Matotoninong Pa daw an mga Nagsasakit nin Makuri?

GUSTO daw nindong maheling an katapusan nin pagsakit, bako sanang kan saindong sadiri kundi kan bilog na katawohan? Horophoropa an mga halimbawang ini:

Si Sonia grabe an inagihan na sakit.a Primero, nadiskobre nia na an saiyang agom sampulong taon nang may sambay. Dangan an saiyang ngohod na aking lalaki nagkaigwa nin HIV asin nagadan sa AIDS. Pakalihis nin duwang taon an saro pa niang aking lalaki naghelang, asin dai nahaloy nagadan man ini sa AIDS. “Nahaloy na marhay an ultimong kabtang kan saiyang helang,” an nagigirumdoman ni Sonia. “Grabe an saiyang depresyon, napangas sia, asin dai nang gayo nakaheheling. Idto makamomondong marhay.”

Si Fabiana, sarong estudyante sa unibersidad na taga-Brazil, nahahadit manongod sa sosyal na mga inhustisya sa kinaban. Dangan inagihan nin trahedya an saiya mismong buhay. An saiyang tugang na lalaki, na may depresyon, naghugot. Kan mawaran nin trabaho si Fabiana, isinuherir nin sarong kaamiga na sia dumolok sa sarong pai-de-santo (parasantiguar), na irinarason na kaya inaagihan ni Fabiana an siring na pagkadaing palad ta siertong may nag-engkanto sa saiya! Alagad daing ikinataong kaginhawahan an pai-de-santo. Imbes, si Fabiana nakamateng pinadudusahan, na dai napapatorog huli sa saiyang mga kasakitan.

An makuring sakit ni Ana nagpoon kan sia akion pang marhay. “Kan ako sarong taon pa sana,” an pagsaysay nia, “binayaan ako kan sakong ina, kaya inataman ako kan sakong lola.” Dangan, kan si Ana tres anyos pa sana, nagadan an saiyang lola. Si Ana ilinaog sa sarong amponan sa Rio de Janeiro, kun saen sia nagdanay sagkod kan sia 13 anyos. “Maraoton an pagtrato sa samuya duman, asin nagin rebelde ako,” sabi nia. “Mantang ako nagdadakula, haros gabos na bagay kalaban ko.”

An makuring sakit garo baga nakakaapektar sa buhay nin lambang tawo sa laen-laen na paagi. Tunay nanggad, aroaldaw nababaretaan niato an mga estorya nin trahedya nin tawo​—basta kita nagdadalan, nagbabasa, o naghihinanyog sa mga bareta. “Kaini sanang satong . . . panahon na may mahiwas na komunikasyon na nagin haros imposibleng makadulag sa danay na pambobomba nin maraot na mga bareta,” an isinurat ni Dr. Mary Sykes Wylie. “An mga guerra, natural na mga kalamidad, mga kalamidad sa industriya, mga nagagadan sa aksidente sa tinampo, krimen, terorismo, seksuwal na pagmaltrato, panlulugos, kadahasan sa laog nin pamilya​—gabos minagibo sa makolog na pangyayari na sarong makatatakot asin pan-aroaldaw na sanang tema kan ika-20 siglo.” An Kristianong apostol na si Pablo realistikong sinumaryo an eksperyensia nin tawo: “An gabos na linalang padagos na nag-aaragrangay asin nagtitios nin kolog.”​—Roma 8:22.

Kumusta man kamo? May pinagmamate daw kamong makuring sakit? Anong pakaginhawa an malalaoman nindo? Magkakamit pa daw kamo nin tunay na katoninongan? Si Sonia, Fabiana, asin Ana nakanompong nin tunay na karangahan asin totoong katoninongan! Mababasa nindo iyan sa minasunod na artikulo.

[Nota sa ibaba]