“Pasiranga an Saindong Liwanag”
1. May pribilehio kitang ihiras an ano?
1 Poon sa kaagahon sagkod sa pagdiklom, an kagayonan kan naheheling na liwanag nagtatao nin kaomawan ki Jehova Dios. Pero, inagda ni Jesus an saiyang mga disipulo na magkaigwa nin ibang klase nin liwanag—an “liwanag nin buhay.” (Juan 8:12) An pagkaigwa kan espirituwal na kaliwanagan na ini sarong espesyal na pribilehio na may kaibang seryosong mga paninimbagan. Nagtao nin instruksion si Jesus: “Pasiranga an saindong liwanag sa atubangan nin mga tawo,” na paagi kaiyan makikinabang an iba. (Mat. 5:16) Sa tahaw nin grabeng espirituwal na kadikloman ngonyan, an liwanag na ini dapat na ihiras, asin orog na kaipuhan iyan kisa kasuarin man! Paano niato mapapasirang an satong liwanag arog ni Cristo?
2. Paano ipinaheling ni Jesus an halaga kan paghiras nin espirituwal na liwanag?
2 Paagi sa Paghuhulit: Ginamit ni Jesus an saiyang panahon, kosog, asin rekurso tanganing ipaaram an liwanag nin katotoohan sa mga tawo sa saindang mga harong, mga plasang pampubliko, sa alituktok nin mga bukid—saen man sinda manompongan. Minidbid nia an nagdadanay na halaga kan pagtao nin tunay na espirituwal na kaliwanagan. (Juan 12:46) Tanganing maabot an mas dakol pang tawo, iinandam ni Jesus an saiyang mga disipulo na magin “liwanag kan kinaban.” (Mat. 5:14) Pinasirang ninda an saindang liwanag paagi sa paggibo nin marahay sa saindang kapwa asin paghiras nin espirituwal na mga katotoohan.
3. Paano niato ikakapaheling an tunay na pagpahalaga sa liwanag nin katotoohan?
3 Sineseryoso kan banwaan nin Dios an paninimbagan na ‘padagos na maglakaw bilang mga aki nin liwanag,’ asin sinda naghuhulit saen man manompongan an mga tawo. (Efe. 5:8) An pagbasa sana kan Biblia o iba pang Kristianong mga publikasyon na naheheling kan mga tawo sa panahon nin break sa trabaho o klase puedeng magin paagi na makapoon nin orolay sa Kasuratan. Huli sa paaging ini, an sarong hoben na tugang na babae nakapoon nin pag-adal sa Biblia asin nakapasakamot nin mga libro sa 12 niang kaklase!
4. Taano ta kalabot sa ‘pagpasirang kan satong liwanag’ an arogan na paggawe?
4 Paagi sa Marahay na mga Gibo: Kalabot man sa pagpasirang kan satong liwanag an paggawe niato sa aroaldaw. (Efe. 5:9) Sa trabaho, eskuelahan, asin iba pang pampublikong mga lugar, an Kristianong paggawe risang marhay asin nagtatao nin mga oportunidad na ihiras an mga katotoohan sa Biblia. (1 Ped. 2:12) Halimbawa, an marahay na gawe-gawe nin sarong singko anyos na aking lalaki nagpahiro sa saiyang maestra na apodan an mga magurang kaini. Sinabi kan maestra, “Dai pa ako noarin man nakaheling nin sarong aki na igwa nin siring kakosog na paninindogan sa kun ano an tama asin sala!” Iyo, an satong ministeryo asin marahay na paggawe nakakaakit sa mga tawo pasiring sa “liwanag nin buhay” asin nagtatao nin kaomawan sa satong Dios.