“An Dios nin Katoninongan” May Pagmakolog sa mga Nagsasakit nin Makuri

LINILINAW kan Biblia na si David kan suanoy na panahon pamilyar sa makuring sakit. Sa laog nin nagkapirang taon namuhay sia bilang dulag, na daing herak na linalapag nin sarong hadeng maraot asin matagas an payo, na desididong gadanon sia. Durante kan panahon na ini nin makuring sakit, nagtago si David sa napapasuway na mga lugar. Alagad may ginibo sia na labi pa dian. Sia odok sa boot na namibi ki Jehova manongod sa saiyang kasakitan. “Paagi sa sakuyang tingog, ki Jehova ako nag-arang nin tabang,” an isinurat nia kan huri mapadapit sa saiyang makatatakot na inagihan. “Sa saiyang atubangan ipinahahayag ko an sakuyang kahaditan; sa saiyang atubangan padagos akong nagtaram manongod sa sakuyang sadiring kasakitan.”​—Salmo 142:​1, 2.

Ngonyan, tutuyaon nin nagkapira an pagsarig ni David sa Dios. Sasabihon ninda na an pamibi saro sanang sikolohikong saklay asin na sa praktikal na pananaram iyan pagsayang sana nin panahon. Pero, an kompiansa ni David sa Dios dai napasala, huli ta sa kahurihurihi nadaog an saiyang mga kaiwal. Sa pagsalingoy sa saiyang eksperyensia, si David nagsurat: “An nagsasakit nin makuring ini nag-apod, asin si Jehova mismo nagdangog. Asin sa gabos niang kasakitan sia ilinigtas Nia.” (Salmo 34:6) An tunay na Dios na rinanihan ni David sa iba pang kabtang inaapod na “an Dios nin katoninongan.” (Filipos 4:9; Hebreo 13:20) Matao daw sia nin kaginhawahan sa makuring sakit, na magbubunga nin katoninongan para sa sato?

Si Jehova May Pagmakolog sa Saindo

Si Jehova bakong daing malasakit mapadapit sa mga kasakitan kan saiyang banwaan. (Salmo 34:15) Maasikaso sia sa mga pangangaipo bako sanang kan saiyang mga lingkod bilang grupo kundi siring man kan lambang indibiduwal na natatakot sa saiya. Kan idinededikar an templo sa suanoy na Jerusalem, si Salomon nakimaherak ki Jehova na hinanyogon “an ano man na pamibi, an ano man na kahagadan para sa pabor na tibaad gibohon nin siisay man na tawo o kan bilog mong banwaan na Israel, huli ta aram ninda kada saro an saiyang sadiring damat asin an saiyang sadiring kolog.” (2 Cronica 6:29) Siring sa minidbid ni Salomon, an kada indibiduwal igwa nin sadiring napapalaen na makuring sakit na tatagalan. Para sa sarong tawo iyan tibaad helang sa pisikal. Para sa iba, emosyonal na kasakitan. An nagkapira tibaad nagsasakit nin makuri huli sa pagkagadan nin sarong namomotan. An kadaihan nin trabaho, kadepisilan sa pagbuhay, asin mga problemang pampamilya mga lakop man na sakit sa masakit na mga panahon na ini.

Isip-isipa nin kadikit an manongod sa ‘saindong sadiring damat asin saindong sadiring kolog.’ Kun beses tibaad nakamate kamo nin arog kan salmistang si David, na nagsurat: “Padagos akong naglaom na may magpaheling nin pakikidamay, alagad ta mayo; asin na magkaigwa nin mga pararanga, alagad ta mayo akong nanompongan.” Pero, makaseseguro kamo na an Dios may pagmakolog sa situwasyon nindo, huli ta kan huri sa iyo man sanang salmo, si David nagsurat: “Si Jehova naghihinanyog sa mga dukha, asin dai nanggad nia duduhagion an saiya mismong mga bilanggo.”​—Salmo 69:​20, 33.

Iinaaplikar an mga tataramon ni David sa mahiwas na sentido, makaseseguro kita na an Kaglalang kan katawohan naghihinanyog sa mga pamibi kan mga bilanggo, sabi ngani, kan saindang mga makuring sakit. Labi pa dian, may ginigibo siang aksion sa saindang mamondong kamugtakan. Horophoropa an minasunod na mga tataramon na naghahayag kan pakikidamay ni Jehova sa mga nagsasakit nin makuri.

“Kamong banwaan dai magpasakit nin makuri sa siisay man na balong babae o aking lalaki na daing ama. Kun sia pasasakitan nindo nin makuri, dangan kun magkurahaw sia sa sako, totoong dadangogon ko an saiyang kinurahaw; asin ta malaad nanggad an sakong kaanggotan.”​—Exodo 22:​22-24.

“Dai daw papangyayarihon nin Dios na magibo an hustisya para sa saiyang mga pinili na nag-aagrangay sa saiya aldaw asin banggi, minsan ngani sia matinios sa sainda?”​—Lucas 18:7.

“Ililigtas nia an dukha na naghahagad nin tabang, siring man an nagsasakit nin makuri asin an siisay man na mayo nin paratabang. Maheherak sia sa hababa asin sa dukha, asin an kalag kan mga dukha saiyang ililigtas. Gikan sa pan-aapi asin sa kadahasan saiyang tutuboson an saindang kalag, asin an saindang dugo magigin mahalagang marhay sa saiyang mga mata.”​—Salmo 72:​12-14.

“An nagtitikwil sa saindo [an banwaan nin Dios digdi sa daga] nagtitikwil sa sakong mata.”​—Zacarias 2:8.

An nagkapirang halimbawa na ini nag-iilustrar kan odok na interes kan satong Kaglalang sa ikararahay kan saiyang banwaan. Huli kaini, may marahay kitang dahelan na sunodon an hatol ni apostol Pedro: ‘Ibugtak nindo an gabos nindong kahaditan sa saiya, huli ta sia may pagmakolog sa saindo.’ (1 Pedro 5:7) Alagad paano kita tatabangan nin Dios sa mga panahon nin makuring sakit?

Kun Paano Tinatabangan nin Dios an mga Nagsasakit nin Makuri

Siring sa satong naheling, kan si David magsakit nin makuri, sia odok sa boot na namibi sa Dios na logod giyahan sia. Kadungan kaiyan, nagsadiring boot sia na pagianon an situwasyon, na ginagamit an saiyang pagkamapag-imbento tanganing makadulag sa mga naglalapag sa saiya. Sa siring, an pagsarig ki Jehova na may kaibang personal na paghihingoa nagpangyari ki David na tagalan an saiyang kasakitan. Ano an satong manonodan digdi?

Kun kita napapaatubang sa mga makuring sakit, tunay nanggad na bakong sala na kita gumibo nin rasonableng pagsadiring boot na resolberan an problema. Halimbawa, kun mayong trabaho an sarong Kristiano, dai daw sia maghihingoang humanap nin trabaho? O kun sia may kamatean sa pisikal, dai daw sia mapabolong? Tunay nanggad, minsan si Jesus, na igwa kan kapangyarihan na paomayan an gabos na klase nin helang, nag-admitir na ‘an naghehelang nangangaipo nin parabolong.’ (Mateo 9:12; ikomparar an 1 Timoteo 5:​23.) Siempre, an nagkapirang kasakitan dai kayang haleon; an mga iyan kaipuhan sanang tagalan. Minsan siring, an tunay na Kristiano dai minamansay an pagsakit mismo bilang sarong marahay na kualidad, siring sa pagmansay nin iba. (Ikomparar an 1 Hade 18:28.) Imbes, ginigibo nia an ano man na paaging kaya nia na makaya an saiyang makuring sakit.

Pero kadungan kaiyan, makatanosan na irani iyan ki Jehova sa pamibi. Taano? Enot, paagi sa pagsarig sa satong Kaglalang, natatabangan kitang “makasierto sa orog na mahalagang mga bagay.” (Filipos 1:10) Halimbawa, kun naghahanap nin trabaho, an mapagngayongayong pagsarig sa Dios tatabangan kita na dai akoon an trabaho na kontra sa mga prinsipyo kan Biblia. Lilikayan ta man na kita ‘lagalagon sa pagtubod’ kan pagkamoot sa kuarta. (1 Timoteo 6:10) Tunay nanggad, kun naggigibo nin magabat na mga desisyon​—mapadapit sa trabaho o ano man na iba pang kabtang nin buhay—​kaipuhan tang sunodon an hatol ni David: “Tawan ki Jehova mismo an pagabat sa saimo, asin sia mismo matabang sa saimo. Noarin man dai nia totogotan na matanyog an matanos.”​—Salmo 55:22.

Tinatabangan man kita kan pamibi na papagdanayon an pagkatimbang kan satong isip, tanganing dai kita pangibabawan kan satong makuring sakit. Si apostol Pablo nagsurat: “Sa gabos na bagay paagi sa pamibi asin pagngayongayo na may pasalamat ipahayag nindo sa Dios an saindong mga kahagadan.” Na may anong resulta? “An katoninongan nin Dios na minalampas sa gabos na kaisipan mag-iingat kan saindong puso asin kan saindong mga pag-isip paagi ki Cristo Jesus.” (Filipos 4:​6, 7) Iyo, katoninongan, an katoninongan nin Dios. An katoninongan na iyan “minalampas sa gabos na kaisipan,” kaya puede kitang parigonon kaiyan kun kita pinagagabatan nin nakapupurisaw na mga emosyon. ‘Iingatan kaiyan an satong puso asin mga pag-isip,’ sa siring tinatabangan kita na likayan an pabiglabigla asin bakong madonong na reaksion, na makadadagdag sa satong makuring sakit.​—Eclesiastes 7:7.

Dakol pa an magigibo nin pamibi. Nakakaapektar iyan na marhay sa kaaabtan nin sarong situwasyon. Horophoropa an sarong halimbawa sa Biblia. Kan si apostol Pablo nabibilanggo sa Roma, inenkaminar nia an mga kapwa Kristiano na ipamibi sia. Taano? “Pinakasasadol ko kamo na mas nangorognang gibohon ini,” an isinurat nia sa sainda, “tanganing ako ikabalik sa saindo sa mas madaling panahon.” (Hebreo 13:19) Aram ni Pablo na an daing ontok na mga pamibi kan saiyang mga kapagtubod makakaapektar sa kun noarin sia paluluwason.​—Filemon 22.

Maliliwat daw kan pamibi an resulta kan saindong makuring sakit? Tibaad. Pero, maninigo niatong marealisar na an satong mga pamibi dai perming sinisimbag ni Jehova sono sa paagi na tibaad linalaoman niato. Si Pablo, halimbawa, paorootrong namibi mapadapit sa saiyang “tonok sa laman”​—tibaad sarong kamatean sa pisikal na konektado sa saiyang pagheling. Imbes na haleon an makuring sakit, sinabi nin Dios ki Pablo: “An sakuyang dai na kutana maninigong kabootan igo na para sa saimo; huli ta an sakuyang kapangyarihan sinasangkap sa kaluyahan.”​—2 Corinto 12:​7-9.

Kaya kun beses an satong mga kasakitan dai hahaleon. Imbes, magkakaoportunidad kita na patunayan an satong pagsarig sa satong Kaglalang. (Gibo 14:22) Dugang pa, makaseseguro kita na dawa dai haleon ni Jehova an makuring sakit, sia ‘matao nin luluwasan tanganing iyan matagalan niato.’ (1 Corinto 10:13) Iyo, may marahay na dahelan na si Jehova inaapod na “an Dios nin gabos na karangahan, na minaranga sa sato sa gabos niatong kahorasaan.” (2 Corinto 1:​3, 4) Itinatao nia sa sato an kaipuhan ta tanganing makatagal na may darudakulang katoninongan.

Dai Na Mahahaloy​—Sarong Kinaban na Mayo nin Makuring Sakit!

An Kaglalang nanunuga na paagi sa saiyang Kahadean, hahaleon nia sa dai na mahahaloy an makuring mga sakit nin katawohan. Paano nia ini gigibohon? Paagi sa paghale ki Satanas na Diablo, an poon na parapundar nin makuring sakit asin an pangenot na kaiwal nin katoninongan, na ipinamimidbid kan Biblia bilang an “dios kan palakaw na ini nin mga bagay.” (2 Corinto 4:4) Alagad madali nang matapos an saiyang pagkontrol sa katawohan. An paghale sa saiya magbubukas kan dalan na an dai mabilang na mga bendisyon kakamtan kan mga natatakot sa Dios. An Biblia nanunuga na “papahidon [ni Jehova] an gabos na luha sa saindang mga mata, asin an kagadanan mawawara na, dai na sagkod magkakaigwa nin pagmondo ni pagtangis ni kolog. An enot na mga bagay nakalihis na.”​—Kapahayagan 21:​1-4.

Garo daw dai mapaniniwalaan an sarong kinaban na mayo nin makuring sakit? Tuod na kitang marhay na mabuhay na may kasakitan kaya nasasakitan kitang imahinaron an pagigin mayo kaiyan. Alagad an katalingkasan sa takot, kahaditan, asin kalamidad iyo mismo an katuyohan nin Dios para sa katawohan kan lalangon, asin magigin mapanggana an saiyang katuyohan.​—Isaias 55:​10, 11.

Ini an paglaom na nanompongan ni Sonia, Fabiana, asin Ana, na nasambitan sa naenot na artikulo. Si Sonia, na an duwang aking lalaki nagadan sa AIDS, nagkamit nin dakulang katoninongan gikan sa paglaom na iinaalok kan Biblia​—an pagkabuhay liwat kan mga matanos asin kan mga bakong matanos. (Gibo 24:15) “Sarong bagay an segurado,” sabi nia, “an satong paglaom nakalalabi sa ano pa man na kolog.”

Kan nag-iistar pa sa amponan, si Ana dinalaw kan saro sa Mga Saksi ni Jehova. “Ipinaheling nia sa sako an ngaran ni Jehova sa Biblia,” sabi ni Ana, “asin napahibi ako huli sa kagayagayahan. Nangangaipo akong marhay nin tabang, asin nanodan ko na igwa nin Dios na nagmamakolog sa sato.” Pagkahale sa amponan, si Ana nag-ako nin pag-adal sa Biblia asin dakol pa an nanodan manongod sa mga panuga ni Jehova. Dangan idinusay nia ki Jehova an saiyang buhay asin sinimbolisaran iyan paagi sa bautismo. “Poon kaidto padagos akong nagsarig ki Jehova paagi sa pamibi, asin nararanga ako kan garantiya na tatabangan nia ako.”

Si Fabiana nakanompong man nin dakulang karangahan asin katoninongan nin isip sa saiyang makuring sakit paagi sa pakanood manongod sa mga panuga nin Dios sa ngapit. “An pakanood kan katotoohan sa Biblia kapareho nin paghale sa sarong madiklom asin mamondong marhay na lugar asin paglaog sa sarong malinig, maliwanag, asin nakaoogmang kuarto.”​—Ikomparar an Salmo 118:5.

Alagad paano asin noarin mangyayari an literal na katoninongan sa bilog na globo? Helingon ta sa minasunod na mga artikulo.

[Kahon sa pahina 6]

An Dakol na Aspekto nin Kasakitan

▪ Mga un-kuarto kan populasyon sa kinaban nabubuhay sa grabeng kadukhaan, asin minilyon pa an nabubuhay sa mga kamugtakan na bakong angay para sa tawo na nagsasapeligro kan saindang kaligtasan.

▪ Labi sa 200 milyones na aki an kulang sa pagkakan.

▪ Kada taon mga tres milyones na aki na mayo pang limang taon an edad an nagagadan sa kurso.

▪ An nakaoolakit na mga helang guminadan nin mga 16.5 milyones katawo kan 1993 sana. Mantang an nagkapirang nasyon laen man an pagklasipikar sa mga helang, an totoong bilang tibaad mas halangkaw pang marhay.

▪ An kinakarkulong 500 milyones katawo igwa nin sarong klase nin diperensia sa isip.

▪ An bilang nin mga paghugot mas marikas na naglalangkaw sa tahaw nin mga hoben kisa sa ano man na iba pang edad.

▪ “An gutom asin kadaihan nin trabaho nagin mga digta sa kinaban,” sabi kan The Unesco Courier. “Treinta y singko milyones an daing trabaho sa pitong pinakamayaman na nasyon sa kinaban, asin sa Brazil sana igwa nin 20 milyones na trabahador na para sa sainda an pagkaigwa nin trabaho dai man lamang ngani nangangahulogan na sinda makakakakan sagkod na mabasog.”

[Mga retrato sa pahina 7]

An pamibi makatatabang sa sato na magkonsentrar sa panuga nin Dios na sarong kinaban na mayo nin makuring sakit