Naniniwala daw Kamo sa Reenkarnasyon?
“NAGIGIRUMDOMAN mo an daragita sa kataed na kursunada mo kan ika nagtitin-edyer kaidto digdi sa India?” an isinurat ni Mukundbhai sa saiyang aking lalaki, sarong estudyante sa unibersidad sa Estados Unidos. “Pirang semana na sana ikakasal na sia. Naisip ko na maninigo kang makaaram.”
Taano ta ibinareta ini kan ama sa saiyang aki? Total, desididong tinapos ni Mukundbhai an sa tin-edyer na pagkaginustohan na idto dakol na taon na an nakaagi. Saka, an aki anom na taon nang nasa Estados Unidos tanganing mag-adal sa kolehio. Dai na sia nakikomunikar sa daragita durante kan panahon na idto, asin aram iyan ni Mukundbhai.
Taano, kun siring, ta may paghadit? Ipinaheling iyan huli ta si Mukundbhai naniniwala sa reenkarnasyon, o pagkamundag liwat.a Kun huli sa pagkanorongod nagkaginustohan an duwang tin-edyer huli ta sinda mag-agom sa nakaaging buhay, magigin karingisan na pagsuwayon sinda ngonyan na sinda nasa tama nang edad na magpakasal. Boot sana ni Mukundbhai na maaraman kan saiyang aki an situwasyon bago an daraga magin agom nin iba sa buhay na ini.
Horophoropa an saro pang kaso. An sarong kuatro anyos na aking babae nag-agi nin nagkapirang beses na makologon na pagkaospital sa Mumbai, India. An saiyang problema may depektong balbula sa saiyang puso. Dai matios kan saiyang mayaman na mga magurang na maheling na nagsasakit an aki. Alagad nangatanosan sinda: “Kaipuhan na akoon mi iyan. Seguradong may nagibo sia sa saiyang nakaaging buhay kaya ini nangyayari sa saiya.”
An paniniwala sa reenkarnasyon igwa nin mahalagang kabtang sa buhay nin minilyon sa Hinduismo, Budismo, Jainismo, Sikismo, asin iba pang relihion na gikan sa India. An mga eksperyensia sa buhay—poon sa pagkamoot sagkod sa grabeng pagsakit—ibinibilang na epekto nin mga gibo na nakomitir sa sarong nakaaging buhay o mga buhay.
An dakol sa kadagaan sa Solnopan naaakit man sa doktrinang reenkarnasyon. An Amerikanang artista na si Shirley MacLaine naghihingakong naniniwala dian. An parasurat na si Laurel Phelan kan Vancouver, British Columbia, Canada, naghihingako na igwang nagigirumdoman na 50 nakaaging buhay. Sa sarong surbey na Gallup kan 1994 na ginibo para sa CNN/USA Today, labing 270 kan 1,016 na adulto an naghingakong naniniwala sa reenkarnasyon. An paniniwala sa reenkarnasyon kabtang man kan mobimientong Bagong Panahon. Alagad anong ebidensia an nagsusuportar sa paniniwalang ini?
“Mga nagigirumdoman sa sarong nakaaging buhay!” sabi kan mga naniniwala sa reenkarnasyon. Bilang resulta, kan an tres anyos na si Ratana sa Bangkok magpoon na magkaigwa nin “mga nagigirumdoman sa saiyang nakaaging buhay bilang babaeng relihiosa na nagadan kan sia nasa mga 60 anyos,” an kadaklan na nagmamasid inako an nangyayari sa saiya bilang balidong prueba nin reenkarnasyon.
Minsan siring, kadakol na pagduda. Asin posible an ibang paliwanag dapit sa mga nagigirumdoman na iinaatribwir sa nakaaging mga buhay.b Sa saiyang librong Hinduism: Its Meaning for the Liberation of the Spirit, an pilosopong Hindu na si Nikhilananda nagsasabi na ‘an mga eksperyensia pagkagadan dai ikadedemonstrar paagi sa rason.’ Pero iiniinsistir nia na “an doktrinang pagkamundag liwat mas posible kisa sa imposible.”
Alagad sinusuportaran daw kan Biblia an katokdoan na ini? Asin anong paglaom para sa mga gadan an itinatao kan ipinasabong na Tataramon nin Dios?
[Mga nota sa ibaba]
a “An reenkarnasyon,” sabi kan The New Encyclopædia Britannica, nangangahulogan nin “pagkamundag liwat kan kalag sa saro o labi pang sunod-sunod na pag-eksister, na tibaad tawo, hayop, o, sa ibang kamugtakan, gulay.” An terminong “pagkamundag liwat” ginagamit man sa pagladawan kan pangyayaring ini, alagad an terminong “reenkarnasyon” an inaako nin kadaklan. An nagkapirang diksionaryo nin mga lenguahe sa India ginagamit nin sarosalida an mga terminong iyan.
b Helingon an pahina 5-7 kan luwas kan Awake! na Hunyo 8, 1994.
[Mga retrato sa pahina 4]
Sia daw pinadudusahan huli sa mga kasalan na nakomitir sa sarong nakaaging buhay?