An mga Saksi ni Jehova Magkakaigwa nin Internasyonal na mga Kombension
An Namamahalang Grupo kan Mga Saksi ni Jehova nagpaplanong magkaigwa nin internasyonal na mga kombension durante kan 1998. An paising ini nag-ako nin entusiastikong reaksion sa taonan na miting kan Watch Tower Bible and Tract Society of Pennsylvania, na ginibo sa Jersey City Assembly Hall kan Sabado, Oktubre 5, 1996.
Kaiba kan dati nang ginigibong pandistritong mga kombension, an nagkapirang internasyonal na kombension gigibohon sa Amerika del Norte durante kan kabangaan nin 1998. Linalaoman na magkakairibanan sa mga pagtiripon na ini an ginatos na ribong Saksi hale sa dakol na parte kan daga. Tanganing matawan nin lugar na ikarepresentar an pinakadakol na kadagaan na mapupuede, an kada saro sa labing 100 na sangang opisina kan Watch Tower Society magkakaigwa nin asignadong bilang nin mga delegado para sa sarong designadong lugar nin internasyonal na kombension sa Amerika del Norte.
Malinaw na bakong gabos na gustong magbiahe pasiring sa Amerika del Norte makakaduman. Minsan siring, tibaad posible para sa rinibo na makaatender sa sarong internasyonal na kombension na mas harani sa saindang harong. Ginigibo na an mga areglo para sa internasyonal na mga kombension na gigibohon sa duwa o tolong nasyon sa Europa asin iba pa sa Aprika, Asia, Latin Amerika, Timog Pasipiko, asin Caribe.
Sa angay na panahon, paiisihon kan mga sangang opisina kan Sosyedad an mga kongregasyon sa saindang kanya-kanyang mga teritoryo manongod sa lugar o mga lugar kan kombension na duman sinda imbitado. Itatao an impormasyon mapadapit sa mga petsa kan kombension asin mga areglo sa pagpili nin mga delegado. Idtong mga nag-iisip na mag-aplay para sa pipilion na mga delegado tibaad bobooton na magpoon nang magtipon kan saindang mga pondo bilang pag-antisipar sa espesyal na mga okasyon na ini.
An gabos na Saksi ni Jehova sa bilog na kinaban puedeng tanawon sa enotan an natatagama sa internasyonal na mga pagtiripon na ini sa 1998. An pandistritong mga kombension sa gabos na nasyon magkakaigwa nin kaparehong programa.