Hapot
◼ Anong mga patanid an maninigo niatong sunodon kun naghuhulit sa mga preso?
Sa bilog na kinaban igwa nin kisuerra walong milyon na preso, na an nagkapira nagpapaheling nin interes sa maogmang bareta. (1 Tim. 2:4) An sarong sangang opisina nakareresibi nin mga 1,400 na surat kada bulan hale sa mga preso asin miembro kan saindang pamilya na naghahagad nin mga babasahon o personal na dalaw. Minsan ngani sinsero an interes nin dakol na preso, ipinaheheling nin eksperyensia na an nagkapira nagsasagin interesado, na nan-aaprobetsar sa banwaan nin Dios. Huli kaini, maninigong sunodon kan gabos an minasunod na mga patanid mapadapit sa paghuhulit sa mga preso.
Sa dakol na kamugtakan, napatototoohan an mga preso paagi sa mga surat. Marigon na irinerekomendar na an mga tugang na babae dai sumurat sa mga lalaking preso, dawa kun an pasohan tumabang sa espirituwal. An paninimbagan na iyan maninigong gibohon solamente nin kualipikadong mga tugang na lalaki. Puedeng asignaran an kualipikadong mga tugang na babae na sumurat sa mga babaeng preso na nagpapahayag nin sinserong interes sa katotoohan sa Biblia. Dai maninigong padarahan nin kuarta o personal na mga regalo an mga preso, sa ibong kan katunayan na an siring tibaad hinahagad.
Kun magpaheling nin interes an sarong nakakarsel, an ngaran asin adres nia maninigong itao sa kongregasyon na harani sa lugar kan bilanggoan. Sa parate an kualipikadong mga tugang na lalaki duman an nakaaaram kun paano aasikasohon an manlaenlaen na situwasyon na puedeng lumataw. Kun dai aram an kongregasyon, an impormasyon maninigong ipadara sa sangang opisina.
Bakong sala na an asignadong mga tugang na lalaki makipagtipon sa mga preso tanganing makapag-adal nin durungan an nagkapirang preso. Minsan siring, dai maninigong gumibo nin espesyal na mga okasyon sa bilanggoan na dian an mga parahayag sueltong nakikiibaiba sa mga preso. Apuera kaini, sala na an mga parahayag basta-basta na sanang dumalaw sa bilanggoan asin magkaigwa nin dayupot na pakikiasosyar sa mga preso.
Logod na kita magin “maingat siring sa mga halas pero inosente siring sa mga salampati” mantang ipinaaabot niato an maogmang bareta sa mga preso.—Mat. 10:16.