Mga Hapot Hale sa mga Parabasa

An mga report hale sa nagkapirang taon nagpapaheling na an bilang na nakikikabtang sa mga emblema sa Memorial luminangkaw nin kadikit. Isinusuherir daw kaini na dakol pang bagohan an linalahidan nin banal na espiritu?

May marahay na rason na maniwala na an bilang kan 144,000 na linahidan na Kristiano tapos na kaidtong dakol na dekada an nakaagi.

Sa Gibo 2:​1-4, mababasa niato an dapit sa mga naenot sa limitadong grupo na iyan: “Ngonyan mantang nagpapadagos an aldaw kan kapiestahan nin Pentecostes sinda gabos magkairiba sa sarong lugar, asin sa panale nagdatong hale sa langit an ribok na siring sa hagobohob nin makosog na doros, asin iyan nakapano sa bilog na harong na saindang tinutukawan. Asin naheling ninda an mga dila na garo kalayo asin nakawaras, asin may saro na nagtogdon sa lambang saro sa sainda, asin sinda gabos nagkaparano nin banal na espiritu asin nagpoon na magtaram nin manlaenlaen na tataramon, siring sa ipinataram sa sainda kan espiritu.”

Pakatapos kaiyan, si Jehova nagpili nin iba pa, asin linahidan nia sinda kan saiyang banal na espiritu. Rinibo an nakadagdag kan mismong enot na mga taon kan Kristianismo. Sa selebrasyon nin Memorial sa satong panahon, parateng dinadara kan espiker an atension sa mga tataramon ni apostol Pablo sa Roma 8:​15-17, na nagsasabi na an mga linahidan ‘nag-aako nin espiritu nin pagpaniakia.’ Idinugang ni Pablo na an banal na espiritu na saindang inaako ‘nagpapatotoo kaiba kan saindang espiritu, na sinda mga aki nin Dios, kapwa mga paramana ni Cristo.’ May kasegurohan na aram iyan kan mga talagang igwa kan paglahid na ini nin espiritu. Iyan bako sanang kamawotan o pagpaheling nin emosyonal asin bakong realistikong pagmansay sa saindang sadiri.

Nasasabotan niato na an langitnon na pag-apod na ini nagpadagos sa bilog na nag-aging mga siglo, minsan ngani durante kan inaapod na Edad Media, tibaad nagkaigwa nin mga panahon na an bilang nin mga linahidan kakadikit.a Paagi sa pagkaestablisar liwat kan tunay na Kristianismo sa paghinanapos kan nakaaging siglo, dakol pa an inapod asin pinili. Alagad minalataw na kan kabangaan nin mga taon nin 1930, an bilog na bilang kan 144,000 sa pundamental natapos na. Sa siring nagpoon na lumataw an sarong grupo nin maimbod na mga Kristiano na may daganon na paglaom. Inapod ni Jesus an siring na “ibang karnero,” na kasaro sa pagsamba kan mga linahidan bilang sarong inooyonan na aripompon.​—Juan 10:​14-16.

An mga katunayan sa bilog na nag-aging mga siglo nagpapaheling kapwa kan pagtapos sa pag-apod kan mga linahidan asin kan bendisyon ni Jehova sa nagdadakol na “dakulang kadaklan,” na naglalaom na makaligtas sa “dakulang kahorasaan.” (Kapahayagan 7:​9, 14) Halimbawa, sa selebrasyon nin Memorial kan 1935, na inatenderan nin 63,146, idtong mga nakikabtang sa emblema bilang ebidensia kan saindang paghingako bilang linahidan may bilang na 52,465. Pakalihis nin 30 taon, o kan 1965, an nag-atender 1,933,089, mantang an mga nakikabtang nag-ina sa 11,550. Sa pag-abante nin 30 taon pasiring sa presenteng panahon, kan 1995, an bilang nin nag-atender lumingkaw sa 13,147,201, alagad 8,645 sana an nakikabtang sa tinapay asin arak. (1 Corinto 11:​23-26) Malinaw nanggad, mantang nag-aagi an mga dekada, an bilang kan mga naghihingakong kabilang sa mga natatada nag-inang marhay​—mga 52,400 kan 1935; 11,500 kan 1965; 8,600 kan 1995. Minsan siring, idtong mga igwa nin daganon na paglaom binendisyonan, asin an saindang bilang luminangkaw na marhay.

An pinakabagong ipinublikar na report iyo an para sa taon nin 1995, asin iyan nagpapaheling na mas dakol nin 28 an nakikabtang kisa sa sinundan na taon minsan ngani an katimbang kan mga nag-atender sa mga nakikabtang talagang nag-ina. Sa pagkonsiderar sa gabos na bagay, an bagay na may nagkapira pang nagdesisyon na makikabtang sa mga emblema dai maninigong ikahadit. Sa bilog na nag-aging mga taon an nagkapira, minsan an mga bago pa sanang mabautismohan, biglang nagpoon na makikabtang. Sa nagkapirang pangyayari, paghaloyhaloy inako ninda na ini sala. Minidbid kan iba na sinda nakikabtang bilang emosyonal na reaksion sa tibaad pisikal o mental na tension. Alagad sa katapustapusi naaraman ninda na sinda dai man talaga inapod sa langitnon na buhay. Inarang ninda an maheherakon na pagsabot nin Dios. Asin sinda nagpadagos na maglingkod sa saiya bilang marahay, maimbod na mga Kristiano, na may paglaom na buhay na daing katapusan digdi sa daga.

Dai kaipuhan na mahadit an siisay man sa sato kun an saro magpoon na makikabtang sa mga emblema o pumondo sa paggibo kaiyan. Bako man talaga kita an mahusgar kun baga an saro talagang linahidan nin banal na espiritu asin inapod sa langitnon na buhay o dai. Girumdoma an marigon na pag-asegurar ni Jesus: “Ako an marahay na pastor, asin midbid ko an sakong mga karnero.” Siring sa iginarantiya, midbid ni Jehova an saiyang mga pinili bilang espirituwal na mga aki. Yaon an gabos na rason na maniwala na an bilang nin mga linahidan magpapadagos na mag-ina mantang tinatapos nin kagurangan asin pagkanorongod an saindang daganon na buhay. Pero, kun paanong nagin fiel sagkod sa kagadanan an tunay na mga linahidan na ini, na nakalinyang mag-ako kan korona nin buhay, an ibang karnero, na naghugas kan saindang mga gubing sa dugo kan Kordero, makalalaom na makaligtas sa nagdadangadang na dakulang kahorasaan.​—2 Timoteo 4:​6-8; Kapahayagan 2:10.

[Nota sa Ibaba]