Bareta kan mga Parabalangibog kan Kahadean
Pagdulag Pasiring sa Teokratikong Organisasyon ni Jehova
KAIDTO pa si propeta Isaias napahirong magpahayag: ‘Sinda dapat na magpamuraway ki Jehova sa mga isla kan dagat.’ (Isaias 24:15) Minamansay kan Mga Saksi ni Jehova an mga isla kan dagat bilang kabtang kan “ineerokan na daga” na dian sinabi ni Jesus na “an maogmang bareta kaipuhan na ikahulit.”—Mateo 24:14; Marcos 13:10.
An Mga Isla nin Marquesas mga 1,400 kilometros sa amihanan-sirangan nin Tahiti. An mga iyan kabtang nin sarong puerang grupo nin mga isla sa Pasipiko del Sur na inapod French Polynesia. Huli sa mataba, hale sa bulkan na daga asin maimbong, basa-basa na klima, marahay an tubo kan mga pananom sa mga islang ini. Minsan siring, namumunga man nin ibang klase nin prutas an Marquesas. Estudyare an kaso nin sarong pamilya na naghimate sa mensahe kan Kahadean sa isla nin Hiva Oa.
Si Jean asin an saiyang agom na babae, si Nadine, bakong maogma sa sibilisado daang sosyedad kan Solnopan na Europa na saindang iniistaran. Kaya nagdesisyon sindang bayaan an sibot na pamumuhay na iyan asin nagbalyo kaiba an saindang aki sa Mga Isla nin Marquesas. An saindang bagong harong, na gibo sa kawayan, natatago sa sarong puerang kababan. Tanganing makaabot sa pinakaharani nindang kataraed, kaipuhan nindang magbaklay nin duwang oras sa lubak-lubak na agihan sa bukid. An pinakaharaning baryo na igwa nin doktor, eskuelahan, asin dakulang tindahan tolong oras na biahe sa dyip.
Si Jean asin Nadine bakong interesado sa relihion. Minsan siring, sinda nag-oolay manongod sa pinaghalean nin buhay. Sa parate, sinda nag-oolay nin detalyado dapit sa komplikadong mga teoriya nin ebolusyon. Alagad mayo sa mga teoriya ninda an nakatao sa sainda nin satispaksion.
Pakatapos na mamuhay sa puerang lugar sa laog nin anom na taon, nasorpresa sinda na dalawon nin duwang Saksi ni Jehova. Naaraman kan mga Saksi kun yaon saen si Jean asin Nadine sa karaning mga tagabaryo. Naturalmente, an pag-oolay napasiring sa orolay manongod sa teoriya nin ebolusyon. Sa kaogmahan kan mag-agom, an mga Saksi may darang sarong kopya kan librong Life—How Did It Get Here? By Evolution or by Creation?, na ipinublikar kan Mga Saksi ni Jehova. Si Jean asin Nadine naogma na magkaigwa nin libro na nag-aatubang nin detalyadong pagsiyasat kun paano nagkaigwa nin buhay digdi.
Pakalihis nin halipot na panahon, naponan an sarong pag-adal sa Biblia. Sa laog nin mga tolong taon, si Jean asin Nadine padagos na nag-oswag. Nakombensir sinda na sa dai na mahahaloy an bilog na daga gigibohon na sarong paraiso. Kan magkaigwa nin tolong aki an saindang pamilya, an pagbiahe nin apat na oras tanganing makaatender sa Kristianong mga pagtiripon sa Kingdom Hall nagin masakit nanggad. Minsan siring, iyan dai nakapapondo sa sainda sa pag-atender. Pag-abot nin panahon si Jean asin Nadine sinimbolisaran an saindang pagdusay ki Jehova paagi sa bautismo sa tubig. Ginibo ninda ini sa sarong kombension na ginibo sa mayor na baryo, na igwa nin pinakahalangkaw na kabilangan nin nag-atender na 38 katawo!
Tanganing tabangan an sadit na grupo nin mga parahayag kan Kahadean, an pamilya nagdesisyon na bayaan an saindang napapasuhay na harong. Sinda nagbalyo sa sarong baryo na igwa nin mga sangribong residente, kun saen si Jean ngonyan naglilingkod bilang sarong ministeryal na lingkod sa lokal na kongregasyon kan Mga Saksi ni Jehova. An pamilyang ini, na nagpasiring kaidto sa mga isla tanganing dulagan an sibilisasyon, kinokonsiderar na sarong pribilehio na manompongan an solamenteng tunay na santuaryo, an teokratikong organisasyon ni Jehova.