Bareta kan mga Parabalangibog kan Kahadean

Pakatalingkas sa Impluwensia nin Demonyo

AN ESPIRITISMO haloy nang nagdodominar sa buhay kan minilyon na tawo. Alagad posible na makatalingkas! Arog kaiyan an nangyari sa dakol sa suanoy na siudad nin Efeso. Oyon sa pagkasaysay kan Biblia, “an dakol sa mga naggigibo nin mahika tiniripon an saindang mga libro asin sinolo iyan . . . Sa siring sa makapangyarihan na paagi an tataramon ni Jehova padagos na nagtalubo asin nandaog.”​—Gibo 19:​19, 20.

An Kristianong kongregasyon ngonyan nakaeeksperyensia man nin pag-oswag. Siring sa kamugtakan sa Efeso, kabale sa nagigin mga nagtutubod an mga dati naggigibo nin demonismo. An minasunod na eksperyensia hale sa Zimbabwe iiniilustrar ini.

Si Gogo (Lola) Mthupha midbid na marhay sa saiyang espiritistikong mga kapangyarihan. An mga tawo naghahale pa sa hararayong lugar siring sa Zambia, Botswana, asin Aprika del Sur tanganing magpabolong sa saiya paagi sa saiyang mga bolong nin albularyo. Si Gogo Mthupha nagtokdo man sa iba kun paano magin n’anga, o parabawi. Asin kun minsan sia nan-eengkanto!

Sarong Domingong aga si Gogo Mthupha dinalaw kan mga Saksi ni Jehova na nagmiministeryo sa harong-harong. Nagustohan niang marhay an pakikipag-olay nia sa sainda manongod sa panuga kan Biblia dapit sa sarong bagong kinaban na may katanosan, sarong kinaban na mayo kan gabos na maraot na impluwensia. Inako nia an librong Puwede Kamong Mabuhay Sagkod Lamang sa Paraiso Digdi sa Dagaa asin nag-oyon na magkaigwa nin pag-adal sa Biblia sa harong. Pakatapos sana nin tolong pag-adal, sia nagpoon nang umatender sa mga pagtiripon.

Paagi sa saiyang pag-adal sa Biblia, nanodan ni Gogo Mthupha na an saiyang espesyal na mga kapangyarihan hale sa maraot na espiritung mga linalang na nagrebelde tumang sa soberaniya ni Jehova. (2 Pedro 2:4; Judas 6) Nanodan man nia na an mga demonyong ini determinadong gibohon an gabos na mahihimo ninda na magin tumang ki Jehova asin tumang sa dalisay na pagsamba. Mantang an saiyang pagbuhay nakadepende sa pag-arang sa maraot na espiritung mga linalang na ini, ano an saiyang gigibohon?

Ipinahayag ni Gogo Mthupha an pagmawot na haleon an gabos niang anting-anting asin espiritistikong garamiton. Kabale digdi an saiyang espesyal na pantakop sa payo asin “nagtataram na mga sungay nin toro,” na ginagamit nia sa saiyang sa n’anga na mga pagbolong. Gusto ni Gogo Mthupha na haleon an gabos na siring na bagay tanganing makapaglingkod sia sa iyo sanang tunay asin nabubuhay na Dios, si Jehova.

Minsan siring, an nagkapira sa saiyang mga paryente nagkontra huli ta sustentado nia sinda sa pinansial. Nakimaherak sinda sa saiya na itao sa sainda an mga kagamitan, kabale na an saiyang misteryosong mga kapangyarihan, tanganing sinda padagos na magganansia. Si Gogo Mthupha nagsayuma.

Sa tabang kan lokal na kongregasyon kan Mga Saksi ni Jehova, nakatipon sia nin tolong bag nin espiritistikong mga kagamitan asin sinolo iyan gabos. Mantang tinutumtom kan kalayo an saiyang mga instrumento sa pagsamba sa demonyo, si Gogo Mthupha nagkagsing: “Uya! An sungay na iyan, dai nia kayang iligtas an saiyang sadiri.”

Pag-abot nin panahon, si Gogo Mthupha magayagayang sinimbolisaran an saiyang pagdusay ki Jehova paagi sa bautismo sa tubig. Ano an saiyang hanap-buhay ngonyan? Pagtinda nin mga gulay. Iyo, paagi sa kapangyarihan kan Tataramon nin Dios, an saro puedeng makatalingkas sa pagsamba sa demonyo. An sabi ni Gogo Mthupha: “Nungka akong nakamate na talingkas na marhay.”

[Nota sa Ibaba]