Pakaligtas—Sa Sarong Panahon nin mga Kalamidad
AN LIMANG eskalon na basar sa Seoul, Korea, biglang natumpag, na ginatos na tawo an nalaom salaog! An mga parasalbar aldaw-bangging nagtrabaho tanganing iligtas an pinakadakol na buhay na mahihimo. Mantang nag-aagi an mga aldaw, an posibilidad na may makua pang mga natadang buhay na nalobong sa garo-bukid na tambak nin paril asin asero nagpoon na lumuya.
Kaidtong nawawara na an gabos na paglaom, may nakasosorpresang nangyari. Sarong maluya, risang nagdudusang kagrat an nadangog hale sa irarom kan kagabaan. An mga parasalbar natatarantang nagkalot paagi sa saindang kamot tanganing ikaluwas an sarong 19 anyos na babae na 16 na aldaw nang nakalobong na buhay. An natumpag na agihan kan elebeytor nagin nagpoprotehir na espasyo sa ibabaw nia asin linipodan sia sa tonetoneladang nahoholog na mga paril. Minsan ngani grabe na an pagkamara kan hawak asin rulugad, nakaligtas sia sa kagadanan!
Ngonyan na mga aldaw, haros daing bulan na minaagi na mayo nin mga bareta nin kalamidad, baga man iyan linog, makosog na bagyo, pagtuga nin bulkan, aksidente, o gutom. Asin an pambihirang mga estorya nin pagsalbar asin pakaligtas nakaiintriga asin nakaaakit sa minilyon na nagsusubaybay sa mga bareta. Minsan siring, an patanid dapit sa sarong nagdadangadang na kalamidad—saro na mas dakula kisa sa arin pa man sa kasaysayan nin tawo—sa pankagabsan dai iniintindi. (Mateo 24:21) Ilinaladawan kan Biblia an nagdadangadang na pangyayaring ini sa mga tataramon na ini: “Uya! May maluwas na kalamidad sa surunodsunod na nasyon, asin malataw an sarong dakulang bagyo hale sa kaporoporohi kan daga. Asin an pangagaradanon ni Jehova sa aldaw na iyan paghale sa sarong poro kan daga sagkod sa ibong na poro kan daga. Dai sinda tatangisan, ni sasarayon o ilolobong man sinda. Magigin sindang garo odo sa ibabaw kan daga.”—Jeremias 25:32, 33.
Nakakukubhan na mga tataramon! Alagad bakong arog nin natural na mga kalamidad asin aksidente, an kalamidad na ini bakong paggadan na daing pinipili. Sa katunayan, posible an pakaligtas—an pakaligtas nindo!
Sarong Panahon na Apurado
Tanganing lubos na masabotan an bagay na ini, dapat ngunang masabotan nin saro kun taano ta mangyayari an pambilog na globong kalamidad na ini. An totoo, iyan an solamenteng tunay na solusyon sa mga problema nin katawohan. Dikit na tawo ngonyan an nakamamateng ligtas asin tiwasay. Sa ibong kan pinakamarahay na mga paghihingoa nin siensia, an nakaoolakit na mga helang padagos na nandadanyar sa populasyon kan daga. An mga guerra na bunga nin pagkakalaen nin relihion, tribo, asin politika rinibong tawo an ginagadan. An makuring kakulangan nin kakanon nagpapagrabe sa kasakitan asin pagdusa nin inosenteng mga lalaki, babae, asin aki. An pagkalapa nin moral luway-luway na rinaraot an mismong pundasyon nin sosyedad; pati mga aki rinaraot.
May pambihirang pagkaeksakto, an sarong hula sa Biblia na isinurat labing 1,900 na taon na an nakaagi ilinaladawan an satong situwasyon. Iyan nagsasabi: “Dapat mong maaraman na sa huring mga aldaw an mga panahon magigin pano nin peligro.”—2 Timoteo 3:1, The New Testament in Modern English, ni J. B. Phillips; ikomparar an Mateo 24:3-22.
Garo daw makatanosan para sa saindo na an sarong mamomoton na Dios magin indiperente sa mamondong kamugtakan niato? An Biblia nagsasabi: “Sia na totoong Dios, an Naghaman kan daga asin an Naggibo kaiyan, . . . dai iyan linalang na dai nin kapakanan, [sia] naghaman kaiyan tanganing pag-istaran.” (Isaias 45:18) Iyo, imbes na pabayaan na an magayon na planetang ini raoton asin mapoho an gabos na nag-eerok dian, an Dios makikiaram. An hapot, Paano nia iyan gigibohon?
Pilion an Buhay!
An Biblia minasimbag sa Salmo 92:7: “Kun an mga maraot nagtutubo na garo doot asin an gabos na paragibo nin karatan nangagbuburak, iyan tanganing sinda paraon sagkod lamang.” An solusyon nin Dios sa mga problema sa daga iyo an pagpara sa karatan mismo. Nakaoogma, ini dai nangangahulogan na an gabos na tawo kaipuhan na paraon. Sinisierto sa sato kan Salmo 37:34: “Maglaom ki Jehova asin otobon an saiyang dalan, asin ika ilalangkaw nia na makasadiri sa daga. Kun pohoon na an mga maraot, maheheling mo iyan.”
An mga tataramon na ini nagpaparisa na may posibilidad na makaligtas sa pinakadakulang kalamidad na mangyayari noarin pa man sa katawohan. Tinawan kita nin Dios nin mapipilian. An mga tataramon na isinadol ni Moises sa mga Israelita mantang sinda nag-aandam na lumaog sa Dagang Panuga aplikado man sa sato ngonyan: “Ibinugtak ko an buhay asin kagadanan sa atubangan mo, an bendisyon asin an maldisyon; asin kaipuhan na pilion mo an buhay tanganing makapagpadagos kang mabuhay, ika asin an saimong aki.” (Deuteronomio 30:19) Alagad paano talaga an saro ‘makapipili nin buhay’ asin makaliligtas? Ano talaga an kahulogan kan tunay na kaligtasan?
[Pasasalamat para sa pinagkuanan kan retrato sa pahina 2]
COVER: Explosion: Copyright © Gene Blevins/Los Angeles Daily News
[Pasasalamat para sa pinagkuanan kan retrato sa pahina 3]
Yunhap News Agency/Sipa Press