Padagos na Pagpasirang kan Satong Liwanag

¹ Ano an liwanag? Sa ibong kan saiyang modernong teknolohiya, an tawo dai pa man giraray lubos na nakaaaram kan simbag sa hapot na pinalataw ni Jehova sa Job 38:24. Kita daw makapagpapadagos na buhay kun mayong liwanag? Kun mayong liwanag kita dai puedeng mabuhay. Kaipuhan an liwanag tanganing makaheling sa pisikal, asin sinasabi sato kan Biblia na sa espirituwal na sentido, an “Dios liwanag.” (1 Juan 1:5) Kita biyong minadepende sa Saro na “nagtatao sa sato nin liwanag.”​—Sal. 118:27.

² Ini totoo sa pisikal na sentido alagad orog pa ngani sa espirituwal na paagi. An falsong relihion linagalag an kadakol na tawo, na binabayaan sinda sa espirituwal na kadikloman, na ‘nagkakapkap sa lanob arog kan mga buta.’ (Isa. 59:​9, 10) Napahiro kan saiyang daing kaagid na pagkamoot asin pagkaherak, si Jehova ‘nagsugo kan saiyang liwanag asin katotoohan.’ (Sal. 43:3) Literal na minilyon na tawong mapag-apresyar an naghimate, na nagluwas “hale sa kadikloman pasiring sa saiyang makangangalas na liwanag.”​—1 Ped. 2:9.

³ Si Jesu-Cristo igwang mahalagang papel sa pagdara kan liwanag na ini sa kinaban. Sia nagsabi: “Ako napadigdi bilang liwanag sa kinaban, tanganing an lambang saro na minatubod sa sako dai magdanay sa kadikloman.” (Juan 12:46) An gabos niang panahon, kosog, asin kakayahan ginamit tanganing ikapamidbid an liwanag kan katotoohan. Sia nagbiahe sa bilog niang dagang tinuboan, na naghuhulit asin nagtotokdo sa haros lambang siudad asin baryo.

⁴ Sa Mateo 5:​14-16 nagtao nin instruksion si Jesus sa saiyang mga disipulo: “Kamo iyo an liwanag kan kinaban. . . . Pasiranga an saindong liwanag sa atubangan nin mga tawo, tanganing maheling ninda an saindong marahay na mga gibo asin pamurawayon ninda an saindong Ama na nasa kalangitan.” Kapareho ni Jesus, sinda maninigong magin “mga ilaw sa kinaban.” (Fil. 2:15) Maogma nindang inako an paninimbagan na iyan, na minamansay iyan bilang pangenot na katuyohan ninda sa buhay. An bilog na Kristianong kongregasyon nagkasararo sa paghaman kan dakulang gibohon na iyan.

⁵ Kita ngonyan maninigong magpasalamat na kita nagin kabilang sa mga ‘nagsikwal kan mga gibo kan kadikloman.’ (Roma 13:​12, 13) Ikapaheheling ta an satong pag-apresyar paagi sa pag-arog kan halimbawa na itinao ni Jesus asin kan maimbod na mga Kristiano kan suanoy. An pangangaipo na madangog kan iba an katotoohan mas apurado asin kritikal ngonyan kisa kasuarin pa man sa kasaysayan nin tawo.

⁶ Paano Kita Makasisirang Bilang mga Ilaw? An pangenot na paagi na pasirangon an satong liwanag iyo an pakikakabtang sa gibohon na paghuhulit kan Kahadean. An lambang kongregasyon igwang regular, organisadong mga areglo sa paghuhulit sa iinasignar na teritoryo kaiyan. An kadakol na literatura makukua sa laen-laen na klase asin sa dakol na lenguahe. An mahiwas na pagtotokdo itinatao paagi sa mga pagtiripon, asin an tabang sa personal na pagtotokdo sa iba itinatao kan mga may eksperyensia. An mga oportunidad na magpartisipar bukas sa mga lalaki, babae, maedad, asin minsan sa mga aki. An gabos na gibohon kan kongregasyon nakasentro sa paghuhulit, na may mga probisyon na tabangan an lambang miembro na makapakikabtang. An regular, dayupot na pakiasosyar sa kongregasyon iyo an pinakamarahay na paagi na masierto na an satong liwanag padagos na sumirang.

⁷ Kita puedeng sumirang sa mga paagi na tibaad dai kalabot an berbal na pagpapatotoo. Puede niatong makua an atension nin iba paagi sana sa satong paggawe. Iyan an nasa isip ni Pedro kan sia magsadol: “Papagdanayon na marahay an saindong ugale sa tahaw nin mga nasyon, tanganing . . . tibaad huli sa saindong marahay na mga gibo na saindang naheheling pamurawayon ninda an Dios.” (1 Ped. 2:12) Dakol an naghuhusgar sa sarong gibohon o sarong organisasyon sono sa paggawe kaidtong mga asosyado dian. Kun an mga nagmamasid nakaririparo nin mga tawong malinig sa moral, sadiosan, matoninong, asin makinuyog sa ley, minamansay ninda an siring na mga tawo bilang napapalaen asin minakonklusyon na sinda namumuhay sono sa mga pamantayan na mas halangkaw kisa sa sinusunod kan kadaklan. Kaya an agom na lalaki nakapasisirang kan saiyang liwanag kun tinatawan nia nin onra asin pinapadangat an saiyang agom na babae sa mamomoton na paagi; ginigibo man iyan kan agom na babae paagi sa paggalang sa pagkapayo kan saiyang agom na lalaki. An mga aki napapalaen kun kinukuyog ninda an saindang mga magurang asin linilikayan an seksuwal na inmoralidad asin paggamit nin mga droga. An sarong empleyado na maigot sa saiyang trabaho, sadiosan, asin makonsiderasyon sa iba pinahahalagahan na marhay. Paagi sa pagpaheling kan sa Kristianong mga kualidad na ini, pinasisirang niato an satong liwanag.

⁸ An paghuhulit pagtaram sa iba manongod sa mga nanodan niato sa Tataramon nin Dios. Ginigibo iyan paagi sa pagpahayag sa mga pagtiripon o pagtaram sa mga pinto, alagad iyan bakong limitado sa siring na mga okasyon. Sa satong pan-aroaldaw na mga aktibidad kita nakanonompong nin dakol na tawo. Pirang beses kada aldaw na kamo nakikipag-olay sa saindong mga kataed? Pirang beses may nagtotoktok sa pinto nindo? Pirang laen-laen na tawo an nanonompongan nindo kun kamo nananaod, naglulunad sa auto, o nasa sekular na trabaho nindo? Kun kamo sarong hoben na nag-eeskuela, mabibilang daw nindo an mga indibiduwal na nakakaolay nindo sa kada aldaw? An oportunidad na makipag-olay sa iba haros daing limitasyon. An kaipuhan sana nindong gibohon iyo na isaisip an nagkapirang Makakasuratan na idea, magdara nin Biblia asin nagkapirang tract, asin magkaigwa nin inisyatiba na magtaram kun magkaoportunidad kamo.

⁹ Minsan ngani simple sanang marhay an impormal na pagpapatotoo, an nagkapira nag-aalangan na probaran iyan. Tibaad sinda nakamamate na sinda nasosopog o ninenerbiyos na gayong magdolok sa mga dai kamidbid. Tibaad nahahadit sinda na makasumpong nin anggot na reaksion. Idtong mga may eksperyensia na sa impormal na pagpapatotoo makasasabi saindo na bihira an dahelan na mahadit. An iba sa pundamental kapareho niato; sinda may kaparehong mga pangangaipo, kaparehong mga pighahaditan, asin nagmamawot nin parehong mga bagay para sa saindang sadiri asin sa saindang pamilya. An kadaklan magigin maboot an reaksion sa sarong maogmang paghuyom o makiamigong pataratara. Tanganing makapoon, tibaad kaipuhan kamong ‘magmapuso.’ (1 Tes. 2:2) Minsan siring, oras na kamo nakapoon na, tibaad magngalas kamo asin maogma sa mga resulta.

¹⁰ Kita Binebendisyonan kun Pinasisirang Ta an Satong Liwanag: Uya an nagkapirang halimbawa nin mga eksperyensia na bunga nin impormal na pagpapatotoo: Sarong 55 anyos na babae an nagpoprobar na magbalyo sa tinampo. Kan sia mababangga na nin sarong kotse, tinakma nin sarong tugang na babae an saiyang takyag asin binutong sia parayo sa peligro, na nagsasabi: “Mag-ingat po kamo. Kita nabubuhay sa peligrosong mga panahon!” Dangan ipinaliwanag nia kun taano an mga panahon ta peligroso. An babae naghapot, “Saro ka sa Mga Saksi ni Jehova?” Huling an babae nakakua nin saro sa satong mga libro hale sa saiyang matuang tugang na babae, an babae nagmawot na makanompong nin sarong Saksi ni Jehova, asin iyan nagin posible sa pagkatuparan na ini.

¹¹ An sarong tugang na babae nagpoon na kaolayon an sarong babae sa kuartong halatan sa opisina kan doktor. An babae naghinanyog nin atentibo dangan nagsabi: “Haloy-haloy na akong nakatupar nin Mga Saksi ni Jehova; alagad kun sa ngapit magin nanggad akong saro sa Mga Saksi ni Jehova mismo, iyan magigin huli sa sinabi mo sa sako. An paghinanyog sa saimo garo pagpoon na makaheling nin liwanag sa sarong madiklom na lugar.”

¹² An sarong gibo nin kabootan puedeng magin dalan na matabangan an iba na makanood kan katotoohan. Mantang naglalakaw papuli hale sa paglilingkod sa langtad, an duwang tugang na babae nariparo an sarong maedad nang babae na garo may namamatean mantang nagbababa sa auto. Nagpondo sinda asin hinapot an babae kun kaipuhan nia an tabang. Nagngalas siang marhay na an duwang dai nia kamirimidbid mapaheling nin interes sa saiya kaya sia nag-insister na aramon kun ano an dahelan kan siring na maboot na hiro. Binukasan kaini an oportunidad na makapatotoo. An babae dai nagduwaduwang itinao an saiyang adres asin mainit na inimbitaran sinda na bisitahon sia. Naponan an sarong pag-adal. Dai naghaloy an babae nagpoon na umatender sa mga pagtiripon asin ngonyan ihinihiras na sa iba an katotoohan.

¹³ An sarong maedad nang tugang na babae inaaprobetsaran an amay na agang pagpapatotoo sa lokal na baybayon nin dagat. Nakakaolay nia an mga katabang sa harong, paraaling nin aki, empleyado sa bangko, asin mayayaman na babae na naglalakawlakaw sa dalan sa baybayon nin dagat. Sia nagkokondukta nin mga pag-adal sa Biblia, na nakatukaw sa mga bangko na harani sa baybayon nin dagat. An nagkapirang tawo nakanood kan katotoohan sa saiya asin ngonyan mga Saksi ni Jehova na.

¹⁴ Sa saiyang sekular na trabaho, an sarong tugang na babae nadangog an sarong katrabaho na nagtataram manongod sa sarong politikal na partido na sa pagtubod nia makareresolber kan mga problema nin kinaban. An tugang na babae nagpaliwanag, na sinasabi an mga panuga manongod sa gigibohon kan Kahadean nin Dios. An pag-orolay na ini sa trabaho naggiya sa sarong regular na pag-adal sa Biblia sa harong, asin sa katapustapusi an babae asin an saiyang agom na lalaki nagin mga Saksi.

¹⁵ Nungkang Lingawan na Kamo Saksi! Kan iladawan ni Jesus an saiyang mga disipulo bilang “liwanag kan kinaban,” sia nangatanosan na sinda maninigong nagtatabang sa iba na makinabang sa espirituwal na kaliwanagan kan Tataramon nin Dios. Kun iaaplikar ta an hatol ni Jesus, paano niato mamansayon an satong ministeryo?

¹⁶ Kun naghahanap nin trabaho, an nagkapirang tawo pinipili an trabahong por ora. Nagbubugtak sinda nin limitasyon sa panahon asin kosog na gagamiton ninda para dian huli ta mas pinaoorog ninda na gamiton an kadaklan na panahon ninda sa mga aktibidad na nakukuanan ninda nin orog na personal na satispaksion. Kita daw igwa kan kaparehong pagmansay sa satong ministeryo? Minsan ngani kita tibaad makamate na obligado asin andam nganing magtagama nin panahon para sa ministeryo, an pangenot na interes ta daw maninigo na nasa ibang bagay?

¹⁷ Nasasabotan na dai mapupuede an por orang Kristiano, kita nagdusay kan satong sadiri, na ‘pinaindahan an satong sadiri’ asin uminoyon na “padagos” na sumunod ki Jesus. (Mat. 16:24) Kamawotan niato na padagos na magin “bilog na kalag,” na inaaprobetsaran an lambang oportunidad na pasirangon an satong liwanag tanganing aboton an mga tawo dawa saen sinda. (Col. 3:​23, 24) Dapat tang tumangon an kinabanon na mga gawe, papagdanayon an satong kaigotan pareho kan enot, asin seguradohon na an satong liwanag nagpapadagos na sumirang nin maliwanag. An nagkapira tibaad tinogotan na lumipot an saindang kaigotan asin an saindang liwanag magin na sanang nagrurumarom na ilaw, na haros dai na maheling sa haraning distansia. An sarong siring tibaad mangaipo nin tabang na ikabalik an nawarang kaigotan sa ministeryo.

¹⁸ An nagkapira tibaad may tendensiang dai humiro huli ta an satong mensahe dai nagugustohan kan dakol. Sinabi ni Pablo na an mensahe manongod ki Cristo “karungawan sa mga mapapara.” (1 Cor. 1:18) Minsan siring, ano man an sabihon kan iba, sia mapuersang nagpahayag: “Dai ko ikinasosopog an maogmang bareta.” (Roma 1:16) An saro na nasosopog nakamamateng hababa o bakong maninigo. Taano kita ta masosopog mantang an satong itinataram manongod sa Kaharohalangkaweng Soberano kan uniberso asin sa makangangalas na mga probisyon na ginibo nia para sa satong daing sagkod na kaogmahan? Imposibleng makamate kita nin pagin hababa o bakong maninigo kun itinataram niato an mga katotoohan na ini sa iba. Imbes, kita maninigong mapahiro na gibohon an bilog niatong makakaya, na ipinaheheling an satong kombiksion na kita “mayo nin maninigong ikasopog.”​—2 Tim. 2:15.

¹⁹ An liwanag nin katotoohan na nagsisirang ngonyan sa kadagaan sa bilog na daga mainit na nag-aaIok kan paglaom na buhay na daing katapusan sa sarong paraisong bagong kinaban. Ipaheling niato na isinapuso ta an sadol na padagos na pasirangon an satong liwanag! Kun iyan gigibohon niato, kita magkakaigwa nin dahelan na maggayagaya kapareho kan mga disipulo na aroaldaw “nagpadagos . . . na dai nin ontok sa pagtokdo asin pagpahayag kan maogmang bareta dapit sa Cristo, si Jesus.”​—Gibo 5:42.