Mga Hapot Hale sa mga Parabasa
Puede daw na sabihon na an dai pa sana nahahaloy na bagong pakasabot sa terminong “kapag-arakian” sa Mateo 24:34 minatogot sa ideya na an katapusan kan palakaw nin mga bagay puedeng maatraso sa harayo pang ngapit?
Dai nanggad. Al kontraryo, an dai pa sana nahahaloy na pinakarhay na pakasabot manongod sa bagay na ini maninigong makatabang sa sato na magdanay na naghahalat sa katapusan. Taano man?
Bueno, siring sa pagkapaliwanag kan An Torrengbantayan na Nobyembre 1, 1995, iinaplikar ni Jesus an fraseng “kapag-arakian na ini” sa katemporanyong maraot na mga tawo. (Mateo 11:7, 16-19; 12:39, 45; 17:14-17; Gibo 2:5, 6, 14, 40) Idto bakong paglaladawan sa sarong eksaktong lawig nin panahon na minapoon sa sarong espesipikong petsa.
An totoo, an “Mga Hapot Hale sa mga Parabasa” sa luwas man sanang iyan kan An Torrengbantayan nagkonsentrar sa duwang pangenot na punto: “An sarong kapag-arakian nin mga tawo dai puedeng mansayon na sarong peryodo nin panahon na may talaan na bilang nin mga taon” asin, “An mga tawo sa sarong kapag-arakian nabubuhay sa halipot sanang peryodo.”
Parate niatong ginagamit an “kapag-arakian” sa paaging ini. Halimbawa, puede niatong sabihon: ‘An mga soldados kan kapag-arakian ni Napoléon daing kaaram-aram manongod sa mga eroplano asin bomba atomo.’ An boot daw niatong sabihon mga soldados sana na namundag kagubay ni Napoléon? An boot sana daw niatong sabihon mga soldados na Pranses na nagkagaradan bago nagadan si Napoléon? Siempre bako; ni na kita sa siring na paggamit kan “kapag-arakian” magpoprobar na magtalaan nin espesipikong kabilangan nin mga taon. Pero, an boot niatong sabihon halipot sanang peryodo, bakong ginatos na taon poon sa panahon ni Napoléon paabante sa ngapit.
Iyan kaagid kan satong pakasabot sa sinabi ni Jesus sa saiyang hula na itinao sa Bukid nin mga Olibo. An kaotoban kan laen-laen na kabtang kan hulang iyan nagpapatunay na harani na an katapusan kan palakaw na ini. (Mateo 24:32, 33) Girumdomon na sono sa Kapahayagan 12:9, 10, kadungan kan pagpatindog sa langitnon na Kahadean nin Dios kan 1914, si Satanas ihinolog sa palibot kan daga. Idinadagdag pa kan Kapahayagan na si Satanas igwa nin dakulang kaanggotan ngonyan. Taano? Huli ta aram nia na “halipot na sana an saiyang panahon.”—Kapahayagan 12:12.
Sa siring angay na An Torrengbantayan na Nobyembre 1 igwa kan subtemang “Magpuka Kamo!” An suminunod na parapo angay na nagsabi: “Dai niato kaipuhan na aramon kun noarin an eksaktong panahon nin mga pangyayari. Imbes, an satong pagkonsentrar dapat na nasa pagigin puka, na nagpapatalubo nin makosog na pagtubod, asin nagdadanay na sibot sa paglilingkod ki Jehova—bakong sa pagkuenta nin petsa.” Dangan kinotar kaiyan an mga tataramon ni Jesus: “Magbantay kamo, magpuka kamo, huli ta dai nindo aram kun noarin an itinalaan na panahon. Alagad an isinasabi ko sa saindo isinasabi ko sa gabos, Magpuka kamo.”—Marcos 13:33, 37.