Mga Hapot Hale sa mga Parabasa
“An Torrengbantayan” na Nobyembre 1, 1995, nakasentro sa sinabi ni Jesus manongod sa “kapag-arakian na ini,” siring sa mababasa niato sa Mateo 24:34. Nangangahulogan daw ini na igwang pagduda manongod sa kun baga an Kahadean nin Dios ipinatindog sa langit kan 1914?
An paliwanag na iyan sa An Torrengbantayan dai nanggad liniliwat an satong pundamental na katokdoan manongod sa 1914. Itinao ni Jesus an tanda na mapamidbid kan saiyang presensia na may kapangyarihan sa Kahadean. Igwa kita nin igong ebidensia na an tandang ini naootob na poon kan 1914. An mga katunayan manongod sa mga guerra, gutom, damat, linog, asin iba pang ebidensia nagpapatotoo na poon kan 1914, si Jesus aktibo nang Hade kan Kahadean nin Dios. Ipinaheheling kaini na poon kaidto kita yaon na sa pagtatapos kan palakaw nin mga bagay.
Kun siring, ano an linilinaw kan An Torrengbantayan? Bueno, an liabe iyo an sentido kan pagkagamit ni Jesus kan tataramon na “kapag-arakian” sa Mateo 24:34. An tekstong iyan nagsasabi: “Sa katotoohan sinasabi ko sa saindo na an kapag-arakian na ini dai noarin man makalilihis sagkod na an gabos na bagay na ini mangyari.” Ano an boot sabihon ni Jesus kan “kapag-arakian,” kapwa sa saiyang kaaldawan asin sa satong kaaldawan?
Dakol na teksto an nagpapatunay na dai ginamit ni Jesus an “kapag-arakian” kun manongod sa sarong sadit o napapalaen na grupo, na an boot sabihon an Judiong mga namomoon sana o an saiyang maimbod na mga disipulo sana. Imbes, ginamit nia an “kapag-arakian” sa pagkondenar sa kadaklan na Judio na nagsikwal sa saiya. Pero, makaoogma ta an mga indibiduwal puedeng gibohon an isinadol ni apostol Pedro kan aldaw nin Pentecostes na magsolsol asin “paligtas kamo hale sa bikong kapag-arakian na ini.”—Gibo 2:40.
Sa mga tataramon na iyan, si Pedro malinaw nanggad na bakong espesipiko kun manongod sa ano man na edad o lawig nin panahon, ni ikinokonektar nia an “kapag-arakian” sa ano man na petsa. Dai nia sinabi na an mga tawo maninigong maligtas hale sa kapag-arakian na kagubay ni Jesus o sa kapag-arakian na namundag kan 29 C.E. Si Pedro nagtataram manongod sa dai nagtutubod na mga Judio kan peryodong iyan—na an nagkapira posibleng hoben pa, an iba mas maedad—na nakadangog kan katokdoan ni Jesus, nakaheling o nakabareta kan saiyang mga milagro, asin dai nag-ako sa saiya bilang an Mesiyas.
Malinaw na iyan an pakasabot ni Pedro sa paggamit ni Jesus kan “kapag-arakian” kan sia asin an tolo pang apostol kaiba ni Jesus sa Bukid nin mga Olibo. Sono sa makahulang kapahayagan ni Jesus, an mga Judio kan peryodong iyan—sa pundamental, an mga katemporanyo ni Jesus—makaeeksperyensia o makababareta nin mga guerra, linog, gutom, asin iba pang ebidensia na harani na an katapusan kan Judiong palakaw. Sa katunayan, an kapag-arakian na iyan dai luminihis antes na dumatong an katapusan kan 70 C.E.—Mateo 24:3-14, 34.
Kaipuhan na akoon na dai niato perming sinabot an mga tataramon ni Jesus sa sentidong iyan. Igwa nin tendensia an mga tawong bakong sangkap na magmawot na magin espesipiko manongod sa petsa kun noarin maabot an katapusan. Girumdomon na dawa an mga apostol nagmawot nin mas espesipikong impormasyon, na naghahapot: “Kagurangnan, ibabalik mo ngonyan an kahadean sa Israel?”—Gibo 1:6.
May siring na sinserong mga intension, an mga lingkod nin Dios sa presenteng mga panahon nagprobar na paluwason hale sa sinabi ni Jesus manongod sa “kapag-arakian” an espesipikong petsa na kinuenta poon 1914. Halimbawa, an sarong pangangatanosan iyo na an sarong kapag-arakian puedeng 70 o 80 taon, na binibilog nin mga tawo na nasa edad na tanganing masabotan an kahulogan kan enot na guerra mundial asin iba pang mga pangyayari; sa siring makukuenta niato poko mas o menus kun gurano na karani kan katapusan.
Minsan pa gurano karahay kan nagin intension nin siring na kaisipan, iyan daw nakasono sa sadol na itinao ni Jesus? Si Jesus nagsabi: “Mapadapit sa aldaw asin oras na iyan mayo nin siisay man na nakaaaram, ni an mga anghel kan kalangitan ni an Aki, kundi an Ama sana. . . . Magdanay kamong mapagbantay, kun siring, huli ta dai nindo aram kun sa anong aldaw madatong an saindong Kagurangnan.”—Mateo 24:36-42.
Kaya an bago pa sanang impormasyon sa An Torrengbantayan manongod sa “kapag-arakian na ini” dai nagbago kan satong pakasabot manongod sa nangyari kan 1914. Alagad tinawan kita kaiyan nin mas malinaw na pakasabot sa paggamit ni Jesus kan terminong “kapag-arakian,” na tinatabangan kita na masabotan na an saiyang paggamit bakong basehan para sa pagkuenta—poon 1914—kun gurano na kita karani sa katapusan.