysayan na selebrasyon an ginibo kan kaaldawan ni Hadeng Salomon? (b) Anong dakulang kulminasyon kan antitipikong Kapiestahan nin mga Payag-Payag an puede niatong antisiparon?
8 Sarong makasaysayan na selebrasyon kan panahon kan Kapiestahan nin mga Payag-Payag an ginibo durante kan may prosperidad na pamamahala ni Hadeng Salomon, an aki ni David. “Sarong dakulaon na kongregasyon” an nagtiripon hale sa hararayong parte kan Dagang Panuga para sa Kapiestahan nin mga Payag-Payag asin pagdusay kan templo. (2 Cronica 7:8) Kan iyan matapos, pinapuli ni Hadeng Salomon an mga nagselebrar, na “nagpoon na mag-omaw sa hade asin magpuruli sa saindang harong, na naggagayagaya asin naoogma sa puso huli sa gabos na karahayan na ginibo ni Jehova para ki David na saiyang lingkod asin para sa Israel na saiyang banwaan.” (1 Hade 8:66) Tunay nanggad na iyan sarong makahulogan na kapiestahan. Ngonyan, an mga lingkod nin Dios nag-aantisipar sa dakulang kulminasyon kan antitipikong Kapiestahan nin mga Payag-Payag sa katapusan kan Paghade nin Sangribong Taon kan Salomon na Orog na Dakula, si Jesu-Cristo. (Kapahayagan 20:3, 7-10, 14, 15) Sa panahon na iyan, an mga tawo na nag-eerok sa gabos na lugar kan daga, kabale na an mga binuhay liwat asin nakaligtas sa Armagedon, magkakasararo sa magayagayang pagsamba ki Jehova Dios.—Zacarias 14:16.
9-11. (a) Ano an nangyari bago an makahulogan na kapiestahan kan kaaldawan ni Hadeng Ezequias? (b) Anong halimbawa an itinao kan dakol na hale sa sampulong tribong kahadean sa amihanan, asin ano an ipinagigirumdom kaiyan sa sato ngonyan?
9 An sunod na lataw na kapiestahan na isinaysay sa Biblia nangyari pakatapos kan pamamahala kan maraot na si Hadeng Acaz, na nagpasirra kan templo asin naggiya sa kahadean nin Juda sa apostasiya. An kasalihid ni Acaz iyo an marahay na si Hadeng Ezequias. Sa enot na taon kan saiyang pamamahala, sa edad na 25, pinonan ni Ezequias an sarong dakulang programa nin pagbabalik asin pagreporma. Tolos-tolos niang binukasan an templo asin inareglo an paghirahay kaiyan. Dangan an hade nagpadara nin mga surat sa mga Israelita na nag-eerok sa kalaban na sampulong tribong kahadean nin Israel sa amihanan, na inaagda sindang dumuman asin selebraron an Paskua asin an Kapiestahan kan Tinapay na Mayo nin Lebadura. Dakol an nagduman, sa ibong kan pag-olog-olog kan saindang mga kahimanwa.—2 Cronica 30:1, 10, 11, 18.
10 Nagin mapanggana daw an kapiestahan? An Biblia nagbabareta: “Kaya an mga aki ni Israel na yaon duman sa Jerusalem sinelebrar an kapiestahan kan tinapay na mayo nin lebadura nin pitong aldaw na may dakulang paggayagaya; asin an mga Levita asin an mga saserdote nagdodolot nin pag-omaw ki Jehova aroaldaw paagi sa mga instrumento na makosog an tanog.” (2 Cronica 30:21) Kanigoan karahay na halimbawa an itinao kan mga Israelitang idto para sa banwaan nin Dios ngonyan, na an dakol sa sainda nagtitios nin pagtumang asin nagbibiahe nin halawig tanganing makaatender sa mga kombension!
11 Halimbawa, estudyare an tolong “Diosnon na Debosyon” na Pandistritong Kombension na ginibo sa Polandia kan 1989. Kabale sa 166,518 nag-atender an darakulang grupo hale sa dating Unyon Sobyet asin iba pang mga nasyon sa Sirangan na Europa kun saen ipinangangalad an gibohon kan Mga Saksi ni Jehova kan panahon na idto. “Para sa nagkapira na nag-atender sa mga kombension na ini,” an ibinabareta kan librong Jehovah’s Witnesses—Proclaimers of God’s Kingdom,b “idto an kaenot-enote nindang pakaatender sa dakulang pagtiripon nin labi sa 15 o 20 kan banwaan ni Jehova. An saindang puso napano nin pag-apresyar mantang pinagmamasdan ninda an manampulong ribo sa mga istadyum, nakikiayon sa sainda sa pamibi, asin pinagsasararo an saindang boses sa mga awit nin pag-omaw ki Jehova.”—Pahina 279.
12. Ano an nangyari bago an makahulogan na kapiestahan durante kan pamamahala ni Hadeng Josias?
12 Pagkagadan ni Ezequias, an mga taga-Judea naholog liwat sa falsong pagsamba sa pamamahala ni Hadeng Manases asin Amon. Dangan uminabot an pamamahala nin saro pang marahay na hade, an hoben na si Josias, na naghiro nin may kapusoan tanganing ibalik an tunay na pagsamba. Sa edad na 25, si Josias nagboot na hirahayon an templo. (2 Cronica 34:8) Mantang naghihirahay, an Ley na isinurat ni Moises nanompongan sa templo. Si Hadeng Josias napahirong marhay kan saiyang nabasa sa Ley nin Dios asin inareglo na iyan basahon sa bilog na banwaan. (2 Cronica 34:14, 30) Dangan, kaoyon kan nasusurat, inorganisar nia an selebrasyon kan Paskua. An hade nagtao man nin marahay na halimbawa paagi sa buka an palad na pagkontribwir para sa okasyon. Bilang resulta, an Biblia nagsasaysay: “Mayo pang ginibong paskua sa Israel na arog kaiyan poon kan mga aldaw ni Samuel na propeta.”—2 Cronica 35:7, 17, 18.
13. Ano an ipinagigirumdom sa sato ngonyan kan mga pagselebrar nin kapiestahan ni Ezequias asin Josias?
13 An mga reporma ni Ezequias asin Josias nakapapareho sa makangangalas na pagbabalik kan tunay na pagsamba na nangyari sa tahaw kan tunay na mga Kristiano poon kan patukawon sa trono si Jesu-Cristo kan 1914. Kun paanong totoo nangorogna sa mga reporma ni Josias, an pagbabalik na ini sa presenteng aldaw ibinasar sa nasusurat na Tataramon nin Dios. Asin, kapareho kan mga aldaw ni Ezequias asin Josias, an pagbabalik sa presenteng aldaw igwa nin mga asamblea asin kombension na dian itinatampok an nakapupukaw sa boot na mga paliwanag kan hula sa Biblia asin napapanahon na mga pag-aplikar kan mga prinsipyo sa Biblia. Nakadudugang pa sa kagayagayahan kan mga okasyon na ini nin pagtotokdo an dakol na nababautismohan. Kapareho kan nagsolsol na mga Israelita kan kaaldawan ni Ezequias asin Josias, an mga bagong mabautismohan binayaan an maraot na mga kaugalean kan Kakristianohan asin kan iba pang kabtang kan kinaban ni Satanas. Kan 1997 labing 375,000 an nabautismohan bilang simbolo kan saindang pagdusay sa banal na Dios, si Jehova—na an promedyo labing 1,000 kada aldaw.
Pakalihis kan Pagkadistiero
14. Ano an nangyari bago an makahulogan na kapiestahan kan 537 B.C.E.?
14 Pagkagadan ni Josias, an nasyon nagbalik liwat sa nakararaot na falsong pagsamba. Sa kahurihurihi, kan 607 B.C.E., pinadusahan ni Jehova an saiyang banwaan paagi sa pagpangyari sa mga hukbo kan Babilonya na tumumang sa Jerusalem. An siudad asin an templo kaiyan linaglag, asin an daga pinabayaan. Kasunod kaini an 70 taon na pagkabihag kan mga Judio sa Babilonya. Dangan ibinalik nin Dios an nagsolsol na natatadang mga Judio, na nagbuelta sa Dagang Panuga tanganing ibalik an tunay na pagsamba. Nag-abot sinda sa laglag na siudad nin Jerusalem kan ikapitong bulan kan taon na 537 B.C.E. An enot nindang ginibo iyo an paggibo nin altar tanganing regular na makadolot aroaldaw nin mga atang sono sa sinabi sa tipan nin Ley. Iyan tamang-tama sana para sa saro pang makasaysayan na selebrasyon. “Dangan sinelebrar ninda an kapiestahan nin mga payag-payag oyon sa nasusurat.”—Esdras 3:1-4.
15. Anong gibohon an nasa enotan kan ibinalik na natatada kan 537 B.C.E., asin paano nagkaigwa nin kaparehong situwasyon kan 1919?
15 Dakulang gibohon an nasa enotan kan nagbaralik na disterradong ini—an pagtogdok liwat kan templo nin Dios asin kan Jerusalem saka an mga lanob kaiyan. Grabe an pagtumang kan nauuring kataraed. Kan an templo itinotogdok, iyan “aldaw nin saradit na bagay.” (Zacarias 4:10) An situwasyon kapareho kan kamugtakan kan fiel na linahidan na mga Kristiano kan 1919. Sa memorableng taon na idto, sinda binutasan hale sa espirituwal na pagkabilanggo sa Dakulang Babilonya, an pankinaban na imperyo nin falsong relihion. Sinda pirang ribo sana asin napaatubang sa bakong makikatood na kinaban. Kaya daw kan mga kaiwal nin Dios na papondohon an pag-oswag kan tunay na pagsamba? An simbag sa hapot na iyan nagpapagirumdom kan ultimong duwang selebrasyon nin kapiestahan na nakarekord sa Hebreong Kasuratan.
16. Ano an makahulogan manongod sa sarong kapiestahan kan 515 B.C.E.?
16 Sa katapustapusi an templo ikinatogdok liwat kan bulan nin Adar 515 B.C.E., tamang-tama sana para sa kapiestahan sa tigsoli nin Nisan. An Biblia nagsasaysay: “Sinelebrar ninda an kapiestahan kan tinapay na mayo nin lebadura nin pitong aldaw na may paggayagaya; huli ta pinangyari ni Jehova na sinda maggayagaya, asin pinabirik nia an puso kan hade nin Asiria sa sainda tanganing pakosogon an saindang mga kamot sa gibohon sa harong kan tunay na Dios, an Dios kan Israel.”—Esdras 6:22.
17, 18. (a) Anong makahulogan na kapiestahan an naabot kan 455 B.C.E.? (b) Paano kita nasa kaagid na situwasyon ngonyan?
17 Pakalihis nin 60 taon, kan 455 B.C.E., saro pang makahulogan na pangyayari an naabot. An Kapiestahan nin mga Payag-Payag kan taon na idto nagsenyalar kan katapusan kan pagtogdok liwat kan mga lanob kan Jerusalem. An Biblia nagsasaysay: “An bilog na kongregasyon kaidtong nagbaralik hale sa pagkabihag naggiribo nin mga payag-payag asin nag-iristar sa mga payag-payag; huli ta an mga aki ni Israel dai pa naggibo kaiyan poon kan kaaldawan ni Josue na aking lalaki ni Nun sagkod sa aldaw na idto, kaya nagkaigwa nin dakulang marhay na paggayagaya.”—Nehemias 8:17.
18 Kanigoan kamemorableng pagbabalik kan tunay na pagsamba sa Dios sa ibong nin maringis na pagtumang! Nakaaagid an situwasyon ngonyan. Sa ibong nin sunod-sunod na paglamag asin pagtumang, an dakulang gibohon nin paghuhulit kan maogmang bareta kan Kahadean nin Dios nakaabot sa mga kaporoporohi kan daga, asin an mga mensahe nin paghokom nin Dios ikinapaabot na sa gabos na lugar. (Mateo 24:14) An ultimong pagtatak kan mga natatada kan 144,000 na linahidan harani na. Labing limang milyon kan kairiba nindang “ibang karnero” an tinipon na hale sa gabos na nasyon pasiring sa “sarong aripompon” kaiba kan linahidan na natatada. (Juan 10:16; Kapahayagan 7:3, 9, 10) Kanigoan kamakangangalas na kaotoban kan makahulang ladawan kan Kapiestahan nin mga Payag-Payag! Asin an dakulang gibohon na ini nin pagtitipon magpapadagos sagkod sa bagong kinaban kun an binilyon na binuhay liwat agdahon na makiiba sa pagselebrar kan antitipikong Kapiestahan nin mga Payag-Payag.—Zacarias 14:16-19.
Kan Enot na Siglo C.E.
19. Ano an nagpangyari na magin lataw na marhay an Kapiestahan nin mga Payag-Payag kan 32 C.E.?
19 Kabale sa pinakalataw na mga selebrasyon nin kapiestahan na nakarekord sa Biblia daing duwa-duwa na iyo idtong mga inatenderan kan Aki nin Dios, si Jesu-Cristo. Halimbawa, estudyare an pag-atender ni Jesus sa Kapiestahan nin mga Payag-Payag (o, mga Tabernakulo) kan taon 32 C.E. Ginamit nia an okasyon na idto tanganing magtokdo nin mahalagang mga katotoohan asin sinuportaran an saiyang pagtotokdo paagi sa pagkotar sa Hebreong Kasuratan. (Juan 7:2, 14, 37-39) Sarong regular na kabtang kan kapiestahan na ini an kaugalean na pagpailaw nin apat na dakulang kandelabra sa sarong mas nasa laog na patyo kan templo. Ini nakakontribwir sa kaogmahan kan mga aktibidad sa kapiestahan na nagpapadagos sagkod sa banggi. Minalataw na nanabihan ni Jesus an darakulang ilaw na ini kan sabihon nia: “Ako iyo an ilaw kan kinaban. An minasunod sako dai nanggad maglalakaw sa kadikloman, kundi magkakaigwa kan ilaw nin buhay.”—Juan 8:12.
20. Taano an Paskua kan 33 C.E. ta lataw na marhay?
20 Dangan nagdatong an Paskua asin Kapiestahan kan Tinapay na Mayo nin Lebadura kan makahulogan na taon nin 33 C.E. Kan Aldaw nin Paskua na iyan, si Jesus ginadan kan saiyang mga kaiwal asin nagin an antitipikong Kordero nin Paskua, na nagadan tanganing maghale kan “kasalan kan kinaban.” (Juan 1:29; 1 Corinto 5:7) Pakalihis nin tolong aldaw, kan Nisan 16, binuhay liwat nin Dios si Jesus na may inmortal na hawak na espiritu. Kadungan kaini an pagdolot kan enot na mga bunga kan inaning sebada siring sa ipinagboot kan Ley. Sa siring, an binuhay liwat na Kagurangnan na si Jesu-Cristo nagin “an enot na bunga kan mga natorog sa kagadanan.”—1 Corinto 15:20.
21. Ano an nangyari kan Pentecostes 33 C.E.?
21 Sarong tunay na marahayon na kapiestahan an Pentecostes kan 33 C.E. Kan aldaw na idto dakol na Judio asin proselito an nagkatiripon sa Jerusalem, kabale na an mga 120 kan mga disipulo ni Jesus. Mantang nasa kapiestahan pa, an binuhay liwat na Kagurangnan na si Jesu-Cristo ibinubo an banal na espiritu nin Dios sa 120 idto. (Gibo 1:15; 2:1-4, 33) Sa siring sinda linahidan asin nagin bagong piniling nasyon nin Dios paagi sa bagong tipan na pinangoltanan ni Jesu-Cristo. Durante kan kapiestahan na idto an Judiong halangkaw na saserdote nagdodolot nin duwang may lebadurang tinapay sa Dios na ginibo hale sa enot na mga bunga kan inaning trigo. (Levitico 23:15-17) An may lebadurang mga tinapay na ini naglaladawan sa 144,000 na bakong sangkap na tawo na ‘binakal [ni Jesus] manongod sa Dios’ tanganing maglingkod bilang “kahadean asin mga saserdote . . . [na] mamamahala bilang mga hade sa daga.” (Kapahayagan 5:9, 10; 14:1, 3) An bagay na an langitnon na mga namamahalang ini hale sa duwang sanga kan makasalan na katawohan, an mga Judio asin Hentil, puede man na iladawan kan duwang may lebadurang tinapay.
22. (a) Taano ta dai sineselebrar kan mga Kristiano an mga kapiestahan kan tipan nin Ley? (b) Ano an eestudyaran niato sa masunod na artikulo?
22 Kan an bagong tipan magpunsionar kan Pentecostes 33 C.E., iyan nangahulogan na an daan na tipan nin Ley nawaran na nin halaga sa pagheling nin Dios. (2 Corinto 3:14; Hebreo 9:15; 10:16) Iyan dai nangangahulogan na an linahidan na mga Kristiano mayo nin ley. Sinda napasairarom kan ley nin Dios na itinokdo ni Jesu-Cristo asin isinurat sa saindang puso. (Galacia 6:2) Kun siring, an tolong taonan na kapiestahan, huling kabtang kan daan na tipan nin Ley, dai sineselebrar kan mga Kristiano. (Colosas 2:16, 17) Minsan siring, dakol an puede niatong manodan sa aktitud kan mga lingkod nin Dios kan mga panahon bago kan mga Kristiano sa saindang mga kapiestahan asin iba pang mga pagtiripon para sa pagsamba. Sa masunod niatong artikulo, eestudyaran niato an mga halimbawa na daing duwa-duwa na mamotibar sa gabos na apresyaron an pangangaipo na magin regular sa pag-atender sa Kristianong mga pagtiripon.
[Mga nota sa ibaba]
a Helingon man an Insight on the Scriptures, na ipinublikar kan Watchtower Bible and Tract Society of New York, Inc., Tomo 1, pahina 820, kolumna 1, parapo 1 asin 3, sa irarom nin “Festival.”
b Ipinublikar kan Watchtower Bible and Tract Society of New York, Inc.
Mga Hapot sa Repaso
◻ Ano an katuyohan kan tolong dakulang kapiestahan sa Israel?
◻ Ano an nagpapamidbid sa mga kapiestahan kan kaaldawan ni Ezequias asin Josias?
◻ Anong makahulogan na pangyayari an sinelebrar kan 455 B.C.E., asin taano iyan ta nakaparirigon sa satong boot?
◻ Ano an makahulogan manongod sa Paskua asin Pentecostes kan 33 C.E.?
[Kahon sa pahina 12]
Sarong Leksion na Kapiestahan Para sa Sato Ngonyan
An gabos na makikinabang nin daing sagkod sa nakatutubos nin kasalan na atang ni Jesus dapat na mamuhay sono sa ilinaladawan kan Kapiestahan kan Tinapay na Mayo nin Lebadura. An antitipikong kapiestahan na ini iyo an magayagayang pagselebrar kan linahidan na mga Kristiano sa saindang pagkaligtas sa maraot na kinaban na ini asin sa saindang pakabutas sa pagkondenar nin kasalan paagi sa pantubos ni Jesus. (Galacia 1:4; Colosas 1:13, 14) An literal na kapiestahan naglawig nin pitong aldaw—sarong numerong ginamit sa Biblia na nagsisimbolo sa espirituwal na pagkakompleto. An lawig kan antitipikong kapiestahan sagkod sa kompletong panahon nin pagdanay kan linahidan na Kristianong kongregasyon digdi sa daga asin dapat na selebraron na may “sinseridad asin katotoohan.” Iyan nangangahulogan nin dayaday na pagmaan tumang sa piguratibong lebadura. An lebadura ginagamit sa Biblia sa paglaladawan sa marigsok na mga katokdoan, pagsaginsagin, asin karatan. An tunay na mga parasamba ki Jehova dapat na kaongisan an siring na lebadura, na dai iyan tinotogotan na raoton an saindang sadiring buhay asin dai iyan tinotogotan na atian an kadalisayan kan Kristianong kongregasyon.—1 Corinto 5:6-8; Mateo 16:6, 12.
[Retrato sa pahina 9]
An sarong goygoy kan bagong aning sebada idinodolot kada taon sa Nisan 16, an aldaw na si Jesus binuhay liwat
[Retrato sa pahina 10]
Tibaad nanabihan ni Jesus an mga ilaw sa kapiestahan kan sabihon nia na sia “an ilaw kan kinaban”