Mga Hapot Hale sa mga Parabasa

Kita naogma sa satong pag-adal kan parabola ni Jesus manongod sa mga karnero asin kanding. Kinokonsiderar an bagong pakasabot na iinatubang sa “An Torrengbantayan” kan Oktubre 15, 1995, masasabi pa daw niato na an Mga Saksi ni Jehova ngonyan nakikikabtang sa gibohon na pagbubulagbulag?

Iyo. Natural sana na dakol an nag-iisip manongod kaini huli ta an Mateo 25:​31, 32 nagsasabi: “Kun an Aki nin tawo dumatong na sa saiyang kamurawayan, asin an gabos na anghel kaibanan nia, dangan sia matukaw sa saiyang mamurawayon na trono. Asin an gabos na nasyon titiponon sa atubangan nia, asin pagbubulagbulagon nia an mga tawo, kun paanong ibinubulag nin pastor an mga karnero sa mga kanding.” Ipinaheling kan An Torrengbantayan kan Oktubre 15, 1995 kun taano an mga bersikulong ini ta minaaplikar pakatapos na an dakulang kahorasaan pumoon. Si Jesus madatong sa saiyang kamurawayan na kaiba kan saiyang mga anghel asin matukaw sa saiyang trono nin paghokom. Dangan pagbubulagbulagon nia an mga tawo. Sa anong sentido? Sia madesisyon basado sa kun ano an ginibo o dai ginibo nin mga tawo kan nakaagi.

Puede ta ining ikomparar sa mga nangyayari sa sarong legal na proseso na minagiya pasiring sa sarong kaso sa husgado. An ebidensia natitipon sa laog nin halawig na panahon antes na iluwas an desisyon asin sentensia kan husgado. An ebidensia sa kun baga an mga tawong nabubuhay ngonyan magigin karnero o kanding natitipon sa haloy nang panahon. Asin iyan padagos pang natitipon. Alagad kun si Jesus tumukaw na sa saiyang trono, an kaso matatapos. Sia magigin andam nang itao an paghokom. An mga tawo pagbubulagbulagon magsalang pasiring sa pagkaparang daing katapusan o buhay na daing katapusan.

Minsan siring, an bagay na an pagbubulagbulag sa mga tawo pasiring sa buhay o kagadanan na sinambit sa Mateo 25:32 sa ngapit pa dai nangangahulogan na mayo nin pagbubulagbulag, o pagbarangabanga, na nangyayari antes kaiyan. An Biblia, sa Mateo kapitulo 13, nagsasambit nin sarong pagbubulagbulag na mas naenot. Interesante, an librong Nagkakasararo sa Pagsamba sa Iyo Sanang Tunay na Dios, pahina 179-80, ipinaliliwanag ini sa irarom kan temang “Pagbubulagbulag sa mga Tawo”.a An libro nagsasabi: “Igwa man nin ibang makahulogan na mga pangyayari na lataw na iinasosyar ni Jesus sa pagtatapos kan palakaw nin mga bagay. An saro digdi iyo an pagbubulagbulag kan ‘mga aki kan kahadean’ sa ‘mga aki kan maraot.’ Si Jesus nagtaram manongod digdi sa saiyang parabola dapit sa oma nin trigo na sinabwagan nin mga doot nin sarong kaiwal.”

An libro nagtataram dapit sa ilustrasyon ni Jesus na itinao sa Mateo 13:​24-30 asin ipinaliwanag sa bersikulo 36-43. Mangnoha sa bersikulo 38 na an marahay na mga banhi kan trigo nagrerepresentar sa mga aki kan Kahadean, alagad an mga doot nagrerepresentar sa mga aki kan maraot. Ipinaheheling kan bersikulo 39 asin 40 na sa “pagtatapos kan palakaw nin mga bagay”​—sa panahon na kinabubuhayan niato ngonyan—​an mga doot tinitipon. Sinda ibinubulag asin katapustapusi sosoloon, lalaglagon.

An ilustrasyon dapit sa linahidan na mga Kristiano (na sa parabola manongod sa mga karnero asin kanding inaapod na mga tugang ni Jesus). Pero, malinaw an punto na an sarong mahalagang marhay na pagbubulagbulag nangyayari sa satong panahon, na an linahidan napapalaen sa mga naghihingakong Kristiano alagad pinatutunayan an saindang sadiri na “mga aki kan maraot.”

Si Jesus nagtao nin ibang mga halimbawa nin mga tawong binabangabanga, o binubulagbulag. Girumdomon na sia nagsabi manongod sa mahiwas na dalan na pasiring sa kalaglagan: “Dakol an mga nagraralaog dian.” (Mateo 7:13) Bako iyan na komento manongod sana sa ultimong kaaabtan. Iyan komento manongod sa nagpapadagos na pangyayari, kun paanong iyan totoo ngonyan sa diit na nakanonompong sa hayakpit na dalan pasiring sa buhay. Girumdomon man na kan isinusugo an mga apostol, sinabi ni Jesus na manonompongan ninda an nagkapira na maninigo. An iba bakong maninigo, asin papagpagon kan mga apostol an kabokabo sa saindang mga bitis “para sa pagpatotoo tumang” sa siring na mga tawo. (Lucas 9:5) Bako daw totoo na nangyayari an kaagid kaiyan mantang ginigibo kan mga Kristiano an saindang pampublikong ministeryo ngonyan? An nagkapira naghihimate nin marahay, mantang an iba sinasayumahan an mensahe nin Dios na dinadara niato.

An mga artikulo sa An Torrengbantayan manongod sa mga karnero asin kanding nagsabi: “Minsan ngani an paghokom na ilinaladawan sa parabola nasa harani nang ngapit, maski ngonyan may mahalaga nang nangyayari. Kitang mga Kristiano nakikikabtang sa nagliligtas-buhay na gibohon na pagbalangibog nin mensahe na nagpapangyari nin pagbubulagbulag sa tahaw nin mga tawo. (Mateo 10:​32-39).” Sa tekstong iyan sa Mateo kapitulo 10, mababasa niato na si Jesus nagsabi na an pagsunod sa saiya magbubunga nin pagkabaranga​—ama tumang sa aking lalaki, aking babae tumang sa ina.

Katapustapusi, pinangenotan kan linahidan nin espiritu na mga tugang ni Cristo an paghuhulit kan mensahe kan Kahadean sa bilog na kinaban. Mantang an mga tawo nakadadangog kaiyan asin nagkakaigwa nin paborable o bakong paborableng reaksion, ipinamimidbid ninda kun anong klase sindang tawo. Kitang mga tawo dai puede, asin kita dai maninigo, na magsabi, ‘An tawong ini sarong karnero; an sarong iyan kanding,’ sa sentido kan Mateo kapitulo 25. Minsan siring, an satong pagpaabot sa mga tawo kan maogmang bareta minatogot sa sainda na ipaheling kun ano an paninindogan ninda​—kun ano sinda asin kun ano an reaksion ninda sa mga tugang ni Jesus. Huli kaini, garo ebidensia na natitipon para sa sarong kaso sa husgado, an pagkabanga sa pag-oltanan kan mga nagsusuportar sa mga tugang ni Jesus asin kan mga nagsasayumang magsuportar sa sainda nagigin risa. (Malaquias 3:18) Siring kan ipinaheling kan An Torrengbantayan, sa dai na mahahaloy si Jesus matukaw sa saiyang trono asin ipapahayag an sentensia, na sa hudisyal na paagi pinagbubulagbulag an mga tawo sa pinakabiyong sentido pasiring sa buhay o sa pagkapara.

[Nota sa Ibaba]