Kun Paano Makanonompong nin Paglaom sa Tahaw nin Pagkadesesperar
IMAHINARA na maeksperyensiahan nindo an mga minasunod: An gabos nindong materyal na rogaring nalaglag, na nakapadukha sa saindo. An saindong mga aki—an kagayagayahan nindo sa buhay—nagkagaradan. An saindong agom dai kamo tinatawan nin moral na pagsuportar. An saindong salud biyo nang buminagsak. An kada aldaw makologon na eksperyensia.
Kun iyan an saindong situwasyon, makanonompong daw kamo nin dahelan na padagos na mabuhay? O mapadaog daw kamo sa pagkadesesperar?
An mamondong kamugtakan na ilinadawan pa sana tunay na buhay na eksperyensia ni Job, sarong tawo na nabuhay kan mga panahon kan Biblia. (Job, kapitulo 1, 2) Kan namomondong marhay, nag-agrangay si Job: “An sakong kalag nababalde nanggad sa sakong buhay.” Inako nia kutana kaidto an kagadanan bilang pakaginhawa. (Job 10:1; 14:13) Minsan siring, sa ibong kan saiyang grabeng pagsakit, namantener ni Job an saiyang integridad sa Dios. Kaya si Jehova “binendisyonan an kasagkodan ni Job nin labi pa sa saiyang kapinonan.” Sa siring sia nagadan na may katoninongan, “gurang na asin kontento sa mga aldaw.”—Job 42:12, 17.
Si Job nagtao nin halimbawa sa pakatagal na inoomaw sagkod sa aldaw na ini. An mga pagbalo sa saiya nakapakarhay sa saiyang personalidad asin minotibar an iba sa marahay na mga gibo. (Santiago 5:10, 11) Pinakaimportante sa gabos, pinagayagaya kan daing depektong integridad ni Job an puso ni Jehova. (Talinhaga 27:11) Sa siring an garo pangum-um na labi-labing kasakitan nagin pambihirang kapangganahan nin pagigin diosnon, pagtubod, asin integridad na nakatao nin mga bendisyon ki Job asin sa gabos na napahiro kan saiyang halimbawa.
Paglaom sa Ibong nin Manlaenlaen na Pagbalo
Tibaad nagsasapar kamo nin mga pagbalo na kapareho kan mga naeksperyensiahan ni Job. An pagkagadan nin sarong namomotan tibaad nagpasakit sa saindo sa emosyon. An grabeng helang tibaad ginibong makologon an buhay nindo. An bilog nindong buhay tibaad garo baga nagkasuruhaysuhay na huli sa makologon sa boot na diborsio. An mga kapierdihan sa ekonomiya tibaad nakapadukha sa saindo. Tibaad punteriya kamo nin makuring paglamag kan maongison na mga paratumang sa tunay na pagsamba. An kasakitan na makapanggana sa mga pagbalo sa saindo tibaad nagpamate sa saindo na dai nang esperansa an saindong ngapit.—1 Pedro 1:6.
Imbes na padaog sa pagkadesesperar, hapota an saindong sadiri, ‘Taano ta nagsasakit ako?’ Nagsasakit kamo huli ta kamo nabubuhay sa sarong kinaban na “namumugtak sa kapangyarihan kan maraot,” si Satanas na Diablo. (1 Juan 5:19) Bilang resulta, an gabos nagsasakit. Minsan paano kita gabos apektado kan sutsut kan Diablo na pagkaongis sa mensahe kan Kahadean, kan bakong mamomoton na mga tataramon nin iba, o kan makatatakot na mga akto nin maraot na gawe-gawe na lakop na gayo sa “delikadong mga panahon” na ini.—2 Timoteo 3:1-5.
Kun may nangyaring makaturotriste sa saindong buhay, tibaad biktima kamo nin “panahon asin pagkanorongod.” (Eclesiastes 9:11) Sa ibong na kampi, kun beses napapasala an mga bagay sa buhay huli sa sato mismong minanang pagkamakasalan. (Roma 5:12) Dawa kun nagkasala kamo nin magabat alagad nagsolsol na kamo asin naghagad nin espirituwal na tabang, dai maghona na pinabayaan na kamo nin Dios. (Salmo 103:10-14; Santiago 5:13-15) Orog kisa siisay pa man, nagmamalasakit sia sa sato. (1 Pedro 5:6, 7) Makakokompiar kamo na “si Jehova harani sa mga nababaak an puso; asin an mga nasasakitan an espiritu saiyang iliniligtas.” (Salmo 34:18) Gurano man kamakaturotriste o kagrabe kan pagbalo sa saindo, kaya ni Jehova na tawan kamo kan kadonongan tangani na atubangon iyan. (Santiago 1:5-8) Perming girumdomon na kayang bolongon ni Jehova an gabos na lugad. Kun kamo inooyonan nia, mayo nin makaoolang sa saindo sa pagkamit kan premyong buhay.—Roma 8:38, 39.
May Pakinabang daw Gikan sa mga Pagbalo?
May suanoy na sarabihon, “An lambang panganoron maputi an gilid.” Iyan simpleng paagi nin pagsabi na gurano man karaot kan magin kamugtakan nin mga bagay, permi kamong makanonompong nin dahelan na maglaom. An katuyohan na nasa likod kan gabos na nasusurat sa Tataramon nin Dios iyo na “magkaigwa kita nin paglaom.” (Roma 15:4) Gurano man kamakamomondo kan saindong kamugtakan, an mga panuga asin prinsipyo sa Biblia makatatao sa saindo nin bagong kagayagayahan asin paglaom.
Ipinaheheling kan Kasuratan na “an kasakitan naagi sana asin magian” kun ikokomparar sa daing sagkod na mga bendisyon na iinoopresir sa mga namomoot sa Dios. (2 Corinto 4:16-18) Ipinaheheling man kan Biblia na an diosnon na mga kualidad na napatalubo sa tahaw nin mga pagbalo orog na mahalaga kisa sa kabantogan o materyal na kayamanan. (1 Juan 2:15-17) Sa siring, maski an pagsakit puedeng magtao nin mga pakinabang. (Hebreo 5:8) Sa katunayan, an pag-aplikar kan nanonodan durante kan mga pagbalo puedeng magtao sa saindo nin dai linalaoman na mga bendisyon.
An masakit na pagbalo tibaad gibohon kamong mas maboot. Tibaad admitiron nindo na kan nakaagi igwa kamo nin ugale na ikinauuyam nin iba asin nakaolang pa ngani sa saindong espirituwal na pag-oswag. Tibaad idto sobrang kompiansa. Pakatapos na masakitan nin makuri huli sa sarong kalamidad, tibaad bigla na sana nindong marealisar na maluyahon palan kamo asin kaipuhan nanggad nindo an iba. Kun iyan an nanodan nindo sa pagbalo sa saindo asin guminibo na kamo nin kinakaipuhan na mga pagbabago, nakinabang kamo dian.
Kumusta kun, kan nakaagi, nasakitan an iba na makiiba sa saindo huli ta nasasakitan kamong kontrolon an templada kan saindong payo? Tibaad nagcausa pa ngani ini sa saindo nin kapurisawan may koneksion sa saindong salud. (Talinhaga 14:29, 30) Minsan siring, ngonyan tibaad mas marahay na an situwasyon huli ta nagsasarig kamo sa espiritu nin Dios na tabangan kamong magpogol sa sadiri.—Galacia 5:22, 23.
Arog nin iba, posibleng may panahon na mayo kamo kan pakikidamay tanganing magin maheherakon sa mga nagkakasala. Alagad kun kamo mismo napasa kamugtakan na huli kaiyan nakamate kamo nin dakulang pangangaipo nin pagkaherak, posibleng ngonyan mas may tendensia kamong magin maheherakon sa iba. An nakaoogmang simpatiya, pagmalasakit, asin pagkaherak na ipinaheling sa saindo nakaparealisar sa saindo na maninigo man nindong ipaheling an kaparehong mga kualidad sa nagsolsol na mga nagkasala. Kun an kamondoan nindo nagpahiro sa saindo na itanos an mga kaluyahan na ini sa saindong personalidad, saro ining pakinabang na nakamtan nindo sa saindong eksperyensia. Nanodan nindo na “an pagkaherak mapangganang nag-oogma tumang sa paghokom.”—Santiago 2:13; Mateo 5:7.
Kumusta kun an disiplina kan Kristianong kongregasyon nagresulta sa pagkawara kan saindong mahal na mga pribilehio asin kan paggalang nin iba? Dai padaog sa pagkadesesperar. An pagdisiplina nakatatabang na papagdanayon na malinig an kongregasyon, alagad kabale sa mga katuyohan kaiyan an pagbabalik sa espirituwal kan nagkasala. Totoo, “mayong disiplina na sa presente garo nakagagayagaya, kundi nakamomondo; pero pakatapos duman sa mga napatood kaiyan iyan nagbubunga nin matoninong na bunga, arin na baga, an katanosan.” (Hebreo 12:11) Minsan ngani puedeng magin nakapanluluya nin biyo an disiplina, dai kaiyan binabayaan na mayong paglaom an tawong mapakumbabang nagsosolsol. Si Hadeng David kan suanoy na Israel estriktong dinisiplina huli sa pagkakasala, alagad sia nagsolsol asin sa kahurihurihi nag-ako nin espesyal na komendasyon bilang sarong tawo na may ekselenteng pagtubod.—2 Samuel 12:7-12; Salmo 32:5; Hebreo 11:32-34.
An pagbalo puedeng magkaigwa nin hararom na epekto sa saindong punto de vista. Kan nakaagi, an saindong atension tibaad nakasentro sa materyalistikong mga pasohan asin nagibo na nagpamidbid asin nagpabantog sa saindo sa kinaban na ini. Tibaad an pagbalo na konektado sa kapierdihan sa pinansial o kalugihan sa materyal isinentro an saindong mga kaisipan sa orog na mahalagang mga bagay. (Ikomparar an Filipos 1:10.) Ngonyan narerealisar nindo na an espirituwal na mga pamantayan asin pasohan sa sagradong paglilingkod iyo an solamenteng nagtatao nin tunay na kagayagayahan asin nagdadanay na satispaksion.
Magtiwala ki Jehova
An pagtao nin sagradong paglilingkod ki Jehova tibaad magresulta nin paglamag asin pagsakit sa kamot kan mga nagtutumang sa saindong Kristianong mga paniniwala. Tibaad makamate kamong inaapi huli sa pagbalong ini, alagad may pakinabang na puedeng gumikan dian. An pagbalong ini puedeng makapakosog sa saindong pagtubod. Dugang pa, an ibang nagsasapar nin paglamag puedeng maparigon an boot asin mapakosog paagi sa pagmasid sa saindong pagmamaigot. An mga nakaheheling mismo kan saindong marahay na gawe-gawe puedeng mamotibar na pamurawayon an Dios. Maski an mga nagtutumang sa saindo tibaad mapasopog asin midbidon an saindong marahay na mga gibo!—1 Pedro 2:12; 3:16.
Tangani na malikayan an pagkadesesperar kun linalamag, kaipuhan kamong magtiwala ki Jehova. An saiyang Tataramon nagpapaheling na siertong maabot an pakaginhawa sa pagbalo, alagad tibaad dai iyan umabot sa pinakamadaling panahon na gusto nindo. Mientras tanto, “dai kamo umontok sa paggibo nin tama.” (2 Tesalonica 3:13) Padagos na hanapon an mga paagi na makapanggana sa mga pagbalo asin makatagal. Dawa kun an mga bagay garo baga mayo nang paglaom, “tawan ki Jehova mismo an pagabat sa saimo, asin sia mismo matabang sa saimo. Noarin man dai nia totogotan na matanyog an matanos.” (Salmo 55:22) Imbes na padaog sa pagkaherak sa saindong sadiri, isip-isipon kun gurano kamo kaogma sa pakamidbid ki Jehova, sa pagkaigwa nin lugar sa tahaw kan saiyang banwaan, asin sa pagkaigwa nin paglaom na buhay na daing sagkod.—Juan 3:16, 36.
Papagdanayon an saindong isip na nakasentro sa mga bagay na mahalagang marhay. Dumolok ki Jehova aroaldaw sa pamibi, na nag-aarang na pakosogon tangani na makatagal. (Filipos 4:6, 7, 13) Isikwal an ano man na kaisipan na bumalos sa mga nagpapasakit sa saindo. Pabayaan an mga bagay sa kamot ni Jehova. (Roma 12:19) Padagos na hanapon an mga paagi na mapakarhay an saindong personalidad, na kinukultibar an Kristianong mga kualidad. (2 Pedro 1:5-8) Apresyaron an gabos na bagay na ginibo sa saindo kan iba, kabale an kamagurangan na mamomoton na nagmamalasakit sa saindong espirituwal na mga pangangaipo. (Hebreo 13:7, 17) Magin fiel sa Dios, asin itorohok an saindong mata sa premyong buhay, na kompiado na maski an kagadanan dai makaaagaw kaiyan sa saindo.—Juan 5:28, 29; 17:3.
Kun naeeksperyensiahan nindo ngonyan an grabeng kamondoan o makuring mga pagbalo, ‘magtiwala ki Jehova sa bilog nindong puso,’ asin sa katapustapusi sasalidahan nin abundang kagayagayahan an saindong kamondoan asin kasakitan. (Talinhaga 3:5, 6; Juan 16:20) An kasakitan sasalidahan nin kaogmahan kun bendisyonan na kamo nin Dios siring kan ginibo nia ki Job. An mga kasakitan ngonyan daing halaga kun ikokomparar sa balos sa saindo. (Ikomparar an Roma 8:18.) An saindong fiel na pakatagal makaeenkaminar sa iba asin makatatabang sa saindo na kultibaron an magayon na Kristianong mga kualidad na kaiba kan “bagong pagkatawo.” (Efeso 4:23, 24; Colosas 3:10, 12-14) Kun siring, kumua nin kapusoan sa madonong na sadol ni apostol Pedro: ‘Idtong mga nagtitios sono sa kabotan nin Dios padagos na magdolot kan saindang kalag sa fiel na Kaglalang mantang sinda naggigibo nin marahay.’—1 Pedro 4:19.
[Retrato sa pahina 23]
3Arogon si Job. Dai noarin man mawaran nin paglaom
[Retrato sa pahina 24]
Magtiwala ki Jehova sa bilog nindong puso