Minidbid daw Kutana Nindo an Mesiyas?
SI Jesu-Cristo tolo may kabangang taon na naghulit kan Tataramon nin Dios sa tahaw kan mga Israelita. Alagad kan panahon na matapos an saiyang ministeryo sa daga, an mayoriya kan saiyang mga kakontemporanyo isinikwal sia bilang an Mesiyas, o an ipinanuga nin Dios na “Linahidan na Saro.” Taano?
Tinatabangan kita kan Biblia na mamidbid an nagkapirang rason kun taano an mga Judio kan enot na siglo ta dai minidbid si Jesus bilang an Mesiyas. An tolo sa mga rason na ini nakapopogol sa dakol na midbidon an katongdan ni Jesus sa presenteng aldaw bilang an namamahalang Mesiyanikong Hade.
“Minamawot Ming Makaheling nin Sarong Tanda”
An sarong rason kun taano an mga Judio kan enot na siglo ta dai minidbid an Mesiyas iyo an pagsayuma ninda na akoon an Makakasuratan na mga tanda na nagtotokdo sa saiyang pagka-Mesiyas. Kun beses, hinahagad kan mga tawong naghihinanyog ki Jesus na gumibo sia nin tanda tanganing patunayan na sia hale sa Dios. Halimbawa, ibinabareta kan Mateo 12:38 na an nagkapirang eskriba asin Fariseo nagsarabi: “Paratokdo, minamawot ming makaheling nin sarong tanda hale sa saimo.” Dai pa daw sinda pinahelingan ni Jesus nin mga tanda? Siempre iyo na.
Kan panahon na idto naggibo na si Jesus nin nagkapirang milagro. Ginibo niang arak an tubig, pinaomayan an naghihingagdan na aking lalaki, binolong an may helang na panugangan na babae ni Pedro, lininigan an sarong lalaking leproso, pinangyaring makalakaw an sarong paralisadong lalaki, pinaomayan an sarong lalaki na 38 taon nang naghehelang, ibinalik sa normal an alang na kamot nin sarong lalaki, binolong an dakol na tawo sa saindang grabeng mga helang, pinaomayan an oripon nin sarong opisyal sa hukbo, binuhay liwat an aking lalaki nin sarong balong babae, asin binolong an sarong lalaking buta asin pula. An mga milagrong ini nangyari sa Cana, Capernaum, Jerusalem, asin Nain. Minsan siring, an bareta manongod sa siring na mga milagro nakalakop sa bilog na Judea asin sa nakapalibot na probinsia.—Juan 2:1-12; 4:46-54; Mateo 8:14-17; 8:1-4; 9:1-8; Juan 5:1-9; Mateo 12:9-14; Marcos 3:7-12; Lucas 7:1-10; 7:11-17; Mateo 12:22.
Malinaw nanggad, bakong kulang an mga tanda na nagpapatunay na si Jesus iyo an Mesiyas. Minsan ngani naggibo sia nin kadakol na tanda sa atubangan kan mga tawo, dai sinda nagtubod sa saiya. Idtong mga nakaheling kan prueba na si Jesus isinugo nin Dios alagad dai sia minidbid bilang an Mesiyas mga buta sa espirituwal. An saindang puso matagas asin habong mag-ako sa katotoohan.—Juan 12:37-41.
Kumusta man sa satong kaaldawan? May mga tawong nagsasabi, “An tinutubod ko sana iyo an naheheling kan sakong mga mata.” Alagad iyan daw an madonong na gibohon? An mga hula sa Biblia nagpaparisa na si Jesus pinatukaw na sa trono bilang langitnon na Hade sa Mesiyanikong Kahadean. Mantang dai sia naheheling, kaipuhan ta nin tanda na matabang sa sato na mamansayan an saiyang pamamahala, na nagtatanda sa kapinonan kan huring mga aldaw kan maraot na palakaw na ini nin mga bagay. Midbid daw nindo an tanda?—Mateo 24:3.
Sono sa Biblia, an kapinonan kan pamamahala ni Cristo bilang Mesiyanikong Hade tatandaan nin mga guerra, linog, kakulangan nin pagkakan, asin peste sa sokol na dai pang kaagid. Sa “huring mga aldaw,” maheheling sa mga relasyon sa tawo an kapasloan, kahanaban, asin kadaihan nin pagpopogol. (2 Timoteo 3:1-5; Mateo 24:6, 7; Lucas 21:10, 11) Apuera sa kronolohikong prueba, an labing 20 laen-laen na nagpapamidbid na kabtang kan huring mga aldaw nagtotokdo sa kapinonan kan paghade kan Mesiyas kan 1914.—Helingon an Torrengbantayan na Marso 1, 1993, pahina 5.
“Mga Mamomoton sa Pirak”
An materyalismo saro pang rason kun taano an mga Judio ta isinikwal si Jesus bilang an Mesiyas. An pagtao nin labi-labing importansia sa kayamanan nakaolang sa dakol na sumunod ki Jesus. Halimbawa, an mga Fariseo midbid bilang “mga mamomoton sa pirak.” (Lucas 16:14) Helinga an kaso nin sarong mayaman na hoben na namamahala na nagdolok ki Jesus asin naghapot kun paano makakamit an buhay na daing katapusan. “Padagos na otoba an mga togon,” an simbag ni Jesus. “Inotob ko an gabos na ini; ano pa an kulang sa sako?” an hapot kan hoben na lalaki, na minalataw na namamatean niang orog pa an kaipuhan kisa sa pag-otob sa nagkapirang ley. “Pabakalan an saimong mga sadiri asin tawan iyan sa mga dukha asin magkakaigwa ka nin kayamanan sa langit, asin madia sumunod ka sa sako,” an sabi sa saiya ni Jesus. Kanigoan na oportunidad—na magin disipulo kan Mesiyas! Pero, an namamahala huminale, na labi-labi an kamondoan. Taano? Huli ta an kayamanan sa daga mas importante sa saiya kisa sa kayamanan sa langit.—Mateo 19:16-22.
Dai nagliwat an situwasyon. An pagigin tunay na parasunod kan Mesiyanikong Hade nangangahulogan nin pag-enot sa espirituwal na intereses sa gabos na iba pang bagay, kabale an mga sadiri sa daga. Para sa siisay man na materyalistiko an pagmansay, ini sarong angat. Halimbawa, an sarong mag-agom na misyonero sa sarong nasyon sa Sirangan kinaolay an sarong babae manongod sa Biblia. Huling naniniwala na an babae boot na makanood nin dakol pa manongod ki Jehova Dios asin sa saiyang Aki, si Jesu-Cristo, inalokan sia kan mag-agom nin An Torrengbantayan asin Awake! Ano an saiyang reaksion? “Matatabangan daw ako kan mga magasin na ini na makaganar nin dakol pang kuarta?” an hapot nia. An babae mas interesado sa materyal na mga bagay kisa sa espirituwal na mga bagay.
An mag-agom man sanang iyan inadalan sa Biblia an sarong hoben na lalaki na nagpoon na umatender sa mga pagtiripon sa Kingdom Hall. “Sinasayang mo an saimong panahon,” an sabi sa saiya kan mga magurang nia. “Maninigo kang kumua nin saro pang trabaho kun banggi asin gumanar nin dakol pang kuarta.” Makamomondo nanggad kun an mga magurang ineenkaminar an saindang mga aki na enoton an materyal na mga bagay kisa sa pag-adal manongod sa Mesiyanikong Hade! “Minsan ngani dakol siang kayamanan an namamahala dai makababakal nin sampulong ribong taon nin buhay,” an sabi nin sarabihon na Intsik.
Dakol an nakarealisar na an pag-adal manongod sa asin pagsunod sa Mesiyanikong Hade dai nagtotogot nin pagkamoot sa pirak. An sarong Saksi ni Jehova na dati may sadiring negosyo na halangkaw an ginaganar, nagsabi: “An pagkaigwa nin dakol na kuarta kawiliwiling marhay alagad bakong kaipuhan. Bakong kuarta an nakapaoogma sa saro.” Saro na sia ngonyan na miembro kan pamilyang Bethel sa sarong sangang opisina kan Watch Tower Society sa Europa.
“Takot sa mga Judio”
An pagkatakot sa tawo saro pang rason kun taano ta dai inako kan mga Judio si Jesus bilang an Mesiyas. An hayag na pagmidbid sa saiyang pagka-Mesiyas nangahulogan nin pagsapeligro sa saindang dangog. Para sa iba masakit na marhay na karibay iyan. Helinga si Nicodemo, sarong miembro kan Judiong korte suprema na inaapod Sanhedrin. Huling naghanga sa mga tanda asin katokdoan ni Jesus, inadmitir nia: “Rabbi, aram niamo na ika bilang paratokdo naggikan sa Dios; huli ta mayo nin makagigibo kan mga tandang ini na saimong ginigibo puera sana kun an Dios nasa saiya.” Pero si Nicodemo nagduman ki Jesus kan banggi, na posibleng naglilikay na mamidbid kan ibang mga Judio.—Juan 3:1, 2.
Para sa dakol na nadangog si Jesus na nagtataram, an pag-oyon nin mga tawo mas importante kisa sa pag-oyon nin Dios. (Juan 5:44) Kan nasa Jerusalem si Jesus para sa Kapiestahan nin mga Payag-Payag kan 32 C.E., “nagkaigwa nin kanigoan na hinghingan an mga kadaklan manongod sa saiya.” Mayong nagtaram nin hayag manongod ki Jesus “huli sa takot sa mga Judio.” (Juan 7:10-13) Maski an mga magurang kan sarong lalaki na pinaomayan ni Jesus sa pagkabuta dai kayang midbidon na an milagro gikan sa representante nin Dios. Sinda man “takot sa mga Judio.”—Juan 9:13-23.
Ngonyan, may mga nakaaaram na si Jesus namamahala na ngonyan bilang Mesiyanikong Hade sa langit, alagad natatakot sindang midbidon ini nin hayag. Para sa sainda masakit na marhay na karibay an pagkawara kan saindang marahay na dangog sa iba. Sa Alemania, halimbawa, an sarong Saksi ni Jehova nakaolay manongod sa Biblia an sarong lalaki na nag-admitir: “Totoo an ihinuhulit nindo mga Saksi manongod sa Biblia. Alagad kun magin Saksi ako ngonyan, nuodma aram na iyan kan gabos. Ano an iisipon ninda dapit sa sako sa trabaho, sa pagtaraed, asin sa klab na kinabibilangan ko asin kan sakong pamilya? Dai ko kayang tioson iyan.”
Ano an dahelan kan pagkatakot sa tawo? Kapalangkawan, pagkamoot sa popularidad sa tahaw nin pamilya asin mga katood, takot na olog-ologon asin mapasopog, pagkahadit na magin napapalaen sa kadaklan. An siring na mga pagmate nagigin pagbalo partikularmente sa mga minapoon na mag-adal sa Biblia kaiba kan Mga Saksi ni Jehova. Halimbawa, an sarong hoben na babae naogmang marhay na manodan an manongod sa Paraiso na eestablisaron digdi sa daga kan Mesiyanikong Kahadean sa irarom kan pamamahala ni Jesu-Cristo. Alagad apisyonado sia sa disko, asin an pagkatakot sa tawo nakaolang sa saiya na ipakipag-olay sa iba an manongod sa paglaom na ini. Sa katapustapusi nagkaigwa sia nin kapusoan na sueltong makipag-olay manongod sa Biblia. Sinayumahan sia kan saiyang mga katood sa disko, alagad an saiyang agom asin mga magurang nagpaheling nin interes. Pag-abot nin panahon an babae asin an saiyang ina nabautismohan, patin an saiyang agom asin an saiyang ama nagpoon nang mag-adal sa Biblia. Marahayon nanggad na balos huli sa pakapanggana sa pagkatakot sa tawo!
Talaga daw na Minimidbid Nindo an Mesiyas?
Kan si Jesus naghihingagdan sa hariging pasakitan, presente an nagkapira niang disipulo. Minidbid ninda sia bilang an ihinulang Mesiyas. Presente man an Judiong mga namamahala, na, sabi ngani, naghahagad pa giraray nin tanda. “Paligtasan an saiyang sadiri, kun sia iyo an Cristo [o Mesiyas] nin Dios, an Sarong Pinili.” (Lucas 23:35) Nungka daw sindang mapondo sa paghagad nin tanda? Dinosenang milagro na an ginibo ni Jesus. Dugang pa, an saiyang pagkamundag, ministeryo, pagbista sa saiya, paggadan sa saiya, asin pagkabuhay nia liwat nakaotob sa dakol na hula sa Hebreong Kasuratan.—Helingon an “All Scripture Is Inspired of God and Beneficial,” na ipinublikar kan Watchtower Bible and Tract Society of New York, Inc., pahina 343-4.
Tinuya si Jesus kan mga nag-aaragi, na sinasayumahan an ebidensia kan saiyang pagka-Mesiyas. (Mateo 27:39, 40) An mga soldados may pagkamateryalistikong binaranga an gubing ni Jesus, na pinagpabunotan an saiyang pan-irarom na gubing. (Juan 19:23, 24) An pagkatakot sa tawo nagkaigwa nin kabtang sa nagkapirang kamugtakan. Halimbawa, helinga si Jose na taga-Arimatea, sarong miembro kan Sanhedrin. Sia “disipulo ni Jesus alagad sekreto sana huli sa saiyang pagkatakot sa mga Judio.” Pagkagadan kan Mesiyas, si Jose asin Nicodemo an nag-asikaso sa bangkay ni Jesus. Sa siring napangganahan ni Jose an pagkatakot nia sa tawo.—Juan 19:38-40.
Kun kamo buhay na kan enot na siglo, minidbid daw kutana nindo si Jesus bilang an Mesiyas? An paggibo kaiyan nangaipo na saindong midbidon an Makakasuratan na ebidensia, isikwal an materyalistikong kaisipan, asin dai padara sa pagkatakot sa tawo. Sa huring mga aldaw na ini, an kada saro sa sato maninigong ihapot sa saiyang sadiri, ‘Minimidbid ko daw ngonyan si Jesus bilang an langitnon na Mesiyanikong Hade?’ Sa dai na mahahaloy sia an mamamahala sa mga aktibidad sa daga. Kun mangyari na iyan, magigin kabilang daw kamo duman sa mga talagang nagmimidbid ki Jesu-Cristo bilang an ipinanugang Mesiyas?
[Mga retrato sa pahina 28]
Nungka nindong talikdan an ebidensia na si Jesus iyo an Mesiyanikong Hade
[Retrato sa pahina 31]
An pag-adal manongod sa Mesiyas parateng nangangahulogan nin pagpanggana sa pagkatakot sa tibaad sabihon nin iba