Bareta kan mga Parabalangibog kan Kahadean
“Pasiranga an Saindong Liwanag sa Atubangan nin mga Tawo”
SA SAIYANG Sermon sa Bukid, si Jesus nagsabi sa saiyang mga disipulo: “Kamo iyo an liwanag kan kinaban.” Nagpadagos sia sa pagsadol sa sainda: “Pasiranga an saindong liwanag sa atubangan nin mga tawo, tanganing maheling ninda an saindong marahay na mga gibo asin pamurawayon ninda an saindong Ama na nasa kalangitan.”—Mateo 5:14-16.
Sa Italia naririsa an marahay na mga gibo kan Mga Saksi ni Jehova. Halimbawa, an saindang marahay na paggawe kun nag-aatender sa saindang taonan na mga kombension nagdadara nin kaomawan sa Dios, siring sa pinatutunayan kan minasunod na mga bareta:
▪ Sa laog nin dakol na taon tinabangan nin sarong babae sa Terni, Italia, an saiyang aking babae sa pagmanehar nin sarong kapehan na harani sa istadyum sa siudad na iyan. Sia nagsasaysay: “Narisa ko an dakulang kalaenan kan mga nagdidigdi para sa soccer asin kan mga delegado sa mga kombension kan Mga Saksi ni Jehova digdi. An mga Saksi mas mabini sa saindang paggubing, asin sadiosan patin magalang sinda. Parate akong naghohorophorop kun paano marahayon na makapag-iiribaiba an mga tawong laen-laen an rasa.
“Sarong aldaw pinapondo ako nin sarong Saksi sa tinampo asin naghapot kun aram ko an ngaran nin Dios. Dai ko aram, asin huling aram kong marahay na mga tawo an Mga Saksi ni Jehova, uminoyon akong songkoon nia. May mga hapot ako manongod sa kamugtakan kan gadan, na sinimbag nia hale sa Biblia. Daing pag-alangan, inako ko an pag-adal sa Biblia, asin pakalihis nin duwang semana nagpoon na akong umatender sa mga pagtiripon.
“Sa primero kinontra ako kan sakong aking babae, alagad naliwat an saiyang kaisipan huli sa sakong paggawe asin determinasyon. Siyam na bulan na akong nag-aadal. Ngonyan nagpapahayag na nin pag-apresyar an sakong aking babae asin an saiyang agom sa mga Saksi na naglalaog sa saindang kapehan. Dapit sa sako, nabautismohan ako sa sarong kombension sa istadyum na ini.”
▪ Pakatapos nin sarong kombension sa Roseto degli Abruzzi, an manedyer sa sarong kampamento nagkomento: “Narisa ko na an Mga Saksi ni Jehova sadiosan na marhay sa gabos nindang ginigibo. Kan nakaaging semana, 40 sa sainda an yaon sa sakong kampamento, asin dai sinda naggibo nin ano man na mga problema. Al kontraryo, sinda sana an marani asin masabi sa saindo kun may dagdag pa sindang kaiba sa saindang harong na de rueda o tolda. Kun para sa sako, sinda an puedeng magin pinakamarahay na parokyano nindo.”
▪ Pakatapos kan iyo man sanang kombension, an sarong manedyer sa hotel nagsabi: “An Mga Saksi ni Jehova gabos matoninong. Bako sindang maribok, asin amay sindang natotorog. Sinda talagang maboot, sadiosan, asin marahay an ugale. Marahayon kun an gabos arog ninda. An iba hinahabon an gabos—mga plorera, bugtakan nin apos, minsan tisyung pankasilyas asin asukar! Daing arog kaiyan na nangyari kasuarin man sa saindo. Kun an saindong mga aki nagkukua nin ice cream sa repridyeretor kun banggi, dai na ako nag-iisip na magduman pa asin helingon kun ano an kinua ninda. Kinukuenta ninda an babayadan ninda sa sako asin nagbabayad tolos. Lubos an tiwala ko sa sainda. Magigin kanigoan karahay kun arog kaiyan an iba! Gusto ko kutana na an gabos kong bisita mga Saksi ni Jehova.”
Midbid na marhay sa Italia an Mga Saksi ni Jehova, arog sa dakol na iba pang parte kan daga. ‘Pinapagdadanay nindang marahay an saindang ugale sa tahaw nin mga nasyon’ asin sa siring nakatatao nin kaomawan sa tunay na Dios, na an ngaran dara ninda.—1 Pedro 2:12.