Kun Paano Patotoodon an Saindong Konsensia

“AN MALINIG na konsensia iyo an pinakamarahay na ulunan.” An daan na kasabihan na ini nagtatampok nin sarong mahalagang katunayan: Kun hinihimate ta an satong konsensia, kita igwa nin panlaog na katoninongan asin armoniya.

Minsan siring, bakong gabos gustong gibohon iyan. Si Adolf Hitler nagpahayag na sia may misyon na patalingkason an tawo sa nakararaot na imbento kan isip, o ilusyon, na inaapod na konsensia. An saiyang pamamahala na nagbunga nin grabeng takot nagtatao nin nakapangigirabong patanaw sa kun magigin gurano karingis an mga tawo kun isisikwal ninda an saindang konsensia. Pero, pareho man kadaing herak an dakol sa madahas na kriminal ngonyan​—an mga nanlulugos asin nangagadan na dai nagbabasol. An nagdadakol na kabilangan kan mga kaggibo nin maraot na ini akion pa. Sa siring an sarong libro na nag-eestudyar sa pangyayaring ini igwa kan subtitulong Children Without a Conscience.

Minsan ngani an kadaklan na tawo nungkang mag-iisip na magkomitir nin madahas na krimen, dakol an dai man lamang nakokonsensia manongod sa paggibo nin seksuwal na inmoralidad, pagputik, o pandadaya. Nagrururo an moral sa bilog na globo. Nasasambitan an dakulang apostasiya sa tunay na pagsamba, si apostol Pablo nagsurat na an nagkapirang Kristiano mapaimpluwensia sa kinaban asin sa siring nagigin “tinatakan sa saindang konsensia na garo nin batbat na pantatak.” (1 Timoteo 4:2) An peligro nin karatan mas dakula ngani ngonyan na “huring mga aldaw” na ini. (2 Timoteo 3:1) An mga Kristiano kun siring dapat na magmaigot na marhay na protehiran an saindang konsensia. Magigibo ta ini paagi sa pagpatood asin pagpatalubo kaiyan.

An Isip, an Puso, Asin an Saindong Konsensia

Si apostol Pablo nagsabi: “Nagtataram ako kan katotoohan dian ki Cristo; dai ako nagpuputik, mantang an sakong konsensia nagpatotoo sa sako sa banal na espiritu.” (Roma 9:1) Kun siring an konsensia puedeng magin parapatotoo. Puedeng siyasaton kaiyan an sarong paggawe asin magsalang oyonan o kondenaron iyan. An kadaklan kan satong pakaaram sa tama asin sala ibinugtak sa sato kan satong Kaglalang. Pero, an satong konsensia puedeng moldehon asin patoodon. Paano? Paagi sa satong pagkua nin tamang kaaraman sa Tataramon nin Dios. “Maliwat kamo paagi sa pagbago kan saindong pag-isip, tanganing mapatunayan nindo sa saindong sadiri kun ano an marahay asin inaako patin sangkap na kabotan nin Dios,” an sabi ni apostol Pablo. (Roma 12:2) Mantang itinatanom nindo sa saindong isip an mga kaisipan asin kabotan nin Dios, an saindong konsensia minapoon na magpunsionar sa mas diosnon na paagi.

Minilyon sa bilog na kinaban an natabangan kan Mga Saksi ni Jehova na ‘kumua nin kaaraman dapit ki Jehova Dios asin ki Jesu-Cristo.’ (Juan 17:3) Paagi sa saindang areglo nin daing bayad na pag-adal sa Biblia sa harong, tinotokdoan ninda an mga sadiosan an puso kan mga pamantayan ni Jehova Dios dapit sa sekso, mga inomon na de alkohol, pag-agom, mga transaksion sa negosyo, asin dakol na iba pang tema.a (Talinhaga 11:1; Marcos 10:​6-​12; 1 Corinto 6:​9, 10; Efeso 5:​28-​33) An pagkua kan “tamang kaaraman” na ini sarong mahalagang tangga sa pagpatalubo nin diosnon na konsensia. (Filipos 1:9) Siempre, dawa pakatapos na an sarong Kristiano magkamit nin maygurang na pakasabot sa Biblia, dapat niang padagos na pakakanon nin regular an saiyang isip sa Tataramon nin Dios tanganing magdanay na nasa marahay na kondisyon an saiyang konsensia.​—Salmo 1:​1-3.

Ikinokonektar man kan Biblia an konsensia sa piguratibong puso, na kalabot an satong mga pagmate asin emosyon. (Roma 2:15) An isip asin puso dapat na magkaoyon tanganing makapunsionar nin tama an konsensia. Iyan nangangahulogan nin labi pa sa pagbugtak sana nin impormasyon sa saindong isip. Dapat man nindong moldehon an saindong puso​—an saindong panlaog na mga pagmate, pagmawot, asin paghimuyawot. Sa siring an librong Talinhaga naggagamit kan mga tataramon na arog baga kan ‘ikiling mo an saimong puso,’ “bugtakan an saimong puso,” asin “giyahe an saimong puso.” (Talinhaga 2:2; 23:19; 27:23) An sarong paagi na magibo iyan iyo an paghorophorop asin pagpensar sa Kasuratan. “Hohorophoropon ko nanggad an gabos mong gibo, asin tatawan ko nin atension an saimong mga ginibo,” an sabi kan Salmo 77:12. An paghorophorop nakatatabang sa sato na mataros an satong kairairaroming mga pagmate asin motibo.

Ipamugtak, halimbawa, na igwa kamo nin marigsok na bisyo na arog baga nin pagkaadikto sa tabako. Arog nin kadaklan na tawo, siertong aram nindong marhay an mga peligro kaiyan sa salud. Pero, apisar kan mga pagsadol nin mga katood asin pamilya, nadedepisilan kamong pumondo. Paano mapakokosog kan paghorophorop sa mensahe kan Biblia an saindong konsensia sa bagay na ini?

Bilang halimbawa, probaring horophoropon an mga tataramon ni apostol Pablo na yaon sa 2 Corinto 7:1: “Kun siring, mantang igwa kita kan mga panugang ini, mga namomotan, magpakalinig kita sa lambang ramog nin laman asin espiritu, na sinasangkap an kabanalan sa pagkatakot sa Dios.” Saboton nindo an mga tataramon na ini. Ihapot sa saindong sadiri, ‘Ano man nanggad an “mga panugang ini” na sinambit ni Pablo?’ Paagi sa pagbasa kan konteksto, maririsa nindo na an naenot na mga bersikulo nagsasabi: “‘“Humale kamo sa tanga ninda, asin sumiblag kamo,” an sabi ni Jehova, “asin dai na kamo dumotdot sa maating bagay”’; ‘“asin aakoon ko kamo.”’ ‘“Asin ako manini saindong ama, asin kamo manini sakong mga aking lalaki asin aking babae,” sabi ni Jehova na Makakamhan sa gabos.’”​—2 Corinto 6:​17, 18.

An pagboot ni Pablo na ‘magpakalinig kita sa ramog’ nadugangan an puersa ngonyan! Bilang mapuersang pan-enganyar na gibohon iyan, an Dios nanunugang ‘akoon kita,’ an boot sabihon, ibugtak kita sa irarom kan saiyang mapagprotehir na pag-ataman. ‘Magkakaigwa daw ako nin dayupot na relasyon sa saiya​—arog sa relasyon nin aking lalaki o babae sa sarong ama?’ an tibaad ihapot nindo sa saindong sadiri. Bako daw na nakaaakit na marhay an ideya na ‘akoon’ o kamotan nin madonong, mamomoton na Dios? Kun an ideyang iyan garo baga daing kahulogan para sa saindo, masdan nindo kun paano an mamomoton na mga ama nagpapahayag nin pagkamoot asin kapadangatan sa saindang mga aki. Ngonyan isip-isipa an bogkos na iyan sa pag-oltanan nindo ni Jehova! Mientras na orog na pinaghohorophorop nindo iyan, orog man na nagtatalubo an pagmawot sa siring na relasyon.

Alagad mangnohon: An kadayupotan sa Dios posible sana kun “dai na kamo dumotdot sa maating bagay.” Ihapot sa saindong sadiri: ‘Bako daw na an pagkaadikto sa tabako kabale sa “maating mga bagay” na kinokondenar nin Dios? An paggamit daw kaiyan “ramog nin laman,” na ginigibo an sakong sadiri na madaling tamaan nin gabos na klase nin peligro sa salud? Mantang si Jehova malinig, o “banal,” na Dios, ooyonan daw nia an tuyong pagramog ko kan sakong sadiri sa paaging ini?’ (1 Pedro 1:​15, 16) Mangnoha na si Pablo nagpapatanid man tumang sa ‘ramog nin espiritu,’ o inklinasyon nin isip. Ihapot sa saindong sadiri: ‘Nangingibabaw daw sa sakong pag-iisip an pagkaadiktong ini? Gigibohon ko daw an gabos na medyos tanganing mapanigoan an sakong paghimuyawot, na tibaad isinasapeligro an sakong salud, an sakong pamilya, o pati an sakong kamugtakan sa atubangan nin Dios? Sagkod saen ko tinogotan an sakong pagkaadikto sa tabako na danyaran an sakong buhay?’ An pag-atubang sa makolog sa boot na mga hapot na ini tibaad magtao nanggad sa saindo kan kapusoan na pumondo!

Siempre, tibaad kaipuhan nindo an tabang asin pagsuportar kan iba tanganing madaog an pagtabako. Pero, dakula an magigibo kan paghorophorop sa Biblia na patoodon asin pakosogon an saindong konsensia tanganing makahale kamo sa pagkaadikto.

Kun Kita Nasasala

Apisar kan satong pinakamarahay na mga paghihingoa na gibohon an tama, kun beses nadadaog kita kan satong mga pagkabakong sangkap asin nagkakasala kita. Dangan pupurisawon kita kan satong konsensia, alagad nakatetentar na hingoahon na ignorohon iyan. O tibaad manluyang marhay an satong boot kaya gusto na niatong ipondo an gabos na paghihingoa na maglingkod sa Dios. Minsan siring, girumdoma an nangyari ki Hadeng David. Pakakomitir nia nin pagsambay ki Bat-seba, kinolgan sia kan saiyang konsensia. Ilinaladawan nia an pasakit na namatean nia: “Aldaw asin banggi an saimong kamot magabat sa sako. An kalabasan kan sakuyang buhay naribayan na siring sa alang na init nin tig-init.” (Salmo 32:4) Makologon? Iyo nanggad! Pero an diosnon na kamondoan na ini nagpahiro ki David na magsolsol asin makipag-uli sa Dios. (Ikomparar an 2 Corinto 7:10.) An may kakologan na pakimaherak ni David na logod patawadon sia nagtatao nin igong ebidensia kan saiyang sinserong pagsolsol. Huling naghimate sia sa saiyang konsensia, si David tinabangan na magbakle asin sa kahurihurihi nakabalik an saiyang kagayagayahan.​—Salmo 51.

Puede man iyan na mangyari ngonyan. May nagkapirang nag-adal kan Biblia kaiba kan Mga Saksi ni Jehova kan nakaaging mga panahon alagad nagpondo kan maaraman ninda na an saindang buhay bakong kaoyon kan halangkaw na mga pamantayan nin Dios. Posibleng nakikisaro sinda sa bakong kasekso na bakong kasal o oripon sinda nin marigsok na mga bisyo. Kinolgan sinda kan saindang konsensia!

Kun kamo nasa siring na situwasyon, horophoropa an mga tataramon ni apostol Pedro kan aldaw nin Pentecostes. Kan ibuyagyag nia an mga kasalan kan saiyang mga kahimanwang Judio, “sinda nagkarulugad sa puso.” Imbes na sumuko, kinuyog ninda an hatol ni Pedro na magsolsol, asin nakamtan ninda an pabor nin Dios. (Gibo 2:​37-41) Magigibo man nindo iyan! Imbes na talikdan an katotoohan huli ta kinokolgan kamo kan saindong konsensia, pahiroon logod kamo kan saindong konsensia na ‘magsolsol asin magbakle.’ (Gibo 3:19) Paagi sa determinasyon asin paghihingoa, magigibo nindo an mga pagbabago na kaipuhan tanganing makamtan an pabor nin Dios.

‘Papagdanayon an Marahay na Konsensia’

Baga man kamo nagpopoon pa sanang mag-adal kan mga dalan ni Jehova o dakol nang taon an eksperyensia bilang sarong maygurang na Kristiano, angay an konseho ni Pedro: “Papagdanayon nindo an marahay na konsensia.” (1 Pedro 3:16) Iyan sarong bentaha, bakong pagabat. Patoodon iyan paagi sa pagpakakan kan saindong isip asin puso nin kadonongan na nasa Tataramon nin Dios, an Biblia. Himateon an saindong konsensia kun kamo pinatatanidan kaiyan. Kamtan an panlaog na katoninongan nin isip na ikatatao kan pagkuyog sa konsensia nin saro.

Totoo, an pagpatood asin pagmolde kan saindong konsensia bakong pasil. Minsan siring, makapamimibi kamo ki Jehova Dios na tabangan kamo. Paagi sa saiyang tabang, makapaglilingkod kamo sa Dios “gikan sa marahay na konsensia patin gikan sa pagtubod na mayo nin pagsaginsagin.”​—1 Timoteo 1:5.

[Nota sa ibaba]

[Retrato sa pahina 6]

An pagbasa asin paghorophorop sa Tataramon nin Dios tinatabangan kitang patoodon an satong konsensiar