Natatakot daw Kamong Magtiwala sa Iba?
‘MAYO akong makaolay. Dai makakaintindi an mga tawo. Sibot-sibot sinda sa saindang sadiring mga problema. Mayo sindang panahon para sa sako.’ Siring kaiyan an saboot nin dakol, kaya sinasadiri na sana ninda an mga bagay. Kun kinukumusta sinda nin iba, parate na gusto nindang magsabi sa sainda, alagad dai ninda sinasabi. Dai nanggad sinda makapagpahayag kan saindang sadiri.
Totoo, igwa nin mga habong patabang sa iba. Pero, dakol an talagang gustong-gustong patabang alagad natatakot na ihayag an saindang personal na gayong mga iniisip, namamatean, asin eksperyensia. Saro daw kamo sa sainda? Mayo na daw talaga kamong mapagtitiwalaan?
Pagsabot sa Takot
Sa presenteng kinaban lakop an dai pagtitiwala. An mga hoben dai nagtataram sa saindang mga magurang. An mga magurang dai makapag-olay-olay. Pipira an gustong makipag-olay sa mga may autoridad. Huling dai makapagkompiar sa iba, an nagkapira naggagamit nin alkohol, droga, o palaen na estilo nin pamumuhay sa paghingoang dulagan an saindang mga problema.—Talinhaga 23:29-35; Isaias 56:12.
An pagkompiar sa mga may autoridad, arog baga nin mga klerigo, doktor, terapista, asin maestro, nagluya huli sa daing katapusan na mga pagkabuyagyag nin pandadaya asin inmoralidad. Halimbawa, an sarong pagkarkulo nagsasabi na an labing 10 porsiento nin mga klerigo kalabot sa salang gawe-gawe sa sekso. An “mga pararaot nin pagtitiwala” na ini, sabi nin sarong parasurat, “nagkokotkot nin mga ampas, guang asin gatak sa mga relasyon nin tawo.” Paano ini nakaaapektar sa saindang mga kongregasyon? Rinaraot kaiyan an pagtitiwala.
An lakop na pagbagsak nin moral nagbunga man nin krisis sa laog nin pamilya, sagkod sa kamugtakan na an mga pamilyang bakong normal an pagpunsionar haros nauuso na, bakong napapalaen. Kaidto an harong sarong kamugtakan na nakapaooswag. Ngonyan iyan parateng arog sa gasolinahan kun panahon nin pagkakan. Kun an aki dumakula sa pamilya na “dai nin natural na kapadangatan,” an pankagabsan na resulta iyo an kadaihan nin pagtitiwala sa iba kun nasa edad na.—2 Timoteo 3:3.
Dugang pa, mantang naggagrabe an mga kamugtakan sa kinaban, orog kitang nagigin madaling maimpluwensiahan nin makolog na mga pangyayari. Sa sarong kaagid na situwasyon, si propeta Miqueas nagsurat: “Dai kamo magtiwala sa dayupot na amigo.” (Miqueas 7:5) Tibaad siring man kaiyan an mamatean nindo pakatapos nin sadit na pagkadesganar, pagkaraot nin kompiansa, o dakulang pangyayari na buhay an katimbang. Kamo nasasakitan na magtiwala giraray sa iba asin orog na namamagol an emosyon, na namumuhay kada aldaw na may emosyonal na kaolangan. (Ikomparar an Salmo 102:1-7.) Totoo, an siring na kaisipan tibaad makatabang sa saindo na magpunsionar, alagad hinahale kan saindong “kolog kan puso” an ano man na tunay na kagayagayahan sa buhay. (Talinhaga 15:13) An totoo, tanganing magin marahay kamo sa espirituwal, emosyonal, mental, asin pisikal, an kaolangan na iyan dapat na haleon asin dapat kamong makanood na magtiwala sa mga tawo. Posible daw iyan? Iyo.
Taano ta Dapat na Mahale an Kaolangan?
An pagkompiar sa iba nakagiginhawa sa purisaw na puso. Ini an eksperyensia ni Ana. Marahay an saiyang pag-agom, tiwasay an harong, alagad purisaw siang marhay. Minsan ngani “may kapaitan an saiyang kalag,” may kadonongan na “nagpoon siang mamibi ki Jehova” nin makosog kaya nagkubogkubog an saiyang silensiong mga ngabil. Iyo, nagkompiar sia ki Jehova. Dangan ipinahayag nia an nasa saiyang puso sa representante nin Dios na si Eli. Na may anong resulta? “[Si Ana] nagpadagos sa saiyang paglakaw asin nagkakan, asin an saiyang lalauogon bako nang mamondo.”—1 Samuel 1:1-18.
Aram na nin kadaklan na kultura an mga pakinabang sa pagtuga nin pribadong mga bagay. Halimbawa, puedeng magin kapakipakinabang an pagpahayag nin mga ideya asin eksperyensia duman sa mga nag-agi na sa kaparehong mga situwasyon. An mga parasiyasat nagkokonklusyon: “An pagsolosolo sa emosyonal na paagi pinaggigikanan nin helang—kaipuhan kitang magtuga tanganing magdanay na marahay an kaisipan.” An nagdadakol na pagsiyasat sa siensia nagpapatunay sa pagigin totoo kan ipinasabong na talinhaga na nagsasabi: “An nagsosolosolo maghahanap sa saiyang sadiring paslong pagmawot; malapas sia sa gabos na kapakipakinabang na kadonongan.”—Talinhaga 18:1.
Kun dai kamo magsasabi sa iba, paano ninda kamo matatabangan? Minsan ngani si Jehova Dios nagbabasa nin puso, an saindong kairairaroming mga kaisipan asin saboot dai aram kan pamilya asin mga katood—apuera kun isabi nindo. (1 Cronica 28:9) Kun an problema may labot sa paglapas sa ley nin Dios, an dai pagtuga orog sanang mapagrabe kaiyan.—Talinhaga 28:13.
Sierto nanggad, an mga pakinabang sa pagtuga nin kapurisawan sa iba nakalalabi kisa sa mga peligro na makolgan an boot. Siempre, dai iyan nangangahulogan na maninigo tang ihayag na daing pakundangan an pribadong mga detalye. (Ikomparar an Hokom 16:18; Jeremias 9:4; Lucas 21:16.) “Igwa nin magkairiba na andam na magrinonotan,” an patanid kan Talinhaga 18:24 alagad idinagdag: “Igwa nin katood na labi pa kadayupot sa tugang.” Saen nindo manonompongan an siring na katood?
Magtiwala sa Saindong Pamilya
Kun igwa kamo nin problema, naprobaran na daw nindong ipakipag-olay iyan sa saindong agom o sa saindong mga magurang? “Dapit sa dakol na problema, an kaipuhan sana pag-olayan iyan nin lubos,” an inadmitir nin sarong eksperyensiadong parakonseho. (Talinhaga 27:9) An Kristianong mga agom na lalaki na ‘namomoot sa saindang agom na babae arog kan pagkamoot ninda sa saindang sadiri,’ an mga agom na babae ‘na nagpapasakop sa saindang agom na lalaki,’ asin an mga magurang na isinasaboot an saindang paninimbagan na tao nin Dios na ‘padakulaon an saindang mga aki sa pagtatanos nin isip ni Jehova’ maghihingoang marhay na magin madinamayon na parahinanyog asin matinabang na parakonseho. (Efeso 5:22, 33; 6:4) Minsan ngani mayo sia nin agom ni mga aki sa sentido nin pagigin laman, kanigoan kagayon na halimbawa an itinao ni Jesus sa bagay na ini!—Marcos 10:13-16; Efeso 5:25-27.
Ano kun an problema dai kayang resolberan sa laog nin pamilya? Sa Kristianong kongregasyon, dai kita noarin man kaipuhan na magsolo. “Siisay an maluya, asin bako akong maluya?” an sabi ni apostol Pablo. (2 Corinto 11:29) Nagsadol sia: “Padagos na magturowangan sa pagabat sa lambang saro.” (Galacia 6:2; Roma 15:1) Sa tahaw kan satong espirituwal na mga tugang na lalaki asin babae, daing duwa-duwa na makanonompong kita nin labi sa sarong “tugang na namundag manongod sa panahon nin kasakitan.”—Talinhaga 17:17.
Magtiwala sa Kongregasyon
Sa labing 80,000 na kongregasyon kan Mga Saksi ni Jehova sa bilog na daga, igwa nin mapakumbabang mga lalaki na naglilingkod bilang “mga katabang para sa saindong kagayagayahan.” (2 Corinto 1:24) Ini iyo an kamagurangan. “An lambang saro,” sabi ni Isaias, “kaipuhan na magin siring sa pailihan sa doros asin tagoan sa bagyo, siring sa mga sapa nin tubig sa sarong desierto, siring sa limpoy nin dakulang gapo sa tagiltil na daga.” Pinagmamaigotan kan kamagurangan na magin siring kaiyan.—Isaias 32:2; 50:4; 1 Tesalonica 5:14.
An kamagurangan nakakaabot sa Makakasuratan na mga kahagadan bago ‘nombrahan kan banal na espiritu.’ An pakaaram kaini mapakosog sa saindong kompiansa sa sainda. (Gibo 20:28; 1 Timoteo 3:2-7; Tito 1:5-9) An ipinakipag-olay nindo sa sarong magurang sa kongregasyon magdadanay na estriktong kompidensial. An pagigin mapagtitiwalaan saro sa saiyang mga kualipikasyon.—Ikomparar an Exodo 18:21; Nehemias 7:2.
An kamagurangan sa kongregasyon “nagbabantay sa saindong kalag bilang an mga maninimbag.” (Hebreo 13:17) Dai daw ini nagpapahiro sa saindo na magtiwala sa mga lalaking ini? Natural sana na bakong gabos na kamagurangan parareho marahayon an mga kualidad. An nagkapira tibaad garo mas madaling dolokon, maboot, o mapagsabot kisa sa iba. (2 Corinto 12:15; 1 Tesalonica 2:7, 8, 11) Taano ta dai magkompiar sa sarong magurang sa kongregasyon na pamugtak an boot nindo?
An mga lalaking ini bakong mga propesyonal na binabayadan. Imbes, sinda “balaog na mga lalaki,” na itinao ni Jehova tanganing tabangan kamo. (Efeso 4:8, 11-13; Galacia 6:1) Paano? Ekspertong ginagamit an Biblia, iaaplikar ninda sa personal na situwasyon nindo an nakapagpapaomay na kapangyarihan kaiyan. (Salmo 107:20; Talinhaga 12:18; Hebreo 4:12, 13) Mamimibi sinda kaiba nindo asin para sa saindo. (Filipos 1:9; Santiago 5:13-18) Dakula an magigibo kan tabang nin siring na mamomoton na mga parakonseho tanganing maomayan an purisaw na espiritu asin ikabalik an katoninongan nin isip.
Kun Paano Makagigibo nin May Pagtitiwalang mga Relasyon
An pagpatabang, pagpahatol, o pakiolay na kamo hinanyogon sana bakong tanda nin kaluyahan o pagkasudya. Iyan saro sanang realistikong pag-ako na kita bakong sangkap asin na mayo ni saro na igwa kan gabos na solusyon. Tunay nanggad, an pinakadakulang parakonseho asin tugaan niato iyo an satong langitnon na Ama, si Jehova Dios. Minaoyon kita sa salmista na nagsurat: “Si Jehova iyo an sakong kasarigan asin sakong kalasag. Dian sa saiya nagtiwala an sakong puso, asin ako tinabangan.” (Salmo 28:7) Sa pamibi daing pag-alangan na ‘biyong ikapahahayag niato sa saiya an laog kan satong puso’ sa ano man na panahon, na kompiado na sia nagdadangog sa sato asin nagmamakolog sa sato.—Salmo 62:7, 8; 1 Pedro 5:7.
Alagad paano nindo manonodan na magtiwala sa kamagurangan asin iba pa sa kongregasyon? Enot, siyasata an saindong sadiri. Masarig daw an dahelan kan saindong mga pagkatakot? Nagsususpetsa daw kamo sa mga motibo nin iba? (1 Corinto 13:4, 7) Igwa daw nin paagi na mainaan an peligro na makolgan an boot? Igwa. Paano? Hingoahon na magin personal na pamilyar sa iba sa espirituwal na kamugtakan. Makipag-olay sa sainda sa mga pagtiripon kan kongregasyon. Makikabtang sa pagharongharong na magkaibanan kamo. An pagtitiwala, pareho nin paggalang, dapat na hingoahon na makamtan. Kaya magin mapasensia. Halimbawa, mantang namimidbid nindo an sarong espirituwal na pastor, matalubo an saindong kompiansa sa saiya. Luway-luway na ihayag an saindong mga iniisip. Kun angay, madinamay, asin madonong an paagi nin pagsimbag nia, dangan tibaad probaran nindong magtuga sa saiya nin dakol pa.
An mga kapwa parasamba ki Jehova, nangorogna an Kristianong kamagurangan, nagmamaigot na arogon an kawiliwiling mga kualidad nin Dios sa saindang relasyon sa lambang saro. (Mateo 5:48) Nagbubunga ini nin kamugtakan na may pagtitiwala sa laog nin kongregasyon. Nagsabi an sarong haloy nang magurang sa kongregasyon: “May sarong bagay na dapat na maaraman kan mga tugang: Ano man an gibohon nin saro, an magurang sa kongregasyon dai nawawaran kan saiyang Kristianong pagkamoot sa saiya. Tibaad dai nia gusto an ginibo, alagad namomotan pa man giraray nia an saiyang tugang asin boot nia siang tabangan.”
Kaya dai kaipuhan na makamateng nagsosolo kun may problema. Makipag-olay sa saro na igwang “espirituwal na mga kualipikasyon” na makatatabang sa saindo sa pagpasan kan pagabat sa saindo. (Galacia 6:1) Girumdomon na “an kahaditan sa puso nin tawo iyo an mapaduko dian,” alagad “an managom na mga tataramon anira nin tangguli, mahamis sa kalag asin bolong sa mga tolang.”—Talinhaga 12:25; 16:24.
[Kahon sa pahina 26]
An siisay man na Kristiano tibaad hagadan na tumabang sa sarong paryente, katood, o espirituwal na tugang na igwa nin personal na problema. Aram daw nindo kun paano matabang?
An Epektibong Parakonseho
madaling dolokon: Mateo 11:28, 29; 1 Pedro 1:22; 5:2, 3
pinipili an tamang mga kamugtakan: Marcos 9:33-37
hinihingoang saboton an problema: Lucas 8:18; Santiago 1:19
bakong sobra an reaksion: Colosas 3:12-14
nagtatabang na atubangon an mga kakologan sa emosyon: 1 Tesalonica 5:14; 1 Pedro 3:8
nakakaaram kan saiyang mga limitasyon: Galacia 6:3; 1 Pedro 5:5
nagtatao nin espesipikong hatol: Salmo 19:7-9; Talinhaga 24:26
nagtatago nin mga bagay na kompidensial: Talinhaga 10:19; 25:9