“Binago Nindo an Impresyon Ko sa Mga Saksi ni Jehova”
IYAN an komento nin sarong Polacong opisyal nin bilibid sa sarong artikulo manongod sa gibohon nin Mga Saksi ni Jehova, na ibinareta sa samong isyu sa Ingles na Oktubre 15, 1998. Isinurat sa artikulong “When Hearts of Stone Turn Responsive,” an kapangganahan na nakamit kan Mga Saksi ni Jehova sa paghuhulit sa mga preso sa Wołów, Polandia.
Bago ilinuwas sa publiko an nasambit sa enotan na magasin na Watchtower, iinareglo an sarong espesyal na pagtiripon kan Setyembre 13, 1998, sa bilibid nin Wołów tangani na matawan kaiyan an mga preso. Kabilang sa mga inimbitaran na mag-atender an mga Saksi sa lugar na idto, mga bautisado asin iba pang interesadong preso, asin dakol na opisyal kan bilibid. Kasunod kaini iyo an nagkapira sa nagin komento kan mga nag-atender.
Si Jerzy, saro sa Mga Saksi ni Jehova na nabautismohan sa bilibid labi nang limang taon an nakaaagi, nagsabi: “Maogma akong marhay, na sakong mabasa ngonyan kun guranong paghihingoa an ipinaheling kan mga tugang sa kaharaning mga kongregasyon tanganing tabangan kami.” Idinugang nia: “Padagos akong nagmamaigot na paoswagon an sakong sadiri, asin naheheling ko kun paano ako minomolde ni Jehova.”
Saro pang preso, an ngaran Zdzisław, an nagtaram mapadapit sa gibohon na paghuhulit sa bilanggoan: “Sa presente, apat na preso an naghahanda para sa bautismo, asin nagpapadagos sa pag-atender sa mga pagtiripon sa samuyang tiriponan an bago pa sanang mga interesado. Sarong mapuersang motibasyon sa samuya an artikulong ini para sa dugang pang aktibidad sa lugar na ini.” Kanigoan kapositibong aktitud, na kun iisipon 19 taon pa si Zdzisław sa laog kan karsel!
Pakatapos na mabasa an artikulo dapit sa bilibid nin Wołów, sarong opisyal nin bilanggoan an nagsabi: “Espesyalmente kaming natawan nin onra. Nungka kong inisip na maako an bilibid na ini nin siring na positibong publisidad sa 130 lenguahe kan kinaban. Gusto ko kamo, asin inaapresyar ko an saindong mga paghihingoa para sa mga preso.” Saro pang opisyal an nagdagdag: “Binago nindo an impresyon ko sa Mga Saksi ni Jehova. Dati, an pagheling ko sa saindo mga panatiko sa relihion. Ngonyan nasasabotan ko na kamo mga tawong may prinsipyo.”
An direktor kan bilibid nin Wołów, si Marek Gajos, naghuyom asin nagsabi: “Kan enot paghona niamo kakadikit an magigibo nindo. Paghona niamo ibang relihion sana kamo na may mga kamawotan para sa Biblikong pagbabagong-buhay kan mga preso. Minsan siring, huling naheheling an mga resulta kan saindong enot na aktibidad, nagdesisyon kami na makipagtabangan na marhay. Siyam na taon na kamong nagdidigdi na daing sawa, asin inaapresyar kong marhay an saindo nang naginibohan.”
Pero paano an artikulo inako kan pankagabsan na populasyon nin mga preso sa Wołów? Makosog na marhay an interes kan mga preso kaya kinulang nin suplay nin magasin an mga Saksi sa bilibid. Nagpaheling man nin interes an mga opisyal nin bilibid paagi sa paghagad nin 40 pang kopya para sa sainda. Tanganing mapanigoan an nadagdagan na pangangaipo, an mga kongregasyon sa lugar na idto nagtabang asin nagtao nin 100 pang kopya para sa mga tugang sa bilibid. Kadungan kaiyan, naglangkaw an bilang kan mga nag-aatender sa pagtiripon.
Si Piotr Choduń, sarong opisyal sa bilibid na nakipagtabangan na marhay sa Mga Saksi ni Jehova, nagsabi: “Nagdesisyon kami na magbugtak kan artikulong ini sa gabos na iskaparate sa samong bilibid. Linalaoman niamo na an gabos na preso na dai pa saindo nakikipag-adal sa Biblia babasahon an magasin.”
An marahay na halimbawa kan mga Saksi asin an saindang determinadong mga paghihingoa sa paghuhulit nagpapadagos na magkaigwa nin marahay na mga resulta. Apuera sa 15 preso na nag-oswag sagkod sa pagpabautismo, 2 opisyal nin bilibid an nagdusay kan saindang buhay ki Jehova, asin saro pang opisyal nin bilibid an naghagad na adalan sa Biblia. Siempre, an mga tugang na naghuhulit sa bilibid nin Wołów itinatao an gabos na kredito ki Jehova Dios para sa saindang kapangganahan.—Ikomparar an 1 Corinto 3:6, 7.
[Retrato sa pahina 28]
An tolong Saksi asin sarong preso sa pag-atubang nin magasin sa tiriponan sa paglektura sa bilibid