Taano ta Ginigibo Ninda Iyan?

TAON-TAON an Mga Saksi ni Jehova sa bilog na kinaban nagtitiripon nin manriboribo sa mga kombension. Dian, sinda naoogma sa pakikiasosyar asin nagdadangog sa marahayon na programa nin pagtotokdo sa Biblia. An nagkapira dakula an mga paghihingoa tanganing atenderan an mga kombension na ini. Halimbawa, kan nakaaging taon, sa Malawi igwa nin mag-agom na nasa mga 65 na an edad, kaiba kan saindang aking lalaki asin kan agom patin omboy kaini, na nagbisikleta nin 80 kilometros tanganing mag-atender sa sarong kombension. Naghale sinda sa saindang baryo nin alas sais nin aga asin nag-abot sa lugar kan kombension pakalihis nin 15 oras.

Sa Mozambique, sarong grupo an nagbisikleta nin tolong aldaw tanganing makaabot sa kombension. Sarong banggi, mantang sinda nagkakampo sa kahiwasan, sinda nakadangog nin nagngangarob na mga leon sa harani. Maski ngani sinda nagbatikal nin songo sa direksion kan mga hayop, an mga leon dai naghale sagkod sa kaagahon. An saro pang Saksi na nagbiahe pasiring sa iyo man sanang kombension nakahampangan an sarong leon sa tinampo. Sia toninong na nagtindog na dai naghihiro sagkod na naghale an leon. Sa kombension an mga Saksing ini maogmang nag-estorya kun paano sinda “ilinigtas sa ngoso kan leon.”​—2 Timoteo 4:​17.

Dakol sa Mga Saksi ni Jehova an dakula an mga paghihingoa tanganing makaatender sa mga kombension o dawa sa semanal na mga pagtiripon kan kongregasyon para sa pagsamba? Taano? An minasunod na mga artikulo tatabangan kamo na masabotan kun taano an pagtiripon ta mahalagang marhay.