“Pasiranga an Saindong Liwanag”
1 An kinaban na nasa palibot niato nasa kadikloman sa moral asin espirituwal na paagi. Ibinubuyagyag kan liwanag nin katotoohan an “daing pakinabang na mga gibo” nin kadikloman tanganing malikayan an nakagagadan na mga singkogan na ini. Bilang resulta, sinadol ni apostol Pablo an mga Kristiano: “Padagos kamong maglakaw bilang mga aki nin liwanag.”—Efe. 5:8, 11.
2 “An bunga kan liwanag” kabaliktaran na marhay kan kaduloman kan kinaban. (Efe. 5:9) Tangani na mapaluwas an bungang ini nagkakaipo na kita magin marahayon na mga halimbawa sa Kristianong pamumuhay, an klase nin mga tawo na inooyonan ni Jesus. Dapat man niatong ipaheling an mga kualidad na arog kan pagigin bilog na puso, sinseridad, asin entusiasmo para sa katotoohan. An bungang ini nangangaipong ipaheling sa satong aroaldaw na buhay asin sa satong ministeryo.
3 Magsirang sa Gabos na Oportunidad: Sinabihan ni Jesus an saiyang mga disipulo: “Pasiranga an saindong liwanag sa atubangan nin mga tawo.” (Mat. 5:16) Bilang pag-arog ki Jesus, ipinababanaag niato an liwanag ni Jehova paagi sa paghuhulit dapit sa Kahadean nin Dios asin sa saiyang mga katuyohan. Kita nagsisirang bilang mga liwanag kun kita nagdadalaw sa harong kan mga tawo asin kun pinalalakop niato an katotoohan sa trabaho, sa eskuelahan, sa satong kataraed, o kun saen man kita igwa nin oportunidad.—Fil. 2:15.
4 Nagsabi si Jesus na may mga maoongis sa liwanag. (Juan 3:20) Kaya dai nanluluya an boot niato kun an mayoriya nagsasayumang pasirangon sa sainda “an liwanag kan mamuraway na maogmang bareta manongod ki Cristo.” (2 Cor. 4:4) Nababasa ni Jehova an puso nin katawohan asin habo sia sa mga paragibo nin maraot sa tahaw kan saiyang banwaan.
5 Kun kinukuyog niato an mga dalan ni Jehova asin ikinaoogma an espirituwal na liwanag, ikapababanaag niato iyan sa iba. Kun naririparo ninda paagi sa satong gawe-gawe na kita ‘igwa kan ilaw nin buhay,’ kun siring sinda man mamomotibar na gumibo nin kinakaipuhan na mga pagbabago tanganing magin mga paradara nin liwanag.—Juan 8:12.
6 Paagi sa pagpasirang kan satong liwanag, inoomaw niato an satong Kaglalang asin tinatabangan ta an mga sinsero na mamidbid sia asin magkamit kan paglaom na buhay na daing katapusan. (1 Ped. 2:12) Huling igwa kita kan liwanag, gamiton ta iyan sa pagtabang sa iba na maheling an dalan paluwas sa espirituwal na kadikloman asin magpaluwas nin mga gibo na para sa liwanag.