Bareta kan mga Parabalangibog kan Kahadean
Pagpalakop kan Banhi nin Kahadean sa Gabos na Okasyon
AN Tataramon nin Dios, an Biblia, nag-eenkaminar nin kahigosan. Si Hadeng Salomon nagsabi: “Pagkaaga itanom mo an saimong banhi asin sagkod sa banggi dai mo pagpahingaloan an saimong kamot; huli ta dai mo aram kun saen ini magigin mapanggana, kun baga digdi o duman, o kun baga sindang duwa anas na marahay.”—Eclesiastes 11:6.
Sa gabos na angay na okasyon, an Mga Saksi ni Jehova nagtatanom nin “banhi” paagi sa paghuhulit kan maogmang bareta kan Kahadean nin Dios. Sa labing 230 nasyon asin isla, sinda nagpapadagos “na dai nin ontok sa pagtokdo asin pagpahayag kan maogmang bareta dapit ki Cristo, si Jesus.” (Gibo 5:42) An minasunod na mga eksperyensia nag-iilustrar kun paano an Mga Saksi ni Jehova ‘dai pinahihingaloan an saindang mga kamot’ sa paghuhulit.
◻ Sa Republika nin Cape Verde, an saro sa Mga Saksi ni Jehova minaagi sa sarong bilanggoan mantang nasa ministeryo sa langtad. Sa patyo kan bilanggoan, nagkapirang preso an nakasangat sa sarong poon nin kahoy. Pinagmamasdan an Saksi sa ibaba, nagkagsing an mga preso para sa nagkapirang magasin. Ibinogkos kan Saksi an nagkapirang magasin na Torrengbantayan asin Awake! sa sarong gapo asin idinaklag iyan sa ibong kan lanob kan bilanggoan. Bilang resulta kan enot na interes na ini, 12 pag-adal sa Biblia an naponan. Tolo sa mga preso an nagdusay kan saindang buhay sa Dios asin iprinesentar an saindang sadiri para sa bautismo sa tubig. An saro sa mga preso labi nang sarong taon na naglilingkod bilang bilog na panahon na ebanghelisador, o payunir. Pero, paano ninda ginigibo an mga paglilingkod sa langtad sa bilanggoan? Enot binangabanga an bilanggoan sa mga teritoryo. Dangan iinaasignar an teritoryo sa tolong Saksi asin hinuhulitan an kada selda. Kinukultibar kan mga parabalangibog na ini kan Kahadean an interes sa paaging kaparehong marhay kan ginigibo kan Mga Saksi ni Jehova sa bilog na kinaban—paagi sa mga pagdalaw liwat. Minsan siring, an sarong pagkakalaen iyo an pagkaparate kan pagkondukta nin mga pag-adal sa Biblia. Imbes na pag-adalan an Biblia nin saro o duwang beses sana sa sarong semana sa laog nin mga sarong oras, may mga preso na nag-aadal aroaldaw! Dagdag pa, tinogotan an mga Saksi kan direktor heneral kan bilanggoan na gibohon an gabos na pagtiripon kan kongregasyon sa laog kan bilanggoan.
◻ An sarong babae sa Portugal nakamana nin nagkapirang publikasyon kan Watch Tower pagkagadan kan saiyang lola. Huling bako siang saro sa Mga Saksi ni Jehova, bako siang interesado na sarayon an mga libro. Minsan siring, habo niang itapok an mga iyan. Sarong aldaw sinabihan nia manongod sa libreriya an saro sa Mga Saksi ni Jehova na duminalaw sa saiya sa ministeryo sa harong-harong. Hinapot sia kan Saksi kun aram nia an tunay na halaga kan libreriya. Nagsimbag an babae: “An totoo, dai ko aram an tunay na halaga kaiyan, alagad paano ko maaaraman?” Nag-ako nin pag-adal sa Biblia an babae, asin dai nahaloy minahal na nia an libreriya kan saiyang lola. Ngonyan sia man saro nang bautisadong Saksi ni Jehova. Dugang pa, an saiyang aking babae asin an sarong dayupot na katood kan pamilya nag-aadal na man sa Biblia. Nagin kanigoan kahalagang pamana an koleksion na ini nin mga libro!