Kamo daw Igwang “Tonok sa Laman”?

¹ Mawot niatong marhay na otobon an sugo sa sato na ihulit an maogmang bareta sa pinakamakakaya kan satong abilidad. Minsan siring, dakol sa satong namomotan na mga tugang na lalaki asin babae an nadedepisilan na lubos na makikabtang huli ta nakaoolang an seryosong pisikal na mga kamatean o kabiadian, na nagpapadepisil na magibo an pinakadakol na gusto nindang gibohon. Para sa sainda, tibaad masakit pangganahan an mga pakamate na pagkadesganar, nangorogna kun naheheling ninda an iba sa palibot ninda na aktibong marhay sa ministeryo.​—1 Cor. 9:16.

² Sarong Halimbawa na Dapat Arogon: Si apostol Pablo kinaipuhan na tagalan an “sarong tonok sa laman.” Tolong beses siang nakimaherak ki Jehova na haleon an nakamomondong olang, na ilinadawan nia na “sarong anghel ni Satanas” na padagos na nagtatampal sa saiya. Pero, sa ibong kaiyan, si Pablo nagtagal asin nagpadagos sa saiyang ministeryo. Dai sia naherak sa saiyang sadiri o nagin sarong paorootrong reklamador. Ginibo nia an saiyang pinakamakakaya. An liabe sa saiyang pakapanggana iyo an pag-asegurar na ini hale sa Dios: “An sakuyang dai na kutana maninigong kabootan igo na para sa saimo; huli ta an sakuyang kapangyarihan sinasangkap sa kaluyahan.” An kaluyahan ni Pablo nagin kakosogan kan manodan niang akoon an saiyang situwasyon asin magsarig ki Jehova patin sa banal na espiritu tanganing makatagal.​—2 Cor. 12:​7-​10.

³ Kun Paano Kamo Makatatagal: An kaluyahan daw nin tawo nakalilimitar sa saindong paglilingkod sa Dios? Kun iyo, arogon an punto de vista ni Pablo. Dawa kun an saindong helang o kabiadian mayo nin permanenteng remedyo sa palakaw na ini nin mga bagay, puede kamong lubos na magtiwala ki Jehova, na nakasasabot kan saindong mga pangangaipo asin magtatao kan “kosog na lihis sa ordinaryo.” (2 Cor. 4:7) Aprobetsaran an tabang na makukua nindo sa kongregasyon, na dai nagsosolosolo. Kun nadedepisilan kamong makikabtang sa paghuhulit sa mga pinto, humanap nin praktikal na mga paagi na magpatotoo nin impormal o sa telepono.

⁴ Minsan ngani may tonok sa laman na tibaad makalimitar sa magigibo nindo sa ministeryo, dai kamo kaipuhan na makamateng mayo nin kabtang. Siring ki Pablo, kamo man ‘lubos na makapagpapatotoo sa maogmang bareta manongod sa dai na kutana maninigong kabootan nin Dios,’ na ginigibo an itinotogot kan saindong kosog asin mga kamugtakan. (Gibo 20:24) Mantang kamo naghihingoang gibohon an saindong ministeryo, aramon nindo na si Jehova naoogmang marhay.​—Heb. 6:10.