Sarong Buhay na Nungka Kong Pinagbasolan

ISINAYSAY NI PAUL OBRIST

Kan 1912, kan ako sais anyos, nagadan si Nanay mantang ipinapangaki an ikalima niang aki. Pagkaagi nin mga duwang taon, an sarong hoben na katabang sa harong, si Berta Weibel, nagpoon na atamanon an samong pamilya. Kan agomon sia ni Tatay kan sumunod na taon, kaming mga aki naogma na magkaigwa giraray nin ina.

NAG-IISTAR kami kaidto sa Brugg, sarong sadit na banwaan sa kabtang kan Switzerland na an tataramon Aleman. Si Berta sarong tunay na Kristiana, asin nagugustohan ko siang marhay. Nagpoon siang mag-adal sa mga publikasyon kan Mga Estudyante sa Biblia (Mga Saksi ni Jehova) kan 1908, asin ihinihiras nia sa iba an saiyang nanodan.

Kan 1915, dai nahaloy pagkakasal ni Berta asin ni Tatay, nag-iba ako ki Berta sa sarong pasine kan “Photo-Drama of Creation.” An slides asin pelikulang ini kan Internasyonal na Asosasyon kan Maigot na mga Estudyante sa Biblia nakaimpluwensia nin hararom sa sakong isip asin puso. An iba naimpluwensiahan man. An tiriponan sa Brugg pano-panong marhay kaya isinirra kan pulis an mga pinto asin sinayumahan na makalaog an iba pang nag-aarabot. Dakol an nagprobar na makalaog sa sarong bukas na bintana paagi sa hagyan, asin may nagkapirang nagin mapanggana.

An Marahay na Halimbawa ni Nanay

An Guerra Mundial I nagpapasakit kaidto sa Europa, asin an mga tawo natatakot manongod sa ngapit. Sa siring, an pagsongko sa harong-harong na dara an nakararangang mensahe kan Kahadean nin Dios, siring sa ginibo ni Nanay, sarong nobleng gibohon. Kun minsan tinotogotan nia akong umiba sa saiya, asin naogma akong marhay digdi. Kan 1918, sa katapustapusi nahimo ni Nanay na simbolisaran an saiyang pagdusay ki Jehova Dios paagi sa bautismo sa tubig.

Si Tatay dai nakilabot sa pagsamba ni Nanay sagkod na sia nabautismohan, alagad pakatapos kaiyan nagpoon siang kumontra sa saiya. Sarong aldaw inagaw nia an saiyang literatura sa Biblia asin iinapon iyan sa kalan. An Biblia sana an naagaw ni Nanay sa kalayo. Alagad an sunod niang ginibo makangangalas. Dinolok nia si Tatay asin kinugos sia. Dai sia naghinanakit sa saiya.

Biyong nasorpresa, si Tatay nagkalma. Minsan siring, sa panapanahon, an saiyang pagkontra biglang minalaad, asin kinaipuhan niamong tagalan an saiyang grabeng kaanggotan.

Trabaho Asin Espirituwal na Pag-oswag

Kan 1924, pakatapos na makompleto an tolong taon na pagkua nin eksperyensia sa trabaho bilang painador, naghale ako sa harong asin nakakua nin trabaho sa kabtang kan Switzerland na an tataramon Pranses. Ini nagtao nin oportunidad sa sako na paoswagon an sakong kaaraman sa lenguaheng Pranses. Minsan ngani an pagbalyo medyo nakapogol sa sakuyang espirituwal na pag-oswag, dai noarin man nawara an sakong pagkamoot sa katotoohan sa Biblia. Kaya kan ako magpuli pakalihis nin anom na taon, nagpoon akong mag-atender sa mga pagtiripon kan Kristianong kongregasyon sa Brugg.

Dai nahaloy nagbalyo ako sa Rheinfelden, sarong sadit na banwaan na mga 40 kilometros an rayo. Nagtrabaho ako duman sa parlor sa buhok kan sakong tugang na babae asin ipinadagos ko an sakong espirituwal na pag-oswag paagi sa pakipagtipon sa sarong sadit na grupo nin mga Estudyante sa Biblia. Sarong aldaw kan patapos na an samong pag-adal sa Biblia sa kabangaan kan semana, si Tugang na Soder, an nangengenot na magurang sa kongregasyon, naghapot: “Siisay an nagpaplanong makikabtang sa ministeryo sa langtad sa Domingo?” Nagboluntaryo ako, na naghohona na may saro akong iibanan asin matokdo sa sako kun ano an gigibohon.

Kan dumatong an Domingo asin umabot kami sa samong teritoryo, si Tugang na Soder nagsabi, “Si Mister Obrist magibo duman.” Minsan ngani an pagpitik kan puso ko ruminikas na nungka pang nangyari kaidto, pinonan kong songkoon an mga tawo sa saindang harong asin makipag-olay sa sainda manongod sa Kahadean nin Dios. (Gibo 20:20) Poon kan panahon na iyan, dai na ako noarin man nag-urong-sulong sa paghuhulit na sinabi ni Jesus na kaipuhan na mahaman bago umabot an katapusan kan palakaw na ini nin mga bagay. (Mateo 24:14) Kan Marso 4, 1934, kan ako 28 anyos, sinimbolisaran ko an sakong pagdusay ki Jehova Dios paagi sa bautismo sa tubig.

Pakalihis nin duwang taon nakanompong ako nin trabaho bilang painador sa Lugano, sarong siudad sa kabtang kan Switzerland na an tataramon Italiano. Tolos-tolos kong pinonan an paghuhulit kan maogmang bareta duman, minsan ngani dikiton an aram ko sa pagtaram nin Italiano. Pero, durante kan sakong enot na Domingo sa ministeryo, ikinapasakamot ko an 20 pulyeto na dinara ko. Pag-abot nin panahon, nahimo ko na tiponon an nagkapirang interesadong tawo na nakabilog nin sarong grupo tanganing pag-adalan An Torrengbantayan. Katapustapusi an nagkapira kaini nabautismohan, asin kan Pebrero 1937 nabilog niamo an sarong kongregasyon kan Mga Saksi ni Jehova sa Lugano.

Pakalihis nin duwang bulan, kan Abril 1937, nakaresibi ako nin sarong surat na luminiwat sa sakong buhay sa dramatikong paagi. Idto imbitasyon na maglingkod sa Bethel, an apod sa sangang pasilidad kan Mga Saksi ni Jehova sa sarong nasyon. Tolos-tolos kong inako an imbitasyon​—sarong desisyon na nungka kong pinagbasolan. Sa siring pinonan ko an nagin 60 taon na karera sa bilog na panahon na ministeryo.

Paglilingkod sa Bethel sa Maribok na mga Panahon

Kan panahon na idto an Suecong Bethel yaon sa siudad nin Bern, an kabisera kan Switzerland. Duman kami nag-imprenta nin mga libro, pulyeto, asin magasin sa 14 lenguahe, asin an mga ini ipinapaktora sa bilog na Europa. Kun beses, dinadara ko an inimprentang literatura sa istasyon nin tren karga nin karomatilya, mantang kan mga aldaw na idto may panahon na mayo kaming nagagamit na van. An Departamento sa Komposisyon iyo an primero kong asignasyon sa Bethel, kun saen inaareglar niamo an mga letra na timga na gagamiton sa pag-imprenta. Dai nahaloy nagpoon akong magtrabaho bilang resepsionista, asin, siempre, naglingkod man ako bilang barbero kan pamilyang Bethel.

Kan Setyembre 1939, puminutok an Guerra Mundial II, asin an pagsalakay kan Nazi nagpalakop nin grabeng takot sa bilog na Europa. An Switzerland sarong neutral na nasyon sa tahaw kan nagraralaban na nasyon. Kan primero, ikinapadagos niamo an samong Kristianong aktibidad na mayo nin olang. Dangan, kan Hulyo 5, 1940, alas dos nin hapon, mantang ako yaon sa sakong lamesa sa sala sa paglaog, an sarong sibilyan naglaog, kaiba an sarong soldados na may riple na natatakodan nin bayoneta.

“Yaon saen si Zürcher?” an kurahaw kan sibilyan. Si Franz Zürcher kan panahon na idto iyo an paraataman sa sanga sa samong paghuhulit sa Switzerland.

“Siisay tabi an sasabihon kong naghahanap?” an hapot ko. Tolos-tolos ninda akong kinaptan asin ginuyod ako pasakat sa hagyan, na hinahagad na darahon ko sinda sa opisina ni Zürcher.

An bilog na pamilyang Bethel​—mga 40 kami kaidto—​pinagbotan na magtiripon sa komedor. Apat na masinggan an nakaposisyon sa luwas kan edipisyo tanganing desganaron an siisay man sa pagprobar na dumulag. Sa laog, mga 50 soldados an nagpoon na rekisahon an edipisyo. Al kontraryo sa mga linalaoman, mayong nakuang ebidensia na an Mga Saksi ni Jehova kalabot sa pagpapalakop nin pagsayuma sa serbisyo militar. Pero, kadakol na literatura an kinumpiskar asin hinakot sa limang trak nin militar.

Kan kami magsayuma na sensurahon kan mga autoridad sa gobyerno An Torrengbantayan, napondo an pagpublikar kaiyan sa Switzerland. Ini nangahulogan na dikit na sanang tawohan an kaipuhan para sa gibohon sa Bethel, asin an mas hoben na mga miembro kan pamilya pinarigon an boot na humale asin magpayunir, an apod sa mga Saksi ni Jehova na nasa pambilog na panahon na paghuhulit.

Pagpapayunir sa Panahon nin Guerra

Kan Hulyo 1940, nagpuli ako sa lugar sa Switzerland na an tataramon Italiano na harani sa Lugano, kun saen ako nag-istar bago naglaog sa Bethel. An teritoryong ini na sirradong Katoliko, na kan panahon na idto impluwensiado man na marhay kan Fascismo, nagin teritoryo ko sa pagpapayunir.

Haros mayong aldaw na dai ako pinapondo nin pulis na pinipirit akong umontok sa paghuhulit. Sarong aldaw mantang nakikipag-olay ako sa sarong babae sa may trangka nin hardin, tinakma ako hale sa likod nin sarong lalaki na nakasibilyan na gubing, dinara ako sa sarong pampatrolyang kotse, asin isinakay ako pasiring sa Lugano. Duman itinao nia ako sa pulis. Kan ako hapoton, ipinaliwanag ko na pinagbotan kami ni Jehova Dios na maghulit.

“Digdi sa daga, kami an nagboboot,” an pangahas na simbag kan opisyal. “An Dios puedeng magboot sa langit!”

Durante kan guerra, nangorognang nagin mahalagang marhay na himateon niamo an hatol ni Jesus na magin “maingat siring sa mga halas pero inosente siring sa mga salampati.” (Mateo 10:16) Sa siring, itinago ko an kadaklan kan sakong mga literatura sa mga bulsa sa laog kan sakong kamisa-dentro. Asin tanganing masierto na dai mawara an dawa arin, nagsulot ako nin haluag na media-pantalon na kipot sa ibaba kan tuhod.

Pag-abot nin panahon, nakaresibi ako nin mga instruksion na magbalyo sa kababan nin Engadine, kun saen nagpadagos an pagdulagdulag ko sa mga pulis. Ini sarong magayon na kababan sa sirangan na Swiss Alps, na kun panahon nin tiglipot natatahoban nin mahibog na niebe, kaya ipinadara ko an sakong mga ski tanganing makaluwas ako sa sakong teritoryo.

An maimbong na guantis mahalagang marhay kun nagbibiahe paagi sa mga ski durante nin tiglipot. Huli ta parateng ginagamit, an mga guantis ko madaling naluma. Kanigoan nanggad an sakong pasasalamat sarong aldaw na makaresibi nin dai linalaoman na paktora paagi sa koreo na may laog na sarong niniting na sueter saka maimbong na mga guantis! Ginibo iyan para sa sako kan sarong Kristianang tugang sa dati kong kongregasyon sa Bern. Dawa ngonyan kun narurumdoman ko iyan, napapahiro ako na magpasalamat.

Dakol na Magayagayang Pribilehio

Kan 1943, an mga kamugtakan sa Switzerland nagpoon na maestabilisar, asin inapod giraray ako na maglingkod sa Bethel. Huli sa nagkapirang problema sa Pranses na kongregasyon sa Lausanne, na mga 100 kilometros an rayo, ako iinasignar na dalawon nin regular an siudad na iyan tanganing tabangan an mga parahayag na magkaigwa nin tamang punto de vista manongod sa organisasyon nin Dios.

Kan huri naglingkod ako nin kadikit na panahon bilang paraataman sa sirkito sa gabos na kongregasyon na Pranses sa Switzerland. Sa pagpopoon kan semana, nagtatrabaho ako sa Bethel, alagad ginagamit ko an Biernes, Sabado, asin Domingo sa pagdalaw sa manlaenlaen na kongregasyon kada semana sa paghihingoa na makatabang sa espirituwal. Dugang pa, kan mabilog an sarong Pranses na kongregasyon sa Bern kan 1960, ako an nagin nangengenot na paraataman kaiyan. Naglingkod ako sa kapasidad na ini sagkod 1970, kan ibalyo an Bethel hale sa Bern pasiring sa presenteng magayon na kinamumugtakan kaiyan sa banwaan nin Thun.

Naogma ako na manompongan an sarong sadit na grupo nin mga Saksi na Italiano an tataramon sa Thun, asin nagpoon akong makiiba sa sainda sa gibohon. Pag-abot nin panahon nabilog an sarong kongregasyon, asin naglingkod ako bilang nangengenot na paraataman kaiyan sa nagkapirang taon sagkod na makualipikar an mas hoben na mga tugang na lalaki na isaabaga an paninimbagan na iyan.

An ibinilang ko na espesyalmenteng magayagayang pribilehio iyo an pag-atender sa internasyonal na mga kombension kan banwaan ni Jehova. Halimbawa, kan 1950 nagkaigwa kan memorableng Pag-oswag kan Teokrasya na Asamblea sa Yankee Stadium, Nueva York. An pagdalaw sa pankinaban na opisina prinsipal kan Mga Saksi ni Jehova sa Brooklyn, Nueva York, nagkaigwa nin nagdadanay na impluwensia sa sako. Nungka ko man na malilingawan an pahayag ni Tugang na Milton G. Henschel kan suminunod na taon sa Malinig na Pagsamba na Asamblea sa Londres, Inglaterra, na nagtampok kan mga tataramon ni Jesus, “Sinasabi ko sa saindo, Kun an mga ini dai maggirong, an mga gapo makururahaw.” (Lucas 19:40) Naghapot si Tugang na Henschel, “Sa paghona daw nindo kaipuhan na magkururahaw an mga gapo?” Nadadangog pa kan sakong mga talinga an makosog na “Dai!” na hale sa manampulong ribong tingog.

Kan maglaog ako sa Bethel kaidtong 1937, an sakong ama, na nakaaram na nakareresibi sana kami nin kadikit na paragastos, may paghadit na naghapot, “Aki ko, paano ka mabubuhay sa paggurang mo?” Nagsimbag ako paagi sa pagkotar kan mga tataramon kan salmistang si David: “Dai ako noarin man nakaheling nin siisay man na matanos na lubos na pinabayaan, ni an saiyang mga aki na nakikilimos nin tinapay.” (Salmo 37:25) An mga tataramon na ini tunay nanggad na naotob sa kaso ko.

Kanigoan an sakong kaogmahan na kaidtong labing 80 taon na an nakaagi, nagpaagom si Berta Weibel ki Tatay asin na paagi sa saiyang halimbawa asin paggiya namidbid ko si Jehova patin an saiyang mga kualidad! Minsan ngani an ibang miembro kan pamilya tinuya sia, sia fiel na naglingkod ki Jehova sagkod sa panahon kan saiyang kagadanan kan 1983. Nungka siang nagpahayag nin pagbasol na napaglingkodan nia an saiyang Dios, si Jehova; ni nagbasol man ako na nagdadanay akong daing agom asin idinudusay an sakong buhay nin lubos sa paglilingkod ki Jehova.

[Retrato sa pahina 25]

Nagtatrabaho sa Bethel