Tumindog na Lubos Asin May Marigon na Kombiksion

Mga Kombension—Magayagayang Patunay kan Satong Kasararoan nin Magturugang

AN SINGKUENTA anyos na si Joseph F. Rutherford, na maluya an salud pakatapos nin haros sangtaon nin bakong makatanosan na pagkabilanggo, maogmang naglilingkod bilang bellhop. Entusiastiko niang binibitbit an mga maleta asin hinahatod an mga kapwa Kristiano sa saindang mga kuarto sa otel. An duwa sa saiyang dating kaibang preso​—kapwa Estudyante sa Biblia​—nananao nin asignasyon na mga kuarto sa sarong dakulang grupo na naghahalat nin dadagosan. Nagpadagos na sibot-sibot sinda sagkod kan matanga nang marhay. Nangibabaw sa sainda gabos an nakaoolakit na espiritu nin kaogmahan. Ano an okasyon?

Taon idto nin 1919, asin an Mga Estudyante sa Biblia (na midbid ngonyan bilang Mga Saksi ni Jehova) nagbabawi gikan sa panahon nin maisog na paglamag. Tanganing pakosogon liwat an mga kabilang sa sainda, magibo sinda kaidto nin kombension sa Cedar Point, Ohio, E.U.A., poon Setyembre 1 sagkod 8, 1919. Sa ultimong aldaw kan kombension, an ganado an boot na kaburunyogan nin 7,000 atentong naghihinanyog mantang pinaririgon ni Tugang na Rutherford an boot kan lambang kombensionista paagi sa mga tataramon na: “Kamo embahador kan Hade nin mga hade asin Kagurangnan nin mga kagurangnan, na ipinapaisi sa mga tawo . . . an mamuraway na kahadean kan satong Kagurangnan.”

Sa tahaw kan banwaan ni Jehova, may mga kombension na kaidtong panahon kan suanoy na Israel. (Exodo 23:14-​17; Lucas 2:​41-​43) An siring na mga pagtiripon magayagayang okasyon, na tinatabangan an gabos na presente na papagdanayon an saindang isip sa Tataramon nin Dios. Kaagid kaiyan, an mga kombension kan Mga Saksi ni Jehova sa presenteng mga panahon nakasentro sa espirituwal na intereses. Para sa sinserong mga nagmamasid an siring na magayagayang mga pagtiripon nagtatao nin dai manenegaran na ebidensia na an mga Saksi pinagsasaro nin makosog na mga bogkos nin Kristianong kasararoan nin magturugang.

Mga Paghihingoa na Umatender

Aram kan mga Kristiano sa presenteng aldaw na an saindang mga kombension panahon nin espirituwal na pagrepresko asin pagtotokdo sa Tataramon nin Dios. Ibinibilang ninda na an darakulang pagtiripon na ini kaipuhan nanggad na paagi nin pagtabang sa sainda na “makatindog na lubos asin may marigon na kombiksion sa gabos na kabotan nin Dios.” (Colosas 4:12) Sa siring, bilog na pusong sinusuportaran kan mga Saksi an mga pagtiripon na ini, na naggigibo nin dakulang mga paghihingoa na atenderan iyan.

Para sa nagkapira, an mismong presensia ninda sa siring na mga kombension nagkakaipo nin paggibo nin pagtubod asin pagpanggana sa arog-bukid na mga balakid. Halimbawa, estudyare an sarong may edad nang Saksi sa Austria. Minsan ngani may diabetes asin kinakaipuhan na ineksionan nin insulin aroaldaw, sineseguro nia na maatenderan nia an gabos na aldaw nin sarong pandistritong kombension sa saiyang nasyon. Sa India, an sarong dakulang pamilya nin mga Saksi na grabe an pagtios nadepisilan na marhay na makaatender sa sarong kombension. Sarong miembro kan pamilya an tuminabang. “Huling habo kong malipasan an okasyon,” sabi nia, “ipinabakal ko an sakong bulawan na hikaw tanganing may pamasahe. Bawi man an pagsakripisyo, huling napakosog an samong pagtubod kan pakikiasosyar asin mga eksperyensia.”

Sa Papua New Guinea, an sarong grupo nin dai pa bautisado, interesadong mga tawo determinado na umatender sa sarong pandistritong kombension sa kabisera. Kinaolay ninda an sarong lalaki sa saindang baryo na may sadiring pampublikong sasakyan asin hinapot kun gurano an isisingil nia sa paghatod sa sainda sa kombension. Huling dai ninda kaya an kantidad na hinahagad, naggibo sinda nin areglo na magtrabaho sa harong kan lalaking idto, na hihirahayon an saiyang kusina. Sa siring nakaabot sinda sa pandistritong kombension asin nakinabang sa pag-atender sa enterong programa.

An distansia bakong dai mapanggaganahan na problema para sa mga Saksi ni Jehova na desididong magin presente sa mga kombension. Kan 1978, tanganing makaatender sa sarong kombension sa Lille, Pransia, an sarong hoben na delegado hale sa Polandia nagbisikleta nin 1,200 kilometros sa laog nin anom na aldaw. Durante kan tig-init nin 1997, duwang Saksi hale sa Mongolia an nagbiahe nin 1,200 kilometros tanganing umatender sa sarong Kristianong pagtiripon sa Irkutsk, Rusya.

Tunay na Pagkanitugang na Ginigibo

An pagkasararo asin pagkanitugang na ipinaheheling kan mga Saksi sa saindang mga kombension malinaw na naririsa kan makatanosan an isip na mga nagmamasid. Dakol an naghanga na mayo nin pagpaorog sa tahaw kan mga kombensionista asin na igwa nin tunay na init nin pakikiiba dawa sa mga enot pa sanang magkamiridbidan.

Durante nin sarong nakaagi pa sanang internasyonal na kombension sa Australia, an sarong giya nin mga turista na inibanan an bisitang mga delegado sa kombension sa laog nin sarong semana boot na umiba sa sainda nin dikit pang panahon tanganing maogma sa kaibanan ninda. Naghahanga sa saindang pagkamoot asin pagkasararo, dai sia makapaniwala na marahayon an pag-iribaiba ninda, huling an kadaklan sa sainda mga dai kamidbid. Kan mahale na sia, inapod nia sinda. Inaapod sindang “tugang,” pinonan niang pasalamatan sinda alagad dai matapostapos, huli ta dinaog na sia nin emosyon asin napahibi.

Kan 1997, ginibo sa Sri Lanka an enot na pandistritong kombension kaini na tolong lenguahe an ginamit sa sarong dakulang istadyum. An bilog na programa durungan na iinatubang sa Ingles, Sinhales, asin Tamil. Sa sarong kinaban na nag-oorog an kariribokan etniko, narisa an siring na pagtiripon nin tolong grupo nin lenguahe. An sarong pulis hinapot an sarong tugang na lalaki: “Siisay an nagpapadalagan kan kombension na ini​—an mga Sinhales, an mga Tamil, o an mga Ingles?” “Dai ni arin man sa grupo an nagpapadalagan kan kombension,” an simbag kan tugang. “Iriba kami gabos na ginigibo ini.” Dai makapaniwala an pulis. Kan an tolong grupo nin lenguahe mag-iriba para sa pantapos na pamibi asin an sararong “Amen” mag-aningal sa bilog na istadyum, an mga kombensionista biglang nagpoon na mag-urupakan. Haros mayo nin marang mata sa mga presente. Iyo, an mga kombension tunay nanggad na magayagayang patunay kan satong kasararoan nin magturugang.​—Salmo 133:1.a

[Nota sa Ibaba]