Pagtubod sa Dios—Kaipuhan Pa daw an Milagro?
SI Albert labing 20 anyos kan ponan niang hanapon an Dios. Prinobaran nia an nagkapirang relihion alagad dai pa man giraray sia nakontento. Sa pagbasa kan mga kabtang kan Biblia, nanodan nia kun paano trinatar nin Dios an mga indibiduwal na siring baga ki Noe, Abraham, Sara, asin Moises. Namatean ni Albert na napararani an boot nia sa Dios kan Biblia. Minsan siring, makaseseguro daw sia na an Dios talagang nag-eeksister?
Sarong banggi si Albert nagmaneho pasiring sa sarong napapasuway na lugar kun saen sia namibi, “Tabi man Dios, tawe ako nin tanda—ano man na magpapatunay na ika nag-eeksister.” Nagparahalat si Albert. Nagigirumdoman nia na kan mayo nin nangyari, an saiyang paghalat “nagin pagkadesganar, pagmate na dai nang halaga an buhay, pagkaanggot.”
Arog ki Albert, dakol an nakamamate na daing kamanungdanan an paghanap ninda sa Dios. Tibaad nariribaraw sinda sa mga sermon nin mga klerigo o nadedesganar sa pangongombensir nin mga paraebanghelyo sa telebisyon. Nabibigla sa pagsaginsagin na risang marhay sa dakol na kataed ninda, an nagkapira bakong segurado kun ano an paniniwalaan. Pero, sinierto ni Hadeng David kan suanoy na Israel sa saiyang aking si Salomon: “Kun hanapon mo [an Dios], mapakua sia sa saimo.”—1 Cronica 28:9.
Bueno, kun siring, paano ihinahayag nin Dios an saiyang sadiri? Maninigo daw kamong maghalat nin tanda—sarong eksperyensia na lihis sa natural na mapatunay sa saindo na an Dios nag-eeksister? Sono sa bago pa sanang surbey na ibinareta sa magasin na Time, labi sa dos tersio kan mga Amerikano an naniniwala sa mga milagro. Sinabi man kan artikulo na “an pinakamarikas magdakol na mga iglesia sa Amerika iyo an mga kongregasyon na Karismatiko asin Pentecostal na an pagsamba nakasentro sa ‘mga tanda asin ngangalasan.’”
Talaga daw na kaipuhan pa an “mga tanda asin ngangalasan” tanganing maniwala sa Dios? Naggamit sia nin mga milagro kaidtong mga panahon. Bilang ilustrasyon: Si Saulo na taga-Tarso, na naglalamag sa mga parasunod kan Aki nin Dios, si Jesu-Cristo, nagkaigwa nin ekstraordinaryong eksperyensia sa dalan hale sa Jerusalem pasiring sa Damasco. An milagrosong pagkainatubangan nindang ini kan binuhay liwat na si Jesus nagbunga kan pagkakombertir ki Saulo. (Gibo 9:1-22) Sa siring an dating paralamag nagin si apostol Pablo—saro sa pangenot na mga paradepensa nin Kristianismo!
Alagad permi daw na nagbubunga nin siring na paborableng reaksion an mga milagro? An tunay na pagtubod daw sa Dios nasasarig sa pakaeksperyensia nin saro nin milagro?
[Retrato sa pahina 3]
An Aki nin Dios milagrosong nakipag-olay ki Saulo na taga-Tarso. Maninigo daw kamong maghalat nin milagro?