Andam daw Kamo Para sa Aldaw ni Jehova?

“An dakulang aldaw ni Jehova harani na. Iyan harani na, asin igwa nin paghihidale na gayo kaiyan.”​—SOFONIAS 1:14.

1. Paano ilinaladawan kan Kasuratan an aldaw ni Jehova?

AN “DAKULA asin makangingirhat na aldaw” ni Jehova madali nang umabot sa maraot na palakaw na ini nin mga bagay. Ilinaladawan kan Kasuratan an aldaw ni Jehova bilang aldaw nin ralaban, kadikloman, kabangisan, kapurisawan, labi-labing kamondoan, kahandalan, asin kagabaan. Pero, magkakaigwa nin mga matatadang buhay, huli ta “an gabos na mag-arang sa ngaran ni Jehova makaliligtas.” (Joel 2:​30-32; Amos 5:​18-20) Iyo, sa panahon na iyan lalaglagon nin Dios an saiyang mga kaiwal asin ililigtas an saiyang banwaan.

2. Taano ta maninigo kitang makamate nin pagkaapurado manongod sa aldaw ni Jehova?

² Iinasosyar kan mga propeta nin Dios an pagkaapurado sa aldaw ni Jehova. Halimbawa, si Sofonias nagsurat: “An dakulang aldaw ni Jehova harani na. Iyan harani na, asin igwa nin paghihidale na gayo kaiyan.” (Sofonias 1:14) Mas apurado pa ngonyan an situwasyon ta an Pangenot na Parakastigo nin Dios, si Hadeng Jesu-Cristo, madali nang ‘ihagkos an saiyang espada sa saiyang paa asin mangabayo para sa katotoohan, kapakumbabaan, asin katanosan.’ (Salmo 45:​3, 4) Andam daw kamo para sa aldaw na iyan?

Darakula an Saindang Paglaom

3. Ano an mga paglaom nin nagkapirang Kristianong taga-Tesalonica, asin sa anong duwang dahelan na sinda nasala?

³ Dakol an nagkaigwa nin mga paglaom na dai naotob mapadapit sa aldaw ni Jehova. An nagkapirang enot na Kristiano sa Tesalonica nagsabi, ‘An aldaw ni Jehova uya na!’ (2 Tesalonica 2:2) Alagad ta may duwang pundamental na dahelan kun taano idto ta bakong harani na. Sa pagsitar sa saro kaini, si apostol Pablo nagsabi: “Kun noarin sinda nagsasarabi: ‘Katoninongan asin katiwasayan!’ dangan an biglang pagkalaglag maabot tolos sa sainda.” (1 Tesalonica 5:​1-6) Sa “panahon kan katapusan” na ini, kita mismo naghahalat sa kaotoban kan mga tataramon na iyan. (Daniel 12:4) An mga taga-Tesalonica mayo man kan saro pang prueba na nagdatong na an dakulang aldaw ni Jehova, ta sinabi sa sainda ni Pablo: “Iyan dai maabot kun dai nguna mangyari an apostasiya.” (2 Tesalonica 2:3) Kan isurat ni Pablo an mga tataramon na idto (kaidtong mga 51 C.E.), “an apostasiya” sa tunay na Kristianismo dai pa biyong nakatalubo. Ngonyan, naheheling niato iyan na biyo nang aktibo sa Kakristianohan. Pero, sa ibong kan saindang mga paglaom na dai naotob, an fiel na mga linahidan na idto sa Tesalonica, na padagos na fiel na naglingkod sa Dios sagkod sa kagadanan, sa kahurihurihi nag-ako nin langitnon na balos. (Kapahayagan 2:10) Babalosan man kita kun kita magdadanay na fiel mantang hinahalat niato an aldaw ni Jehova.

4. (a) Sa ano ikinokonektar an aldaw ni Jehova sa 2 Tesalonica 2:​1, 2? (b) Ano an mga opinyon kan inaapod na mga Ama kan Iglesia mapadapit sa pagbuelta ni Cristo asin sa konektadong mga bagay?

⁴ Ikinokonektar kan Biblia “an dakulang aldaw ni Jehova” sa “presensia kan satong Kagurangnan na Jesu-Cristo.” (2 Tesalonica 2:​1, 2) An inaapod na mga Ama kan Iglesia laen-laen an ideya manongod sa pagbuelta ni Cristo, sa saiyang presensia, asin sa saiyang Paghade nin Sangribong Taon. (Kapahayagan 20:4) Kan ikaduwang siglo C.E., si Papias na taga-Hierapolis nagkaigwa nin mga paglaom sa makangangalas na pagkabalunbon kan daga durante kan Milenyal na Paghade ni Cristo. Si Justinong Martir paorootrong nagtaram manongod sa presensia ni Jesus asin naglaom na an ibinalik na Jerusalem iyo an magin kabesera kan Saiyang Kahadean. Si Ireneo na taga-Lyons nagtokdo na pakalaglaga kan Imperyo nin Roma, si Jesus mapaheling, gagaposon si Satanas, asin maghahade sa daganon na Jerusalem.

5. Ano an isinabi nin nagkapirang iskolar manongod sa “Ikaduwang Pagdatong” ni Cristo asin sa saiyang Milenyal na Paghade?

⁵ Sinabi kan historyador na si Philip Schaff na “an pinakalataw na punto” sa panahon bago an Konsilyo nin Nicea kan 325 C.E. iyo “an paniniwala sa naheheling na paghade ni Cristo na may kamurawayan digdi sa daga kaiba an binuhay liwat na mga santo sa laog nin sangribong taon, bago an pankagabsan na pagkabuhay liwat asin paghokom.” An A Dictionary of the Bible, na an editor si James Hastings, nagsasabi: “Si Tertuliano, Ireneo, asin Hipolito naglalaom pa sa madali nang Pagdatong [ni Jesu-Cristo]; alagad ta paagi sa mga Amang Alejandrino minalaog kita sa sarong bagong kaisipan. . . . Huli sa pagsabi ni Agustin na an Milenyo iyo an panahon kan Iglesia militante, an Ikaduwang Pagdatong idinidigson sa harayo pang ngapit.”

An Aldaw ni Jehova Asin an Presensia ni Jesus

6. Taano ta dai kita maninigong magkonklusyon na haloyon pa an aldaw ni Jehova?

⁶ An mga salang paghona nagbunga nin mga pagkadesganar, alagad dai niato honaon na haloyon pa an aldaw ni Jehova. An dai naheheling na presensia ni Jesus, na dian iyan iinaasosyar kan Kasuratan, nagpoon na. An Torrengbantayan asin konektadong mga publikasyon kan Mga Saksi ni Jehova parate na nagtatao nin Makakasuratan na ebidensia na an presensia ni Cristo nagpoon kan taon 1914.a Kun siring, ano an isinabi ni Jesus manongod sa saiyang presensia?

7. (a) Ano an nagkapirang nagpapamidbid na kabtang kan tanda kan presensia ni Jesus asin kan pagtatapos kan palakaw nin mga bagay? (b) Paano kita maliligtas?

⁷ An presensia ni Jesus nagin tema nin orolay dai nahaloy bago sia nagadan. Pakadangog sa saiya na ihinula an pagkalaglag kan templo sa Jerusalem, an mga apostol nia na si Pedro, Santiago, Juan, asin Andres naghapot: “Noarin mangyayari an mga bagay na ini, asin ano an magigin tanda kan saimong presensia asin kan pagtatapos kan palakaw nin mga bagay?” (Mateo 24:​1-3; Marcos 13:​3, 4) Sa pagsimbag, ihinula ni Jesus an mga guerra, makuring kakulangan nin kakanon, linog, asin iba pang nagpapamidbid na kabtang kan “tanda” kan saiyang presensia asin kan pagtatapos kan palakaw nin mga bagay. Sinabi man nia: “An makatagal sagkod sa katapusan iyo an maliligtas.” (Mateo 24:13) Kita maliligtas kun kita fiel na magtatagal sagkod sa katapusan kan satong presenteng buhay o sagkod sa katapusan kan maraot na palakaw na ini.

8. Bago an katapusan kan Judiong palakaw, ano an kaipuhan na mahaman, asin ano an ginigibo ngonyan manongod digdi?

⁸ Bago an katapusan, maootob an sarong nangorognang makahulogan na nagpapamidbid na kabtang kan presensia ni Jesus. Mapadapit dian, sia nagsabi: “An maogmang baretang ini kan kahadean ihuhulit sa bilog na ineerokan na daga para sa pagpatotoo sa gabos na nasyon; dangan madatong an katapusan.” (Mateo 24:14) Bago an Jerusalem linaglag kan mga Romano asin natapos an Judiong palakaw nin mga bagay kan 70 C.E., nasabi na ni Pablo na an maogmang bareta “ikinahulit sa gabos na linalang sa sirong nin langit.” (Colosas 1:23) Minsan siring, ngonyan ginigibo kan Mga Saksi ni Jehova an mas mahiwas pang marhay na paghuhulit “sa bilog na ineerokan na daga.” Sa nakaaging pirang taon, binukasan nin Dios an dalan na ikatao an dakulang patotoo sa Sirangan na Europa. Huling igwa nin mga imprentahan asin iba pang pasilidad sa bilog na kinaban, an organisasyon ni Jehova andam para sa orog na aktibidad, minsan sa “teritoryo na dai nagigibo.” (Roma 15:​22, 23) Itinutulod daw kamo kan saindong puso na gibohon an pinakamakakaya nindo sa pagpatotoo bago umabot an katapusan? Kun iyo, mapakokosog kamo nin Dios na magkaigwa nin nakakokontentong kabtang sa maabot na gibohon.​—Filipos 4:​13; 2 Timoteo 4:17.

9. Ano an puntong idinoon ni Jesus, na nasusurat sa Mateo 24:36?

⁹ An ihinulang paghuhulit kan Kahadean asin iba pang nagpapamidbid na kabtang kan tanda kan presensia ni Jesus naootob na mismo ngonyan. Huli kaini, harani na an katapusan para sa maraot na palakaw nin mga bagay na ini. Totoo, si Jesus nagsabi: “Mapadapit sa aldaw asin oras na iyan mayo nin siisay man na nakaaaram, ni an mga anghel kan kalangitan ni an Aki, kundi an Ama sana.” (Mateo 24:​4-14, 36) Alagad an hula ni Jesus makatatabang sa sato na magin andam para sa “aldaw asin oras na iyan.”

Andam Sinda

10. Paano niato naaaraman na posibleng magpuka sa espirituwal?

¹⁰ Tanganing matadang buhay sa dakulang aldaw ni Jehova, kita dapat na magpuka sa espirituwal asin marigon na manindogan para sa tunay na pagsamba. (1 Corinto 16:13) Aram niato na posible an siring na pakatagal, huli ta iyan ginibo nin sarong diosnon na pamilya asin sinda natadang buhay sa Baha na luminaglag sa maraot na mga tawo kan 2370 B.C.E. Ikinokomparar an kapanahonan na idto sa saiyang presensia, si Jesus nagsabi: “Kun paano kan mga aldaw ni Noe, siring man an presensia kan Aki nin tawo. Huli ta kun paano sinda kan mga aldaw na idto bago kan baha, nagkakarakan asin nag-iirinom, an mga lalaki nag-aaragom asin an mga babae nagpapaaragom, sagkod kan aldaw na si Noe naglaog sa dahong; asin dai sinda nagmangno sagkod na dumatong an baha asin iinanod sinda gabos, magigin siring man kaiyan an presensia kan Aki nin tawo.”​—Mateo 24:​37-39.

11. Ano an iginawe ni Noe sa ibong kan kadahasan na yaon kan saiyang aldaw?

¹¹ Kapareho niato, si Noe asin an saiyang pamilya nabuhay sa sarong madahas na kinaban. An sumbikalan na anghel na “mga aki kan tunay na Dios” nagmateryalisar asin nangagom nin mga babae na paagi sa sainda sinda nagkaaki kan labi-labi karaot na mga Nefilim​—mga paradaogdaog na daing duwa-duwa na ginibo pang mas madahas an mga kamugtakan. (Genesis 6:​1, 2, 4; 1 Pedro 3:​19, 20) Minsan siring, “si Noe naglakaw sa kaibanan kan tunay na Dios” na may pagtubod. “Pinatunayan nia an saiyang sadiri na daing sala sa tahaw kan saiyang mga kapanahon”​—an maraot na kapag-arakian kan saiyang aldaw. (Genesis 6:​9-11) Paagi sa mapagngayongayong pagsarig sa Dios, magigibo man niato an arog kaiyan sa madahas asin maraot na kinaban na ini mantang hinahalat niato an aldaw ni Jehova.

12. (a) Apuera sa pagtogdok nin dahong, ano an ginibo ni Noe? (b) Ano an reaksion kan mga tawo sa paghuhulit ni Noe, asin ano an mga resulta para sa sainda?

¹² Midbid si Noe bilang an kagtogdok nin dahong para sa pagliligtas nin buhay sa Delubyo. Sia saro man na “parahulit nin katanosan,” alagad ta an saiyang mga kapanahon ‘dai nagmangno’ sa saiyang mensahe na tao nin Dios. Sinda nagkarakan asin nag-irinom, nag-agom, nagpamilya, asin ipinadagos an normal na mga gibo-gibo sa buhay sagkod na iinanod sinda gabos kan Baha. (2 Pedro 2:5; Genesis 6:​14) Habo nindang makadangog manongod sa tanos na pagtaram asin gawe, kun paanong an maraot na kapag-arakian ngonyan pinipintoan an saindang talinga sa sinasabi kan Mga Saksi ni Jehova manongod sa “pagsolsol sa Dios,” pagtubod ki Cristo, katanosan, asin “paghokom na madatong.” (Gibo 20:​20, 21; 24:​24, 25) Mayo nin makukuang rekord kun pira an tawong nabuhay digdi sa daga kan ipinahahayag ni Noe an mensahe nin Dios. Alagad sarong bagay an segurado, an populasyon kan daga nainaan na marhay kan 2370 B.C.E.! Pinara kan Delubyo an mga maraot, na an ilinigtas sana idtong mga andam para sa gibo nin Dios na idto​—si Noe asin an pito pa sa saiyang pamilya.​—Genesis 7:​19-​23; 2 Pedro 3:​5, 6.

13. Sa anong hudisyal na dekreto si Noe nagkompiansa nin biyo, asin paano sia guminawe kaoyon kaini?

¹³ Si Noe dai tinawan nin Dios nin notisya mga taon bago pa manongod sa eksaktong aldaw asin oras kan Baha. Minsan siring, kan si Noe 480 anyos, si Jehova nagmanda: “An sakuyang espiritu dai maghihiro para sa tawo sagkod noarin pa man huli ta sia man laman. Huli kaiyan an saiyang mga aldaw magigin sarong gatos may duwang polong taon.” (Genesis 6:3) Si Noe nagkompiansa nin biyo sa hudisyal na dekreto nin Dios na ini. Pag-edad nin 500, sia “nagin ama ni Sem, Cam asin Jafet,” asin isinusuherir kan kostumbre kaidtong mga panahon na 50 sagkod 60 taon an luminihis bago nag-agom an saiyang mga aking lalaki. Kan pagbotan si Noe na magtogdok kan dahong tanganing makaligtas sa Baha, an mga aking idto asin an mga agom na babae kaini malinaw na nagtabang sa saiya sa trabahong idto. An pagtogdok kan dahong posibleng kadungan kan paglilingkod ni Noe bilang “parahulit nin katanosan,” na nagpagin sibot sa saiya sa huring 40 sagkod 50 taon bago an Baha. (Genesis 5:​32; 6:​13-​22) Sa gabos na taon na idto, sia asin an saiyang pamilya guminawe na may pagtubod. Ipaheling man niato an pagtubod mantang kita naghuhulit kan maogmang bareta asin naghahalat kan aldaw ni Jehova.​—Hebreo 11:7.

14. Ano an sa kahurihurihi isinabi ni Jehova ki Noe, asin taano?

¹⁴ Kan matatapos na an dahong, tibaad inisip ni Noe na madali na an Baha, minsan ngani dai nia aram nin eksakto kun noarin iyan mangyayari. Sa kahurihurihi sinabihan na nanggad sia ni Jehova: “Pitong aldaw na sana papaoranan ko an daga nin apat na polong aldaw asin apat na polong banggi.” (Genesis 7:4) Tinawan kaiyan nin tama sanang panahon si Noe asin an saiyang pamilya na ikalaog sa dahong an gabos na klase nin hayop asin lumaog mismo dian bago nagpoon an Baha. Dai niato kaipuhan na maaraman an aldaw asin oras kan pagpoon kan paglaglag sa palakaw na ini; dai ipinagkatiwala sa sato an pagkatadang buhay nin mga hayop, asin an mga tawo na may esperansang matadang buhay nagraralaog na sa simbolikong dahong, an espirituwal na paraiso kan banwaan nin Dios.

“Magdanay Kamong Mapagbantay”

15. (a) Sa sadiri nindong pananaram, paano nindo ipaliliwanag an mga tataramon ni Jesus na yaon sa Mateo 24:​40-​44? (b) Ano an epekto kan dai pakaaram kan eksaktong oras kan pagdatong ni Jesus tanganing lubos na gibohon an pamamalos nin Dios?

¹⁵ Mapadapit sa saiyang presensia, ipinaliwanag ni Jesus: “Sa panahon na iyan an duwa katawo [magtatrabaho sa] oma: an saro kukuanon asin an saro iwawalat; duwang babae an maggigiling [nin trigo na magin harina] sa gilingan: an saro kukuanon asin an saro iwawalat. Magdanay kamong mapagbantay, kun siring, huli ta dai nindo aram kun sa anong aldaw madatong an saindong Kagurangnan. Alagad sabota nindo an sarong bagay, na kun naaraman kan kagharong kun sa anong pagbantay madatong an parahabon, nagpuka kutana sia asin dai pinabayaan na salakaton an saiyang harong. Huli kaini kamo man magin andam, huli ta sa oras na dai nindo pinaghohona, an Aki nin tawo madatong.” (Mateo 24:​40-44; Lucas 17:​34, 35) An dai pakaaram kan eksaktong oras kan pagdatong ni Jesus tanganing lubos na gibohon an pamamalos nin Dios pinapagdadanay kitang mapagmato asin nagtatao sa sato nin oportunidad sa aroaldaw na patunayan na kita naglilingkod ki Jehova na may mga motibong bakong paslo.

16. Ano an mangyayari sa mga indibiduwal na “iwawalat” asin sa mga “kukuanon”?

¹⁶ Kabilang sa mga indibiduwal na “iwawalat” sa kalaglagan kaiba kan mga maraot an mga dati naliwanagan alagad ta nalamos sa paslong pamumuhay. Makabilang logod kita sa mga “kukuanon,” idtong mga lubos na deboto ki Jehova asin tunay na nagpapasalamat sa saiyang espirituwal na mga probisyon paagi sa “fiel asin madonong na oripon.” (Mateo 24:​45-​47) Sagkod sa katapusan, maglingkod kita sa Dios na may “pagkamoot na gikan sa malinig na puso asin gikan sa marahay na konsensia patin gikan sa pagtubod na mayo nin pagsaginsagin.”​—1 Timoteo 1:5.

Kaipuhan an Banal na mga Gibo

17. (a) Ano an ihinula sa 2 Pedro 3:10? (b) Ano an nagkapira sa mga gawe asin gibo na ineenkaminar kan 2 Pedro 3:11?

¹⁷ Si apostol Pedro nagsurat: “An aldaw ni Jehova madatong siring sa parahabon, na dian an kalangitan mawawara na may makosog na sagitsit, alagad an mga elemento mantang labi-labi kainit matutunaw, asin an daga asin an mga gibo-gibo dian mahahayag.” (2 Pedro 3:10) An simbolikong kalangitan asin daga dai makapagdadanay huli sa init kan naglalaad na kaanggotan nin Dios. Kaya idinugang ni Pedro: “Mantang an gabos na bagay na ini tutunawon nin siring, kamo maninigong magin anong klaseng mga tawo sa banal na mga gawe asin gibo nin diosnon na debosyon!” (2 Pedro 3:11) Kabilang sa mga gawe asin gibong ini an regular na presensia sa Kristianong mga pagtiripon, paggibo nin karahayan sa iba, asin pagkaigwa nin makahulogan na kabtang sa paghuhulit kan maogmang bareta.​—Mateo 24:​14; Hebreo 10:​24, 25; 13:16.

18. Kun kita tinutuboan nin pagkamuya sa kinaban, ano an maninigo niatong gibohon?

¹⁸ Hinahagad kan “banal na mga gawe asin gibo nin diosnon na debosyon” na satong ‘papagdanayon an sadiri na daing digta kan kinaban.’ (Santiago 1:27) Alagad ano kun tinutuboan kita nin pagkamuya sa kinaban na ini? Tibaad naaakit kita pasiring sa peligrosong kamugtakan sa atubangan nin Dios paagi sa pagduman sa marigsok na aling-alingan o pagdangog nin musika asin mga kanta na nagpapalakop kan maraot na espiritu kan kinaban na ini. (2 Corinto 6:​14-​18) Kun iyan an kamugtakan, hagadon niato an tabang nin Dios sa pamibi tangani na dai kita umagi kaiba kan kinaban kundi magin aprobado sa atubangan kan Aki nin tawo. (Lucas 21:​34-​36; 1 Juan 2:​15-​17) Kun kita nagdusay sa Dios, segurado na boot niatong gibohon an pinakamakakaya niato na pataluboon asin papagdanayon an mainit na relasyon sa saiya asin sa siring magin andam para sa dakula asin makangingirhat na aldaw ni Jehova.

19. Taano an kadakol na parabalangibog kan Kahadean ta makalalaom na makaligtas sa pagtatapos kan maraot na palakaw nin mga bagay na ini?

¹⁹ An diosnon na si Noe asin an saiyang pamilya nakaligtas sa Baha na luminaglag sa suanoy na kinaban. An tanos sa moral na mga indibiduwal natadang buhay sa katapusan kan Judiong palakaw nin mga bagay kan 70 C.E. Halimbawa, si apostol Juan aktibo pa sa paglilingkod sa Dios kaidtong mga 96-98 C.E., kan isurat nia an librong Kapahayagan, an saiyang Ebanghelyo, asin an tolong ipinasabong na surat. Sa rinibo na maogmang nag-ako kan tunay na pagtubod kan Pentecostes nin 33 C.E., posible na dakol an nakaligtas sa katapusan kan Judiong palakaw. (Gibo 1:​15; 2:​41, 47; 4:4) Ngonyan an kadakol na parabalangibog kan Kahadean makalalaom na makaligtas sa pagtatapos kan presenteng palakaw nin mga bagay.

20. Taano ta maninigo kitang magin maigot na mga “parahulit nin katanosan”?

²⁰ Mantang nasa atubangan niato an pagkaligtas pasiring sa bagong kinaban, magin kitang maigot na mga “parahulit nin katanosan.” Kanigoan na pribilehio na maglingkod sa Dios sa huring mga aldaw na ini! Asin kanigoan na kagayagayahan na idirehir an mga tawo pasiring sa “dahong” na yaon ngonyan, an espirituwal na paraiso na nakakamtan kan banwaan nin Dios! Logod an minilyon na yaon dian ngonyan magdanay na fiel, puka sa espirituwal, asin andam para sa dakulang aldaw ni Jehova. Alagad ta ano an makatatabang sa sato gabos na magpuka?

[Nota sa Ibaba]

Ano an Isisimbag Nindo?

◻ Ano an mga paglaom nin nagkapira mapadapit sa aldaw ni Jehova asin sa presensia ni Cristo?

◻ Taano ta masasabi niato na si Noe asin an saiyang pamilya andam para sa Baha?

◻ Ano an mangyayari sa mga ‘nagdadanay na mapagbantay’ asin sa mga dai?

◻ Taano ta kaipuhan an banal na mga gibo, nangorogna mantang kita orog na nagrarani sa dakulang aldaw ni Jehova?