Gumibo Kamo nin Marahay Asin Oomawon Kamo!
1 “Igwa sinda nin katrangkilohan na dai ko noarin man naheling sa siisay man na ibang tawo.” “Maogmang makaibanan an grupong ini.” Normal na ini sa dakol na positibong komento na naresibi hale sa mga nagmamasid pakatapos kan pandistritong mga kombension kan nakaaging taon, na nagdodoon kan marahay na reputasyon niato bilang sarong organisasyon. (Tal. 27:2; 1 Cor. 4:9) Sa katapustapusi, an siring na pag-omaw napapaduman ki Jehova. (Mat. 5:16) An saro pang ekselenteng oportunidad na omawon an Dios nasa atubangan niato ngonyan sa “Mga Paratokdo kan Tataramon nin Dios” na Pandistritong Kombension sa taon na ini.
2 Kada taon nakareresibi kita nin maboot na mga pagirumdom mapadapit sa tamang gawe-gawe sa kombension. Taano? Huli ta mantang padagos na nagrururo an aktitud, paggubing, asin gawe-gawe kan kinaban, habo niato na arogon sinda. Habo niatong maraot an satong marahay na reputasyon. (Efe. 2:2; 4:17) Girumdomon niato an minasunod na mga patanid.
3 Gumibo Kamo nin Marahay—Sa Kombension: Naghahanga an mga nagmamasid kun naheheling ninda an mga aki niato na minagawe sa magalang asin makinuyog na paagi. (Efe. 6:1, 2) Mga magurang, bantayan tabi an mga aki nindo sa kombension tanganing dai sinda makadisturbo sa iba. Durante kan mga sesyon, tokdoan sinda kun paano magibo nin simpleng mga nota asin mag-aatento. Sa pag-oltanan nin mga sesyon dai sinda maninigong togotan na magparadarodalagan na dai nin nagbabantay, huling an pasilidad na ginagamit niato minamansay bilang sarong dakulang Kingdom Hall durante kan kombension.
4 Irinerekomendar giraray niamo na an gabos magbalon nin sadiring pangodtohan sa kombension kada aldaw. Ini nagtatao nin marahay na oportunidad na makarelaks durante kan pahingalo sa odto asin makagamit nin dugang na oras sa pakikiasosyar sa mga tugang hale sa manlaenlaen na kongregasyon. Kun an gabos na tugang mabalon nin sadiri nindang pangodtohan imbes na magbakal nin kakanon sa mga paratinda sa luwas o restawran, makakapadesganar ini sa nagkapira sa mga paratindang ini na magtiripon sa mga entrada kan pasilidad kan kombension, na nagigin dahelan nin pagsurusuan asin makanos paghelingon. Magbalon nin simple sanang kakanon, bakong nin dakol na kakanon, tanganing makakan iyan sa tukawan nindo na dai nakaookupar nin dakulang espasyo. Paagi kaini dai madidisturbo nin labi-labi an iba.
5 Bilang paggalang sa espirituwal na lamesa ni Jehova, dai maninigong gumibo nin komersial na aktibidad an siisay man na nag-aatender. Sala para sa siisay man na tugang na aprobetsaran an kombension tangani na palakopon an saiyang mga aktibidad sa negosyo, o magtinda nin arog baga kan mga patos sa libro o T-shirt, abaniko, o kalendaryo na may nakaimprentang ngaran kan kombension.
6 Kun itatapok nin lambang tugang an sadiri niang basura sa tamang mga lalagan o dadarahon iyan sa harong, gigibohon kaining pasil an pagpapadanay na malinig an pasilidad kan kombension. Bago humale sa hapon, magin listo na puroton an ano man na papel o iba pang bagay na tibaad ikinaapon dian. Maninigo na sanayon nin mga magurang an saindang mga aki na dai mag-apon nin basura sa salog kundi iapon iyan sa tamang paagi. Kun kaya nindong magboluntaryo sa laog nin halipot na panahon tangani na tumabang sa paglinig kan pasilidad pakatapos kan mga sesyon kada aldaw, ini aapresyaron na marhay kan mga tugang na nakaasignar sa departamento sa paglinig.
7 Gumibo Kamo nin Marahay—Paagi sa Satong Paggubing Asin Pag-alinyar: Pakatapos kan saro sa pandistritong mga kombension kan nakaaging taon, an editor nin sarong dakulang diaryo sa sarong siudad nagsurat: “Orog kisa ano pa man na ibang bagay, an paggawe kan mga Saksi mismo an pinakarisang marhay. Kanigoan kanakarerepresko na maheling an kadakol na tawo na an postura igwa nin dignidad asin paggalang. Nakasulot nin marahayon na pan-Domingong gubing, ginatos na pamilya na nagrerepresentar kan kabilogan na rasa asin etnikong pinaghalean an matoninong na nagburunyog sa ampiteatro. An gawe-gawe ninda napapalaen na marhay sa gawe-gawe kan kadaklan na mga grupo na nagraralaog sa ampiteatro. Sa katunayan, napapalaen na marhay an mga Saksi sa kadaklan na mga grupo sa pankagabsan. Nagin komun nang marhay na makaheling nin daing modong gawe-gawe sa publiko. . . . Tunay na nakagiginhawa an grupo nin mga Saksi.” Nungka logod niatong togotan an satong paggubing asin pag-alinyar o an satong gawe-gawe na sa ano man na paagi makabawas sa pagigin espirituwal kan kombension.—Fil. 1:10; 1 Tim. 2:9, 10.
8 Gumibo Kamo nin Marahay—Sa Bautismo: Bobooton kan mga kandidato sa bautismo na trataron an okasyon na ini na may pinakahalangkaw na dignidad. An pagsulot nin mabining pankarigos magpapaheling nin pagpahalaga sa pagigin sagrado kan okasyon. Kapakipakinabang na marhay para sa mga namamayo nin pag-adal sa Biblia na repasohon sa mga inaadalan ninda bago umatender sa kombension an “Mga Hapot Hale sa mga Parabasa” sa Abril 1, 1995 luwas kan An Torrengbantayan.
9 An satong marahay na ugale asin diosnon na gawe-gawe nagpapatotoo sa satong Kristianong mga tinutubod asin ginigibong mas pasil para sa mga sadiosan an puso na marekonoser an katotoohan. Kun siring, ‘padagos kitang gumibo nin marahay’ asin oomawon kita mantang nag-aatender sa “Mga Paratokdo kan Tataramon nin Dios” na Pandistritong Kombension.—Roma 13:3.