Kamo daw Katood nin Dios?—An Ihinahayag kan Saindong mga Pamibi
NAPROBARAN na daw nindong madangog nin dai tinutuyo an duwang tawo na nag-oolay? Daing duwa-duwa na madali nindong naaraman an klase kan saindang relasyon—kun baga sinda liputok na magkatood o dai magkamidbid, magkamidbid sana o dayupot, nagtitiniwalaan na mag-amigo. Sa kaagid na paagi, an satong mga pamibi puedeng maghayag kan satong relasyon sa Dios.
Sinisierto sa sato kan Biblia na an Dios “bakong harayo sa lambang saro sa sato.” (Gibo 17:27) Sa katunayan, inaagda nia kitang midbidon sia. Kita puede pa ngani na magin mga katood nia. (Salmo 34:8; Santiago 2:23) Kita puedeng magkaigwa nin liputok na relasyon sa saiya! (Salmo 25:14) Malinaw nanggad, an satong relasyon sa Dios iyo an pinakamahalagang bagay na puedeng mapasatuya na bakong sangkap na mga tawo. Asin pinahahalagahan ni Jehova an satong pakikikatood. Ini malinaw na maheheling huli ta an satong pakikikatood sa saiya basado sa satong pagtubod sa saiyang bugtong na Aki, na itinao an saiyang buhay para sa sato.—Colosas 1:19, 20.
Kun siring an satong mga pamibi maninigong magpabanaag nin hararom na pagkamoot asin apresasyon ki Jehova. Minsan siring, namatean na daw nindo na an saindong mga pamibi, minsan ngani may paggalang, medyo nagkukulang nin tunay na hararom na pagmate? Ini bakong pambihira. An liabe sa pagpaoswag sa mga bagay? Pagpatalubo sa saindong pakikikatood ki Jehova Dios.
Pakakua nin Panahon Para sa Pamibi
Enot sa gabos, kaipuhan an panahon na mapatalubo asin makultibar an pakikikatood. Tibaad aroaldaw nindong tinitino o kinakaolay pa ngani an dakol na tawo—mga kataed, katrabaho, tsuper nin auto, asin despatsador sa tindahan. Pero, dai nanggad ini nangangahulogan na tunay na katood nindo an siring na mga tawo. An pakikikatood nagtatalubo mantang nakikipag-olay kamo nin halawig sa sarong tawo, na nagliliwat hale sa ordinaryong estoryahan pasiring sa pagpahayag kan saindong panlaog na mga pagmate asin kaisipan.
Sa kaagid na paagi, an pamibi nagtatabang sa sato na magin dayupot ki Jehova. Alagad kaipuhan na idusay dian an igong panahon; labi pa an kaipuhan kisa sa sarong madalian na pagpasalamat sa mga panahon nin pagkakan. Mantang orog kamong nakikipag-olay ki Jehova, orog man nindong namimidbid an saindong mga pagmate, motibo, asin gawe-gawe. An solusyon sa masakit na mga problema nagpopoon na mahayag mantang ipinagigirumdom kan espiritu nin Dios an mga prinsipyo sa saiyang Tataramon. (Salmo 143:10; Juan 14:26) Dugang pa, mantang kamo namimibi, si Jehova nagigin orog na totoo sa saindo, asin orog nindong narerealisar an saiyang mamomoton na interes asin pagmakolog sa saindo.
Ini nangorognang totoo kun naeeksperyensiahan nindo an simbag sa saindong mga pamibi. Tara, si Jehova “makakagibo nin labi kaorog sa gabos na bagay na satong hinahagad o naiisip”! (Efeso 3:20) Ini dai nangangahulogan na an Dios naggigibo nin milagro para sa saindo. Minsan siring, paagi sa saiyang nasusurat na Tataramon, mga publikasyon kan grupong fiel na oripon, o sa ngoso kan mamomoton na mga tugang na lalaki asin babae, sia tibaad magtao sa saindo nin kinakaipuhan na sadol o paggiya. O sia tibaad magtao sa saindo kan kosog na kaipuhan tanganing matagalan o malabanan an sugot. (Mateo 24:45; 2 Timoteo 4:17) An siring na mga eksperyensia pinapano an satong puso nin apresasyon sa satong langitnon na Katood!
Kun siring an saro dapat na magkaigwa nin panahon sa pamibi. Totoo, an panahon bakong igo sa mga aldaw na ini na nagtatao nin tension. Alagad kun kamo talagang nagmamakolog sa sarong tawo, kamo sa parate nakakukua nin panahon para sa sarong iyan. Mangnoha kun paano ipinahayag kan salmista an saiyang sadiri: “Arog kan usang babae na hinihidaw an tubig na nagbobolos, an sakuya man na kalag hinihidaw ka, O Dios. An sakuyang kalag napapaha nanggad para sa Dios, para sa nabubuhay na Dios. Noarin daw ako marani asin maatubang sa Dios?” (Salmo 42:1, 2) Kamo daw may siring na pagmawot na makipag-olay sa Dios? Kun siring tuboson an panahon na magibo iyan!—Ikomparar an Efeso 5:16.
Halimbawa, puede nindong probaran na bumangon nin amay sa pagkaaga tanganing magkaigwa nin pribadong panahon na mamibi. (Salmo 119:147) Nakaeeksperyensia daw kamo kun beses nin mga bangging dai napapatorog? Kun siring, arog kan salmista, puede nindong mansayon an siring na nakapupurisaw na mga panahon bilang oportunidad na ipahayag an saindong mga kapurisawan sa Dios. (Salmo 63:6) O tibaad kaipuhan sana an pagsambit nin haralipot na pamibi durante kan aldaw. An salmista nagsabi sa Dios: “Sa saimo nag-aagrangay ako sa bilog na aldaw.”—Salmo 86:3.
Pagpaoswag sa Kualidad kan Satong mga Pamibi
Kun beses maheheling man nindo na makatatabang na labaan an saindong mga pamibi. Durante nin sarong halipot na pamibi, tibaad magkaigwa kamo nin inklinasyon na magtaram dapit sa hababaw na mga isyu. Alagad kun namimibi kamo nin mas halaba asin mas hararom, mas madali nindong ikinapapahayag an saindong mga kaisipan asin hararom na mga pagmate. Si Jesus kisuerra sarong beses na namibi nin bilog na banggi. (Lucas 6:12) Daing duwa-duwa na maheheling nindo na an saindong mga pamibi nagigin mas liputok asin makahulogan kun lilikayan nindong hidaleon iyan.
Ini dai nangangahulogan nin pagtiwatiwa kun kakadikit an saindong sasabihon; dai man iyan nangangahulogan nin daing kuentang pag-orootro. Si Jesus nagpatanid: “Kun namimibi, dai nindo pagparaorootrohon an iyo man sanang mga bagay, arog kan ginigibo kan mga tawo kan mga nasyon, huli ta hinohona ninda na dadangogon sinda huli sa paggamit ninda nin kadakol na tataramon. Kaya, dai kamo magin arog ninda, huli ta aram na nin Dios na saindong Ama an mga kaipuhan nindo bago pa nindo iyan hagadon sa saiya.”—Mateo 6:7, 8.
An pamibi mas makahulogan kun patienot nindong iniisip an mga tema na mawot nindong ipakipag-olay. An mga posibilidad daing sagkodan—an satong mga kagayagayahan sa ministeryo, an satong mga kaluyahan asin pagkabakong sangkap, an satong mga pagkadesganar, an satong mga pinaghahaditan sa pagbuhay, an mga pangigipit sa trabaho o sa eskuelahan, an ikararahay kan satong pamilya, asin an espirituwal na kamugtakan kan satong lokal na kongregasyon, sa pagsambit sana nin nagkapira.
Naglalagawlagaw daw an saindong isip kun minsan kun kamo namimibi? Kun siring orog na magmaigot na magkonsentrar. Total, si Jehova andam na ‘tawan nin atension an satong mga pakimaherak.’ (Salmo 17:1) Bako daw na kita maninigong magin andam na odok na maghingoa na mag-atento sa satong mga pamibi? Iyo, ‘itorohok an saindong isip sa mga bagay kan espiritu,’ asin dai togotan iyan na maglagawlagaw.—Roma 8:5.
Mahalaga man kun paano kita nakikipag-olay ki Jehova. Minsan ngani gusto nia na mansayon niato sia bilang sarong katood, dapat na nungka niatong lingawan na kita nakikipag-olay sa Soberano kan uniberso. Basahon asin horophoropon an nakapupukaw nin hararom na paggalang na eksenang ilinaladawan sa Kapahayagan kapitulo 4 asin 5. Duman naheling ni Juan sa bisyon an kamurawayan kan Saro na dinodolok niato sa pamibi. Kanigoan na pribilehio na makadolok kita asin makapakipag-olay sa “Saro na nagtutukaw sa trono”! Nungka niatong mamawoton na magin daing galang o daing dignidad an satong pananaram. Imbes, maninigo kitang odok na maghingoa na gibohon na ‘an mga tataramon kan satong ngoso asin an paghorophorop kan satong puso magin nakaoogma ki Jehova.’—Salmo 19:14.
Minsan siring, maninigo niatong masabotan na dai niato maiimpluwensiahan si Jehova paagi sa matibay na pagtaram. Sia naoogma sa satong magalang, odok sa pusong mga pahayag, dawa gurano man kasimple an pagkasabi kaiyan.—Salmo 62:8.
Karangahan Asin Pakasabot sa mga Panahon nin Pangangaipo
Kun kaipuhan niato an tabang asin karangahan, kita parateng narani sa sarong dayupot na katood para sa suporta asin simpatiya. Bueno, mayo nin katood na mas madaling dolokon kisa ki Jehova. Sia “sarong tabang na danay na makukua sa panahon nin mga kasakitan.” (Salmo 46:1) Bilang “an Dios nin gabos na karangahan,” nasasabotan nia nin orog kisa kiisay pa man kun ano an nangyayari sa sato. (2 Corinto 1:3, 4; Salmo 5:1; 31:7) Asin sia may tunay na pakikidamay asin pagkaherak sa mga nasa desesperadong situwasyon. (Isaias 63:9; Lucas 1:77, 78) Nasasabotan na si Jehova sarong nakasasabot na katood, kita sueltong nakakapakipag-olay sa saiya nin utitok, mainit. Kita napahihiro na magpahayag kan satong pinakahararom na mga pagkatakot asin kahaditan. Sa siring naeeksperyensiahan niato mismo kun paano ‘an mga panranga ni Jehova nakararanga sa satong kalag.’—Salmo 94:18, 19.
Kun minsan kita tibaad makamate na bakong angay na dumolok sa Dios huli sa satong mga sala. Alagad kumusta kun an sarong dayupot na katood nindo magkasala tumang sa saindo asin makimaherak na patawadon? Bako daw na mapahihiro kamo na rangahon asin pakosogon an boot kan sarong iyan? Kun siring, taano ta lalaoman nindo an mas menus ki Jehova? Sia abundang nagpapatawad sa saiyang mga katood na nagkakasala bilang resulta nin pagkabakong sangkap nin tawo. (Salmo 86:5; 103:3, 8-11) Nakaaaram kaini, dai niato pinopogolan na sueltong ituga an satong mga sala sa saiya; makakokompiar kita sa saiyang pagkamoot asin pagkaherak. (Salmo 51:17) Kun kita nagmomondo huli sa satong mga pagkukulang, puede kitang maranga sa mga tataramon kan 1 Juan 3:19, 20: “Paagi kaini makaaaram kita na kita nasa katotoohan, asin tatawan niato nin kasiertohan an satong puso sa atubangan nia kun manongod sa kun sa ano man kita kondenaron kan satong puso, huli ta an Dios orog kadakula kisa sa satong puso asin nakaaaram kan gabos na bagay.”
Minsan siring, dai niato kaipuhan na mapasa desesperadong kamugtakan tanganing kamtan an mamomoton na pagmakolog nin Dios. Si Jehova interesado sa ano man na bagay na puedeng makaapektar sa satong espirituwal asin emosyonal na ikararahay. Iyo, nungka na dapat niatong isipon na an satong mga pagmate, kaisipan, asin kapurisawan daing halaga nanggad na sabihon pa sa pamibi. (Filipos 4:6) Kun kaiba nindo an sarong dayupot na katood, pinag-oolayan sana daw nindo an mayor na mga pangyayari sa saindong buhay? Bako daw na ihinihiras man nindo an medyo sadit na mga kapurisawan? Sa kaagid na paagi, puede nindong sueltong ipakipag-olay an ano man na kabtang kan saindong buhay ki Jehova, sa pakaaram na “sia may pagmakolog sa saindo.”—1 Pedro 5:7.
Siempre, an pakikikatood posibleng dai maglawig kun an gabos na sinasabi nindo manongod sa saindong sadiri. Kaagid kaiyan, an satong mga pamibi maninigo na bakong sadiri sana an iniintindi. Maninigo man niatong ipahayag an satong pagkamoot asin pagmakolog para ki Jehova asin sa saiyang intereses. (Mateo 6:9, 10) An pamibi bako sanang oportunidad na humagad nin tabang sa Dios kundi oportunidad man na magsabi nin pasasalamat asin pag-omaw. (Salmo 34:1; 95:2) ‘An pagkua nin kaaraman’ paagi sa regular na personal na pag-adal tatabangan kita sa bagay na ini, mantang tinatabangan kita kaiyan na mas mamidbid si Jehova asin an saiyang mga dalan. (Juan 17:3) Tibaad manompongan nindo na partikularmenteng nakatatabang an pagbasa kan librong Salmo asin risahon kun paano ipinahayag kan ibang fiel na mga lingkod an saindang sadiri ki Jehova.
An pakikikatood ki Jehova tunay nanggad na sarong mahalagang balaog. Logod ipaheling niato na inaapresyar niato iyan paagi sa paggibong mas liputok, odok sa puso, asin personal kan satong mga pamibi. Kun siring makakamtan niato an kaogmahan na ipinahayag kan salmista, na nagsabi: “Maogma an saro na saimong pinili asin pinadolok mo.”—Salmo 65:4.
[Mga retrato sa pahina 28]
Kita puedeng mamibi sa Dios sa gabos na panahon kan aldaw basta magkaigwa nin oportunidad