Hapot
◼ Kun gusto nin magkailusyon na gamiton an Kingdom Hall para sa saindang kasal, anong mga bagay an kaipuhan nindang ipakipag-olay sa kamagurangan?
An mga kasal na inareglo kaoyon kan mga prinsipyo sa Biblia nagtatao nin onra ki Jehova. Nangorognang totoo ini kun mapadapit sa mga kasal sa Kingdom Hall, huling paagi sa mga programa na ginigibo dian, an komunidad nagkakaigwa nin impresyon sa satong organisasyon. Tanganing “an gabos na bagay mangyari sa disente asin aregladong paagi,” angay sana na magin kalabot an lokal na kamagurangan kun hinahagad na gamiton an Kingdom Hall para sa sarong kasal.—1 Cor. 14:40.
An magkailusyon na gustong gamiton an Kingdom Hall para sa saindang kasal maninigo na magtao nin nasusurat na kahagadan sa komite sa paglilingkod kan kongregasyon na nagtitipon sa hall na iyan. Maninigo na itao nin amay pang marhay an saindang surat asin maninigo na ibugtak ninda dian an petsa saka oras na gusto nindang gamiton an hall. Maninigo nindang girumdomon na dai liliwaton kan kamagurangan an iskedyul kan pagtiripon tanganing matawan nin lugar an kasal. Dugang pa, dapat na an nobyo asin nobya nasa marahay na kamugtakan, na namumuhay kaoyon kan mga prinsipyo sa Biblia asin kan matanos na mga pamantayan ni Jehova.
Tanganing masegurado na an kasal nagtatao nin marahay na impresyon manongod sa satong may dignidad na Dios, an magkailusyon maninigong makipag-olay sa komite sa paglilingkod dapit sa mga areglo sa kasal bago gumibo nin pinal na desisyon. Minsan ngani dai hihingoahon kan kamagurangan na ipirit sa magkailusyon an personal na mga gusto ninda, an magkailusyon maninigong gumibo nin mga pagliliwat kun igwa sinda nin ano man na kuestionableng plano. Solamenteng an musika na pinili hale sa Kingdom Melodies o na makukua sa satong libro nin mga awit an puedeng gamiton. An ano man na dekorasyon sa Kingdom Hall o pagliliwat sa pagkaareglar kan mga tukawan dapat na may pag-aprobar man. Kun may gigibohon na pagretrato o pagrekord nin video, maninigo na dai ini makabawas sa dignidad kan okasyon. Puedeng togotan kan kamagurangan an pagpraktis sa Kingdom Hall basta dai iyan makakaolang sa ibang mga areglo kan kongregasyon. Maninigo na dai magpaskil nin imbitasyon sa information board. Minsan siring, puedeng magtao nin halipot na paisi an kamagurangan durante kan Pagtiripon sa Paglilingkod tanganing impormaran an kongregasyon manongod sa nagdadangadang na kasal sa Kingdom Hall.
Minsan ngani bakong kahagadan na bautisado an gabos na partisipante sa kasal, dai magigin angay na iiba sa mga partisipante sa kasal an mga indibiduwal na an pamumuhay kontrang gayo sa mga prinsipyo sa Biblia o na an paggawe magbabangon nin mga hapot sa isip kan mga nag-aatender. Sarong magurang sa kongregasyon na autorisadong magkasal an maninigong mangenot sa seremonya kan kasal. An siring na kamagurangan kualipikadong marhay na itampok an sono sa Kasuratan na mga prinsipyo na aplikado sa mahalagang okasyon na ini.—1 Tim. 3:2.
Huling an kasal nagtatao man nin impresyon manongod sa magurang sa kongregasyon na makasal, sia man maninigo na patienot na impormaran dapit sa mga areglo sa kasal. Makikipag-olay sia sa magkailusyon tanganing maghapot manongod sa moral na paggawe ninda kan sinda nag-iilusyonan pa sana; gugustohon kan magkailusyon na magin prangka asin onesto sa saiya. Kun ikinasal na kaidto an siisay man sa nobyo o nobya, dapat na patunayan nia na libre na siang magpakasal sono sa Kasuratan asin ley. (Mat. 19:9) Kaiba digdi an pagpaheling sa magurang sa kongregasyon kan kopya kan pinal na dekreto sa diborsio, kun sia nakipagdiborsio mantang nasa ibang nasyon.
Kun an magkailusyon prangkang nakikikomunikar asin lubos na nakikipagtabangan sa kamagurangan, an kasal magigin sarong nakakaogmang okasyon para sa gabos.—Tal. 15:22; Heb. 13:17.