An Kaluyahan nin Tawo Orog na Nagpapadakula sa Kapangyarihan ni Jehova

“An gabos naghohona na ako sarong maogma asin bibang pambilog na panahon na ministro. Ako an perming nagtatabang sa iba sa saindang mga problema. Minsan siring, kadungan kaiyan, ako nakamate na ako garo nagagadan sa laog. An mga kaisipan na nakariribok asin labi-labing kahaditan sa isip nagkakaigwa nin nakadadanyar na epekto sa sako. Nagpoon akong makamate na napapasuhay sa mga tawo. Gusto ko na sanang magparahigda sa harong. Sa laog nin dakol na bulan, nakimaherak ako ki Jehova na togotan na akong magadan.”​—Vanessa.

SIRING sa nasambitan na pangyayari sa itaas, normal sana na kun beses an mga lingkod ni Jehova makamate kan mga epekto kan pagkabuhay sa ‘delikadong mga panahon na ini na masakit pakibagayan.’ (2 Timoteo 3:1) An nagkapira puede nganing manluyang marhay an boot. (Filipos 2:​25-27) Kun maglawig, an kadaihan nin paglaom puedeng halean kita kan satong kosog, huli ta sinasabi kan Biblia: “Ika daw nanluya an boot sa aldaw nin kasakitan? An saimong kosog magigin kadikit.” (Talinhaga 24:10) Iyo, kun nanluluya an satong boot, kaipuhan niato an kosog​—posibleng an inapod pa ngani ni apostol Pablo na “kosog na lihis sa ordinaryo.”​—2 Corinto 4:7.

Si Jehova Dios iyo an gikanan nin daing sagkod na kapangyarihan. Maririsa ini kun sisiyasaton niato an saiyang paglalang. (Roma 1:20) Halimbawa, konsiderara an saldang. An daga daing pondong tinatamaan nin mga 240 trilyones na kabalyo hale sa saldang. Alagad ta, an numerong ini nagrerepresentar sana sa mga kabanga nin ikasarong bilyon na kabtang kan enerhiyang pinaluluwas kan saldang. Asin an saldang sadit kun ikokomparar sa mga bitoon na inaapod na mga supergiant. Kabale sa mga ini an Rigel, sarong bitoon sa konstelasyon nin Orion na 50 doble kan satong saldang asin nagpapaluwas nin enerhiya na 150,000 kadoble!

An Kaglalang kan siring na langitnon na mga gikanan nin enerhiya seguradong igwa nin “kadakolan nin dinamikong kosog.” (Isaias 40:26; Salmo 8:​3, 4) Tunay nanggad, si propeta Isaias nagsabi na si Jehova ‘dai nanluluya o napapagal.’ Asin an Dios andam na ihiras an saiyang kosog sa siisay man na, huli sa kaluyahan nin pagigin tawo, nakamamate na sinda nanluluya. (Isaias 40:​28, 29) Kun paano nia ginigibo ini iiniilustrar sa kaso kan Kristianong apostol na si Pablo.

Pag-atubang sa mga Pagbalo

Sinabi ni Pablo sa mga taga-Corinto an dapit sa balakid na kinaipuhan niang tagalan. Inapod nia iyan na “sarong tonok sa laman.” (2 Corinto 12:7) An “tonok” na ini tibaad sarong problema sa salud, posibleng may diperensiang pagheling. (Galacia 4:15; 6:11) O tibaad si Pablo nagtataram manongod sa falsong mga apostol asin iba pang nanriribok na inangat an saiyang pagigin apostol asin gibo. (2 Corinto 11:​5, 6, 12-​15; Galacia 1:​6-9; 5:​12) Ano man idto, an “tonok sa laman” na ini nakapurisaw na gayo ki Pablo, asin sia namibi nin paorootro na iyan haleon.​—2 Corinto 12:8.

Minsan siring, dai itinao ni Jehova an hinahagad ni Pablo. Imbes, sinabi nia ki Pablo: “An sakuyang dai na kutana maninigong kabootan igo na para sa saimo.” (2 Corinto 12:9) Ano daw an boot sabihon kaini ni Jehova? Bueno, kun iisipon niato an nakaaging paglamag ni Pablo sa mga Kristiano, huli sana sa dai na kutana maninigong kabootan na sia nagkaigwa nin relasyon sa Dios​—dai na baga sabihon an paglingkod bilang apostol!a (Ikomparar an Zacarias 2:8; Kapahayagan 16:​5, 6.) Puedeng sinasabi ni Jehova ki Pablo na an pribilehio nin pagigin disipulo “igo na.” Iyan dai na iibanan nin milagrosong paghale sa personal na mga problema sa buhay. Sa katunayan, an nagkapirang kasakitan tibaad lumataw pa ngani bilang resulta nin dugang na mga pribilehio. (2 Corinto 11:​24-27; 2 Timoteo 3:12) Ano man an kamugtakan, kinaipuhan ni Pablo na tagalan na sana an saiyang “tonok sa laman.”

Pero, dai nanggad pinabayaan na daing herak ni Jehova si Pablo. Imbes, sinabi nia sa saiya: “An sakuyang kapangyarihan sinasangkap sa kaluyahan.” (2 Corinto 12:9) Iyo, mamomoton na itatao ni Jehova ki Pablo an kosog na maatubang an saiyang situwasyon. Sa siring, an “tonok sa laman” ni Pablo nagin praktikal na halimbawa. Tinokdoan sia kaiyan na manarig sa kosog ni Jehova imbes na sa sadiri niang kosog. Malinaw na nanodan na marhay ni Pablo an leksion na ini, huli ta pakalihis nin pirang taon sia nagsurat sa mga taga-Filipos: “Nakanood ako, sa ano man na magin kamugtakan ko, na buhayon an sadiri. Igwa ako kan kosog para sa gabos na bagay huli sa saiya na nagtatao nin kapangyarihan sa sako.”​—Filipos 4:​11, 13.

Kumusta man kamo? Kamo daw nagtitios man nin sarong klase nin “tonok sa laman,” tibaad helang o kamugtakan sa buhay na nagtatao sa saindo nin grabeng kahaditan? Kun iyo, maranga kamo. Minsan ngani tibaad dai man haleon ni Jehova sa milagrosong paagi an balakid, puede nia kamong tawan kan kadonongan asin sarig nin boot na maatubang iyan mantang padagos nindong ineenot sa buhay an intereses kan Kahadean.​—Mateo 6:33.

Kun an helang o paggurang nakaoolang sa saindo na gibohon an arog kan minamawot nindo sa Kristianong aktibidad, dai madesesperar. Imbes na mansayon an saindong pagbalo bilang nakalilimitar sa saindong paglilingkod ki Jehova, mansayon iyan na sarong oportunidad na dugangan an saindong pagsarig sa saiya. Girumdomon man na an halaga nin sarong Kristiano sinosokol, bakong sono sa kadakolan kan ginigibo nia, kundi sono sa saiyang pagtubod asin rarom nin pagkamoot. (Ikomparar an Marcos 12:​41-44.) An pagkamoot ki Jehova sa bilog nindong kalag nangangahulogan na naglilingkod kamo sa saiya sa bilog na makakaya kan saindong abilidad​—bakong kan iba.​—Mateo 22:​37; Galacia 6:​4, 5.

Kun an saindong “tonok sa laman” may labot sa sarong makamomondong kamugtakan sa buhay, siring sa kagadanan nin sarong namomotan, sunodon an konseho kan Biblia: “Tawan ki Jehova mismo an pagabat sa saimo, asin sia mismo matabang sa saimo. Noarin man dai nia totogotan na matanyog an matanos.” (Salmo 55:22) An sarong Kristiana na an ngaran Sylvia ginibo ini. Sa laog sana nin pirang taon, nagadan an saiyang agom pakalihis nin 50 taon nin pag-agoman asin an siyam pang miembro kan pamilya​—kabale an duwa niang hoben na makoapo. “Kun bakong huli ki Jehova,” an sabi ni Sylvia, “dai ko makokontrol an sakong kamondoan. Alagad nakanonompong ako nin dakulang karangahan sa pamibi. Haros daing pondo an sakong pakikipag-olay ki Jehova. Aram ko na tinatawan nia ako kan kosog tanganing makatagal.”

Kanigoan kanakapakokosog nin boot na maaraman na “an Dios nin gabos na karangahan” makatatao sa mga nagmomondo kan kosog na makatagal! (2 Corinto 1:3; 1 Tesalonica 4:​13) Inaapresyar ini, masasabotan niato an konklusyon ni Pablo sa bagay. Sia nagsurat: “Ako nag-oogma sa mga kaluyahan, sa mga pagtuya, sa mga pangangaipo, sa mga paglamag asin kasakitan, dahel ki Cristo. Huli ta kun ako maluya, dangan ako makosog.”​—2 Corinto 12:10.

Pag-atubang sa mga Pagkabakong Sangkap

Kita gabos nagmana nin pagkabakong sangkap sa satong enot na tawong mga magurang. (Roma 5:12) Bilang resulta, kita nakikipaglaban tumang sa mga horot kan makasalan na laman. Kanigoan kanakapanluluya nin boot na maaraman na an mga karakteristiko kan “daan na pagkatawo” mas makosog an impluwensia sa sato kisa sa paghona niato! (Efeso 4:​22-24) Sa siring na mga kamugtakan tibaad magsaboot kita arog ni apostol Pablo, na nagsurat: “Tunay na ako naoogma sa ley nin Dios oyon sa sakong pagkatawo sa laog, alagad nakaheheling ako nin laen na ley sa mga kabtang kan sakong hawak na minatumang sa ley kan sakong isip asin dinadara ako sa pagkabihag sa ley nin kasalan na yaon sa mga kabtang kan sakong hawak.”​—Roma 7:​22, 23.

Digdi man, puede kitang makakua nin kosog hale ki Jehova. Kun nasasakitan sa personal na kaluyahan, nungkang umontok sa pagdolok sa saiya sa pamibi, na odok na naghahagad kan saiyang kapatawadan maski gurano kaparate na kaipuhan kamong dumolok sa saiya manongod sa iyo man sanang problema. Huli sa saiyang dai na kutana maninigong pagkaherak, si Jehova, na “nagsisiyasat sa mga puso” asin na nakaheheling kan rarom kan saindong pagkasinsero, tatawan kamo nin sarong nalinigan na konsensia. (Talinhaga 21:2) Paagi sa saiyang banal na espiritu, puede kamong tawan ni Jehova kan kosog na ipadagos an pakikipaglaban tumang sa mga kaluyahan nin laman.​—Lucas 11:13.

Kaipuhan man niato an kosog na hale ki Jehova sa pag-atubang sa mga pagkabakong sangkap nin iba. Halimbawa, an sarong kapwa Kristiano tibaad magtaram sa sato na “dai iniisip arog kan mga bono nin espada.” (Talinhaga 12:18) Puede kita kaining makolgan na marhay, nangorogna kun iyan hale sa saro na sa pagmate niato maninigong mas nakaaaram kan saiyang ginigibo. Tibaad mapurisaw kita nin labi-labi. An nagkapira ginamit pa ngani an siring na mga pagkakasala bilang sarahotan sa pagbaya ki Jehova​—an pinakadakulang sala sa gabos!

Minsan siring, an sarong balanseng aktitud matabang sa sato na mansayon an mga kaluyahan nin iba na may tamang punto de vista. Dai kita makalalaom nin pagkasangkap sa bakong sangkap na mga tawo. “Mayo nin tawo na dai nagkakasala,” an pagirumdom sa sato kan madonong na tawong si Salomon. (1 Hade 8:46) Si Arthur, sarong linahidan na Kristiano na maimbod na naglingkod ki Jehova sa laog nin mga pitong dekada, nagkomento: “An mga kaluyahan nin mga kapwa lingkod nagtatao sa sato nin oportunidad na patunayan an satong integridad, na binabalo an kualidad kan satong Kristianong boot. Kun totogotan niato an sinasabi o ginigibo nin mga tawo na makaentremeter sa satong paglilingkod ki Jehova, kita naglilingkod sa mga tawo. Apuera kaiyan, namomotan man kan satong mga tugang si Jehova. Kun hahanapon niato an marahay sa sainda, maheheling tolos niato na bako man palan sindang siring kaiyan karaot.”

An Kapangyarihan na Maghulit

Bago nagsakat sa langit, sinabihan ni Jesus an saiyang mga disipulo: “Kamo mag-aako nin kapangyarihan kun dumatong na sa saindo an banal na espiritu, asin kamo magigin mga saksi ko sa Jerusalem asin sa bilog na Judea asin Samaria patin sagkod sa kaporoporohi kan daga.”​—Gibo 1:8.

Kaoyon sa mga tataramon ni Jesus, an gibohon na ini ginigibo ngonyan kan Mga Saksi ni Jehova sa 233 na kadagaan sa bilog na globo. Bilang grupo, sinda naggagamit nin labing sarong bilyon na oras kada taon sa pagtabang sa iba na magkaigwa nin kaaraman dapit ki Jehova. An paghaman kan gibohon na ini bako perming pasil. Sa nagkapirang kadagaan an paghuhulit kan Kahadean ipinoprohibir o linilimitaran. Horophoropa man kun siisay an naggigibo kan gibohon​—maluya, bakong sangkap na mga tawo, na an kada saro sa sainda igwa nin sadiri niang mga problema asin kahaditan. Pero an gibohon nagpapadagos, asin bilang resulta, sa nakaaging tolong taon, labing sarong milyon na tawo an nagdusay kan saindang buhay ki Jehova asin sinimbolisaran an saindang pagdusay paagi sa bautismo sa tubig. (Mateo 28:​18-20) Tunay nanggad, an gibohon na ini nahahaman paagi sana sa kosog nin Dios. Si Jehova nagsabi paagi ki propeta Zacarias: “Bakong paagi sa puersa militar, ni sa kapangyarihan, kundi paagi sa sakong espiritu.”​—Zacarias 4:6.

Kun kamo sarong parahayag kan maogmang bareta, kamo nagkakaigwa nin kabtang​—gurano man iyan kasadit paghelingon—​sa dakulang nagibo na iyan. Dawa ano pang ‘tonok’ an kaipuhan nindong tagalan, makasisierto kamo na dai lilingawan ni Jehova “an saindong ginibo asin an pagkamoot na saindong ipinaheling para sa saiyang ngaran.” (Hebreo 6:10) Kaya padagos na manarig sa Gikanan kan gabos na dinamikong kosog para sa suporta. Girumdomon, sa kosog sana ni Jehova na kita makatatagal; an saiyang kapangyarihan sinasangkap sa satong mga kaluyahan.

[Nota sa Ibaba]

[Retrato sa pahina 26]

An paghuhulit nagigibo sana paagi sa kapangyarihan ni Jehova