Mga Kasal na Nagtatao nin Onra ki Jehova

An minasunod na artikulo manongod sa kristianong mga kasal orihinal na isinurat sa etiopia tangani na magtao nin nakatatabang na giya sa lenguaheng amharico para sa dakol sa nasyon na iyan na dai pa sana nahahaloy na nagin mga saksi ni jehova. ipinaliliwanag kaiyan an nagkapirang lokal na kaugalean asin gawe-gawe na tibaad napapalaen sa kan sa iniistaran nindo. posibleng manompongan nindo na interesanteng gayo an kalaenan. kadungan kaiyan, iinaatubang kan artikulo an timbang na sadol kan biblia na maheheling nindo na aplikado maski napapalaen an mga kaugalean sa kasal sa saindong lugar.

“KRISTIANONG mga Kasal na Nagtatao nin Kagayagayahan” an titulo nin sarong magayon na artikulong pinag-adalan sa An Torrengbantayan na Enero 1, 1985 (w84-E 4/15). An suminunod na artikulo sa luwas na iyan may titulong “Magkamit nin Timbang na Kagayagayahan sa mga Punsion sa Kasal.” (Para sa siisay man na nagpaplanong mag-agom, igwa nin dagdag na madonong na sadol sa mga librong Making Your Family Life Happy, kapitulo 2, asin Your Youth​—Getting the Best Out Of It, kapitulo 19 asin 20.)a Dakol an nagin Saksi ni Jehova poon kan lumuwas an mga artikulong iyan, kaya boot niatong repasohon an nagkapirang punto na partikularmenteng aplikado sa satong lugar, siring man an iba pang angay na mga punto na matabang sa sato na gibohon an kasal na mga okasyon na nagtatao nin onra ki Jehova, an Kagtugdas nin pag-agoman.

An sarong hapot na puedeng enot na konsideraron iyo an, Noarin maninigong gibohon an kasal? Maninigo daw na an petsa isunod sa mga petsa kan lokal na tradisyonal na panahon sa kasal? An lokal na paniniwala iyo na an ano man na kasal na ginibo sa ibang panahon kan taon dai magigin mapanggana. Ini sarong superstisyon na mayo nin pundasyon, huli ta dakol na mag-agom na maogma asin sararong naglilingkod ki Jehova an dai nagpakasal durante kan tradisyonal na panahon. Dai kita naniniwala sa marahay o maraot na suerte. (Isaias 65:​11; Colosas 2:8) Dai ta matatabangan an daing pagtubod na mga paryente na maheling an kalaenan kan katotoohan asin kaputikan kun itatalaan niato an petsa kan kasal sono sa saindang mga superstisyon. An totoo, puedeng magpakasal an mga Kristiano sa ano man na bulan.

Kun iinareglo an pahayag sa kasal pakatapos kan kinakaipuhan na seremonya sibil, madonong na dai magkaigwa nin dakol na aldaw na pag-oltanan sa duwang okasyon. Kun boot kan mag-agom na magkaigwa nin pahayag sa kasal sa Kingdom Hall, maninigo nindang dolokon an mga magurang sa kongregasyon nin haloy-haloy pa tangani na ipakiolay na gamiton an hall. Seseguradohon kan lokal na kamagurangan na magigin malinig an saindang konsensia sa mga areglo para sa seremonya. An oras maninigong iiskedyul tanganing dai magkaigwa nin problema sa ano man na aktibidad kan kongregasyon. An tugang na lalaki na napiling magtao kan pahayag sa kasal makikipag-olay nin patienot sa nobyo asin nobya tanganing magtao nin nakatatabang na sadol asin tanganing seguradohon na mayo nin moral o legal na mga kaolangan sa pag-agom asin na sia minaoyon sa mga plano para sa ano man na sosyal na pagtiripontipon na masunod. An pahayag sa kasal maninigong mga kabangang oras an lawig asin itao sa kagalanggalang na paagi, na idinodoon an espirituwal na aspekto. An pahayag sa kasal mas importante nanggad kisa sa ano man na punsion na puedeng sumunod.

An Kristianong kasal sarong marahay na oportunidad na ipaheling na kita “bakong kabtang kan kinaban.” (Juan 17:14; Santiago 1:​27) An satong pagigin areglado maninigong marisang marhay. Mangangahulogan ini na dapat kitang nasa oras imbes na papaghalaton an mga maatender, na posibleng nakaeentremeter sa mga aktibidad kan kongregasyon. Ini sarong bagay na nangorognang dapat na masabotan kan nobya, huling tibaad sadolon sia nin kinabanon na mga paryente na magpahuri​—na garo baga makadadagdag sa saiyang importansia. Paagi sa pagigin nasa oras puedeng ikapaheling nin sarong maygurang na tugang na Kristiana na an espirituwal na mga kualidad, siring sa kapakumbabaan asin konsiderasyon, importante sa saiya! Siring man, kun iniimbitaran an sarong retratista na kuanan an okasyon, importante an pagigin areglado. Marahay na hagadon sa retratista na dumuman na nakaamerikana, kurbata, asin pantalon na pandisente asin na sia dai makaentremeter sa pahayag kun sia nagreretrato. Dai maninigong magretrato durante kan pamibi. An satong pagigin areglado magtatao nin onra ki Jehova asin magtatao nin marahay na patotoo. Dai kaipuhan na hingoahon na makasunod sa sosyal na mga pormalidad na makatatahob sa tunay na kahulogan kan okasyon.

An punsion bakong kahagadan para sa sarong mapangganang kasal, alagad mayo nin Makakasuratan na pagkontra sa siring na maogmang okasyon. Minsan siring, an siring na pagtiripontipon para sa tunay na mga Kristiano maninigong magin napapalaen sa kinabanon na mga punsion na midbid sa pagigin maluho, sobrang pag-inom, pagpagutid, maribok na musika, malaswang pagbayle, asin suruntokan pa ngani. Kinaklasipikar kan Biblia an “mariribok na katiriponan sa pag-ogma” na kabilang sa mga gibo nin laman. (Galacia 5:21) Mas pasil na magkaigwa nin tamang kontrol kun iyan bakong dakulang marhay na pagtiripontipon. Dai kaipuhan na magpatindog nin tolda tangani na mapanigoan an popular na mga kaugalean. Kun magdesisyon an nagkapira na gumamit nin tolda huli sa espasyo o kamugtakan kan panahon, personal na bagay ini.

Ipinaheling nin eksperyensia na an epektibong paagi na malimitaran an bilang nin mga bisita iyo an paggamit nin nasusurat na espesipikong mga imbitasyon. Mas madonong na mag-imbitar nin mga indibiduwal imbes na bilog na mga kongregasyon, asin bilang aregladong mga Kristiano, maninigo niatong igalang an siring na mga limitasyon. An nasusurat na mga imbitasyon nakatatabang man sa sato na malikayan an kasosopgan sa pag-abot nin sarong tiwalag sa punsion, huling kun mangyari iyan, dakol na tugang na lalaki asin babae an tibaad magdesisyon na humale. (1 Corinto 5:​9-​11) Kun an magkailusyon mag-imbitar nin daing pagtubod na mga paryente o kamidbid, daing duwa-duwa na limitado sana an kabilangan kaini, na tinatawan nin orog na importansia an mga “may relasyon sa sato sa pagtubod.” (Galacia 6:10) An nagkapira nagdesisyon na imbitaran an kinabanon na mga kamidbid o daing pagtubod na mga paryente sa pahayag sa kasal imbes na sa punsion. Taano? Bueno, nagkaigwa nin mga situwasyon na an kinabanon na mga paryente ginikanan nin makasosopog na marhay na situwasyon sa punsion sa kasal kaya dakol na tugang na lalaki asin babae an nakamate na dai ninda kayang magdanay. May mga magkailusyon na iinareglo na magkaigwa sana nin simpleng pagkakan kaiba an dayupot na mga miembro kan pamilya asin Kristianong mga katood.

Kaoyon sa Juan 2:​8, 9, praktikal na pumili nin sarong “namamahala sa punsion.” Bobooton kan nobyo na pumili nin sarong mapagkakatiwalaan na Kristiano na iyo an masierto na namamantenir an pagigin areglado asin an halangkaw na mga pamantayan. Kun madara nin mga regalo an mga bisita, ini maninigong gibohon na mayo nin “pagpaabaw-abaw.” (1 Juan 2:16) An musika puedeng magin maogma na dai nasasalakan nin kustionableng mga liriko, sobrang kariribokan, o daing kontrol na kumpas. Dakol an nanompongan na pinakamarahay na ipadangog nin patienot sa sarong magurang sa kongregasyon an musika na patotogtogon. Puedeng magcausa nin mga peligro an pagbayle, huling dakol na tradisyonal na bayle an guminikan sa pagbayle tangani na magin mainaki asin nagtatampok nin bakong angay na pagkamakalaman. An “oras nin pagpidaso kan keyk asin pagpuesto kaiyan na may kaibang arak” kun beses nagsesenyalar sa kinabanon na mga tawo na humiro nang mayong kontrol. An totoo, dakol na Kristianong magkailusyon an nagdesisyon na dai magkaigwa nin ano man na inomon na de alkohol sa mga punsion sa kasal, sa siring nalilikayan an mga problema.

Mantang boot niatong tawan nin onra si Jehova, lilikayan niato an pagpaabaw-abaw na maakit nin sobrang atension sa satong sadiri. Dawa an sekular na mga publikasyon nagtaram tumang sa popular na uso nin pagigin maluho. Kanigoan kabakong madonong para sa sarong mag-agom na malubog sa utang huli sa maluhong kasal dangan magtios nin kadaihon sa laog nin dakol na taon tangani na makabayad sa mga ginasto sa sarong aldaw na iyan! Siempre, an ano man na gubing na isinusulot sa okasyon na iyan maninigong magin mabini asin aregladong marhay, na angay sa sarong tawong naghihingako na nagsasamba sa Dios. (1 Timoteo 2:​9, 10) An artikulong “Christian Weddings Should Reflect Reasonableness” (The Watchtower na Enero 15, 1969) may interesanteng mga komento na arog kaini manongod sa gubing:

“An kasal nin saro sarong espesyal na okasyon, kaya an atension parate nang itinatao sa pagigin magayagaya asin magayon. Pero dai ini nangangahulogan na an saro dapat na magsulot nin sarong klase nin trahe o amerikana. Marahay na konsideraron nin saro an lokal na mga estilo, gastos asin personal na kagustohan. . . . Pero, magigin rasonable daw na bumakal nin mahalon na sulot na macausa nin pinansial na pagabat para sa saindang sadiri o sa iba? . . . May mga nobya na ginamit an trahe nin sarong namomotan na amiga o paryente. An iba nagkamit nin dakulang pagkakontento sa paggibo kan sadiri nindang traheng pangnobya, na posibleng sa paaging iyan nagkaigwa pa ngani nin gubing na puedeng gamiton sa ibang mga okasyon sa ngapit. Asin angay nanggad para sa sarong magkailusyon na magpakasal sulot an saindang pinakamagayon na regular na gubing . . . An iba na tibaad may kakayahan na magkaigwa nin engrandeng kasal tibaad personal na mawoton na magkaigwa nin sarong ‘simpleng kasal’ huli sa pagigin delikado kan mga panahon.”

Kaagid kaiyan, an mga partisipante sa kasal (an mga katood kan nobyo asin an mga babaeng kairiba kan nobya) dai kaipuhan na dakol. Dai man ninda bobooton na makaakit nin dai kinakaipuhan na atension sa saindang sadiri paagi sa saindang gubing asin hiro-hiro. Minsan ngani puedeng togotan an sarong tiwalag na umatender sa pahayag sa Kingdom Hall, An Torrengbantayan na Enero 1, 1985 (w84-E 4/15), nagsabi: “Bakong maninigo na ipag-iba sa mga partisipante sa kasal an mga tawo na natiwalag o na an iskandalosong pamumuhay kontrang gayo sa mga prinsipyo kan Biblia.”

Dawa ngani nanginasal si Jesus, dai niato maiimahinar na ooyonan nia an popular na kaugalean na magprosisyon an mga kotse sa banwaan na maribokon; pinamulta pa ngani nin mga pulis an mga tsuper huli sa pagparabusina sa sarong prosisyon nin kasal. (Helingon an Mateo 22:21.) Bilang sumaryo, imbes na arogon an pagpaabaw-abaw o tipikong hiro-hiro nin mga tawo kan mga nasyon, ipinaheheling nin mga Kristiano an kadonongan na yaon sa hababa an boot.​—Talinhaga 11:2.

Alagad kumusta man an pag-atender sa mga kasal nin kataraed, kinabanon na mga katrabaho, o harayo nang mga paryente asin kamidbid? An kada Kristiano maninigong personal na magdesisyon digdi. Marahay na girumdomon na mahalagang marhay an satong panahon, huling kaipuhan niato an panahon para sa satong ministeryo, personal na pag-adal, asin iba pang pampamilya asin pankongregasyon na mga aktibidad. (Efeso 5:​15, 16) Kun mga Sabado asin Domingo, igwa kita nin mga pagtiripon asin paglilingkod sa langtad na habo niatong malipasan. (Hebreo 10:​24, 25) An oras nin dakol na kasal natatangod sa mga asamblea o espesyal na mga paghihingoa sa paglilingkod na konektado sa Pamanggihan nin Kagurangnan. Dai niato maninigong togotan an satong sadiri na malingling parayo sa paggibo nin kaparehong espesyal na mga paghihingoa na ginigibo kan satong mga tugang sa bilog na kinaban tangani na makaatender sa Pamanggihan nin Kagurangnan. Bago nakaaram kan katotoohan, naggamit kita nin dakol na panahon kaiba kan mga kinabanon, tibaad sa mga sirkumstansia na dai nakatao nin onra sa Dios. (1 Pedro 4:​3, 4) Ngonyan laen na an satong mga ipinaoorog. Perming mapupuede na taratarahon an kinabanon na mag-agom paagi sa pagpadara nin sarong kard o paghapit sa ibang aldaw tangani na songkoon nin madali. An nagkapira ginamit an mga okasyon na iyan tangani na makapatotoo, na ihinihiras an nagkapirang teksto na angay sa mga bagong kasal.

An kasal na dian nangongorog an espirituwal na mga aspekto kisa sa kinabanon na gawe-gawe tunay na magtatao nin onra ki Jehova. Paagi sa pagsierto na sinda nagdadanay na siblag sa kinaban kaiba an mga superstisyon asin pagpalabilabi kaiyan, paagi sa dai pagtogot dian na makaentremeter sa regular na teokratikong mga aktibidad, asin paagi sa pagpaheling nin kababaan nin boot imbes na pagpaabaw-abaw, ikaoogma nin mga Kristiano an okasyon na iyan. Dugang pa, makasasalingoy sinda sa okasyon na iyan na may marahay na konsensia asin makawiwiling mga girumdoman. Paagi sa pagpaheling nin kadonongan asin pagkarasonable, an gabos logod niatong Kristianong kasal makapatotoo sa mga nagmamasid na sadiosan an puso.

[Nota sa ibaba]

[Retrato sa pahina 24, 25]

An mga Kristiano dai eksaktong sinusunod an gabos na lokal na kaugalean sa kasal